ထိုင်း

September 21, 2021

ဆူဇူကီးဖလားတွင် ထိုင်း၊ ဖိလစ်ပိုင်၊ စင်ကာပူအသင်းများနှင့် မြန်မာ တွေ့ဆုံ

အာဆီယံဆူဇူကီးဖလားအုပ်စုခွဲဝေမှုကို ဒီကနေ့ နေ့လယ်ပိုင်းက ပြုလုပ်ခဲ့ရာမှာ မြန်မာအသင်းက ထိုင်း၊ ဖိလစ်ပိုင်၊ စင်ကာပူ နဲ့ ခြေစစ်ပွဲအဆင့်မှာ အနိုင်ရတဲ့အသင်းနဲ့ အုပ်စု A မှာ ကျရောက်ခဲ့ပါတယ်။ 

ခြေစစ်ပွဲအဆင့်မှာ အရှေ့တီမောနဲ့ ဘရူနိုင်းတို့ ယှဉ်ပြိုင်ရမှာ ဖြစ်ပါတယ်။ 

တခြားအုပ်စု B မှာ ဗီယက်နမ်၊ မလေးရှား၊ အင်ဒိုနီးရှား၊ ကမ္ဘောဒီးယားနဲ့ လာအိုအသင်းတို့ အတူတွေ့ဆုံခဲ့ပါတယ်။

အာဆီယံချန်ပီယံရှစ်ပွဲစဉ်တွေကို လာမယ့် ဒီဇင်ဘာ ၅ ရက်ကနေ ဇန်နဝါရီ ၁ ရက်အထိ ယှဉ်ပြိုင်သွားမှာပါ။ 

အိမ်ရှင်နိုင်ငံ ၁ နိုင်ငံ ဒါမှမဟုတ် ၂ နိုင်ငံ ကျင်းပမှာဖြစ်ပြီး ကမ္ဘောဒီးယား၊ အင်ဒိုနီးရှား၊ စင်ကာပူ၊ ထိုင်းနဲ့ ဗီယက်နမ်နိုင်ငံတွေက အိမ်ရှင်အဖြစ်ကျင်းပဖို့ စိတ်ဝင်စားနေတယ်လို့ သိရပါတယ်။ 

မြန်မာအသင်းဟာ  အာဆီယံဖလား သမိုင်းတလျှောက် ထိုင်းအသင်းပါတဲ့ အုပ်စုမှာ (၂၀၁၄၊ ၂၀၁၂၊ ၂၀၀၇၊ ၂၀၀၄၊ ၂၀၀၀၊ ၁၉၉၈) ၆ ကြိမ်အထိ အတူတွေ့ဆုံဖူးပြီး နိုင်ပွဲရယူနိုင်ခြင်း မရှိသေးပါဘူး။

16 hours Ago

September 20, 2021

မြန်မာလုပ်သားများ ထိုင်းသို့ MOU စနစ်ဖြင့် ပြန်လွှတ်ရန် အဆင်သင့်မရှိသေး

ထိုင်းနိုင်ငံက MOU စနစ်နဲ့ နိုင်ငံခြားသားလုပ်သားတွေကို ပြန်လည်ခေါ်ယူမယ်လို့ ထုတ်ပြန်ထားပေမယ့် မြန်မာနိုင်ငံဘက်က  အလုပ်သမားစေလွှတ်ရေးအဆင်သင့်ရှိ မနေသေးဘူးလို့ ပြည်ပအလုပ်အကိုင်အေဂျင်စီလုပ်ငန်းရှင်တချို့က ပြောပါတယ်။ 

အာဏာသိမ်းစစ်ကောင်စီက ပြည်ပသို့အလုပ်သမားစေလွှတ်ရေးနဲ့ ပတ်သက်ကြီး ဘာညွှန်ကြားချက်မှ ထုတ်ပြန်ထားခြင်းမရှိသေးလို့ မြန်မာအလုပ်သမားတွေထံ စေလွှတ်ဖို့ လမ်းစမမြင်သေးဘူးလို့ လည်း ဆိုပါတယ်။

“နယ်တွေက သွားလာမှု ကန့်သတ်ထားတာတွေ၊ မတည်ငြိမ်တာတွေ ဖြစ်နေတော့ လွှတ်ဖို့က မလွယ်ဘူး။ လုံခြုံရေးအကြောင်းပြချက်တွေရှိနေတော့ မဖြစ်နိုင်သေးဘူးလို့” ပြည်ပအလုပ်အကိုင်အေဂျင်စီ လုပ်ငန်းရှင်တစ်ဦးက ပြောပါတယ်။ 

ထိုင်းနိုင်ငံက မကြာခင် MOU စနစ်နဲ့ နိုင်ငံခြားသားအလုပ်သမား ၄ သိန်းလောက်ခေါ်ယူဖို့ ပြင်ဆင်နေတာပါ။ လာရောက်လုပ်ကိုင်မယ့်အလုပ်သမားတွေဟာ ကိုဗစ်ကာကွယ်ဆေးထိုးထားသူ ဖြစ်ဖို့ လိုအပ်ပြီး ဆေးထိုးစရိတ်ကိုအလုပ်ရှင်ကကျခံရမယ်လို့ ထိုင်းလုပ်သမားရေးရာဌာနက ထုတ်ပြန်ထားပါတယ်။ 

မြန်မာနိုင်ငံအနေနဲ့ ပြည်တွင်းမှာ ကိုဗစ်-၁၉ ရောဂါ စတင်တွေ့ရှိတဲ့ ၂၀၂၀ မတ်လကစလို့ ပြည်ပအလုပ်သမားစေလွှတ်မှု ရပ်နားခဲ့ပါတယ်။ 

ထိုင်းနိုင်ငံကို သွားရောက်လုပ်ကိုင်ဖို့ပြင်ဆင်ထားတဲ့ အလုပ်သမားဦးရေသိန်းနဲ့ချီရှိနေပြီး ဒီနေ့အချိန်အထိ သွားရောက်ခွင့်ရဖို့စောင့်ဆိုင်းနေကြရပါတယ်။ ဒါပေမဲ့ တရားမဝင် နယ်စပ်ဖြတ်ကျော် ပြီး ထိုင်းနိုင်ငံကို သွားရောက်သူတွေလည်း အများအပြားရှိနေပြီး ဖမ်းဆီးခံရတာတွေလည်း မကြာခဏရှိနေပါတယ်။ 

ထိုင်းနိုင်ငံဟာ မြန်မာအလုပ်သမားအများဆုံး သွားရောက်လုပ်ကိုင်တဲ့ နိုင်ငံတခုဖြစ်ပြီး အလုပ်စေလွှတ်မှု မရပ်ဆိုင်းခင်က တစ်လမှာ MOU စနစ်နဲ့ တရားဝင်သွားရောက်လုပ်ကိုင်သူ ဦးရေ နှစ်သောင်းလောက် ရှိခဲ့ပါတယ်။

2 days Ago

ထိုင်းတွင် တရက်တည်း ကိုဗစ်ပိုးတွေ့လူနာ ၁၂,၀၀၀ ကျော်၊ ကူးစက်ခံရသူ ၁ သန်းခွဲနီးပါးရှိလာ

ကိုဗစ်-၁၉ တတိယလှိုင်း ကူးစက်မှုတွေ မြင့်တက်နေတဲ့ ထိုင်းနိုင်ငံမှာ တရက်တည်း ပိုး တွေ့လူနာသစ် ၁၂,၀၀၀ ကျော်နဲ့ ကူးစက်ခံရသူ စုစုပေါင်း ၁ သန်းခွဲ နီးပါးရှိလာခဲ့ပြီလို့ ထိုင်းပြည်သူ့ကျန်းမာရေးဝန်ကြီးဌာနက ထုတ်ပြန်ပါတယ်။

ကူးစက်မှုအသစ်တွေထဲမှာတော့ နိုင်ငံတဝန်း အကျဉ်းထောင်တွေက ၈၅၈ ယောက် ပါဝင်တယ်လို့ ဆိုပါတယ်။

ပြီးခဲ့တဲ့ ၂၄ နာရီအတွင်း သေဆုံးသူအသစ်ကတော့ ၁၀၆ ယောက်ရှိခဲ့ပြီး ရောဂါပြန်လည် ပျောက်ကင်းလာတဲ့အတွက် ဆေးရုံက ဆင်းခွင့်ရသူအရေအတွက်ကတော့ ၁၁,၁၂၅ ယောက် ရှိနေခဲ့တာပါ။

လက်ရှိအချိန်ထိ ထိုင်းနိုင်ငံတဝန်း ကိုဗစ်-၁၉ ရောဂါကူးစက်ခံရသူ စုစုပေါင်းကတော့ ၁ ဒသမ ၄၈ သန်းကျော်ရှိလာခဲ့ပြီး သေဆုံးသူ စုစုပေါင်း ၁၅,၄၆၉ ယောက်ရှိလာခဲ့ပြီ ဖြစ်ပါတယ်။

အာဆီယံနိုင်ငံတွေထဲမှာတော့ ကိုဗစ်-၁၉ သန်းချီကူးစက်ခံ အင်ဒိုနီးရှား၊ ဖိလစ်ပိုင်၊ မလေး ရှားနိုင်ငံတွေပြီးရင် ထိုင်းနိုင်ငံကတော့ ကူးစက်မှုအမြင့်ဆုံးအမှတ်စဉ် ၄ နေရာမှာ ရှိနေပါတယ်။

ကမ္ဘာတဝန်းမှာတော့ လက်ရှိအချိန်ထိ ရောဂါကူးစက်ခံရသူပေါင်း ၂၂၉ ဒသမ ၂၉ သန်းကျော်၊ သေဆုံးသူ ၄ ဒသမ ၇ သန်းကျော်နဲ့ ရောဂါပြန်လည်ပျောက်ကင်းသက်သာလာသူ ပေါင်း ၂၀၅ ဒသမ ၉၂ သန်းကျော် ရှိနေတာ ဖြစ်ပါတယ်။

2 days Ago
More News
Up