ထိပ်သီးအစည်းအဝေး

January 23, 2022

အာဏာသိမ်းစစ်ခေါင်းဆောင်ကို BIMSTEC ထိပ်သီးအစည်းအဝေး တက်ခွင့်မပြုရန် တောင်းဆို

ဘင်္ဂလားပင်လယ်အော် စီးပွားရေးနှင့် နည်းပညာဆိုင်ရာ ဘက်စုံပူးပေါင်းဆောင်ရွက်ရေးအဖွဲ့ (BIMSTEC) အဖွဲ့ဝင်နိုင်ငံတွေအနေနဲ့ မြန်မာအာဏာသိမ်းစစ်ကောင်စီကို တရားဝင်မှုပေးနေတာကို ချက်ချင်းရပ်တန့်ဖို့နဲ့  စစ်ခေါင်းဆောင်ကို ထိပ်သီးအစည်းအဝေး တက်ခွင့်မပြုဖို့  Justice For Myanmar ကဒီကနေ့ တောင်းဆိုလိုက်ပါတယ်။

ဒေသတွင်း ပူးပေါင်းဆောင်ရွက်ရေးအစုအဖွဲ့ BIMSTEC ဟာ လာမယ့် မတ်လ ၃၀ ရက်နေ့ သီရိလင်္ကာနိုင်ငံက အိမ်ရှင်အဖြစ် လက်ခံကျင်းပမယ့် (၅) ကြိမ်မြောက် BIMSTEC နိုင်ငံခေါင်းဆောင်များ ထိပ်သီးအစည်းအဝေးကို ကျင်းပဖို့ ပြင်ဆင်နေကြပြီး ဒီအစည်းအဝေးမှာ မြန်မာနိုင်ငံ တက်ရောက်ဖို့ အတည်ပြုပြီးဖြစ်တယ်လို့ ဘင်္ဂလားဒေ့ရှ်မီဒီယာတွေက သတင်းထုတ်ထားပါတယ်။ 

BIMSTEC အဖွဲ့ဟာ ဖေဖော်ဝါရီလ စစ်အာဏာသိမ်းမှုနောက်ပိုင်း တရားမဝင်မြန်မာစစ်ကောင်စီနဲ့ ထိတွေ့ ဆက်ဆံခဲ့ကြသလို အခုထိပ်သီးအစည်းအဝေးမှာလည်း စစ်ရာဇဝတ်ကောင် မင်းအောင်လှိုင်က မြန်မာနိုင်ငံကို ကိုယ်စားပြုပြီးတက်ရောက်လာမယ့် အန္တရာယ်ကြီးရှိနေတယ်လို့ Justice For Myanmar အဖွဲ့က ဆိုပါတယ်။

ဒီလို ဖြစ်လာပါက စစ်ကောင်စီရဲ့ သံတမန်သစ် ခန့်အပ်ဖို့ ကြိုးပမ်းတာကို ငြင်းဆိုခဲ့တဲ့ ကုလသမဂ္ဂနဲ့ စစ်ခေါင်းဆောင်ကို ထိပ်သီးအစည်းအဝေးမှာ တက်ခွင့်မပြုခဲ့တဲ့ အာဆီယံအဖွဲ့တို့ကို ဆန့်ကျင်ပြီး လူ့အခွင့်အရေးနဲ့ မြန်မာပြည်သူတို့ရဲ့ ဒီမိုကရေစီစိတ်ဆန္ဒအပေါ် စိတ်ပျက်ဖွယ်ရာ လျစ်လျူရှုမှုတရပ် ဖြစ်လာတော့မယ်လို့ ဆိုပါတယ်။

“တရားမဝင်စစ်ကောင်စီအနေနဲ့ BIMSTEC တင်မဟုတ်ဘဲ တခြားဘယ်ကမ္ဘာ့ဖိုရမ်တွေမှာမှ မြန်မာနိုင်ငံကို ကိုယ်စားပြုဖို့ လူထုထောက်ခံချက် ရရှိထားတာ မရှိပါဘူး။ BIMSTEC ရဲ့ ထိတွေ့ဆက်ဆံမှုက စစ်ကောင်စီကို သူတို့ရဲ့ အကြမ်းဖက်စစ်ဆင်ရေးတွေ အရှိန်မြှင့်ဆောင်ရွက်ဖို့ ရဲဆေးတင်ပေးခြင်းသာ ဖြစ်ပါတယ်”လို့ Justice For Myanmar ရဲ့ သတင်းထုတ်ပြန်ချက်မှာ‌ ဖော်ပြပါတယ်။

ပြီးခဲ့တဲ့ ဒီဇင်ဘာလက အိန္ဒိယနိုင်ငံက လက်ခံကျင်းပခဲ့တဲ့  BIMSTEC စစ်ရေးလေ့ကျင့်မှုမှာ မြန်မာ စစ်ကောင်စီတပ်တွေကို ပူးပေါင်းပါဝင်ခွင့်ပြုခဲ့သလို တရားမဝင်စစ်ကောင်စီ ကိုယ်စားလှယ်တွေဟာလည်း BIMSTEC   အစည်းအဝေးတွေကို  တက်ခွင့်ပြုခဲ့ပါတယ်။ မြန်မာပြည်မှာ စစ်အာဏာသိမ်းပြီးနောက်  အခုလို  BIMSTEC အဖွဲ့ရဲ့ လုပ်ရပ်မှတ်တမ်းတွေက ရှက်စရာကောင်းတယ်လို့ Justice For Myanmar က ဝေဖန်ပါတယ်။

BIMSTEC အဖွဲ့ဝင်နိုင်ငံတွေထဲမှာ အိန္ဒိယ၊ နီပေါ၊ ဘူတန်၊ ဘင်္ဂလားဒေ့ရှ်၊ မြန်မာ၊ ထိုင်းနဲ့ သီရိလင်္ကာနိုင်ငံ စတဲ့ တောင်အာရှနဲ့ အရှေ့တောင်အာရှဒေသတွင်း နိုင်ငံ ၇ နိုင်ငံ ပူးပေါင်းပါဝင်တာ ဖြစ်ပါတယ်။

5 months Ago

October 26, 2021

စစ်ခေါင်းဆောင်ကို ထိပ်သီးအစည်းအဝေး ပေးမတက်သည့်ဆုံးဖြတ်ချက် အပြည့်အဝထောက်ခံ ဟု အာဆီယံ ခေါင်းဆောင်အချို့ပြော

မြန်မာနိုင်ငံရဲ့ ကိုယ်စားပြုမှုနဲ့ ပတ်သက်ပြီး အာဆီယံ ဥက္ကဋ္ဌရဲ့ ဆုံးဖြတ်ချက်ကို မလေးရှားနိုင်ငံအနေနဲ့ အပြည့်အဝထောက်ခံကြောင်း မလေးရှားဝန်ကြီးချုပ် အစ္စမေးလ်ဆာဘရီယာကွတ်ဘ်က အောက်တိုဘာ ၂၆ ရက် ဒီနေ့ စတင်ကျင်းပတဲ့ အာဆီယံထိပ်သီး အစည်းအဝေးနဲ့ ပတ်သက်ပြီး ထုတ်ဖော်ပြောကြားလိုက်ပါတယ်။

အခုထိပ်သီး အစည်းအဝေးပွဲမှာ မြန်မာအတွက် လမ်းဖွင့်ပေးခဲ့ပေမယ့် မြန်မာကိုယ်စားလှယ်မပါဝင်နိုင်တာ အာဆီယံအပြစ်မဟုတ်ဘူးလို့ ကမ္ဘောဒီးယားဝန်ကြီးချုပ် ဟွန်ဆန်ကလည်း ပြောဆိုလိုက်ပါတယ်။

ဒါ့အပြင် မြန်မာစစ်တပ်ဟာ အာဆီယံနဲ့ ပူးပေါင်းဆောင်ရွက်ခြင်း မရှိခဲ့ဘူးလို့ အာဆီယံ အလှည့်ကျ ဥက္ကဋ္ဌတာဝန်  ၂၀၂၂ ခုနှစ်ကျရင် လွှဲပြောင်းယူမယ့် ကမ္ဘောဒီးယားနိုင်ငံရဲ့  ဝန်ကြီးချုပ်က ပြောပါတယ်။

ထိုင်းဝန်ကြီးချုပ် ပရာယွတ်ကတော့ မြန်မာ့အရေးဟာ အာဆီယံဒေသတွင်းမူကို စိန်ခေါ်နေပြီး ပထမခြေလှမ်းအနေနဲ့ အာဆီယံအထူးသံတမန်က မြန်မာနိုင်ငံ အမြန်ဆုံးသွားရောက်ကာ သက်ဆိုင်သူအားလုံးနဲ့ တွေ့ဆုံနိုင်ဖို့လိုတယ်၊ အာဆီယံရဲ့ ချမှတ်ထားတဲ့ မူ(၅)ချက်ကို မြန်မာနိုင်ငံအနေနဲ့ လိုက်နာလုပ်ဆောင်နိုင်ဖို့ တိုက်တွန်းလိုက်ပါတယ်။

အောက်တိုဘာ ၂၆ ရက်ကနေ ၂၈ ရက်နေ့အထိ ကျင်းပနေတဲ့  အာဆီယံထိပ်သီးအစည်းအဝေးမှာ မြန်မာ အာဏာသိမ်းစစ်ခေါင်းဆောင်ကို မဖိတ်ပဲ  နိုင်ငံရေးအရကိုယ်စားမပြုတဲ့  နိုင်ငံခြားရေး အတွင်းဝန် ဦးချမ်းအေးကို အာဆီယံအလှည့်ကျ ဥက္ကဋ္ဌ ဘရူးနိုင်းနိုင်ငံကနေ ဖိတ်ကြားခဲ့ပါတယ်။

နိုင်ငံအဆင့်အကြီးအကဲ  ဒါမှမဟုတ် ပြည်ထောင်စု ဝန်ကြီးအဆင့်  ဖိတ်ကြားမှသာ တက်မယ်လို့ အာဏာသိမ်း စစ်ကောင်စီရဲ့ နိုင်ငံခြားရေးဌာနက အကြောင်းပြန်ခဲ့ပေမယ့် မြန်မာကိုယ်စားလှယ် မပါဝင်ပဲ အာဆီယံထိပ်သီး အစည်းအဝေးကို ဒီနေ့ အာဆီယံ ၉ နိုင်ငံက နိုင်ငံ့ခေါင်းဆောင်တွေနဲ့ စတင်ပြုလုပ်နေပြီ ဖြစ်ပါတယ်။

အခု အာဆီယံထိပ်သီးအစည်းအဝေးရဲ့ ဆက်စပ်အစည်းအဝေးတခုဖြစ်တဲ့ အာဆီယံ-အမေရိကန် ပူးပေါင်းအစည်းအဝေးတခုကို  ၄ နှစ်အတွင်း ပထမဆုံးအနေနဲ့ အမေရိကန် သမ္မတ ဂျိုးဘိုင်ဒင်လည်း ဗီဒီယို ကနေတဆင့် တက်ရောက်ဖို့ရှိနေပါတယ်။ 

Photo-Credit

8 months Ago
More News
Up