ထိုင်းဘတ်

May 17, 2018

မြန်မာအမျိုးသမီးတဦးထံမှ ထိုင်းဘတ် ၉ သန်းနှင့် ရွှေ ၇၀ ကျပ်သား သိမ်းဆည်းရမိ

ထိုင်း-မြန်မာနယ်စပ်မှာ ထိုင်းအာဏာပိုင်တွေက ငွေမည်းခဝါချမှု နှိမ်နင်းရာကနေ မြန်မာအမျိုးသမီးတဦးဆီက ထိုင်းဘတ်ငွေ ၉ သန်းနဲ့  ရွှေအလေးချိန် ၇၀ ကျပ်သားလောက် သိမ်းဆည်းရမိပါတယ်။ အခုရက်ပိုင်းအတွင်း ထိုင်းနိုင်ငံ ရာဇဝတ်မှု နှိမ်နင်းရေး၊ ငွေမည်းခဝါချမှု နှိမ်နင်းရေး၊ လာဘ်စားမှု တိုက်ဖျက်ရေး၊ မူးယစ်ဆေးဝါး နှိမ်နင်းရေး၊ အကောက်ခွန်ဌာန အစရှိတဲ့ အဖွဲ့တွေ ပူးပေါင်းပြီး ငွေမည်းခဝါချမှု နှိမ်နင်းရေးစီမံချက် ဆောင်ရွက်နေရာမှာ ထိုင်း-မြန်မာနယ်စပ် မဲဆောက်နဲ့ မယ်ဆိုင်မြို့က ရွှေဆိုင်အချို့နဲ့ ငွေလွှဲလုပ်ငန်း လုပ်ကိုင်သူတွေ ဖမ်းဆီးခံထားရပါတယ်။ မေလ ၁၄ ရက်နဲ့ ၁၅ ရက်တွေက မဲဆောက်မြို့ရှိ သံသယဖြစ်ဖွယ် ရွှေဆိုင်၊ ကျောက်မျက်ရတနာဆိုင်နဲ့ အရက်ဆိုင်တွေကို ဝင်ရောက်စစ်ဆေးရာမှာ စာသင်ကျောင်းဘေးရှိ အရက်ဆိုင်တဆိုင်ကနေ ဘတ်ငွေပေါင်း ၉ သန်းနဲ့ ရွှေအလေးချိန် ၇၀ ကျပ်သားခန့်ကို ဖမ်းဆီးရမိတယ်လို့ တာဝန်ရှိသူတွေရဲ့ အပြောကို ကိုးကားပြီး ထိုင်းရတ်သတင်းမှာ ဖော်ပြပါတယ်။ အဆိုပါ အရက်ဆိုင်ထဲမှာ အသက် ၅၉ နှစ်ရွယ် ဒေါ်ဌေးဆိုသူ မြန်မာအမျိုးသမီးတဦးနဲ့ မိသားစုဝင်လေးဦးနေထိုင်ပြီး သမီးဖြစ်သူရဲ့ အိပ်ခန်းထဲရှိ မီးခံသေတ္တာက  ဘတ်ငွေနဲ့ ရွှေထည်တွေ ဖမ်းမိခဲ့တာဖြစ်ကြောင်း၊ ဒီအရက်ဆိုင်ဟာ မူးယစ်ဆေးဝါး ရောင်းချငွေတွေကို ခဝါချပေးနေတယ်ဆိုတဲ့ ကြိုတင်သတင်းရထားချက်အရ ဝင်ရောက်စစ်ဆေးခဲ့တာလို့ ထိုင်းရာဇဝတ်မှု နှိမ်နင်းရေးရဲတပ်ဖွဲ့မှ ဒုရဲမှူးချုပ် ဆုမ်မိုင် ကောင်ဝိဆိုင်ဆုခ်က ဒီနေ့မနက် သတင်းစာရှင်းလင်းပွဲမှာ ပြောပါတယ်။ ဒါ့အပြင် ပြီးခဲ့တဲ့ မေ ၁၄ ရက်က ချင်းရိုင်းခရိုင် ဝိန်းပါပေါက်မြို့နယ်ထဲမှာ မူးယစ်ကုန်သည် နှစ်ဦးဆီကနေ စိတ်ကြွဆေး အလုံးပေါင်း ၅ သန်း၊ ဘိန်းဖြူ ၇၆ ကီလိုဂရမ် ဖမ်းမိတာနဲ့ပတ်သက်ပြီး မဲဆောက်က ရွှေဆိုင်တချို့ကို ဝင်ရောက်စစ်ဆေးခဲ့ကြောင်း၊ အထူးသဖြင့် ပရဆတ်ဝိထီ လမ်းမပေါ်ရှိ ၀ီရိယရွှေဆိုင်ဟာ အဆိုပါ မူးယစ်ဆေးဂိုဏ်းရဲ့ ငွေတွေကို လက်ခံလွှဲပြောင်းပေးနေတယ်လို့ စုံစမ်းသိရှိရကြောင်း၊ စစ်ဆေးတဲ့အခါ ရောင်းချဖို့ သိုလှောင်ထားတဲ့ ရွှေချောင်းတွေ အသွင်ပြောင်းခဲ့ကြောင်း၊ ဒါပေမယ့် တကယ်ရောင်းချခွင့် အခွန်ဆောင်ထားတဲ့ ရွှေပမာဏနဲ့ ကိုက်ညီမှုမရှိလို့ စာရွက်စာတမ်းတွေ သိမ်းဆည်းထားပြီး ဆက်လက်စစ်ဆေးသွားမယ်လို့ ဆိုပါတယ်။ ချင်းရိုင်းခရိုင် မယ်ဆိုင်မြို့မှာလည်း မေ ၁ ရက်မှ ၁၅ ရက်အတွင်း ဘတ်သန်းပေါင်း ၂၀၀၀ကျော် တန်ဖိုးရှိ စိတ်ကြွဆေးပြား၊ ဘိန်းဖြူနဲ့ အိုက်စ်မူးယစ်ဆေးတွေ ဖမ်းဆီးရမိခဲ့ပြီး ငွေဖြူ ငွေမည်း ခဝါချသူ အမျိုးသမီး လေးဦး နဲ့ မြန်မာအမျိုးသား တဦးကို ဖမ်းဆီးရမိခဲ့တယ်လို့ ဆိုပါတယ်။ အဆိုပါအမျိုးသမီးတွေဟာ ထိုင်းဘဏ်ကနေ နေ့စဉ် ငွေဘတ်သန်းနဲ့ချီ ထုတ်ယူတာ စစ်ဆေးတွေ့ရှိရကြောင်း၊ သူတို့ထဲက နန်းဆောင်ဟွမ်နွန်း ဆိုသူ ဖွင့်ဟဝန်ခံချက်အရ သူတို့ဟာ ထိုင်းဘက်ခြမ်း မူးယစ်ကုန်သည်တွေဆီက ငွေတွေလက်ခံပြီး မြန်မာဘက်ခြမ်း တာချီလိတ်ကို အငှားဆိုင်ကယ်နဲ့ ပို့သလို မယ်ဆိုင်ဘက် ကျောင်းလာတက်တဲ့ ကျောင်းသူ ကျောင်းသားတို့ရဲ့ ကျောပိုးအိတ်ထဲကိုလည်း ခိုးထည့်ပြီး သယ်ဆောင်ခဲ့ကြောင်း၊ တကြိမ်ကို ငွေ ဘတ် ၁ သန်း ပို့ဆောင်ပေးပြီး ပို့ခအတွက် တကြိမ် ဘတ် ၁ သောင်းရတယ်လို့ ဆိုပါတယ်။  ၅ လအတွင်း သူတို့ဘဏ်စာရင်းထဲမှာ လည်ပတ်ငွေပေါင်း ဘတ်သန်းပေါင်း ၂၀၀ ကျော် ရှိတယ်လို့ ဆိုပါတယ်။ မြန်မာနိုင်ငံသားတဦးဖြစ်သူ စိုင်းထက်မင်း (၁၉-နှစ်) ကတော့ မယ်ဆိုင်မှာ နေထိုင်တဲ့ နန်းဖိန်းဆီက ဘဏ်ကထုတ်ပေးထားတဲ့ငွေ လာရောက်ယူဆောင်စဉ် နန်းဖိန်းဆီနဲ့အတူ ဖမ်းဆီးခံရပါတယ်။ နန်းဖိန်းဆီဟာ မူးယစ်ကုန်သည်တွေနဲ့ ငွေလွှဲမှု အဆက်အသွယ်ရှိပြီး သူမ ဘဏ်စာရင်းထဲမှာ ဘတ်ငွေ ၃ ဒသမ ၇ သန်း ရှိကြောင်း စစ်ဆေးတွေ့ရှိရတယ်လို့ မူးယစ်ရဲအရာရှိရဲ့ အပြောကို ကိုးကားပြီး ထိုင်းရတ်သတင်းမှာ ဖော်ပြပါတယ်။  
4 years Ago
Up