တောင်းခံ

October 17, 2021

တောင်တွင်းကြီးတွင် ဧည့်စာရင်းကြေး ၃၀၀၀ ကျပ် တောင်းခံနေ

မကွေးတိုင်း၊ တောင်တွင်းကြီးမြို့က ရပ်ကွက်တွေမှာ ညအိပ်ညနေ လာရောက်သူတွေ ဧည့်စာရင်းတိုင်ရပြီး ဧည့်စာရင်းကြေး ၃၀၀၀ ကျပ်တောင်းခံနေတာကြောင့် ပြည်သူတွေ အခက်အခဲဖြစ်နေကြရတယ်လို့ ဒေသခံတွေဆီက သိရပါတယ်။

ဒေသခံလုပ်ငန်းရှင်တဦးက “ကျနေ့ာ်ဆီက ကားအဝင်အထွက်များတော့ ဧည့်သည်လည်းများတယ်။ အခုနောက်ပိုင်း စစ်တပ်က အာဏာသိမ်းလိုက်မှ ဧည့်စာရင်းတိုင်ရတဲ့အလုပ်ကပိုလာတယ်။ နောက်ပြီး ဧည့်စာရင်းတိုင်ရရင်လည်း ဧည့်သည် ၁ ယောက်ကို ၃၀၀၀ နှုန်းပေးနေရတယ်'' လို့ ပြောပြပါတယ်။

တောင်တွင်းကြီးမြို့မှာ မြို့ပေါ်မှာရပ်ကွက် ၁၀ ခုရှိပြီး စစ်ကောင်စီကခန့်တဲ့ အုပ်ချုပ်ရေးမှူး၊ ရာအိမ်မှူးနဲ့ ဒလန်သတင်းပေးလုပ်နေသူတွေက ကောက်ခံနေတာလို့ သိရပါတယ်။

''ရပ်ကွက်ရုံးကို ဧည့်စာရင်းသွားတိုင်ချိန်မှာတော့ မတောင်းဘူးပေါ့။ နောက်ပြီးမှ ရာအိမ်မှူးနဲ့ ဒလန်တွေက ဧည့်စာရင်းလာတိုင်တဲ့အိမ်တွေကို လိုက်တောင်းတာ။ ဧည့်သည် ၁ ယောက်ကို ၃၀၀၀ နှုန်း တောင်းပြီး သောက်စားမူးရူး ရပ်ကွက်ထဲလှည့်ပတ်ပြီး ပြည်သူကိုအော်ဟစ်ကြိမ်းမောင်းနေတာဗျာ။ ဥပဒေဆိုတာ မရှိတော့ဘူး။ ပြည်သူတွေ ကြပ်တည်းနေချိန်ဆိုတာ လူလိုမသိတဲ့သူတွေပါဗျာ'' ဒေသခံတဦးဆီက သိရပါတယ်။

တောင်တွင်းကြီးမြို့မှာ မြို့ပေါ် ၁၀ ရပ်ကွက်ရှိတဲ့အနက်က စစ်ကောင်စီကခန့်တဲ့အုပ်ချုပ်ရေးမှူး ၁ ဦးထဲသာ နုတ်ထွက်ထားတာလို့ ဒေသခံတွေဆီက သိရပါတယ်။

1 month Ago

April 22, 2021

စိုက်စရိတ်ချေးငွေ ပြန်ဆပ်ကြရန် စိုက်ဘဏ်က တောင်သူတွေကို ဖိအားပေးတောင်းခံနေ

အကြမ်းဖက်စစ်အာဏာရှင်လက်အောက် မြန်မာ့လယ်ယာဖွံဖြိုးရေးဘဏ်က ပြည်သူ့အစိုးရချေးထားတဲ့ ပိုက်ဆံတွေ ပြန်ဆပ်ဖို့ တောင်သူတွေကို ဖိအားပေးတောင်းခံနေတယ်လို့ လယ်သမားအရေးလှုပ်ရှားတွေထံက သိရပါတယ်။

ပုံမှန်စိုက်ပျိုးစရိတ်ချေးငွေ၊ ကိုဗစ် အထူးချေးငွေနဲ့ နှစ်ရှည်နှစ်ဆင့်ခံချေးငွေတွေ အားလုံးကို ပြန်ဆပ်ဖို့ မြို့နယ်မြန်မာ့လယ်ယာဖွံဖြိုးရေးဘဏ်ခွဲတွေမှာ အသိပေးကြေညာထားပြီး တောင်သူတွေဆီ ဖိအားပေးတောင်းခံဖို့ ဘဏ်ရုံးချုပ်ကနေ ညွှန်ကြားထားတယ်လို့ သိရပါတယ်။

ဧရာဝတီတိုင်းက လယ်သမားအရေးလှုပ်ရှားသူ တစ်ဦးက “သူတို့လက်ထဲမှာ ပိုက်ဆံမရှိတော့တာ သေချာတယ်။ တောင်သူတွေ ကြောက်ပြီး ရှိသမျှ ပေါင်နှံပြီး အကြွေးသွားမဆပ်ဖို့ တိုက်တွန်းပါတယ်။ တောင်သူလယ်သမား အကျိုးစီးပွား ကာကွယ်ရေး ဥပဒေဟာ အခုထိကို အသက်ဝင်နေတာမို့ တောင်သူတွေ မကြောက်ကြဖို့ လိုတယ်။ အကြွေးသစ်ထပ်ချေးလို့ မရရင်တောင် အကြွေးဟောင်းကို မဆပ်ဘဲ တောင့်ခံထားဖို့ လိုပါတယ်” လို့ ပြောပါတယ်။

စိုက်ပျိုးစရိတ်ချေးငွေမှာ အချိန်စေ့ကြွေးကျန်၊ အချိန်စေ့လွန်ကြွေးကျန်ဆိုပြီး ရှိရာမှာ အချိန်စေ့လွန်ကြွေးကျန်ကို တောင်သူတွေဆီ အကြောင်းကြားကောက်ခံတာကို  အရင်က ပြုလုပ်ခဲ့ပေမဲ့ အချိန်စေ့ကြွေးကျန်ကိုတော့ အတင်းအဓမ္မကောက်ခံတာ မရှိဘူးလို့ ဆိုပါတယ်။

 ဒါ့အပြင် ကိုဗစ်အထူးချေးငွေနဲ့ နှစ်ရှည်နှစ်ဆင့်ခံ ချေးငွေတွေကို ပြည်သူ့အစိုးရက ထုတ်ချေးခဲ့စဉ်မှာ သတ်မှတ်အချိန်ထားရှိပေမဲ့ အခုလို အတင်းအဓမ္မတောင်းခံဖို့ ညွှန်ကြားခဲ့ခြင်း မရှိခဲ့ပါဘူး။

7 months Ago
Up