တွန်းဇံ

January 14, 2022

တွန်းဇံတွင် ကသည်းသူပုန်အဖွဲ့နှင့် ချင်းပြည်သူ့ကာကွယ်ရေးတပ်ဖွဲ့တို့ တိုက်ပွဲဖြစ်ပွား

အိန္ဒိယနိုင်ငံ၊ မဏီပူရ် ပြည်နယ်အခြေစိုက် ကသည်းသူပုန်တွေနဲ့ ချင်းပြည်သူ့ကာကွယ်ရေးပူးပေါင်းတပ်ဖွဲ့တွေ ချင်းပြည်နယ်၊ ဖလမ်းခရိုင်၊ တွန်းဇံမြို့နယ် စဲနမ်ကျေးရွာအနီးမှာ ဇန်နဝါရီ ၁၃ ရက်နေ့မနက်ပိုင်းက တိုက်ပွဲဖြစ်ပွားခဲ့ကြတယ်လို့ ချင်း PDF အဖွဲ့တွေဆီက သိရပါတယ်။

တိုက်ပွဲရလဒ်ကိုတော့ ပြည်သူ့ကာကွယ်ရေးတပ်ဖွဲ့တွေအနေနဲ့ ဇန်နဝါရီ ၁၃ရက်နေ့ ညပိုင်းအထိ ထုတ်ပြန်ထားတာ မရှိသေးပါဘူး။ 

အခုလို ကသည်းသူပုန်တွေကို တိုက်ခိုက်တာဟာ ဒေသခံပြည်သူ့ကာကွယ်ရေးတပ်ဖွဲ့တွေရဲ့ သဘောတူညီမှုနဲ့ တိုက်ခိုက်တာဖြစ်ပြီး စစ်ကောင်စီတပ်နဲ့နီးစပ်တဲ့ အဖွဲ့အစည်းတွေကို ကြိုတင်ဟန့်တားတဲ့အနေနဲ့ တိုက်ခိုက်တာလို့ Chinland Joint Defense Committee  တာဝန်ရှိသူတစ်ဦးက ဒေသခံမီဒီယာတစ်ခုကို ပြောထားပါတယ်။

တွန်းဇံမြို့နယ်က ဆရာမတစ်ဦးအား ကသည်းသူပုန်တစ်ဦးက ၂၀၁၉ ခုနှစ် နိုဝင်ဘာလ သေနတ်နဲ့ပစ်ခတ်သတ်ဖြတ်ခဲ့ပြီး မဏီပူရ် ပြည်နယ်ဘက် ထွက်ပြေးတိမ်းရှောင်နေတာကိုလည်း ဒီနေ့အထိ အရေးမယူနိုင်သေးဘူးလို့ သိရပါတယ်။

ကသည်းသူပုန်တွေဟာ စစ်ကောင်စီတပ်နဲ့ ဆက်ဆက်ကောင်းမွန်တဲ့ ဆက်ဆံရေးရှိပြီး ခေါင်းဆောင်ပိုင်းတွေဟာ ချင်းပြည်နယ်၊ တွန်းဇံမြို့နယ်၊ စစ်ကိုင်းတိုင်းဒေသကြီးအတွင်းက တမူး၊ ကလေး၊ မုံရွာ စတဲ့မြို့တွေမှာ နေထိုင်ကြတယ်လို့ သိရပါတယ်။

တမူး- TSG ကလည်း ကသည်းသူပုန်တွေဟာ စစ်ကောင်စီနဲ့ပူးပေါင်းနေတာကြောင့် စက်တင်ဘာလကတည်းက သတိပေးချက် ထုတ်ပြန်ထားပေမယ့် စစ်ကိုင်းတိုင်းဒေသကြီး တမူးမြို့မှာ ခိုလှုံနေတဲ့အပြင် စစ်ကောင်စီတပ်နဲ့ ပူးပေါင်းနေတယ်လို့ တမူး- TSG က ဆိုထားပါတယ်။

ပူးပေါင်းမှုကို ရပ်တန့်ဖို့နဲ့ မရပ်တန့်ပါက တော်လှန်ရေးပြီးဆုံးပါက မြန်မာနိုင်ငံအတွင်း ခိုလှုံခွင့်လုံးဝပေးတော့မှာမဟုတ်ကြောင်း ထုတ်ပြန်ထားပါတယ်။

တမူး ပြည်သူ့ကာကွယ်ရေးတပ်ဖွဲ့တွေနဲ့ စစ်ကောင်စီတပ်ဖွဲ့တို့ တိုက်ပွဲဖြစ်ပွားစဉ်ကလည်း ကသည်းသူပုန်တွေက စစ်တပ်ဝတ်စုံဝတ်ဆင်ပြီး PDF တွေကို တိုက်ခိုက်ခဲ့တယ်လို့ တမူး PDFအဖွဲ့က ၂၀၂၁ မေလမှာ ထုတ်ပြန်ထားပါသေးတယ်။

တွန်းဇံမြို့နယ်ရဲ့အရှေ့ဘက်မှာ စစ်ကိုင်းတိုင်းဒေသကြီး ကလေးခရိုင်နဲ့ တမူးမြို့နယ် တည်ရှိပြီး တောင်ဘက်မှာ တီးတိန်မြို့နယ်၊ အနောက်ဘက်မှာ အိန္ဒိယနိုင်ငံ၊ မီဇိုးရမ်းပြည်နယ်နဲ့ ထိစပ်နေပြီး မြောက်ဘက်မှာတော့ အိန္ဒိယနိုင်ငံ၊ မဏိပူရ် မြို့နယ်နဲ့ နယ်မြေချင်းထိစပ်နေတာဖြစ်ပါတယ်။

9 months Ago

September 8, 2021

တွန်းဇံမြို့မရဲစခန်းက ရဲတပ်သား ၅ ဦး CDM ပြုလုပ်ပြီး CDF တပ်ဖွဲ့နဲ့ ပူးပေါင်း

ချင်းပြည်နယ် တွန်းဇံမြို့မရဲစခန်းက ရဲတပ်သား ၅ ယောက်ဟာ NUG အစိုးရက D Day ကြေညာတဲ့ စက်တင်ဘာလ ၇ ရက်နေ့မှာ အာဏာဖီဆန်ရေးလှုပ်ရှားမှု CDM ပြုလုပ်ပြီး ပူးပေါင်းလာတယ်လို့ CDF တပ်ဖွဲ့က ထုတ်ပြန်ပါတယ်။

တွန်းဇံမြို့မ ရဲစခန်းက ရဲတပ်သား ကိမ်ကိမ်းမန်အပါအဝင် ရဲတပ်သား ၅ ယောက်ဟာ နိုင်ငံတော်အာဏာကို မတရားသိမ်းပိုက်ထားတဲ့ အာဏာသိမ်းစစ်အုပ်စုရဲ့ လက်အောက်မှာ တာဝန်မထမ်းဆောင်လိုတာကြောင့် CDM ပြုလုပ်တာလို့ ဆိုပါတယ်။

ပြည်သူလူထုရဲ့ ဆန္ဒနဲ့အညီ ရွေးချယ်တင်မြှောက်တဲ့ ဒီမိုကရေစီ အစိုးရတစ်ရပ်ပေါ်ပေါက်မှသာ မိမိတို့ရဲ့ တာဝန်ဝတ္တာရားတွေကို ပြန်လည်ထမ်းဆောင်မယ်လို့ ဖော်ပြထားပါတယ်။

1 year Ago
Up