တောင်သူလယ်သမား

July 18, 2022

စစ်ကောင်စီတပ် စစ်ကြောင်းထိုးနေမှုကြောင့် ရွှေဘိုနှင့် ဝက်လက် တောင်သူများ စပါးမစိုက်နိုင် ဖြစ်နေ

ဆန်စပါးအများအပြားစိုက်ပျိုးတဲ့ စစ်ကိုင်းတိုင်း ရွှေဘိုနဲ့ ဝက်လက်မြို့နယ်တို့မှာ စစ်ကောင်စီတပ်တွေ စစ်ကြောင်းထိုးနေတာကြောင့် တောင်သူအတော်များများ စပါးမစိုက်ပျိုးနိုင်ကြဘူးလို့ ဒေသခံတွေက ပြောပါတယ်။

စစ်ကောင်စီတပ် စစ်ကြောင်းမရှိတဲ့နေရာအချို့မှာသာ စိုက်ပျိုးကြပြီး စစ်ကြောင်းရှိရာ နေရာတွေမှာ မစိုက်ပျိုးနိုင်ကြကြောင်း၊ ဒါ့အပြင် စစ်ကောင်စီတပ်ရဲ့အန္တရာယ်ကို ကြောက်ပြီး ရွာလုံးကျွတ်နီးပါး ထွက်ပြေးတိမ်းရှောင်နေတာကြောင့် လယ်မစိုက်ဖြစ်ကြသူတွေလည်း ရှိတယ်လို့ ဆိုပါတယ်။ 

Shwebo Daily News သတင်းပြန်ကြားရေးတာဝန်ခံက “အရင်က ပုံမှန် ဆန်စပါး အထွက်များဆုံး ခရိုင်ပါပဲ။ ဒါပေမဲ့ ပြည်သူတွေ စစ်ဘေးရှောင်ရ၊ ထွက်ပြေးနေကြရတော့ တောင်သူလုပ်နိုင်တဲ့သူ မရှိသလောက်ဖြစ်ကြပြီး စစ်ကောင်စီကို ထောက်ခံသူတွေ စစ်တပ်နဲ့ ပျူစောထီးတို့ရဲ့ လုံခြုံရေးအရယူပြီး သူတို့ပဲ တောင်သူလုပ်ခွင့် ရနေတာပါ၊ စစ်တပ် မထောက်ခံသူတွေက တောင်သူလုပ်ခွင့် မရှိသလောက် ရှားပါတယ်။ စိုက်ပျိုးသူ အရမ်းနည်းပါးသွားပါတယ်။ အထူးသဖြင့် စစ်တပ် စိုးမိုးတဲ့ နေရာတွေမှာ အရမ်းကို နည်းပါးပါတယ်” လို့ ပြောပါတယ်။

အလားတူ ရွှေဘိုခရိုင်၊ ဝက်လက်မြို့နယ်မှာလည်း စစ်တပ်စစ်ကြောင်းထိုးတဲ့ ကျေးရွာတွေမှာ စပါးစိုက်ပျိုးသူ ၅၀ ရာခိုင်နှုန်းလောက် လျော့ကျသွားတယ်လို့ ဒေသခံတဦးက ပြောပါတယ်။

“တချို့ကျတော့လည်း လုံးဝမစိုက်တာတွေရှိတယ်၊ ဖျက်ဆီးခံရမှာ ကြောက်တာတွေ ရှိတယ်။ တချို့ကျတော့လည်း အိမ်မရှိအုံးတော့ စားဖို့သောက်ဖို့ရှိရင် အဆင်ပြေပြီဆိုပြီး စပါးနဲ့ ပဲလေးတွေ စိုက်တာရှိတယ်ဗျ။ ၅၀ ရာခိုင်နှုန်းလောက် လျော့ကျသွားတယ်ဗျ။”

ဝက်လက်မြို့နယ်မှာ စစ်ကောင်စီတပ်ဟာ စစ်ကြောင်းထိုးရာတလျှောက်က ကျေးရွာတွေကို မီးရှို့ ဖျက်ဆီးတာတွေကြောင့် ဒေသခံတောင်သူအချို့အနေနဲ့ လယ်ကွက်ကို အငှားထားခဲ့ပြီး တခြားဒေသကို ပြောင်းရွှေ့နေထိုင်မှုတွေလည်း ရှိတယ်လို့ ဆိုပါတယ်။

“တချို့ကျလည်း နေရာပြောင်းသွားတာတွေရှိတယ်။ မန္တလေးဘက် ပြောင်းသွားလို့ ဒီလယ်ကွက်ကို လုပ်မယ့်လူကို ၃ ပုံ ၁ ပုံပေးဆိုပြီးတော့ ထားခဲ့တဲ့လူနဲ့ လယ်ကွက်ကို အငှားထားတဲ့လူနဲ့ အဲဒီလိုမျိုး ထားခဲ့တဲ့လူ ရှိတယ်။ တော်တော်များများတော့ အဲဒီလိုလုပ်ကြတာချည်းပါပဲ။ ဒီမှာက လုံးဝ တခါလာရင် တခါ ဖျက်ဆီးခံရ၊ မီးရှို့ခံရနဲ့ဆိုတော့ ငြိမ်တဲ့ ဥပမာ မန္တလေးလိုဟာမျိုး၊ မြို့နယ် အဆက်အနွယ်ငြိမ်တဲ့နေရာတွေ ပြောင်းကြတာများတယ်ဗျ” လို့ ဝက်လက်ဒေသခံက ပြောပါတယ်။

ရွှေဘိုမြို့နယ်မှာ အသားတင်စိုက်ပျိုးမြေ ၁၉၄,၂၂၂ ဧရိယာရှိတဲ့အနက် လယ်မြေက ၁၁၆,၉၈၇ ဧကရှိပြီး တနှစ်ကို စပါး ၁၇,၂၀၀,၀၀၀ တင်းကျော်ထွက်လေ့ရှိပါတယ်။ ဝက်လက်မြို့နယ်မှာတော့ အသားတင်စိုက်ပျိုးမြေ ၂၅၂,၄၀၅ ဧကရှိတဲ့အနက် လယ်မြေက ၁၄၇,၈၇၇ ဧက ရှိပြီး တနှစ်ကို စပါး ၁၄,၆၈၉,၅၂၂ တင်းထွက်လေ့ရှိတယ်လို့ ၂၀၂၀ ပြည့်နှစ်က ထုတ်ပြန်ထားတဲ့ ဝက်လက်မြို့နယ်ဒေသဆိုင်ရာအချက်အလက်တွေအရ သိရပါတယ်။

စစ်ကောင်စီတပ်ဟာ ရွှေဘိုနဲ့ ဝက်လက်မြို့နယ်တို့မှာ တလကို ၃ ကြိမ်လောက် စစ်ကြောင်းထိုးနေပြီး စစ်ကြောင်းတကြိမ်ထိုးပါက တပတ်လောက် ကြာလေ့ရှိကြောင်း၊ စစ်ကြောင်းထိုးရာမှာ ကျေးရွာတွေကို မီးရှို့တာ၊ ပြည်သူတွေကို ဖမ်းဆီးနှိပ်စက်တာတွေ ပြုလုပ်နေကြတယ်လို့ ဒေသခံတွေက ပြောပါတယ်။

4 weeks Ago

June 8, 2022

နေကြာသီးနှံအတွက် စိုက်စရိတ်ချေးငွေ ကျပ် ၁၀၀ ဘီလီယံ ချပေးရန်လျာထား

နေကြာသီးနှံစိုက်ပျိုးတဲ့တောင်သူတွေအတွက်  စိုက်ပျိုးစရိတ်ချေးငွေ ကျပ် ၁၀၀ ဘီလီယံ ချေးပေးဖို့လျာထားကြောင်း စစ်ကောင်စီပြန်ကြားရေးထုတ် သတင်းစာတွေမှာ ဖော်ပြပါတယ်။

ချေးငွေချထားပေးရာမှာ သီးသန့်စိုက်ပျိုးတဲ့ နေကြာခင်းတွေအတွက် တစ်ဧကကို ကျပ်တစ်သိန်းနှုန်း၊ ဧက ၃၀၀၀ နဲ့အထက် အထူးစိုက်ပျိုးတဲ့ မြို့နယ်တွေမှာ တစ်ဧကကို ကျပ်တစ်သိန်းခွဲနှုန်းနဲ့  ကြိုတင်ချေးပေးဖို့ စီစဥ်ထားတယ်လို့ ဆိုပါတယ်။

အရင်က စပါးသီးနှံတမျိုးအတွက်ပဲ စိုက်စရိတ်ချေးငွေ ကြိုတင်ထုတ်ချေးပေးခဲ့ရာကနေ အခုအခါ နေကြာသီးနှံအတွက်ပါ တနိုင်ငံလုံးအတိုင်းအတာအတွက် ငွေကျပ် ၁၀၀ ဘီလီယံ ချေးပေးဖို့ လျာထားတယ်လို့ သိရပါတယ်။

ဒါ့အပြင်  သီးနှံပေါ်ချိန်မှာ စျေးနှိမ်မခံရအောင် အခြေခံစျေးနှုန်း သတ်မှတ်ပေးဖို့ ကြိုတင်ပြင်ဆင် နေတယ်လည်း အဲဒီသတင်းစာမှာ ဖော်ပြထားပါတယ်။

မြန်မာနိုင်ငံတဝန်းမှာ ဆီထွက်သီးနှံတွေတိုးချဲ့စိုက်ပျိုးပြီး ပြည်ပကို ဆီတင်ပို့ရောင်းချကြဖို့ အာဏာသိမ်းစစ်ခေါင်းဆောင်က ပြောဆိုပြီးနောက်မှာ အခုလိုဆောင်ရွက်လာတာဖြစ်ပါတယ်။  

လက်တွေ့မှာတော့ မြန်မာနိုင်ငံဟာ ပြည်တွင်းစားဆီလိုအပ်ချက်ကြောင့် ပြည်ပကနေ  စားအုန်းဆီကို နှစ်စဥ် ဒေါ်လာသန်း ပေါင်းများစွာ အကုန်အကျခံပြီး တင်သွင်းနေရတာဖြစ်ပါတယ်။ 

လတ်တလော ပြည်တွင်း၊ပြည်ပ အခြေအနေအရပ်ရပ်အရ ပြည်တွင်းမှာ စားအုန်းဆီရှားပါးနေပြီး၊ စျေးနှုန်းစံချိန်တင် မြင့်တက်ခဲ့တာကြောင့် အခြေခံ၀င်ငွေနည်းပြည်သူတွေ အခက်တွေ့နေကြပါတယ်။

ပြီးခဲ့တဲ့ရက်သတ္တပတ်အတွင်းက ပြည်တွင်းလက်လီစာအုန်းဆီဈေးကွက်မှာ ဆီတပိဿာဈေးဟာ ငွေကျပ် ၉၀၀၀ နီးပါးမြင့်တက်ခဲ့ပါတယ်။

စစ်ကောင်စီကတော့ စားအုန်းဆီတင်သွင်းမှု လျှော့ချဖို့အတွက် ပဲမျိုးစုံ၊ ဆီထွက်သီးနှံနဲ့ စားဆီတင်ပို့မှုကို ကန့်သတ်တာ၊ ဆီထွက်သီးနှံကဏ္ဍမှာ ပြည်တွင်း၊ပြည်ပ ရင်းနှီးမြှပ်နှံမှုတွေကို ဦးစားပေးကဏ္ဍအဖြစ် သတ်မှတ်ပြီးဖိတ်ခေါ်တာ၊ စားအုန်းဆီ ဖြန့်ဖြူးမှုနဲ့ စျေးကွက်ကို ထိန်းချုပ်တာတွေ  လုပ်ဆောင်နေပါတယ်။

ဒါ့အပြင် တနိုင်ငံလုံးအတိုင်းအတာနဲ့ နေကြာသီးနှံ တိုးချဲ့စိုက်ပျိုးဖို့ စီမံနေပြီး မကွေးတိုင်း၊ မန္တလေးတိုင်း၊ ပဲခူးတိုင်း၊ စစ်ကိုင်းတိုင်း၊ ဧရာ၀တီတိုင်းနဲ့ ရှမ်းပြည်နယ်တို့မှာ အဓိက တိုးချဲ့စိုက်ပျိုးဖို့ ပြင်ဆင်နေပါတယ်။

အဲဒီစံမံချက်နဲ့ ပတ်သက်ပြီး အုပ်စုတစု၊ အသင်းအဖွဲ့တဖွဲ့အတွက် လုပ်ပိုင်ခွင့်ချပေးတာမျိုး မဖြစ်စေဖို့ ထောက်ပြပြောဆိုတာတွေလည်း  ရှိပါတယ်။

2 months Ago
More News
Up