တရုတ်နိုင်ငံသားများ၏ တရားမဝင်ဖရဲစိုက်ပျိုးနေမှုကို စိစစ်ရန်တိုက်တွန်း

A d v e r t i s e m e n t With Us

July 15, 2019

တရုတ်နိုင်ငံသားများ၏ တရားမဝင်ဖရဲစိုက်ပျိုးနေမှုကို စိစစ်ရန်တိုက်တွန်း 

တရုတ်နိုင်ငံသားတွေ မြန်မာနိုင်ငံထဲဝင်ရောက်ပြီး ဖရဲစိုက်ခင်းတွေ တရားမဝင် စိုက်ပျိုးနေတာကို စိစစ်သင့်တယ်လို့ ရှမ်းပြည်နယ်က တောင်သူတွေက ပြောပါတယ်။ လာရောက်စိုက်ပျိုးသူတွေဟာ တရုတ်၊ ကချင်နဲ့ ရှမ်းလူမျိုးတွေဖြစ်ပေမယ့် တရုတ်နိုင်ငံသားတွေဖြစ်ပြီး ဒေသန္တရ အုပ်ချုပ်ရေး တာဝန်ရှိသူတွေထံ ရံပုံငွေထည့်တာ၊ တောင်သူတွေဆီက မြေငှားပြီး စိုက်ပျိုးတာတွေ လုပ်ကိုင်နေကြတယ်လို့ ဆိုပါတယ်။ အခုလို စိုက်ပျိုးနေတာဟာ ဆယ်စုနှစ်တခုမက ရှိနေပြီး ရှမ်းပြည်နယ်ဘက်မှာတော့ လွန်ခဲ့တဲ့ ၅ နှစ်ခန့်ကစတင် စိုက်ပျိုးလာကြတယ်လို့ ပြောပါတယ်။ အခုလိုစိုက်ပျိုးသူတွေဟာ တရုတ်နိုင်ငံက စိုက်ပျိုးရေးသုံး ပစ္စည်းတွေ၊နည်းပညာတွေနဲ့ စိုက်ပျိုးကြပြီး တရုတ်နိုင်ငံဘက်ကို ပြန်လည်ရောင်းချကြတာဖြစ်လို့ ပြည်တွင်းက တောင်သူတွေ အနေနဲ့ ဈေးကွက်ယှဉ်ပြိုင်ဖို့ပါ အဆင်မပြေနိုင်ဘူးလို့ ရှမ်းတောင်သူတွေက ပြောပါတယ်။ သီပေါမြို့နယ် ဖရဲစိုက်တောင်သူ စိုင်းကျော်ညွန့် က "ကိုယ့်ပြည်တွင်းက စိုက်တဲ့ တောင်သူ က တရက်ကို တန် ၁၀၀ ထုတ်နိုင်တယ်ဆိုရင် သူတို့ပါ လာစိုက်ရင် ဒါ တန် ၁၀၀၀ ဖြစ်သွားမယ်။ အဲ့မှာ တရုတ်ပြည်မှာ ဝယ်လိုအားရောင်းလိုအား မမျှတဲ့ပြဿနာတွေ ဖြစ်လာနိုင်တယ်။ ဒါက ကျနော်တို့ တောင်သူတွေအပိုင်း၊ နံပါတ် နှစ်အပိုင်းက သဘာဝပတ်ဝန်းကျင်ပိုင်းကျတော့ တရားမဝင်ဆေး ပစ္စည်းတွေ၊ သွင်းအားစုတွေ သုံးတဲ့အတွက် ကျနော်တို့ ဒေသတွေ ညစ်ညမ်းမှု တွေ ဖြစ်ပေါ်မယ်။ ကျနော်တို့ မြေဆီတွေ နောက်ဆက်တွဲ ပြဿနာတွေရှိမယ်။ ဒါမျိုးတွေ ပေါ့ဗျာ၊သုံး အချက်အနေနဲ့ကတော့ အဓိက တရားဥပဒေစိုးမိုးရေးပေါ့။ သူတို့က ကျနော်တို့ နိုင်ငံကို ငွေပေးရင် ရပါတယ်။ မင်းတို့နိုင်ငံကတော့ ပိုက်ဆံပေးရင် အားလုံးလုပ်လို့ရတယ်။ ဂရုစိုက်စရာ မလိုဘူး ဆိုလည်း ကျနော်တို့ နိုင်ငံအပေါ်မှာ တရားဥပဒေစိုးမိုးရေးအရလည်း ပုံရိပ်အများကြီး ကျပါတယ်ဗျ''လို့ စိုင်းကျော်ညွန့်ကပြောပါတယ်။ နိုင်ငံတော် အစိုးရအနေနဲ့ ပြဋ္ဌာန်းထားတဲ့ ဥပဒေတွေနဲ့အညီ စိစစ်ပေးဖို့လိုပြီး ပြည်တွင်း တောင်သူတွေကို အကူအညီပေးဖို့လိုအပ်တယ်လို့လည်း တောင်သူတွေက ပြောပါတယ်။ ပြည်ပ နိုင်ငံသားတွေ အနေနဲ့ မည်သူမဆို လာရောက်စိုက်ပျိုးပါက ပြဋ္ဌာန်းထားတဲ့ ဥပဒေတွေအတိုင်း တရားဝင်စိုက်ပျိုးဖို့ လိုအပ်တယ်လို့ တောင်သူ စိုင်းကျော်ညွန့်က ပြောပါတယ်။ သီပေါမြို့နယ်အတွင်း မိုးဖရဲ ရာသီမှာ တရုတ်နိုင်ငံသားတွေ စိုက်ပျိုးတဲ့ ဖရဲဧက ၅၀၀၀ ခန့်ရှိပြီး မိုးဖရဲရာသီနဲ့ ဆောင်းဖရဲရာသီအတွင်း တဦးကို ၁၀ ဧကကနေ ဧက ၂၀၀ ခန့်ထိ မြေငှါးရမ်းစိုက်ပျိုးကြပါတယ်။ သီပေါမြို့နယ်အတွင်း ဖရဲစိုက်ပျိုးနေတဲ့ တရုတ်နိုင်ငံသား ရာဂဏန်းအထိ ရှိပြီး အဲ့ဒီထဲက တ၀က်ခန့်ဟာ မြန်မာနိုင်ငံသား စိစစ်ရေး ကတ်ပြားတွေလည်း ရှိနေတယ်လို့ စိုင်းကျော်ညွန့်က ပြောပါတယ်။ အခုလို စိုက်ပျိုးနေတာတွေကို ဒေသခံတောင်သူတွေ အနေနဲ့ တားမြစ်ဖို့ မလွယ်ကူတဲ့ အတွက် အာဏာပိုင်တွေ အနေနဲ့ ကြပ်မက်စိစစ်ပေးဖို့လိုအပ်တယ်လို့ တရုတ်နိုင်ငံဘက်ကို ဖရဲစိုက်ပျိုး တင်ပို့သူ တဦးကလည်းပြောပါတယ်။ ဖရဲစိုက်ပျိုးတင်ပို့ရောင်းချသူ ကိုကျော်လင်း က "အခုဟာ လက်ရှိကကျနော်တို့ ဒေသခံတောင်သူတွေ စိုက်နိုင်တာက ဧကငါးရာ၊ သူတို့စိုက်တာက တထောင်ကျော်မယ်။ ဒါဆိုလို့ရှိရင် ဈေးကွက်မှာသွားပြီး အများကြီးထိခိုက်တယ်။ မစိုက်ဖို့ အတွက် တားဖို့လို့ ဆိုတော့ကျလည်း သက်ဆိုင်ရာ အကြောင်းတရားတွေက အများကြီး၊ ဒါတွေကို တောင်သူတွေ အနေနဲ့ကျလည်း လိုက်ပြီးမလုပ်နိုင်ဘူး။ အာဏာပိုင် အဖွဲ့အစည်းတွေ၊ ကျန်တဲ့ ဒေသဆိုင်ရာ အဖွဲ့အစည်းတွေက နေပြီးတော့ ဝိုင်းဝန်းကြပ်မတ်ပြီး စီစဉ်ပေးမှ တောင်သူတွေ ရည်ရှည် ပိုပြီးအကျိုးရှိမယ်''လို့ ပြောပါတယ်။ မြန်မာနိုင်ငံ ပဲခူး၊ စစ်ကိုင်း၊ မန္တလေး၊ ရန်ကုန်၊ ဧရာဝတီစတဲ့ တိုင်းဒေသကြီး တွေအပြင် မွန်ပြည်နယ်နဲ့ ရှမ်းပြည်နယ် ကချင်ပြည်နယ်တွေမှာပါ အခုလို ဖရဲစိုက်ပျိုးကြပါတယ်။ သီပေါ မြို့နယ်မှာ မြေတဧက ကျပ်၂သိန်းခွဲ နဲ့ ငှားရမ်းစိုက်ပျိုးနေကြတာဖြစ်ပြီး လူနေထိုင်ခွင့်ပါ ရှိကြောင်းနဲ့ ထွက်ရှိလာတဲ့ ဖရဲတွေကို မူဆယ် ၁၀၅မိုင်အသီးကွင်းမှာ ရောင်းချနေတယ်လို့ တရုတ်နိုင်ငံသားတဦးက ဖရဲစိုက်ခင်းမှာ  ပြောပါတယ်။ အခုလို စိုက်ပျိုးနေတာတွေကို ဖရဲသခွားအသင်းချုပ်ကနေ လွန်ခန့်တဲ့  ၃ နှစ်ခန့်ကတည်း က တာဝန်ရှိသူတွေထံ တင်ပြထားပေမယ့် ထူးခြားမှု မရှိဘူးလို့ သီပေါမြို့နယ် နာနတ်သီး စိုက်ပျိုးထုတ်လုပ်တင်ပို့ရောင်းချသူများ အသင်းက သိရပါတယ်။ သတင်း- ထိန်ထိန်လင်း
2 years Ago
Up