ထက်မြက်

June 11, 2018

ကြားဖြတ်ရွေးကောက်ပွဲ

၂၀၁၈ ကြားဖြတ်ရွေးကောက်ပွဲများကား ယခုရက်ပိုင်း၊ လပိုင်းအတွင်းမှာပင် ကျင်းပကြပေလိမ့်မည်။ ၂၀၁၈ ကြားဖြတ်ရွေးကောက်ပွဲသည် နိုင်ငံရေးပါတီများအဖို့ကား စစ်ပွဲလည်းဖြစ်သည်။ ၂၀၂၀ ရွေးကောက်ပွဲကို ယခုရွေးကောက်ပွဲများက အဆုံးအဖြတ်ပေးမည် ဆိုခြင်းထက် အနီးစပ်ဆုံး ခန့်မှန်း၍ ရပေသည်။ ကြားဖြတ်ရွေးကောက်ပွဲ၏ အနိုင်အရှုံး၊ မဲအချိုးအစားကို ကြည့်ကာ ပြည်သူက လက်ရှိအစိုးရ ကိုယ်စားပြုသော ပါတီနှင့် ယခင်အစိုးရဖွဲ့ခဲ့သော ပါတီ၊ အသစ်ဖွဲ့လိုက်သော ပါတီ၊ တိုင်းရင်းသားပါတီ စသည် စသည်များကို မည်မျှအလေးထားပြီး မည်မျှ မျက်ကွယ်ပြုသည် ဆိုသည်ကို ကြားဖြတ်ရွေးကောက်ပွဲတွင် အနည်းနှင့်အများဆိုသလို ပေါ်လွင်နိုင်ပါသည်။ အမျိုးသားဒီမိုကရေစီအဖွဲ့ချုပ်သည် ၂၀၁၀ ပါတီစုံ အထွေထွေရွေးကောက်ပွဲကြီးတွင် ပါဝင်ခြင်း မပြုခဲ့ပေ။ ၂၀၀၈ ဖွဲ့စည်းပုံအခြေခံဥပဒေကို လက်မခံနိုင်ခြင်းကြောင့် ရွေးကောက်ပွဲမဝင်ခြင်း ဖြစ်သည်။ ထို့ကြောင့် အမျိုးသားဒီမိုကရေစီအဖွဲ့ချုပ်မှ ခွဲထွက်ခဲ့သောသူများက ပါတီများ ထောင်ကြသည်။ စစ်တပ်ကို ကိုယ်စားပြုသည်ဟု ယူဆသော ပြည်ခိုင်ဖြိုးပါတီကို ဆန့်ကျင်သောသူများကလည်း ဝင်ပြိုင်ကြသည်။ ပါတီမှ ခွဲထွက်သောသူများမှာ ၉၀ ခုနှစ် ရွေးကောက်ပွဲမှ အန်အယ်လ်ဒီသင်္ကေတ ခမောက်ကို ယူခဲ့ကြ၍ ပြည်သူက အန်အယ်လ်ဒီအဖွဲ့နှင့်ရော စစ်အာဏာရှင်နှင့် စစ်အစိုးရကို စက်ဆုပ်မှုများကြောင့် ထိုပါတီငယ်များသည်ပင်လျှင် ဝင်ပြိုင်သရွေ့နီးပါး အရွေးခံခဲ့ကြရလေသည်။ သို့သော်လည်း ငွေကြေးအင်အား၊ လူအင်အား၊ အတွေ့အကြုံ၊ အာဏာပိုင်တို့၏ လူမသိအောင်ရော၊ လူသိအောင်ရော ထောက်ခံအားပေးမှုတို့ကြောင့် ပြည်ခိုင်ဖြိုးပါတီ အနိုင်ရကာ အစိုးရ ဖွဲ့နိုင်ခဲ့လေသည်။ ယခင်စစ်အစိုးရလက်ထက်က 'ဒီမိုကရေစီ' ဆိုသော ဝေါဟာရကို စက်ဆုပ်ဖွယ်ရာ အသုံးအနှုန်းအဖြစ် ဆန့်ကျင်ခဲ့သူများသည် ပါတီများနှင့် ရွေးကောက်ပွဲများ ပေါ်လာသောအခါ ဒီမိုကရေစီဆိုသော ဝေါဟာရကို နှုတ်ဖျားကမချဘဲ ဒီမိုကရေစီ သူရဲကောင်းများ ဖြစ်လာကြလေတော့သည်။ လူထုသည် ၂၀၀၈ ဖွဲ့စည်းပုံကို ကြိုက်သည်၊ မကြိုက်သည်ထက်၊ ရွေးကောက်ပွဲတွင် စစ်အာဏာရှင်ဟောင်းများ၊ စစ်အစိုးရနှင့် ပတ်သက်သော နိုင်ငံရေးသမားများ၊ နိုင်ငံရေးပါတီများ မဲမရရေးအတွက် ရွေးကောက်ပွဲမဲကို တက်တက်ကြွကြွ ထည့်ဝင်ခြင်း မပြုကြပေ။ သို့သော်လည်း မဲမထည့်လျှင် ဘာဖြစ်မလဲဆိုသည့် သို့လောသို့လော သံသယများကြောင့် ၂၀၀၈ ဖွဲ့စည်းပုံ ဆန္ဒခံယူပွဲကဲ့သို့ပင် ယခုလည်း အင်အားအကောင်းဆုံး မဲဆန္ဒနယ်များတွင် ပါဝင်ရွေးချယ်ခံခဲ့သောကြောင့် ပြည်ခိုင်ဖြိုးသာ အနိုင်ရခဲ့ခြင်းဖြစ်သည်။ ၂၀၁၀ တွင် ၂၀၀၈ ဖွဲ့စည်းပုံလက်မခံရေး မူဖြင့် အန်အယ်လ်ဒီ ဝင်မပြိုင်ခဲ့သော်လည်း ၂၀၁၂ ကြားဖြတ်ရွေးကောက်ပွဲ ကျင်းပသောအခါတွင် ၂ နှစ်အတွင်း ထိုမူကို အန်အယ်လ်ဒီခေါင်းဆောင်များက ပြောင်းပစ်လိုက်၏။ ထို့ကြောင့် ၂၀၀၈ ဖွဲ့စည်းပုံ လက်ခံရေးမူ ဖြစ်လာလေသည်။ ထို ကြားဖြတ်ရွေးကောက်ပွဲ၌ လစ်လပ်သော မဲဆန္ဒနယ် ၄၄ နေရာတွင် ဝင်ရောက်ယှဉ်ပြိုင်သော အန်အယ်လ်ဒီကိုယ်စားလှယ် ၄၃ နေရာ မဲအများဆုံးနှင့် အနိုင်ရရှိသွားခဲ့လေတော့သည်။ ထိုအခါ မဲလိမ်ခြင်း၊ မဲခိုးခြင်း ပြဿနာများ ကြီးကြီးမားမား မကြားရဘဲ ကြိုတင်မဲ ပြဿနာသာ ကြားရပြီး ယေဘုယျအားဖြင့် သန့်ရှင်းသော ရွေးကောက်ပွဲဟု ဆိုနိုင်သဖြင့် ၂၀၁၅ ရွေးကောက်ပွဲတွင် အန်အယ်လ်ဒီပါတီသည် မဲဆန္ဒနယ်တိုင်း၌ အင်နှင့်အားနှင့် ဝင်ရောက်ယှဉ်ပြိုင်သောကြောင့် လူထုက သောင်းသောင်းဖြဖြ အားပေးမဲထည့်ခဲ့ကြသည်။ ထို့ကြောင့် Land Slide Victory ဖြစ်ကာ အန်အယ်လ်ဒီ အစိုးရဖွဲ့လာနိုင်ခြင်း ဖြစ်ပါသည်။ ထိုအတွေ့အကြုံအရ ကြားဖြတ်ရွေးကောက်ပွဲသည် လူထု၏ သဘောထားကို အထိုက်အလျောက် ဖော်ပြနိုင်သည်ဟု ယေဘုယျ ကောက်ချက်ချနိုင်၏။ သို့သော်လည်း လုံးဝဥသုံကား ကောက်ချက်ချ၍ မရနိုင်ပေ။ အဘယ်ကြောင့်ဆိုသော် လွန်ခဲ့သော နှစ်ပိုင်းအတွင်းက ပြုလုပ်ခဲ့သော မွန်ပြည်နယ် ရွေးကောက်ပွဲများတွင် လူထုဆန္ဒအရ အန်အယ်လ်ဒီကို မဲအထည့်နည်းသည့် အခြေအနေကို တွေ့မြင်ခဲ့ရလေသည်။ အထူးသဖြင့် လူထုသည် အာဏာရလာသော အန်အယ်လ်ဒီအစိုးရအပေါ် အားထားယုံကြည်မှု လျော့နည်းလာသည်။ ထိုအခြေအနေမှာ အဖြစ်မှန်နှင့် လက်တွေ့ကျကြောင်း အန်အယ်လ်ဒီအနေဖြင့် နားလည်ဖို့ လိုလာပါသည်။ ပြည်သူလူထုအနေဖြင့် အမျိုးသားပြန်လည်သင့်မြတ်ရေး သို့မဟုတ် အမျိုးသားရင်ကြားစေ့ရေးကို လိုလိုလားလား ရှိကြပါသည်။ သို့သော် စစ်တပ်နှင့်သာ သင့်မြတ်ရေး၊ ရင်ကြားစေ့ရေးကို ဘဝင်မကျကြပေ။ တိုင်းရင်းသားလက်နက်ကိုင်အဖွဲ့များ၊ နိုင်ငံရေးသမားများ၊ နိုင်ငံရေးပါတီအားလုံးနှင့် ရင်ကြားစေ့ရေး၊ အမျိုးသားပြန်လည်သင့်မြတ်ရေးကို လိုလိုလားလားရှိသည်။ ဆိုလိုသည်မှာ အမျိုးသားစည်းလုံးညီညွတ်ရေးနှင့် ငြိမ်းချမ်းရေးတည်ဆောက်ဖို့ကို မျှော်လင့်ကြလေသည်။ ထို့အတူ နှစ်ပေါင်း ၅၀ ကျော် အဖိနှိပ်ခံ၊ အုပ်ချုပ်ခံခဲ့ရသော အခြေအနေမျိုးမှလည်း ရုန်းထွက်ချင်ကြသည်။ နှစ်ပေါင်း ၅၀ ကျော် ဖိနှိပ်ခဲ့သော ယန္တရားအောက်မှလည်း လွတ်မြောက်ချင်ကြသည်။ စင်စစ် ထိုယန္တရားမှာ ကိုလိုနီခေတ်၊ ဖဆပလခေတ်၊ စစ်အစိုးရခေတ်က ယန္တရား ဖြစ်နေသောကြောင့် လွတ်မြောက်ချင်ကြလေသည်။ အဂတိလိုက်စားမှုများ၊ အထက်ဖား အောက်ဖိ အနိုင်ကျင့်မှုများ စသည်တို့ကို မမြင်ချင် မတွေ့ချင် မခံချင်ကြတော့ပေ။ သို့သော် အန်အယ်လ်ဒီအစိုးရသည် ထိုယန္တရားဟောင်းဖြင့်ပင် ခရီးဆက်ခဲ့၏။ ငြိမ်းချမ်းရေးကို အသံကုန် အော်ဟစ်နေကြသော်လည်း စစ်ပွဲများမှာ ကြောက်ခမန်းလိလိ ဖြစ်ပေါ်နေဆဲ၊ လွန်ခဲ့သော နှစ်ပေါင်း ၅၀ တုန်းကလို မိုင်းထောင်ခြင်း၊ သံလမ်းများဖြတ်ခြင်း ကဲ့သို့သော အဖျက်လုပ်ရပ်များ လုပ်လာကြသည်။ စစ်ရှောင်ဒုက္ခသည်များ များသထက်များ၊ ပြေးသထက် ပြေးနေရဆဲ၊ ထိုအခြေအနေများတွင် မိမိတို့ အားထားခဲ့သော အန်အယ်လ်ဒီ အစိုးရ၏ လုပ်ဆောင်ချက်များမှာ ထိထိရောက်ရောက်မရှိဟု ယူဆနေလေသည်။ ထို့ကြောင့် စစ်ဗိုလ်ချုပ်ဟောင်းများ၏ ပြည်ခိုင်ဖြိုးပါတီအပေါ် ပြန်လည်ရွေးကောက်ပြီး အသက်မသွင်းချင်သလို ကတိစကားကို ထိရောက်အောင် အကောင်အထည်မဖော်နိုင်၊ ယန္တရားအသစ် မတည်ဆောက်နိုင်သော အန်အယ်လ်ဒီအပေါ်လည်း အားကိုးအားထားပြုမှုများ လျော့နည်းလာရလေသည်။ ထိုအခြေအနေတွင် ကြားဖြတ်ရွေးကောက်ပွဲများမှာ ၂၀၁၂ ကလည်း မဖြစ်နိုင်တော့ဘဲ ပြည်သူသည် ကတိစကားနှင့် လက်တွေ့ မကိုက်ညီမှုကို ဆန့်ကျင်လာကြတော့သည်။ မဲထည့်ရမည်ဆိုလျှင် အန်အယ်လ်ဒီကိုသာ မဲထည့်ကြမည်ဆိုသော်လည်း အန်အယ်လ်ဒီသည် လက်တွေ့ အားနည်းလွန်းသောကြောင့် မဲမထည့်ဘဲ နေရလျှင်လည်း မဲမထည့်ကြတော့ဟု ပြည်သူက လက်လျော့ကာ အနီကတ်ပြဖို့ စိတ်ကူးလာကြလေသည်။ ထိုအခြေအနေကို လေးလေးနက်နက် သဘောပေါက်ကြမည်ဆိုလျှင် ၂၀၂၀ ရွေးကောက်ပွဲအတွက် ယခုအချိန်ကတည်းက ပြင်ဆင်ဖို့၊ မိမိတို့လုပ်ရပ်များကို ပြောင်းလဲဖို့၊ ထိရောက်သော ယန္တရားသစ်ကို တည်ဆောက်ဖို့ လိုအပ်လာလေသည်။ ပြည်သူထောက်ခံမှုမရှိသော မည်သည့်ပါတီ၊ မည်သည့်အဖွဲ့၊ မည်သည့်အင်အားမဆို အနှေးနှင့်အမြန် ကျဆုံးကြမည်မှာ အမှန်ဖြစ်သည်။ ယခု အန်အယ်လ်ဒီ အာဏာရပြီး ၂ နှစ်ကျော်အကြာအထိ ပြည်သူက တကယ်အားကိုးထိုက်သော နိုင်ငံရေးပါတီအဖြစ် ယုံကြည်အားကိုးရဖို့မှာ အားနည်းလာခဲ့ပေသည်။ အာဏာရပါတီကို အားထားဖို့၊ အင်အားနည်းလာသော်လည်း အင်အားအကြီးဆုံး အတိုက်အခံပါတီကိုမူ ပြည်သူက မိမိတို့၏သွေးနှင့် စတေးခဲ့သော အတွေ့အကြုံအရ လုံးဝ အားမထား မယုံကြည်သည်မှာ အမှန်ပင်။ ထိုအခြေအနေကို ၂၀၁၅ ရွေးကောက်ပွဲက သက်သေပြလိုက်ပေပြီ။ ထိုအခါ ကြားပါတီများကို အားထားထိုက်သလား၊ ယုံကြည်ထိုက်သလားဟု ရှာဖွေကြည့်သော်လည်း အားထားထိုက်သော နိုင်ငံရေးပါတီ ပေါ်မလာသေးပေ။ ၈၈ မျိုးဆက်တခုလုံးသာ နိုင်ငံရေးလောကထဲ ရောက်လာပါက ထိုက်သင့်သလောက်သာ ထားနိုင်သော်လည်း ယခုဝင်လာသောသူများမှာမူ သူတို့၏နိုင်ငံရေး သူတို့ဖြတ်သန်းလာသော အတွေ့အကြုံအရ ထိုက်သင့်သလောက် အားထား၍ မရနိုင်ပေ။ တိုင်းရင်းသားပါတီအချို့မှာ လေးစားယုံကြည်ထိုက်သော လှုပ်ရှားမှုများ ရှိသော်လည်း ရွေးကောက်ပွဲတွင် တနိုင်ငံလုံး အတိုင်းအတာအရ အားနည်းနေသောကြောင့် အာဏာအပ်ဖို့ အခြေအနေ မပေးနိုင်ပေ။ ထို့ကြောင့် ၂၀၁၈ ကြားဖြတ်ရွေးကောက်ပွဲသည် အန်အယ်လ်ဒီပါတီအဖို့ ၂၀၁၂ ကြားဖြတ်ရွေးကောက်ပွဲလို လူထုထောက်ခံမှု အင်နှင့်အားနှင့် ရနိုင်လိမ့်မည်ဟု မပြောနိုင်ပေ။ ထို့အတူ ပြည်ခိုင်ဖြိုးပါတီအနေနှင့်လည်း ကြားဖြတ်ရွေးကောက်ပွဲတွင် အင်နှင့်အားနှင့် အနိုင်ရလိမ့်မည်ဟု မမျှော်လင့်သင့်ပေ။ ပြည်သူသည် ပြည်ခိုင်ဖြိုးပါတီကို စစ်တပ်ပါတီအဖြစ်သာ ယုံကြည်နေဆဲဖြစ်သောကြောင့် ဒီမိုကရေစီ အငွေ့အသက် အားနည်းလှသည်ဟု ယူဆကြလေသည်။ ထို့ကြောင့် ၂၀၁၈ ကြားဖြတ် ရွေးကောက်ပွဲများတွင် ပြည်ခိုင်ဖြိုးသည် အနိုင်ရနိုင်လိမ့်မည်မဟုတ်။ ထို့အတူ တတိယအင်အားစု ပါတီများလည်း ယခု သူတို့ဖြတ်သန်းနေသော နိုင်ငံရေးလှုပ်ရှားမှုများအရ ပြည်သူ၏ထောက်ခံမှုကို ရရှိဖို့ မလွယ်လှပေ။ တိုင်းရင်းသား လူမျိုးစုဒေသများတွင်မူ တိုင်းရင်းသားပါတီများသာ အနိုင်ရနိုင်ချေ များလေသည်။ ယခုကြားဖြတ်ရွေးကောက်ပွဲတွင် အများစု ဆက်လက်အနိုင်ရရှိမည့် ပါတီမှာမူ အန်အယ်လ်ဒီပါတီသာဖြစ်ကြောင်း အထွေအထူး ပြောနေစရာ မလိုပေ။ သို့သော် ၂ နှစ်တာ ကာလ အန်အယ်လ်ဒီ၏ အားနည်းချက်၊ ချို့ယွင်းချက်၊ လူထုအပေါ် မျက်ကွယ်ပြုမှုများကြောင့် ၂၀၁၂ ကလို၊ ၂၀၁၅ ကလို သောင်ပြိုကမ်းပြို မဲရနိုင်ဖို့ကား မလွယ်လှပေ။ ထိုကဲ့သို့ ပြတ်ပြတ်သားသား မဲမရလျှင် ၂၀၂၀ အတွက် စဉ်းစားစရာ၊ ရင်လေးစရာ အနာဂတ် မြန်မာ့ဒီမိုကရေစီလမ်းကြောင်းအတွက် စိုးရိမ်စရာ ဖြစ်လာမည်ကို အလေးအနက် ဆင်ခြင်သုံးသပ်ဖို့ အချိန်ရောက်လာပေပြီ။ ထက်မြက်
3 years Ago

May 29, 2018

ရဲဘော်လှတင်အောင် (၅)

ကိုလှတင်အောင်က ကျနော့်ပခုံးကို တိုက်လိုက်ပြီးနောက်- “ဟေ့ကောင်၊ မင်း မသေတော့ဘူးကွ။ မင်း အလံလွှမ်းစရာလည်း မလိုတော့ဘူး။ ကိုကိုလွင်ကျတော့ သူ့သားကို။ သူတို့ ဘာလုပ်လို့ရမှာလဲ” ဟု ကျနော့်နားကပ်ကာ တိုးတိုးလေးပြောပါသည်။ ကျနော့်အတွက် သူ စိုးရိမ်သောက ဖြစ်နေ၏။ ယခုမှ အပူလုံး ကျသွားပုံရသည်။ သူ့ပြောဆိုချက်များမှာလည်း ဖြစ်နိုင်ခြေ အများဆုံးနှင့် ကျိုးကြောင်းဆက်စပ်မှု ရှိနေသဖြင့် ကျနော်ကလည်း ခေါင်းတညိတ်ညိတ်ဖြင့် နားထောင်လာ၏။ မီးသဂြုင်္ိဟ်စက်ရှေ့တွင် အသုဘပို့သူများရော သယ်လာသော အခေါင်းကြီးပါ ရောက်ရှိလာတော့သည်။ ထိုအချိန်တွင် ပြည်သူ့တိုးတက်ရေးပါတီ၏ ဗဟိုကော်မတီဝင်လည်း ဖြစ်၊ ထောင်မှ မကြာခင်က ပူပူနွေးနွေး လွတ်မြောက်လာသော ကိုမြင့်ဦးသစ်က ဦးခင်မောင်မြင့်အား နောက်ဆုံး ဂုဏ်ပြုသည့်အနေဖြင့် အလေးပြုရန် သူ့အသံအောကြီးဖြင့် အော်ပြောလိုက်ပါသည်။ ကျနော်တို့လည်း သူအမိန့်ပေးမည်ကို စောင့်ပြီး တန်းစီရပ်လိုက်ကြပါသည်။ ကျနော့်ဘေးတွင် ကိုလှတင်အောင်၊ သခင်ခင်အောင်နှင့် တခြားရဲဘော်များ တန်းစီနေကြပြီး ကိုမြင့်ဦးသစ်က ၂ မိနစ် အလေးပြုရန် အမိန့်ပေးလိုက်သည်။ ကျနော်တို့လည်း ဦးညွှတ်လိုက်ကြသည်။ ၂ မိနစ်လောက်နေမှ ပြန်မတ်လိုက်ကြသည်။ သို့သော် ကိုမြင့်ဦးသစ်က နေမြဲဟု မအော်သေးပေ။ ထိုအခါ ကျနော်တို့က အန်ကယ်ကြီးဟု ချစ်စနိုးခေါ်သော သခင်ခင်အောင်က ဦးညွှတ်နေရာမှနေ- “ဟေ့ လှတင်အောင်၊ မနေမြဲသေးဘူးလားကွ” ဟု မေးလိုက်မှ အန်ကယ်ကြီး ဦးညွှတ်နေသည်ကို ကျနော်တို့လည်း သတိထားမိကာ ကိုလှတင်အောင်က “အန်ကယ်ကြီး နေမြဲသွားပြီ” ဟု ပြောလိုက်ရာ သခင်ခင်အောင်လည်း ခေါင်းကိုမတ်လိုက်ကာ ကိုမြင့်ဦးသစ်ထံ မျက်စောင်းခဲ၍ ကြည့်လိုက်ပါသည်။ ကျနော်တို့လည်း ငိုအားထက် ရယ်အားသန် ထိုအဖြစ်ကို အမြဲပြောလေ့ရှိကြသည်။ ကျနော်တို့ ထောင်မှလွတ်ပြီး အပြင်ရောက်သည့်အခါ သူ့ဝမ်းဗိုက် ခွဲစိတ်သည့်အကြောင်း၊ ဒေါက်တာရဲမြင့်အကြောင်း၊ အပြည့်အစုံနှင့် အသေအချာ ပြောတတ်သဖြင့် သူ့ဝမ်းဗိုက်ခွဲရခြင်းကို လူကိုယ်တိုင် သွားကြည့်သလို မြင်ယောင်နေမိသည်။ သူ မကွယ်လွန်မီ နောက်ဆုံး မှတ်မှတ်ရရအဖြစ်မှာ ရန်ကုန်မြို့တွင် ဆက်တိုက် ဗုံးခွဲမှုများ ဖြစ်ပွားသည့်နှစ်က ဖြစ်လေသည်။ ထိုနှစ်က ပုဇွန်တောင်ရှိ ကုန်သွယ်ရေး အဆောက်အဦ၊ ရှစ်မိုင်မှ ဂျန်းရှင်းအိပ်ခ်ျ၊ မြေနီကုန်းမှ ဒဂုံစင်တာ စသည့်နေရာများကို အကြမ်းဖက်သမားများက ရှေ့ဆင့်နောက်ဆင့်ဆိုသလို ဗုံးများ ဖောက်ခွဲလိုက်၏။ လူသေဆုံးမှုလည်း များပြားခဲ့၏။ ထိုသို့ ဗုံးများခွဲပြီး ညနေပိုင်းတွင် ကိုလှတင်အောင်ကို ထောက်လှမ်းရေးက လာရောက်မေးမြန်းခဲ့သလို သူနှင့် ကပ်ရပ်နေသော ကိုလှရွှေ (အောင်သာပီသုံးလုံး) ကိုလည်း လာရောက်မေးမြန်းခဲ့သည်ဟု ကျနော် နယ်မှ ပြန်ရောက်သည့်အခါ သိရှိရလေသည်။ ကျနော့်အိမ်မှလည်း ထောက်လှမ်းရေးနှင့် ရပ်ကွက်လူကြီးများ လာရောက်မေးမြန်းကြရာ လွန်ခဲ့သော နှစ်ရက်က ရှမ်းပြည်တောင်ပိုင်း၊ အောင်ပန်းမြို့သို့ ဆရာဒဂုန်တာရာ၏ မွေးနေ့သို့ သွားရောက်သည်ဟု ပြောရာ ပြန်သွားကြသည်ဟု ဆိုသည်။ ကျနော် ပြန်ရောက်ပြီး ကိုလှတင်အောင်ဆီသို့ သွားရာ ထိုမခံချင်စရာ၊ ဒေါသထွက်စရာကောင်းသော ထိုမေးမြန်းမှုအကြောင်းကို “လှတင်အောင် မင်း ဘယ်လိုဖြေခဲ့သလဲကွ။ ဒါက ငါတို့ကို သက်သက်သိက္ခာချတာပဲ။ အကြမ်းဖက် ဗုံးခွဲတဲ့အလုပ် ငါတို့ ဘယ်တော့မှ မလုပ်ခဲ့ဘူး ဆိုတာ မသိဘူးလား။ ဘယ်လို ထောက်လှမ်းရေးလဲ။ နိုင်ငံရေးသမားတွေ၊ နိုင်ငံရေးပါတီတွေရဲ့ သမိုင်းကြောင်းကိုတောင် မသိဘဲ တွေ့တဲ့သူဖမ်း၊ တွေ့တဲ့လူ စစ် ဆိုတော့ တော်တော်ညံ့တဲ့ ထောက်လှမ်းရေးလို့ ပြောရမှာပေါ့ကွ” “မင်းကလည်း ငါ့ကို ဟောက်ဖို့ပဲ သိတယ်။ ငါ ဘယ်ငုံ့ခံလိမ့်မလဲကွာ။ ငါတို့ရဲ့မူ၊ ငါတို့ရဲ့ ပေါ်လစီကို ရှင်းပြတယ်။ ငါတို့ဟာ အကြမ်းဖက်သမားတွေ မဟုတ်ဘူး။ တော်လှန်ရေးသမားတွေ၊ နိုင်ငံရေးသမားတွေဆိုတာ ရှင်းပြခဲ့တယ်။ ဒီလိုခေါ်စစ်တာ ငါတို့နိုင်ငံရေးကို သိက္ခာကျစေတယ်လို့ စိတ်ရှည်လက်ရှည် ရှင်းပြခဲ့တာ။ ငါတို့ဆန့်ကျင်တဲ့ အကြမ်းဖက်ကိစ္စကို။ ငါတို့နဲ့ဆက်စပ်ပြီး မေးမြန်းတယ်ဆိုတာ ဘယ်လောက်မခံချင်စရာ ကောင်းလိုက်သလဲ။ ငါလည်း ခေါင်းငုံ့မခံဘဲ ပြန်ပြော၊ ပြန်ဖြေတာပေါ့ကွာ” သူ ရှင်းပြသည်ကို ကျနော် နားလည်ပါသည်။ သူ ခွန်းတုံ့ပြန်မည်ကိုလည်း သံသယမဝင်ပါ။ ကျနော်တို့သည် စနစ်ကိုသာ တော်လှန်ခြင်းဖြစ်သောကြောင့် ကျနော်တို့နှင့် အကြမ်းဖက်ဝါဒမှာ ပြဒါးတလမ်း၊ သံတလမ်း ဖြစ်နေပါသည်။ ကျနော်မှာ ကံကောင်း၍ အဖမ်းမခံရ၊ အမေးမခံခဲ့ရပေ။ နှစ်စဉ် မေ ၁၀ ရက်နေ့တိုင်း ကျင်းပလေ့ရှိသော ဆရာဒဂုန်တာရာ မွေးနေ့သို့ ၂ ရက်၊ ၃ ရက် ကြိုသွားလေ့ရှိသောကြောင့် ကျနော် အောင်ပန်းမြို့၌ ရောက်ရှိနေသည်ကို သက်ဆိုင်ရာ မြို့နယ်စစ်ထောက်လှမ်းရေးကို သူတို့မေးပြီးသား ဖြစ်ပေလိမ့်မည်။ သခင်အုန်းမြင့်၊ လေထီးဗိုလ်အုန်းမောင်၊ သခင်သိန်းမောင်၊ ဦးမောင်မောင်ခင်၊ ဖျာပုံနီလုံဦး စသောလူများနှင့် သွားရောက်လေ့ ရှိသောကြောင့် ထိုပွဲမှာ ကျနော် ဖျက်လေ့မရှိသလို သွားရောက်နေသောကြောင့်လည်း အမေးမခံရခြင်း ဖြစ်သည်။ ကိုလှတင်အောင် အသက်ရှင်စဉ် ကာလတလျှောက်လုံး ရဲဘော်များ၏ သာရေး၊ နာရေး၊ အစဉ်အလာရှိသော နိုင်ငံရေးသမားကြီးများ၏ သာရေး၊ နာရေးများသို့ သွားလေ့ရှိ၏။ သူ၏လုပ်အားနှင့် ရရှိသော ဝင်ငွေမှနေ ရဲဘော်များကို အတတ်နိုင်ဆုံး ပေးကမ်းလေ့ရှိ၏။ အထူးသဖြင့် ချို့တဲ့သော ရဲဘော်များကို ကူညီလေ့ရှိပါသည်။ ဘယ်နေ့ ဘယ်သွားတော့မည်ဆိုလျှင် သူက ကြို၍လာပြောတတ်သည်။ ထိုစဉ်က လက်ကိုင်ဖုန်းလည်း မကိုင်နိုင်။ လက်ကိုင်ဖုန်းခေတ်လည်း မတွင်ကျယ်သဖြင့် တွေ့ဆုံပြီး သတင်းဖလှယ်ကြ၏။ တပတ်တခါ ကျနော်သည် ကိုလှတင်အောင်နှင့် ကိုလှရွှေထံ သွားကာ လက်ဖက်ရည်ဆိုင်ထိုင်ပြီး စကားပြောဖြစ်ကြသည်။ စစ်အာဏာရှင်စနစ်ကို ဖြိုဖျက်ရေးအတွက်လည်း အမြဲနှလုံးသွင်းထားတတ်သဖြင့် အန်အယ်လ်ဒီအပေါ် အလေးပေး ထောက်ခံပါသည်။ စနေနေ့တိုင်း တက္ကသိုလ်ရိပ်သာလမ်းတွင် ပြုလုပ်လေ့ရှိသည့် ဒေါ်အောင်ဆန်းစုကြည်၏ တရားပွဲသို့လည်း သူသည် မပျက်မကွက် သွားရောက်နားထောင်တတ်၏။ ဒေါ်အောင်ဆန်းစုကြည်ကို သူက ဒီမိုကရေစီ ခေါင်းဆောင်အဖြစ် အသိအမှတ်ပြု ထောက်ခံလေသည်။ ထိုအချိန်က ဒီမိုကရေစီရေးအတွက် တိုက်ပွဲဝင်ခဲ့သော နိုင်ငံရေးသမားတိုင်းက ဒေါ်အောင်ဆန်းစုကြည်ကို သူ့လိုပင် သဘောထားခဲ့၊ ယုံကြည်ခဲ့ကြသည်။ ထိုယုံကြည်ချက်များ မည်မျှမှန်ကန်ပြီး သမိုင်းတွင် မည်သို့ အပြောင်းအလဲ ဖြစ်ပေါ်မလဲ ဆိုသည်ကိုကား သမိုင်းကို ဖြတ်သန်းသူတိုင်း ကိုယ့်ဘာသာ ရွေး၍ အဖြေပေးကြပေမည်။ အရေးကြီးသည်မှာ သမိုင်းကို လိမ်ညာ၍ မရနိုင်သလို သမိုင်းကို ပြင်၍လည်း မရနိုင်ပေ။ သမိုင်းဖြစ်ပေါ်မှုသည် အတားအဆီး ဆူးငြောင့်ခလုတ်များကို အပိတ်အဆို့မခံဘဲ ဆက်လက် ဖြစ်ပေါ်သွားမည်မှာ သေချာသည်။ သမိုင်းကို လိမ်ညာမရသလို သမိုင်းသည် အမှန်တရားကိုသာ သယ်ဆောင်သွားပေမည်။ မိမိဖြတ်သန်းနေသော အချိန်ကာလ အားလုံးကို သမိုင်းက မှတ်တမ်းတင်သွားပေမည်။ သမိုင်းဘီးသည် အမှန်တရားများကို ဖော်ဆောင်ပြီး ပုံမှန်လည်ပတ်လျက်ရှိသည်ကို သံသယဖြစ်စရာမလို။ သမိုင်းကို ဖန်တီးရှင်အဖြစ် မှတ်ယူခဲ့သော ဧကရာဇ်များ၊ စစ်ဘုရင်များ၊ နိုင်ငံရေးခေါင်းဆောင်များ အားလုံးမှာ ယခုအခါတွင် သမိုင်း၏ မှတ်ကျောက်ကို တင်ခံခဲ့ရပေပြီ။ ကိုလှတင်အောင်သည် သမိုင်းကိုဖန်တီးသော ပြည်သူများထဲ တဦးအပါအဝင် ဖြစ်သလို တော်လှန်ရေးသမားတယောက်အဖြစ်လည်း သူ့အကြောင်းကို သမိုင်းက မှတ်တမ်းတင်ခဲ့ပြီးပြီ။ သူ၏ ရပ်တည်ချက်၊ ယုံကြည်ချက်၊ သူ၏ အကောင်း၊ အဆိုး၊ သူ၏ စွန့်လွှတ်မှု စသည်တို့မှာ ကျနော်တို့ သူ့ကို ယခုအချိန်ထိ ဂုဏ်ပြုနေရခြင်း၊ အမှတ်တရ လွမ်းဆွတ်နေရခြင်း၊ သူ့ဂုဏ်ပုဒ်များကို အမှတ်တရ ရေးသားနေရခြင်းတို့က သူ့သမိုင်း ဘယ်လိုရှိခဲ့သလဲ ဆိုသည်ကို အကဲဖြတ်၍ ရပေသည်။ ဤသို့ဖြင့် ကိုလှတင်အောင်မှာ ကင်ဆာရောဂါ၏ ဖိစီးမှုကိုခံရပြီး သူ၏ နောက်ဆုံးအချိန်များကို ပင်ပန်းခက်ခဲစွာ ဖြတ်သန်းခဲ့ရပါသည်။ သူခင်မင်သော မိတ်ဆွေများ၊ ရဲဘော်များနှင့်လည်း တွေ့ဆုံခဲ့သည်။ သူ့ရောဂါကျွမ်းနေပြီ ဖြစ်ကြောင်းကိုလည်း သူ နားလည်သည်။ သေခြင်းတရားကိုလည်း မလွှဲမရှောင်သာ ရင်ဆိုင်ရတော့မည်ကိုလည်း သဘောပေါက်သောကြောင့် ရဲရဲရင့်ရင့်ပင် ရင်ဆိုင်သွားခဲ့ပါသည်။ သူသည် ကျောင်းသားသမဂ္ဂခေါင်းဆောင်တဦး ဖြစ်ခဲ့သလို သူယုံကြည်သော ကွန်မြူနစ်ပါတီ၏ ကေဒါတဦးလည်း ဖြစ်ခဲ့သည်။ အင်းစိန်ထောင်တွင် နိုင်ငံရေးပုဒ်မဖြင့် အကျဉ်းကျခဲ့သလို ကိုကိုးကျွန်းအကျဉ်းထောင်တွင်လည်း နိုင်ငံရေးပုဒ်မဖြင့်ပင် ၇ နှစ် အကျဉ်းကျခဲ့သည်။ ထောင်မှလွတ်ပြီးနောက် မကြာခဏ ဖမ်းဆီးစစ်ဆေး မေးမြန်းခံခဲ့ရသည်။ နောက် ပုဒ်မ ၁၀(က) ဖြင့် အဖမ်းခံခဲ့ရပြီးနောက် ယုံကြည်မှုအတွက် အသက်စွန့်လွှတ်ခဲ့သော လေးစားဖို့ကောင်းသည့် ရဲဘော်တဦးအဖြစ် သူ့ကို ယခုလို ဂုဏ်ပြု ရေးသားလိုက်ရခြင်း ဖြစ်ပါသည်။ ထက်မြက်
3 years Ago
More News
Up