တောင်းဆို

February 1, 2022

ဒီမိုကရေစီလမ်းကြောင်းဆီ အမြန်ပြန်သွားရန် မြန်မာစစ်အာဏာရှင်ကို တောင်းဆို

မြန်မာနိုင်ငံကို ဒီမိုကရေစီလမ်းကြောင်းဆီသို့ အမြန်ဆုံး ပြန်လည် ပို့ဆောင်ဖို့  အီးယူနဲ့ ကမ္ဘာ့နိုင်ငံပေါင်း ၉ နိုင်ငံက မြန်မာ စစ်အာဏာရှင်ကို ထပ်မံတောင်းဆိုလိုက်ပါတယ်။

ဥရောပသမဂ္ဂကိုယ်စား အဆင့်မြင့်ကိုယ်စားလှယ်နဲ့ အဲလ်ဘေးနီးယား၊ သြစတေးလျ၊ ကနေဒါ၊ နယူးဇီလန်၊ နော်ဝေး၊ ကိုရီးယား၊ ဆွစ်ဇာလန်၊ ယူကေနဲ့ အမေရိကန် နိုင်ငံခြားရေးဝန်ကြီးတွေက မြန်မာနိုင်ငံ စစ်အာဏာသိမ်းမှု တနှစ်ပြည့်တဲ့ ဖေဖော်ဝါရီ ၁ ရက်မှာ  ပူးတွဲထုတ်ပြန် တောင်းဆိုလိုက်တာပါ။

မြန်မာနိုင်ငံမှာ အရေးပေါ်အခြေအနေကြေညာထားတာကို  အဆုံးသတ်ဖို့ လူသားချင်းစာနာမှု အကူအညီတွေ အတားအဆီးမရှိပေးအပ်ခွင့်ပြုဖို့နဲ့ နိုင်ငံခြားသားတွေ အပါအဝင် မတရားထိန်းသိမ်းခံထားသူတွေအားလုံးကို  ပြန်လွှတ်ပေးဖို့လည်း တိုက်တွန်းတောင်းဆိုပါတယ်။ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ တခြား ထိန်းသိမ်းခံန နိုင်ငံရေးသမားတွေအပေါ်  ပြစ်ဒဏ်ချမှတ်တဲ့ အပေါ် လွန်စွာ စိုးရိမ်မကင်းဖြစ်ရတယ်လို့ဆိုပါတယ်။

မြန်မာစစ်တပ်အာဏာသိမ်းယူပြီးနောက် တစ်နှစ်အကြာမှာ ပြင်းထန်ဆိုးဝါးတဲ့ အကျိုးဆက်တွေ ရှင်းလင်းပြတ်သားစွာမြင်နေရကာ ပြည်သူ ၁၄ သန်းကျော် လူသားချင်းစာနာထောက်ထားမှု အကူအညီများလိုအပ်နေကာ  စီးပွားရေးမှာလည်း ကပ်ဆိုးကာလအတွင်းသို့ ရောက်နေတယ်လို့ ထောက်ပြထားပါတယ်။ အာဏာသိမ်းယူခဲ့ချိန်ကစပြီး အိုးအိမ်စွန့်ခွါထွက်ပြေးခဲ့ကြရသူ လူ ၄၀၀,၀၀၀ကျော်နဲ့  ပတ်သက်ပြီးလည်း မိမိတို့ အလွန်စိုးရိမ်ပူပန်မိတယ်လို့လည်းဆိုပါတယ်။

ဒီမိုကရေစီစနစ်ရဲ့ ရလဒ်ကောင်းတွေ ကပြောင်းကပြန်ဖြစ်ကာ နိုင်ငံတစ်ဝန်းတွင် ပဋိပက္ခတွေ ကူးစက်ပြန့်ပွားနေပြီး မြန်မာနိုင်ငံနဲ့ ဒေသတွင်းနိုင်ငံတွေရဲ့ ငြိမ်းချမ်းရေးနဲ့ တည်ငြိမ်အေးချမ်းသာယာရေးကိုပင် ရိုက်ခတ်နေတဲ့ ဆိုးဝါးလှတဲ့ ကပ်ဆိုက်မှုအတွက် စစ်တပ်မှာ တာဝန်ရှိတယ်လို့ ပူးတွဲကြေညာချက်မှာ ဖော်ပြထားပါတယ်။

အကြမ်းဖက်မှုတွေ ချက်ချင်းရပ်တန့်ဖို့ သက်ဆိုင်သူအားလုံး အပြုသဘောဆောင် ဆွေးနွေးမှုနဲ့ အကျပ်အတည်းကို ငြိမ်းချမ်းစွာ အဖြေရှာကြဖို့လည်း  ထပ်မံတောင်းဆိုထားပါတယ်။

ဒါ့အပြင် အာဆီယံဘုံသဘောတူညီချက်ငါးရပ်နဲ့ ဒါကို အကောင်အထည်ဖော်ရန်ကြိုးပမ်းနေတဲ့ အာဆီယံအထူးကိုယ်စားလှယ်ကိုထောက်ခံကြောင်းနဲ့ ဘုံသဘောတူချက် ၅ ရပ်ကို အကောင်အထည်ဖော်ဆောင်ဖို့ ကြိုးပမ်းတဲ့အခါ အထူးကိုယ်စားလှယ်အနေနဲ့ သက်ဆိုင်သည့်လူပုဂ္ဂိုလ်အသီးသီးနဲ့ တွေ့ဆုံခွင့်ရရှိရေး ထိထိရောက်ရောက် ထိတွေ့ဆောင်ရွက်ဖို့ စစ်အာဏာရှင်ကို တောင်းဆိုတယ်လို့လည်း နိုင်ငံခြားရေးဝန်ကြီးတွေရဲ့ ပူးတွဲကြေညာချက်မှာ ဖော်ပြပါတယ်။

5 months Ago

November 1, 2021

ရေနံနှင့်သဘာဝဓာတ်ငွေ့လုပ်ငန်းကို ပိတ်ဆို့အရေးယူရန် ကျောင်းသားသမဂ္ဂ ၂၃၆ ဖွဲ့ နိုင်ငံတကာ သို့ တောင်းဆို

နိုင်ငံတကာ အစိုးရတွေအနေနဲ့ အာဏာသိမ်းစစ်ကောင်စီအောက် ရောက်ရှိနေတဲ့ မြန်မာ့ ရေနံနဲ့ သဘာဝဓာတ်ငွေ့လုပ်ငန်းကို ပစ်မှတ်ထားပိတ်ဆို့အရေးယူမှု ပြုလုပ်ဖို့ပြည်တွင်း ပြည်ပကျောင်းသားသမဂ္ဂ စုစုပေါင်း ၂၃၆ ဖွဲ့က ပူးပေါင်းတောင်းဆိုလိုက်ပါတယ်။

အဆိုပါ ပူးတွဲကြေညာချက်ကို အောက်တိုဘာ ၃၁ ရက်စွဲနဲ့ ထုတ်ပြန်လိုက်တာဖြစ်ပြီး နိုင် ငံတကာ ကုမ္ပဏီတွေကနေ အကြမ်းဖက် တရားမဝင်စစ်အုပ်စုဆီ ငွေကြေးစီးဆင်းမှုတွေ လုံးဝရပ်တန့်စေဖို့နဲ့ မြန်မာနိုင်ငံကို ပေးချေရမယ့် ငွေတွေကို ဒီမိုကရေစီ ပြန်လည်ရရှိပြီး ပြည်သူ့အစိုးရ ပေါ်ပေါက်ချိန်ထိ ဘဏ်တခုမှာ ခေတ္တထိန်းသိမ်းပေးထားဖို့ စတာတွေလည်း ပါဝင်နေပါတယ်။

ရေနံနဲ့ သဘာဝဓာတ်ငွေ့လုပ်ငန်းတွေကနေ အကြမ်းဖက်စစ်ကောင်စီဟာ နှစ်စဉ်အမေရိ ကန်ဒေါ်လာ သန်းထောင်ချီရရှိနေပြီး အဓိကဝင်ငွေရလမ်းတခုဖြစ်နေတာမို့ ဒါကို ပိတ်ဆို့ အရေးယူနိုင်ဖို့ ဖိအားပေးသွားဖို့ လိုအပ်နေတာ ဖြစ်ပါတယ်။

ရေနံနှင့်သဘာဝဓာတ်ငွေ့ကုမ္ပဏီတွေဖြစ်တဲ့ Total Energies  နဲ့ Chevron  တို့နဲ့အတူ အ မေရိကန်သမ္မတက တားဆီးပေးရေးအတွက်ပါ တောင်းဆိုမှုမှာတော့ မင်းအောင်လှိုင်နဲ့ သူရဲ့ အကြမ်းဖက်စစ်အုပ်စုထံကို ငွေကြေးလွှဲပြောင်းမှုဆက်မလုပ်ဖို့၊ ဒီငွေတွေနဲ့ စစ်အုပ်စုကို လူသတ်လက်နက်တွေတပ်ဆင်ပေးနေတာတွေရပ်တန့်ဖို့ ပြည်သူလူထုအားလုံး တောင်းဆိုဖိအားပေးကြဖို့အတွက် လက်မှတ်ထိုးကြဖို့ အားလုံးကို ဖိတ်ခေါ်ထားပါတယ်။

မြို့ရွာတွေကို မီးရှို့ဖျက်ဆီးပြီး ပြည်သူတွေကို အကြမ်းဖက်သတ်ဖြတ်နေတဲ့ စစ်ကောင်စီကို ပံ့ပိုးပေးနေတဲ့  Blood Money သွေးစွန်းငွေတွေ၊ ငွေကြေး‌ထောက်ပံ့မှုတွေ ရပ်တန့်စေရေး ရည်ရွယ်တဲ့ ကမ္ဘာလုံးဆိုင်ရာ သွေးစွန်းငွေဖြတ်တောက်ရေး ဆိုရှယ်မီဒီယာ ကမ်ပိန်းကိုလည်း ပြီးခဲ့တဲ့ အောက်တိုဘာ ၃၀ ရက်က စတင်ကျင်းပနေပါတယ်။

ဒီလှုပ်ရှားမှုမှာ စစ်အုပ်စုကိုငွေကြေးအထောက်အပံ့ပေးနေတဲ့ Total၊ Chevron အပါအဝင် နိုင်ငံတကာကုမ္ပဏီကြီးတွေကို ဖိအားပေး တောင်းဆိုမှုတွေထပ်မံပြုလုပ်ဖို့၊ ဖက်ဆစ် စစ်တပ် အမြစ်ဖြတ်ဖို့ တဦးချင်းစီပါဝင်ဖို့ စည်းရုံးဖိတ်ခေါ်ထားပါတယ်။

ဒါ့အပြင် သွေးစွန်းငွေဖြတ်တောက်ရေး လှုပ်ရှားမှုတွေအနေနဲ့ 'မြန်မာပြည်ကို ကယ်တင်ရေး စစ်ကောင်စီကို ငွေမပေး' စာတန်းပါ ကြွေးကြော်သံတွေနဲ့ မြန်မာပြည်ထဲက မြို့တချို့မှာလည်း သပိတ်မှောက် ဆန္ဒပြမှုတွေ ရှိနေပါတယ်။

8 months Ago
More News
Up