တောင်သူလယ်သမားများ

A d v e r t i s e m e n t With Us

July 2, 2020

ရေးမြို့နယ် တောင်သူလယ်သမားများအတွက် ကျပ်သိန်း ၁၈၀၀၀ ခန့် ထုတ်ချေးပေးမည်

မွန်ပြည်နယ်၊ ရေးမြို့နယ်မှာ  ကိုဗစ်-၁၉ ကပ်ရောဂါဘေးကြောင့် တောင်သူတွေ ထိခိုက်နစ်နာမှုတွေရှိလာတာကြောင့် ပြန်လည် ကုစားတဲ့အနေနဲ့ အတိုးနှုန်း သက်သာစွာနဲ့  ဇူလိုင်လ ပထမအပတ်မှ စတင်ပြီး ငွေထုတ်ချေးပေးသွားမည်လို့ မြန်မာ့လယ်ယာဖွံ့ဖြိုးရေးဘဏ် ရေးဘဏ်ခွဲမှ သိရပါတယ်။ နိုင်ငံတော် အစိုးရရဲ့ မူဝါဒလမ်းညွှန်ချက်တွေအရ ၁ ဧကကို ကျပ် ၅၀၀၀၀ နှုန်း အတိုး ၅ ရာခိုင်နှုန်းနဲ့ လယ်ဧက ၉၄၀၀ ဧကအတွက်  တောင်သူ ၁၆၈၂ ဦးကို ကျပ်သိန်း ၄၇၀၀ ထုတ်ချေးပေးသွားမယ်လို့ မြန်မာ့လယ်ယာဖွံ့ဖြိုးရေးဘဏ်ရေး ဘဏ်ခွဲမှ တာဝန်ရှိသူတဦးက ပြောပါတယ်။ အခုလို ငွေတွေ ထုတ်ချေးပေးတာဟာ လယ်ယာလုပ်ငန်းကို အထောက်အကူပြုစေပေမယ့် ပြီးခဲ့တဲ့နှစ်က သဘာဝဘေး မြစ်ရေကြီးနစ်မြှုပ်ဒဏ်ခံရတဲ့ လယ်ယာတွေ ပျက်စီးတာရယ် စပါးမျိုး ဆုံးရှုံးမှုနဲ့ပါ ကြုံတွေ့ရလို့  စားစရိတ်တွေ ဆုံးရှုံးကြတယ်လို့ တောင်သူတွေက ပြောပါတယ်။ အခု ကိုဗစ် ကပ်ဘေးကာလမှာ ချေးငွေသီးသန့်ထုတ်ချေးပေးမယ့်အပြင် မိုးစပါးချေးငွေကို ၂၀၁၉-၂၀၂၀ ဘဏ္ဍရေးနှစ်မှာ ရေးမြို့နယ်ရှိ ကျေးရွာအုပ်စု ၂၃ အုပ်စုမှ တောင်သူတွေအတွက်  ကျပ်သိန်းပေါင်း ၁၄၀၀၀ လောက် ထုတ်ချေးဖို့ရှိပါတယ်။  လက်ရှိ ကျေးရွာ ၁၉ အုပ်စုရှိ  တောင်သူ ၉၀၂ ဦးကို လယ်ဧက ၅၀၁၄ ဧကအတွက်  ကျပ်သိန်း ၈၀၀၀ နီးပါး  ထုတ်ချေးပေးထားပြီးဖြစ်တယ်လို့ သိရပါတယ်။  သတင်း-နေမျိုးထွဋ် 
8 months Ago

June 16, 2020

တောင်သူလယ်သမားများကို ကိုဗစ်-၁၉  အထူးချေးငွေ ၁ ဧက ကျပ် ၅၀၀၀၀ ထုတ်ချေးမည်

မြန်မာနိုင်ငံတဝန်းက တောင်သူလယ်သမားတွေအတွက် ကိုဗစ်-၁၉  အထူးချေးငွေအဖြစ် လယ်တစ်ဧကကို ငွေကျပ် ၅၀၀၀၀ နှုန်း မြန်မာ့လယ်ယာဖွံ့ဖြိုးရေးဘဏ်က  ထုတ်ချေးပေးသွားဖို့ ရှိနေပါတယ်။  ကိုဗစ်-၁၉ ရောဂါဟာ မြန်မာလယ်ယာကဏ္ဍဖွံ့ဖြိုးရေး အပေါ်မှာလည်း ထိခိုက်မှုတွေ ရှိနေတာကြောင့် လယ်ယာ စိုက်ပျိုးရေးကဏ္ဍ ကုစားဖို့အတွက် တောင်သူလယ်သမားတွေကို အစိုးရက အထူးချေးငွေ ထုတ်ချေးပေးဖို့ စီစဉ်ခဲ့တာပါ။ ကိုဗစ်-၁၉  အထူးချေးငွေအဖြစ်  လယ်တစ်ဧကကို ငွေကျပ် ၅၀၀၀၀ နှုန်းနဲ့ လယ် ၁၀ ဧကအထိ ထုတ်ချေးပေးသွားမယ်လို့ မြန်မာ့လယ်ယာဖွံ့ဖြိုးရေးဘဏ်ခွဲ မွန်ပြည်နယ် မန်နေဂျာ ပြောပါတယ်။ မြန်မာ့လယ်ယာဖွံ့ဖြိုးရေးဘဏ်ခွဲ မွန်ပြည်နယ် မန်နေဂျာ ဦးကျော်စွာလှိုင် က “အခု ထုတ်ချေးပေးမယ့် ကိုဗစ်-၁၉ အထူးချေးငွေဟာ နှစ်စဉ် ထုတ်ချေးပေးနေတဲ့ လယ် တစ် ဧက ၁ သိန်းခွဲနှုန်း မဟုတ်ဘဲ ကိုဗစ်-၁၉ ကပ်ဘေး ကာလမှာ သီးသန့်ထုတ်ချေးပေးတဲ့ ချေးငွေ အမျိုးအစား ဖြစ်ပါတယ်။ တောင်သူလယ်သမားတွေအတွက် ကိုဗစ်-၁၉ အထူးချေးငွေကိုတော့ ဇွန်လအတွင်း စတင် ထုတ်ချေးပေးနိုင်အောင် စီစဉ်နေတာပြီး အတိုးနှုန်းဟာ ၅ ရာခိုင်နှုန်းပဲ ဖြစ်ပါတယ်။”လို့ ဆိုပါတယ်။ ချေးငွေ စည်းကမ်းချက်တွေမှာတော့ ပုံစံ ၇ မူရင်း ရှိသူနဲ့ အကြွေးကျေထားတဲ့ တောင်သူလယ်သမားကို ထုတ်ချေးပေးသွားမှာ ဖြစ်ပါတယ်။ ဒီကိုဗစ်-၁၉  အထူးချေးငွေကိုတော့ ၂၀၂၁ ခုနှစ် စက်တင်ဘာလမှာ ပြန်လည် ပေးဆပ်ရာမှာ ဖြစ်တယ်လို့ မန်နေဂျာ ဦးကျော်စွာလှိုင်ကပြောပါတယ်။ ကိုဗစ်-၁၉ အထူးချေးငွေ ထုတ်ပေးမယ်ဆိုရင် တောင်သူလယ်သမားတွေ စိုက်ပျိုးစရိတ် ပိုရပြီး အဆင်ပြေလာကြမယ်လို့ သထုံမြို့နယ် ဒုံဝင်းကျေးရွာ လယ်သမား ကိုအောင်ဝင်းက ပြောပါတယ်။  မွန်ပြည်နယ်မှာတော့  အထူးချေးငွေကို  လယ်ဧကပေါင်း ၂၈၀၀၀၀ ကျော်အတွက် ငွေကျပ်သန်းပေါင်း ၁၀၀၀၀ ကျော် ထုတ်ချေးပေးသွားဖို့ လျာထားပါတယ်လို့ မြန်မာ့လယ်ယာဖွံ့ဖြိုးရေးဘဏ်က သိရပါတယ်။ သတင်း- ဇော်လွင်ထွဋ် 
9 months Ago
Up