တော်လှန်ရေးလူငယ်များ

January 11, 2022

တော်လှန်ရေးလူငယ်များ ရိက္ခာအတွက် မွေးမြူရေးလုပ်၊ လက်နက်ဝယ်ရေး ကူညီရန် တောင်းဆို

မြေပြင်မှာ ရိက္ခာအတွက် ကြက်နဲ့ ဆိတ် မွေးမြူရေးအပြင် အွန်လိုင်းပဒေသာပင် ခေါင်းစဉ်အောက်ကနေ ဝင်ငွေရှာပြီး တော်လှန်ရေးအတွက် လိုအပ်တဲ့ လက်နက်တွေ ဝယ်ယူဖို့အတွက် ပြည်သူတွေ ဝိုင်းဝန်းကူညီအားပေးကြဖို့ ပြည်သူ့ကာကွယ်ရေးတပ်ဖွဲ့ဝင် လူငယ်တွေက တောင်းဆိုလိုက်ပါတယ်။

နွေဦးကြက်ခြံနဲ့ ဆိတ်မွေးမြူရေးလုပ်ငန်းတွေကို တော်လှန်ရေးရဲဘော်တွေရဲ့ ရိက္ခာအတွက် မွေးမြူရေးလုပ်ငန်းတွေ ဆောင်ရွက်နေပြီး youtube, website, application တွေနဲ့ ဝင်ငွေရှာဖွေရာမှာ အောင်မြင်နေတယ်လို လွတ်မြောက်နယ်မြေတနေရာက တော်လှန်ရေးလူငယ်တွေက ပြောပါတယ်။ 

ပြီးခဲ့တဲ့လက ကျပ်ငွေ ၃၈ သိန်းအထိ ရရှိခဲ့ပြီး ဒေါ်လာသောင်းနဲ့ချီပြီး ဝင်ငွေရရှိဖို့ ကြိုးစားနေတယ်လို့ ဆိုပါတယ်။

တော်လှန်ရေးလူငယ်တဦးက “ပြီးခဲ့တဲ့ လကစပြီး ၃၈ သိန်း ရတယ်၊ ဒီလဆို ဒေါ်လာ ၁ သောင်းအထိ မှန်းထားတယ်။ အဲဒီကရတဲ့ ငွေကြေးတွေအားလုံးကို ရဲဘော်တွေအတွက် လက်နက်ဝယ်ယူနိုင်ဖို့ အသုံးချသွားမှာပါ။ ကျနော်တို့ youtube channel ကလည်း ၂ ခု ဖြစ်သွားပြီ။ website ရှိတယ်၊ application ကလည်း မကြာခင် ထွက်တော့မယ်။ အဲ့ဒါတွေ အားလုံးပေါင်းရင် အနည်းဆုံး ဒေါ်လာ ၁ သောင်း ပျမ်းမျှရမယ်လို့ မှန်းထားတာပါ။ ဒါမို့ ကြုံကြိုက်ခဲ့ရင် ကျနော်တို့ ဖေ့ဘွတ်ခ်ပေ့ချ်ကို  like လုပ်ပေးပြီး ဝင်ကြည့်ပေးပါ။ ကူညီနိုင်သမျှ ကူညီပေးပါဦး တော်လှန်ရေးဟာလည်း တဖြည်းဖြည်းနဲ့ အရှိန်ရလာပါပြီ။ အောင်ပွဲကလည်း မဝေးတော့ပါဘူး။ ပြည်သူအားလုံး အားတင်ထားကြပါ” လို့ ပြောပါတယ်။

အွန်လိုင်းပဒေသာပင်အောက်က ဝင်ငွေရှာဖွေရေးတွေကို လူငယ်တွေ လုပ်ဆောင်နေကြတဲ့အပြင် တော်လှန်ရေး ရဲဘော်တွေအတွက် ရိက္ခာနဲ့ နောက်တန်းရဲဘော်တွေအတွက် အားလပ်ချိန် အလုပ်အကိုင် အခွင့်အလမ်း ရစေဖို့၊ တော်လှန်ရေးပြီးတဲ့အခါ ဒေသအတွက် ကောင်းမွန်တဲ့ လုပ်ငန်းတစ်ခု ကျန်ရှိနေခဲ့ဖို့ ရည်ရွယ်ပြီး ပြီးခဲ့တဲ့ ၂၀၂၁ နိုဝင်ဘာလကတည်းက စတင် အကောင်အထည် ဖော်ခဲ့တာပါ။ 

ဒီဇင်ဘာလကစတင်ပြီး ကြက်မွေးမြူရေးအတွက် စတင်ခဲ့ရာ အခုချိန်မှာ ဆိတ်ကိုပါ မွေးမြူနေပြီလို့ သိရပါတယ်။

“အခက်အခဲတွေကတော့ အများကြီးပါပဲ။ နေရာအခက်အခဲ၊ ခွင့်ပြုချက်ရဖို့ လုပ်ခဲ့ရတာတွေ၊ ဒေသခံတွေရဲ့ ယုံကြည်မှုရဖို့ ကြိုးစားခဲ့ရတာတွေနဲ့ ကြက်မွေးမြူရေး အတွေ့အကြုံ မရှိတာတွေ၊ ဆောက်လုပ်ရေးနဲ့ပက်သက်တဲ့ အခက်အခဲတွေ အများကြီးပါပဲ။ ဒါပေမဲ့ ကျနော်တို့ ရဲဘော်တွေရဲ့ စည်းလုံးညီညွတ်မှုနဲ့ အားလုံးကို ဖြတ်ကျော်နိုင်ခဲ့ပြီး အခုဆို ကိုယ်မျှော်မှန်းထားတဲ့အတိုင်း နွေဦးကြက်ခြံလေးဟာ အဆင်ပြေပြေရှိနေပါပြီ" လို့ ဆိုပါတယ်။

စတင် အကောင်အထည်ဖော်ရာမှာ အခက်အခဲတွေ ရှိခဲ့ပေမယ့် အောင်မြင်အောင် ဆောင်ရွက်နိုင်ခဲ့ပြီး တခြား လွတ်မြောက်နယ်မြေမှာလည်း အလားတူ မွေးမြူရေးတွေ လုပ်ကိုင်ချင်ရင် နည်းလမ်းတွေ မျှဝေပေးသွားမယ်လို့လည်း ဆိုပါတယ်။ 

ဒီကရတဲ့ အကျိုးအမြတ်တွေအနေနဲ့ ရောင်းချလို့ရတဲ့ ငွေကြေးကို ရဲဘော်တွေအတွက် လိုအပ်တာတွေ ဝယ်ယူဖို့ အသုံးချမှာဖြစ်ပြီး ကြက်သားနဲ့ ကြက်ဥတွေကိုတော့ စားနပ်ရိက္ခာအတွက် အသုံးပြုသွားမှာ ဖြစ်ပါတယ်။

1 year Ago

September 12, 2021

တော်လှန်ရေးလူငယ်များကို ကိုလိုနီခေတ် ဖောက်ခွဲရေး ဥပဒေဖြင့် တရားစွဲ

စစ်ကောင်စီဟာ တော်လှန်ရေးလူငယ်တွေကို လက်နက်ဥပဒေအပါအဝင် ကိုလိုနီခေတ်က ဖောက်ခွဲရေးနဲ့ ဖောက်ခွဲရေး ပစ္စည်းဆိုင်ရာဥပဒေနဲ့ပါ ပုဒ်မတပ်တရားစွဲလာတာ တွေ့ရတယ်လို့ သင့်အတွက်ရှေ့နေများအဖွဲ့က ပြောပါတယ်။

အာဏာသိမ်းပြီးနောက်ပိုင်း ဇွန်လလောက်ကစပြီး လူငယ်တွေက မြို့ပြပြောက်ကျားစနစ်နဲ့ စစ်ကောင်စီကိုခုခံတိုက်ခိုက်ခဲ့တာပါ။ 

စစ်ကောင်စီက သပိတ်လူငယ်တွေကို ဖမ်းဆီးခဲ့တုန်းက ပုဒ်မ ၅၀၅(က)နဲ့ တရားစွဲခဲ့ပြီး နောက်ပိုင်းလူငယ်တွေကို ဖမ်းဆီးရာမှာတော့ ပူးတွဲဖမ်းမိတဲ့ လက်နက်အမျိုးအစားအပေါ်မူတည်ပြီး လက်နက်ဥပဒေပုဒ်မ  ၁၉(ဃ)၊ ၁၉(စ)၊ ၁၉(င) နဲ့ ပုဒ်မတပ်လာတာကိုတွေ့ရတယ်လို့ အကူအညီပေးနေတဲ့ သင့်အတွက်ရှေ့နေများအဖွဲ့က ပြောပါတယ်။

လက်နက်ဥပဒေဟာ အမြင့်ဆုံးပြစ်ဒဏ်အဖြစ် ထောင် ၃ နှစ်အထိချနိုင်တဲ့ ဥပဒေဖြစ်ပါတယ်။ ဖောက်ခွဲမှုတွေနဲ့ပတ်သက်ပြီး အဖမ်းခံရတဲ့ လူငယ်တွေကိုတော့ ကိုလိုနီခေတ်တုန်းက အသုံးပြုခဲ့တဲ့ ဖောက်ခွဲရေးနဲ့ဖောက်ခွဲရေးပစ္စည်းဆိုင်ရာဥပဒေနဲ့ ပုဒ်မတပ်လာတာတွေ့ရတယ်လို့ဆိုပါတယ်။

ဖောက်ခွဲရေးနဲ့ဖောက်ခွဲရေးပစ္စည်းဆိုင်ရာဥပဒေဟာ အမြင့်ဆုံးပြစ်ဒဏ်အဖြစ်ထောင်ဒဏ် ၁၀ နှစ်ကနေ တစ်သက်တစ်ကျွန်းအထိချမှတ်နိုင်တဲ့ဥပဒေဖြစ်ပါတယ်။ ဖောက်ခွဲရေးနဲ့ဖောက်ခွဲရေး ပစ္စည်းဆိုင်ရာဥပဒေနဲ့ စစ်ကောင်စီက စွဲတဲ့အမှု ၃ မှုအထိရှိ နေတယ်လို့ဆိုပါတယ်။

တရားလွှတ်တော် ရှေ့နေတစ်ဦးက "လက်နက်မှုက ပုဒ်မ ၁၉ နဲ့ စွဲတယ််ဆိုရင် ထောင်ဒဏ် ၃ နှစ်ရှိပါတယ်။ ပုဒ်မ ၁၉ (ဃ) ပြင်ဆင်လိုက်တယ်လို့ကြားတယ်။ ဘယ်တုန်းက ဘယ်လို ပြင်ဆင်တယ်ဆိုတာ ကျမတို့မသိလိုက်ဘူး။ ဖောက်ခွဲရေးနဲ့ဖောက်ခွဲရေးပစ္စည်းဆိုင်ရာ ဥပဒေဆိုတာလည်းရှိတယ်။ မသုံးတာတော်တော်ကြာပြီ အခု ဒီတစ်ခေါက်မှာ ဖောက်ခွဲနဲ့တရားစွဲတာတွေ တွေ့ရတယ်။ တရားစွဲထားတဲ့အဆင့်ပဲရှိသေးတယ်။ ကြားနာတာတွေတော့ မလာသေးဘူး။ အဲ့ဒါက ၃ မှုလောက်ရှိနေတယ်။ ထောင်ဒဏ် ၁၀ နှစ်ကနေ တစ်သက်တစ်ကျွန်း အထိချလို့ရတယ်။ ဒါက ကိုလိုနီလက်ထက်တုန်းကဥပဒေ။ သုံးတာတော့ မတွေ့သေးဘူး။ ကိုယ့်ရဲ့အတွေ့အကြုံနဲ့လေ့လာမှုအားနည်းတာလည်းဖြစ်နိုင်ပါတယ်။ ကြားကာလမှ အဲ့ဒီဥပဒေကို သုံးတာမသိဘူး။ အခုကြမှ သုံးတာတွေ့ရတယ်။"လို့ ပြောပါတယ်။

သင့်အတွက်ရှေ့နေများအဖွဲ့ဟာ စစ်အာဏာသိမ်းပြီးနောက်ပိုင်း မတ်လ ၁ ရက်နေ့ သပိတ်လူငယ်တွေ စတင်ဖမ်းဆီးခံရကတည်းက အင်းစိန်ထောင်မှာ ထိန်းသိမ်းခံရတဲ့လူငယ်တွေကို အကူအညီပေးခဲ့တဲ့ရှေ့နေအဖွဲ့ဖြစ်ပါတယ်။

သင့်အတွက်ရှေ့နေများအဖွဲ့ကို အကူအညီပေးဖို့ တောင်းဆိုထားတဲ့အမှု တစ်ထောင်နီးပါးရှိခဲ့ပြီး အဖမ်းခံရတဲ့အမှုသည်တွေနဲ့ တွေ့ခွင့်မရခဲ့တဲ့အတွက် အကူအညီပေးဖို့ခက်ခဲခဲ့တယ်လို့ဆိုပါတယ်။

အခုလူငယ်တွေကို လက်နက်မှု၊ ဖောက်ခွဲရေးနဲ့ဖောက်ခွဲရေးပစ္စည်းဆိုင်ရာဥပဒေတွေနဲ့ အစွဲခံရတာကို လူငယ်ရှေ့နေအဖွဲ့တွေက အကူအညီပေးဖို့ ကြိုးစားနေပေမယ့် စစ်ကောင်စီက လုပ်ချင်ရာလုပ်တာဖြစ်တဲ့အတွက် အကျိုးရှိလာမှာမဟုတ်ဘူးလို့ ဝါရင့်ရှေ့နေကြီး တစ်ယောက်က သုံးသပ်ပါတယ်။

ဝါရင့်ရှေ့နေကြီးတစ်ဦးက "အင်္ဂလိပ်ကတို့ကို ဓားမြှောင်တောင်ကိုင်ခွင့်မပေးခဲ့ဘူး။ သစ်ခုတ်တဲ့ ဓားတို့ဘာတို့ ဓားလေးတောင်ကိုင်လို့မရဘူး။ အဲ့ဒီဥပဒေကို ဒီနေ့အထိမဖျက်သေးဘူး။ NLD အစိုးရလက်နက်မှာလည်းမဖျက်ဘူး။ ဧည့်စာရင်းဥပဒေကို ဖျက်တာလည်း စစ်တပ်က သိပ်စိတ်ဆိုးတယ်။ လက်နက်ဥပဒေကိုလည်း NLD အစိုးရက မဖျက်ရဲဘူးဗျာ။ အဲ့ဒါက ရာဇသတ်ကြီးဥပ‌ဒေထဲမှာမရှိဘူး။ အထူးဥပဒေ အပိုင်း ၁ ၊ ၂ ဆိုတာရှိတယ်။ အဲ့ထဲမှာပါတယ်။ အထူးဥပဒေဆိုတာ သီးခြားရှိတယ်။"လို့ ပြောပါတယ်။

အင်းစိန်ထောင်တွင်း ကိုဗစ်ကူးစက်တာတွေကြောင့် စစ်ကောင်စီက ဇူလိုင် ၈ ရက်နေ့ကစပြီး Lock Down ချခဲ့ပါတယ်။ စစ်ကောင်စီက အင်းစိန်ထောင်တွင်း အထူးတရားရုံး ၃၈ ရုံး၊ စစ်ခုံရုံး ၆ ရုံးဖွင့်လှစ်ခဲ့ပြီး  ပုဒ်မ ၅၀၅(က) နဲ့ အဖမ်းခံရသူတွေကို စစ်ဆေးခဲ့ပါတယ်။ 

ဇူလိုင် ၅ ရက်နေ့မှာတော့ ကိုဗစ်တတိယလှိုင်းကြောင့် ထောင်တွင်း တရားရုံးတွေကို ရပ်နားခဲ့ပါတယ်။ အဲ့ဒီနောက်ပိုင်းကတည်းက ထောင်တွင်းအခြေအနေတွေကို  ရှေ့နေတွေက သိခွင့်မရတော့ပါဘူး။ 

အင်းစိန်ထောင်ကို စစ်ကောင်စီက စက်တင်ဘာ ၁၀ ရက်နေ့အထိ Lock Down သက်တမ်းထပ်တိုးထားတာကြောင့် ပုဒ်မ ၅၀၅(က)နဲ့ အစွဲခံထားရသူတွေရဲ့အမှုတွေကို အဲ့ဒီနောက်ပိုင်းမှပြန်စစ်နိုင်လိမ့်မယ်လို့  အင်းစိန်ထောင်နဲ့နီးစပ်တဲ့ရှေ့နေတွေက ပြောပါတယ်။

ဇွန်လ ၃၀ ရက်နေ့မှာ အင်းစိန်ထောင်ထဲက ပုဒ်မ  ၅၀၅(က)နဲ့ အစွဲခံထားရသူ ၇၀၀ ကျော်ကို စစ်ကောင်စီက ပြန်လွှတ်ပေးခဲ့ပြီး လက်ရှိအချိန်အထိ အင်းစိန်ထောင်ထဲမှာ ပုဒ် ၅၀၅(က)နဲ့ အစွဲခံထားရသူ ၃၀၀၀ ကျော်ကျန်နေတယ်လို့ ရှေ့နေ တွေက ပြောပါတယ်။

1 year Ago
Up