ထိုင်းစစ်တပ်နှင့် မူးယစ်ကုန်သည်အဖွဲ့ ပစ်ခတ်မှုဖြစ်

November 28, 2018

ထိုင်းစစ်တပ်နှင့် မူးယစ်မှောင်ခိုအဖွဲ့ ပစ်ခတ်မှုဖြစ်ပြီး  ၁ ဦးသေ၊ စိတ်ကြွဆေး ၁ သိန်းဖမ်းမိ

ထိုင်း-မြန်မာနယ်စပ်မှာ ပြီးခဲ့တဲ့ရက်ပိုင်းက ထိုင်းစစ်တပ်နဲ့ မူးယစ်မှောင်ခိုသမားတွေ ပစ်ခတ်မှုဖြစ်ပြီး ၅ ဦးသေဆုံးခဲ့တဲ့နောက် မနေ့ညကလည်း  ပစ်ခတ်မှု ထပ်ဖြစ်ပွားကာ မူးယစ် အဖွဲ့ဝင် ၁ ဦးသေဆုံးပြီး စိတ်ကြွဆေးပြား ၁ သိန်းနဲ့ ဘိန်းဖြူတွေ ဖမ်းမိတယ်လို့ ချင်းမိုင်နယူးစ်သတင်းမှာ ဖော်ပြပါတယ်။ ချင်းမိုင်ခရိုင်၊ မဲ့အိုင်းမြို့နယ်၊ ထာ့ဒွန်းအုပ်စုထဲမှာ မူးယစ်ဆေးဝါးသယ် ဆောင် ဖြတ်သန်းလာဖို့ရှိကြောင်း ကြိုတင်သတင်းရရှိတဲ့အတွက် အမှတ် ၃ ကွန်မန်ဒိုတပ်နဲ့ နယ်ခြားစောင့်တပ်ဖွဲ့ဝင်တွေဟာ  နယ်မြေထဲမှာ စောင့်ကြပ်စစ်ဆေးနေခဲ့တာပါ။ ည ၇ နာရီ ၁၅ မိနစ်လောက်မှာ မြန်မာနယ်စပ်နဲ့ ၂ ကီလိုလောက်အကွာ ဆန်တွန့်ဒုတ် လားဟူရွာ အနီးတောထဲမှာ ကျောပိုးအိတ်တွေနဲ့ ဖြတ်လျှောက်လာသူ ၅ ယောက်ကို တာဝန်ရှိသူတွေက ရပ်ဖို့အမိန့်ပေးရာမှာ သေနတ်တွေနဲ့ ပြန်လည်ပစ်ခတ်လို့ မိနစ် ၂၀ လောက် အပြန်အလှန်ပစ်ခတ်မှုဖြစ်ခဲ့တယ်လို့ အမှတ် ၃ ဒေသ တိုင်းစစ်ဌာနချုပ်မှ ဗိုလ်မှူးကြီး ဧက၀ုဒ် ဆွတ်လုတ်က သတင်းထောက်တွေကို ပြောပါတယ်။ ဒါပေမယ့် အမှောင်ထဲမှာမို့ နယ်မြေရှင်းလင်းရေးကို ချက်ချင်းမလုပ်နိုင်သေးဘဲ ဒီကနေ့မနက် ၀င်ရောက်စစ်ဆေးရာမှာတော့ အလောင်း ၁ လောင်းနဲ့ စိတ်ကြွဆေးတွေပါတဲ့ အိတ် ၁ လုံး၊ ဟီးရိုးအင်းပါ အထုတ် ၂ ထုတ်ကို တွေ့ရှိခဲ့ပါတယ်။ အဆိုပါအိတ်ထဲမှာ စိတ်ကြွဆေးပြား ၁ သိန်းပါရှိပြီး အထုတ် ၂ ထုတ်ပေါင်းက ဘိန်းဖြူ အလေးချိန် ၁ ကီလိုရှိကာ  နောက်ထပ်ကွင်းဆက်တွေလည်း ဆက်လက်စုံစမ်း စစ်ဆေးနေတယ် လို့ ဗိုလ်မှူးကြီး ဧက၀ုဒ်က ပြောပါတယ်။ နိုဝင်ဘာ ၂၅ ရက်ကလည်း ချင်းရိုင်းခရိုင်၊ မယ်ဆိုင်မြို့၊ ဒွိုင်နန်းနွန်းကျောက်ဂူကြီးအနီး ဒွိုင်ဖာမီတောင်ကြောမှာ ထိုင်းစစ်တပ်နဲ့ မူးယစ်ဆေးသယ်ဆောင်သူတွေ ပစ်ခတ်မှုဖြစ်ပွားပြီး မူးယစ်မှောင်ခိုသမား ၅ ဦးသေဆုံးကာ စိတ်ကြွဆေးပြား ၁ သန်း ဖမ်းဆီးရမိခဲ့ပါတယ်။
3 years Ago

July 2, 2015

ထိုင်းစစ်တပ်နှင့် မူးယစ်ကုန်သည်အဖွဲ့ ပစ်ခတ်မှုဖြစ်

ထိုင်းနိုင်ငံမြောက်ပိုင်း ချင်းရိုင်းခရိုင်က မြန်မာနယ်စပ်တနေရာမှာ ထိုင်းစစ်တပ်နဲ့ မူးယစ်ဆေး ၀ါးကုန်သည်တွေကြား ထိတွေ့ပစ်ခတ်မှုဖြစ်ပွားပြီး စစ်တပ်ဘက်က စိတ်ကြွဆေး ၁ သိန်း သိမ်းဆည်းရမိခဲ့ပါတယ်။ ချင်းရိုင်းခရိုင် မယ်ဖာ့လုန်မြို့နယ် ထိုတ်ထိုင်းကျေးရွာအုပ်စုထဲမှာ နယ်စပ်ဘက်ကနေ မူးယစ်ဆေးဝါး အချီကြီး ၀င်ရောက်လာဖို့ရှိကြောင်း ကြိုတင်ထောက်လှမ်းသိရှိချက်အရ နယ်မြေခံ ရဲနဲ့စစ်တပ် ပူးပေါင်းပြီး သွားစောင့်ဖမ်းခဲ့တာလို့ အမှတ် ၂ အထူးစစ်ဆင်ရေးတပ်ဖွဲ့က တပ်မှူး ဗိုလ်မှူး ပရဖတ် ဖုပ်ဆုဝမ်းက ဇွန်လ ၃၀ ရက်နေ့ သတင်းစာရှင်းလင်းပွဲမှာ ပြောကြားခဲ့ပါတယ်။ ဖြစ်စဉ်မှာ ပြီးခဲ့တဲ့ ဇွန်လ ၂၇ ရက်က ထိုတ်ထိုင်းကျေးရွာ အုပ်စု ဖာကျိကျေးရွာအနီး တောထဲမှာ သွားရောက်စောင့်ဆိုင်းစဉ် ည ဆယ်နာရီခွဲအချိန် ကျောပိုးအိတ်နဲ့ သေနတ် ကိုင်ထားတဲ့ လူ ၃-၄ ဦး နယ်စပ်ဘက်ကနေ ၀င်ရောက်လာကြောင်း၊ သူတို့က တားဆီးစစ်ဆေးဖို့ ကိုယ်ယောင်ပြချိန်မှာ အဲဒီလူတွေက အရင်ဆုံး သေနတ်နဲ့ ပစ်ခတ်တဲ့အတွက် အပြန်အလှန်ပစ်ခတ်မှု ၅ မိနစ်ကြာ ဖြစ်ပွားခဲ့ပြီး ကုန်သည်တွေ တောထဲဝင်ရောက်ပျောက် ကွယ်သွားခဲ့တယ်လို့ ဆိုပါတယ်။ အသံတွေ ငြိမ်သက်လို့ နယ်မြေ၀င်ရောက် ရှင်းလင်းရာမှာတော့ သူတို့ပစ်ထားခဲ့တဲ့ ဆာလာအိတ်ထဲကနေ စိတ်ကြွဆေးပြား အထုတ်ပေါင်း ၅၀၊ အလုံးရေ ၁ သိန်းကို ပိုင်ရှင်မဲ့အဖြစ် သိမ်းဆည်းရမိခဲ့တယ်လို့ ထိုင်းတပ်မှူးက ပြောပါတယ်။ ဒါ့အပြင် အဲဒီနဲ့ မီတာ ၅၀ အကွာမှာ သေနတ်ကျည်ပေါက်ရာနဲ့ အစိမ်းရောင် ကက်ဦးထုတ်တလုံး၊ အနက်ရောင် ဘွတ်ဖိနပ်တဘက်၊ ဆေးဝါးတွေပါလာတဲ့ ကျောပိုးအိတ်တလုံးပါ သက်သေအဖြစ် ဖမ်းဆီးရမိကြောင်း၊ ထွက်ပြေးလွတ်မြောက်သွားသူတွေကိုလည်း  ဖမ်းဆီးအရေးယူနိုင်ဖို့ ဆက်လက်စုံစမ်းနေတယ်လို့ တပ်မှူုးက သတင်းစာရှင်းပွဲမှာ ပြောကြားခဲ့ပါတယ်။  
6 years Ago
Up