တောင်သူ

January 22, 2021

ဧရာဝတီတံတားတည်ဆောက်စဉ်က နစ်နာခဲ့သည့်တောင်သူများကို လျော်ကြေး ကျပ် သိန်း ၃၀၀၀ ကျော်ပေး

ဧရာဝတီတိုင်းဒေသကြီး၊ ညောင်တုန်းမြို့နယ်မှာ ဧရာဝတီတံတားတည်ဆောက်စဉ်က ပျက်စီးခဲ့တဲ လယ်မြေတွေအတွက် တောင်သူတွေကို နစ်နာကြေးအဖြစ် ငွေကျပ် သိန်း ၃၀၀၀ ကျော်ပေးအပ်ခဲ့ပါတယ်။ တံတားကြောင့် ပျက်စီးခဲ့တဲ့ လယ်မြေအတွက် ကျေးရွာ ၉ ရွာက တောင်သူ ၁၆၇ ယောက်ကို သက်ဆိုင်ရာ အုပ်ချုပ်ရေးတာဝန်ရှိသူတွေက ဇန်နဝါရီလ ၂၀ ရက်က တွေ့ဆုံပြီး ပျက်စီးခဲ့တဲ့မြေဧက အလိုက် လျော်ကြေးပေးခဲ့တာဖြစ်တယ်လို့ တောင်သူတွေက ပြောပါတယ်။ ညောင်တုန်းမြို့နယ် ပြည်သူ့လွှတ်တော်ကိုယ်စားလှယ် ဦးအုန်းလွင်က "ပျက်စီးခဲ့တဲ လယ်မြေလျော်ကြေးငွေတွေကို သက်ဆိုင်ရာဌာန ဆိုင်ရာတွေနဲ့ ပူးပေါင်းပြီးတော့ လွှတ်တော်မှာအဆိုတင်သွင်းပြီး လျော်ကြေးရရှိအောင် ကူညီပေးခဲ့တာပါ''လို့ ပြောပါတယ်။ လျော်ကြေးပေးအပ်ရာမှာ ညောင်တုန်းမြို့နယ် မြန်မာပြာသာအုပ်စုက တောင်သူ ၄၈ ယောက်ကို ငွေကျပ် ၅၄၇ သိန်း၊ စက္ကော့ရေလည် အုပ်စုက တောင်သူ ၉၃ ယောက်ကို ငွေကျပ် ၁၆၅၄ သိန်းကျော်နဲ့ ဆင်ထုံ အုပ်စုက တောင်သူ ၂၆ ယောက်ကို ငွေကျပ် ၉၆၇ သိန်းကျော်ကို ဆုံးရှုံး ခဲ့တဲ့ မြေဧကအလိုက်ပေးအပ်ခဲ့တာဖြစ်ပါတယ်။ ဧရာဝတီတံတားတည်ဆောက်စဉ်  ကျေးရွာ ၉ ရွာက ပျက်စီးခဲ့တဲ့ လယ်မြေတွေအတွက် ၁ ဧကကို ငွေကျပ် ၂၅ သိန်းနှုန်းနဲ့ နစ်နာကြေးပြန်လည်ပေးအပ်ခဲ့တာဖြစ်တယ်လို့ တောင်သူတွေက ပြောပါတယ်။ သတင်း - မင်းထက်မုန်း (ပုသိမ်)၊ ဓာတ်ပုံ - ထူးခြား (ညောင်တုန်း)
3 months Ago

January 19, 2021

စစ်ကိုင်းတိုင်းတွင် အိန္ဒိယဒန့်သလွန်သီး ဈေးကောင်းရနေ၍ တောင်သူများအဆင်ပြေ

စစ်ကိုင်းတိုင်းအတွင်း မြို့နယ်တွေမှာ အိန္ဒိယ ဒန့်သလွန်သီးတွေ ဈေးကောင်းရနေတာကြောင့် ဒန့်သလွန်စိုက်တောင်သူတွေ  အဆင်ပြေကြတယ်လို့ သိရပါတယ်။   စိုက်ပျိုးရရှိတဲ့ ဒန့်သလွန်သီးတွေကို အဝယ်ဒိုင်တွေဆီကို ပို့ဆောင်ရောင်းချရတာဖြစ်ပြီး တစ်တောင့်ကို  ၉၀၊ ၁၀၀ ကျပ်နဲ့ ရောင်းချရတယ်လို့ သိရပါတယ်။ ရွာတုံရွာနေ တောင်သူ ဦးကျော်မျိုးထိုက်က “ဒန့်သလွန်က‌တော့ အိန္ဒိယမျိုးပေါ့။ PKM1 လို့လည်း ခေါ်တယ်။ ပြုစုတာကောင်းရင် ၄ လလောက်ဆိုရင် အသီးစသီးပြီ။ မိရိုးဖလာစိုက်ပျိုးရေးနဲ့ အခုလို တွဲစိုက်သင့်တယ်။ ဒန့်သလွန်သီးက ဝယ်သူလည်း ပေါတယ်လေ။ အပင် ၇၀၀ ကျော် စိုက်ပျိုးထားတယ်။ ရေကောင်း ကောင်းပေးနိုင်ရင် တစ်လကို ၃ ကြိမ်ခန့် အသီး ခူးရတယ်” လို့ ပြောပါတယ်။ အိန္ဒိယဒန့်သလွန်ပင်မျိုးတွေဟာ စိုက်ပျိုးပြီး ၃ လကျော်ပါက အပင်တစ်ပင်ကို  အတောင့် ၁၀၀ ကနေ ၆၀၀ လောက် သီးပြီး ဒန့်သလွန်းအသီး တောင့်တစ်တောင့်ကို  ၂ ပေဝန်းကျင်အထိ အရှည်ရှိတယ်လို့ သိရပါတယ်။    မုံရွာမြို့ အောင်မြင်သူ သီနှံပွဲရုံပိုင်ရှင် ဦးလှမင်းနိုင်က "ကျနော်တို့ကတော့ ဝယ်တဲ့နေရာမှာ ခြံရှင်တွေနဲ့ ချိတ်ဆက်ထားရတယ်ပေါ့။ မနှစ်က သီးတစ်ထောင့်ကို ၄၀၊  ၅၀ ပေးရတယ်။ အခုနှစ်ကတော့ ၉၀၊ ၁၀၀ ပေးရပြီး လိုချင်သလောက်မရဘူးဗျ” လို့ ပြောပါတယ်။ ဒန့်သလွန်ပင်တစ်ပင်မှာ တစ်နှစ် ၃ ကြိမ် ခူးရပါက အပင် ၁၀၀၀ ကို သိန်း ၈၀ လောက် ဝင်ငွေရတယ်လို့ အပင်စိုက်တောင်သူတွေက ပြောပါတယ်။ စစ်ကိုင်းတိုင်အတွင်းမှာ ကနီမြို့၊ အ‌ရာတော်မြို့၊ မုံရွာမြို့တွေမှာ တစ်ပိုင်တစ်နိုင်ဒန့်သလွန်ကို စမ်းသပ်စိုက်ပျိုးနေကြပြီး အသီးဝယ်လိုအားကောင်းတာကြောင့် ဈေးကောင်းရနေကြတာပါ။ သတင်း - ကျော်မင်းသန့်
3 months Ago
More News
Up