ထိုင်းနယ်စပ်

May 24, 2019

ထိုင်းနယ်စပ်က ဒုက္ခသည်များနေရပ်ပြန်ရေး ဒေါ်အောင်ဆန်းစုကြည်နှင့် UNHCR မဟာမင်းကြီး ဆွေးနွေး

ထိုင်း-မြန်မာနယ်စပ်က ဒုက္ခသည်တွေ နေရပ်ပြန်ရေးကိစ္စ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ကုလသမဂ္ဂ ဒုက္ခသည်များဆိုင်ရာ မဟာမင်းကြီး ဖိလစ်ပိုဂရန်ဒီတို့ မနေ့က နေပြည်တော်မှာ တွေ့ဆုံဆွေးနွေးခဲ့ကြပါတယ်။ မြန်မာနိုင်ငံအစိုးရ၊ ကုလသမဂ္ဂဖွံ့ဖြိုးမှုအစီအစဉ် (UNDP)နဲ့ ကုလသမဂ္ဂဒုက္ခသည်များ ဆိုင်ရာမဟာမင်းကြီးရုံး (UNHCR) တို့အကြား ၂၀၁၈ခုနှစ် ဇွန် ၆ ရက်က သဘောတူ လက်မှတ်ရေးထိုးခဲ့တဲ့ နားလည်မှုစာချွန်လွှာ သက်တမ်းတိုးမြှင့်ရေးကိစ္စ ဆွေးနွေးခဲ့ကြတယ်လို့ အတိုင်ပင်ခံရုံးက သတင်းထုတ်ပါတယ်။ နားလည်မှုစာချွန်လွှာအရ အသိုက်အဝန်းအခြေပြု စီမံကိန်းလုပ်ငန်းတွေ အကောင် အထည်ဖော်ဆောင်ရွက်နေမှုအခြေအနေတွေ၊ ထိုင်း-မြန်မာနယ်စပ်ရှိ ယာယီစခန်းတွေမှာ နေထိုင်နေတဲ့ ဆန္ဒအလျောက် နေရပ်ပြန်လိုတဲ့ မြန်မာနိုင်ငံသားတွေကိစ္စ၊ မြန်မာအစိုးရက ဆောင်ရွက်နေတဲ့ ငြိမ်းချမ်းရေးနဲ့ ဖွံ့ဖြိုးတိုးတက်ရေး လုပ်ငန်းတွေကို UNHCR က ကူညီပံ့ပိုး ပေးနိုင်မယ့် ကိစ္စတွေ ဆွေးနွေးခဲ့ကြတယ်လို့ ဆိုပါတယ်။ လွန်ခဲ့တဲ့ နှစ်ပေါင်း ၃၀ လောက်ကစပြီး  မြန်မာပြည်တွင်း နိုင်ငံရေး မတည်ငြိမ်မှုနဲ့ တပ်မတော်က တိုင်းရင်းသား လက်နက်ကိုင်တပ်ဖွဲ့တွေအပေါ် ဖြတ်လေးဖြတ် စစ်ဆင်ရေးတွေကြောင့် မြန်မာပြည်သူ သိန်းနဲ့ချီ ထိုင်း-မြန်မာနယ်စပ် ဒုက္ခသည်စခန်းတွေဆီမှာ ခိုလှုံနေခဲ့ကြရတာပါ။ ထိုင်း-မြန်မာနယ်စပ် တာ့ခ်ခရိုင်၊ ကန်ကျနပူရီ၊ ရာ့ခ်ျပူရီနဲ့ မယ်ဟောင်ဆောင်ခရိုင်တွေမှာ ဒုက္ခသည်စခန်း စုစုပေါင်း ၉ ခုဖွင့်လှစ်ထားပြီး လူပေါင်းတသိန်းကျော် ခိုလှုံနေကြဆဲဖြစ်ပါတယ်။ ၂၀၁၆ ခုနှစ် အောက်တိုဘာလမှာ ထိုင်းနဲ့ မြန်မာအစိုးရတို့ရဲ့ အစီအစဉ်နဲ့   နို့ဖိုးဒုက္ခ သည်စခန်းကဒုက္ခသည်တချို့ ပထမဆုံးအကြိမ် ဆန္ဒအလျောက် တရားဝင်နေရပ်ပြန်နိုင်ခဲ့ပြီး လက်ရှိအချိန်အထိ အနည်းဆုံး ၃ ကြိမ် ဒုက္ခသည်တွေ တရားဝင် နေရပ်ပြန်ပို့နိုင်ခဲ့ပါတယ်။ ကုလသမဂ္ဂ ဒုက္ခသည်များဆိုင်ရာ မဟာမင်းကြီး ဖိလစ်ပိုဂရန်ဒီ ခေါင်းဆောင်တဲ့ ကိုယ်စားလှယ်အဖွဲ့ဟာ ရခိုင်ပြည်နယ်ထဲက ဒုက္ခသည်စခန်းတွေကို သွားရောက်ပြီးနောက် နိုင်ငံတော် အတိုင်ပင်ခံပုဂ္ဂိုလ်နဲ့ တွေ့ဆုံခဲ့တာဖြစ်ပါတယ်။ ခရီးစဉ်အတွင်း လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေး ဝန်ကြီးဌာန၊ ဘေးအန္တရာယ် ဆိုင်ရာစီမံခန့်ခွဲမှု ဦးစီးဌာနနဲ့ UNHCR တို့အကြား နားလည်မှုစာချွန်လွှာ အမ်အိုယူ လက်မှတ်ရေးထိုးခဲ့ပါတယ်။ ဓာတ်ပုံ- အတိုင်ပင်ခံရုံး
3 years Ago

January 24, 2016

ထိုင်းနယ်စပ် မြို့နယ်များကို ရေဖြန့်ဝေပေးရန် သောင်းရင်းမြစ်ရေ စုပ်ယူရေး မြန်မာ ကန့်ကွက်

ထိုင်း-မြန်မာ နယ်စပ် မဲဆောက်မြို့နဲ့ အနီးအနားမြို့နယ်တွေကို ရေဖြန့်ဝေပေးဖို့ သောင်းရင်းမြစ်ထဲက ရေစုပ်ယူရေးမှာ မြန်မာဘက်က ကန့်ကွက်တာကြောင့် ထိုင်းအစိုးရ အခက်အခဲနဲ့ ရင်ဆိုင်နေရပါတယ်။ သောင်းရင်းမြစ်ရေ ခန်းခြောက်လာမှုကြောင့် ရေပိုက်ခေါင်းတွေထဲမှာ ပိတ်ဆို့နေတဲ့ သဲတွေကို ထိုင်းအစိုးရက ဖယ်ရှားဖို့ပြုလုပ်မှာကို မြန်မာတာဝန်ရှိသူတွေက ကန့်ကွက်ထားတယ်လို့ ထိုင်းအင်းနယူး အင်တာနက် စာမျက်နှာမှာ ဇန်န၀ါရီလ ၂၃ ရက်နေ့က ဖော်ပြထားပါတယ်။ ‘ရေပိုက်ခေါင်းထဲမှာ ပိတ်ဆို့နေတဲ့ သဲတွေကို ဖယ်ထုတ်ဖို့ မြန်မာ အစိုးရက တားမြစ်ထားတဲ့ အတွက် ရေစုပ်ယူဖို့ အခက်အခဲဖြစ်နေတယ်”လို့ တော့ခ် ခရိုင်အတွင်း အစိုးရ ရေဖြန့်ဝေပေးနေတဲ့ တာဝန်ရှိသူ စူဆက်က ဆိုပါတယ်။ အင်းနယူးသတင်းအရ သဲတွေကို ဖယ်ရှားလိုက်ရင် ရေလမ်းကြောင်း ပြောင်းလဲသွားနိုင်တဲ့ အတွက် မြန်မာ အစိုးရက ခွင့်မပြုတာ ဖြစ်ပါတယ်။ ဒီကိစ္စနဲ့ ပတ်သက်ပြီး သောင်းရင်းမြစ်ထဲက ရေရယူနိုင်ဖို့ တော့ခ် ခရိုင် အုပ်ချုပ်ရေးမှူးမှ တဆင့် မြ၀တီမြို့နယ် အုပ်ချုပ်ရေးမှူး ဦးလွင်ကိုဦးနဲ့ ဆွေးနွေးသွားမယ်လို့ ထိုင်းသတင်းက ဆိုပါတယ်။ ထိုင်းအစိုးရက သောင်းရင်းမြစ်ထဲကရေကို ပိုက်ခေါင်းအကြီးတွေနဲ့ စုပ်ယူပြီး ပြန်လည် သန့်စင်ကာ တော့ခ်ခရိုင် အတွင်းရှိ မဲဆောက်မြို့နဲ့ အနီးအနား မြို့နယ်တွေကို ဖြန့်ဝေပေးနေတာ ဖြစ်ပါတယ်။ လွန်ခဲ့တဲ့ ၂၀၁၀ တုန်းက သောင်းရင်းမြစ် ကမ်းပါးတလျှောက် ထိုင်းဘက်ခြမ်းက ကမ်းထိန်းတမံတွေ ဆောက်လုပ်မှုကြောင့် မြန်မာအစိုးရက ကန့်ကွက်ပြီး နှစ်နိုင်ငံ ချစ်ကြည်ရေး တံတားကိုပိတ်ခဲ့ဖူးပါတယ်။ ကိုးကား - သတင်းနှင့်ဓာတ်ပုံ - innnews  
6 years Ago
Up