ထိုင်ဝမ်

June 22, 2021

တရုတ်အချုပ်အခြာအဖြစ် ကြေညာသည့်အပေါ် ဟောင်ကောင်ကို ထိုင်ဝမ်က ပြစ်တင်

ထိုင်ဝမ်ကျွန်းကို တရုတ်အချုပ်အခြာအဖြစ် အခိုင်အမာ ကြေညာကြောင်း ထောက်ခံတဲ့စာကို လက်မှတ်ထိုးခိုင်းခဲ့တာနဲ့ပတ်သက်ပြီး ထိုင်ဝမ်အစိုးရက ဟောင်ကောင်ကို ဇွန် ၂၁ ရက်မှာ ပြစ်တင် ဝေဖန်လိုက်ပါတယ်။

ဟောင်ကောင်မှာရှိတဲ့ ထိုင်ဝမ် ကိုယ်စားလှယ်ရုံးက အရာရှိတွေကို ပြန်ခေါ်ထုတ်ရတဲ့အထိ ဖြစ်ခဲ့တာပါ။

ထိုင်ဝမ်ကို တရုတ်က ပိုင်တယ်ဆိုတဲ့ အခိုင်အမာ ကြေညာချက်ကို ထောက်ခံတဲ့ စာရွက်စာတမ်းမှာ သူ့အရာရှိတွေ လက်မှတ်ထိုးပေးဖို့ ဟောင်ကောင်အစိုးရက တောင်းဆိုခဲ့ပါတယ်။

အဲဒီနောက် ဟောင်ကောင်မှာရှိတဲ့ ထိုင်ဝမ် ကိုယ်စားလှယ်ရုံးက ထိုင်ဝမ် ဝန်ထမ်းတွေဟာ ဇွန် ၂၀ ရက်ကစပြီး ဟောင်ကောင်ကနေ ထွက်လာခဲ့ကြပါတယ်။

ထိုင်ဝမ်ရဲ့ တရုတ်ပြည်မကြီးရေးရာကောင်စီ အကြီးအကဲက “ဟောင်ကောင် အုပ်ချုပ်ရေးအဖွဲ့ရဲ့ ရည်မှန်းချက်က တရုတ် တနိုင်ငံတည်းမူဝါဒ ကတိစာကနေတဆင့် နိုင်ငံရေးအခက်အခဲတွေကို အကွက်ဆင်ဖို့ ဖြစ်တယ်။ ဒီစာဟာ ကျနော်တို့ရဲ့ အမျိုးသားဂုဏ်သိက္ခာကို မှေးမှိန်စေဖို့နဲ့ ကျနော်တို့ရဲ့ ဝန်ထမ်းတွေကို ပေကျင်း အာဏာပိုင်တွေဆီ ဦးညွှတ်ခိုင်းဖို့ပဲ”လို့  သတင်းထောက်တွေကို ပြောပါတယ်။

2 days Ago

June 6, 2021

အမေရိကန်က ထိုင်ဝမ်ကို ကိုဗစ်-၁၉ ကာကွယ်ဆေး ထိုးဆေးအလုံးရေ ၇ သိန်းခွဲလှူမည်

ထိုင်ဝမ်ကို ကိုဗစ်-၁၉ ကာကွယ်ဆေး ထိုးဆေး အလုံးရေ ၇ သိန်းခွဲ လှူဒါန်းဖို့ အစီအစဉ်အတွက် ထိုင်ဝမ်သမ္မတ ချိုင်အင်းဝမ်ဟာ အမေရိကန် အစိုးရကို ကျေးဇူးတင်ကြောင်း ဇွန် ၆ ရက်မှာ ပြောပါတယ်။

အမေရိကန် အထက်လွှတ်တော်အမတ် တမ်မီ ဒါ့ခ်ဝါ့သ်၊ ဒန်ဆူလေဗန်နဲ့ ခရစ္စတိုဖာ ကွန်းစ်တို့ ထိုင်ဝမ်သမ္မတ ချိုင်အင်းဝမ်နဲ့ လေဆိပ်မှာ တွေ့ဆုံချိန်မှာ ခုလို ပြောလိုက်တာပါ။ 

ဒါဟာ အမေရိကန်ရဲ့ တကမ္ဘာလုံးနဲ့ ထိုးဆေးမျှဝေရေးအစီအစဉ် အစိတ်အပိုင်းလည်းဖြစ်ပြီး ကာကွယ်ဆေး ထိုးပေးဖို့ အများကြီး လိုအပ်နေတဲ့ ထိုင်ဝမ်ကျွန်းအတွက် ကပ်ရောဂါ တိုက်ဖျက်ရေး အားပေးဖို့ ကမ်းလှမ်းခဲ့တာလည်း ဖြစ်ပါတယ်။

ထိုင်ဝမ်မှာ လူဦးရေ ၂၃ ဒသမ ၅ ရာခိုင်နှုန်းရှိပြီး ကိုဗစ်-၁၉ ကပ်ရောဂါ ကာကွယ်ဆေး ထိုးပြီးသူဟာ လူဦးရေရဲ့ ၃ ရာခိုင်နှုန်းသာ ရှိပါသေးတယ်။ အများစုကလည်း ထိုးဆေး ၂ လုံးမှာ ပထမတလုံးကိုသာ ထိုးရသေးတာဖြစ်ပြီး ပြည်တွင်းကူးစက်မှုကိုလည်း ရင်ဆိုင်နေရပါတယ်။

ကိုယ်တိုင်အုပ်ချုပ်တဲ့ ထိုင်ဝမ်ကို နိုင်ငံတကာက ကာကွယ်ဆေး မရောင်းပေးဖို့ တရုတ်အစိုးရက ပိတ်ဆို့နိုင်ရေး ကြိုးစားနေတယ်လို့ ထိုင်ဝမ်က အခိုင်အမာပြောထားပြီး တရုတ်ကတော့ ထိုင်ဝမ်ရဲ့ စွဲချက်ကို ငြင်းထားပါတယ်။

တရုတ်ဟာ ထိုင်ဝမ်ကို တရုတ်ပိုင် သင်းကွဲပြည်နယ်အဖြစ် ရှုမြင်ထားပြီး စစ်ရေးနဲ့ ပြန်သိမ်းပိုက်တာကိုတော့ မလုပ်ခဲ့ဖူးသေးပါဘူး။

2 weeks Ago
More News
Up