တောင်သာမြို့နယ်

March 14, 2021

တောင်သာမြို့နယ် ချုံကြီးကျေးရွာတွင် စစ်တပ်က ပစ်ခတ်မှုကြောင့် ၅ ဦးဒဏ်ရာရ

မန္တလေးတိုင်း၊ မြင်းခြံခရိုင်၊ တောင်သာမြို့နယ်၊ ချုံကြီး(ခ)သာယာကြီးရွာမှာ မနေ့ညက စစ်တပ်က ကျည်အစစ်၊ ရာဘာကျည်တွေ အသုံးပြုပြီး အချက် ၈၀ လောက် ပစ်ခတ်ခဲ့တာကြောင့် ရွာသား ၅ ဦး ဒဏ်ရာရှိခဲ့တယ်လို့ သိရပါတယ်။

ဒါ့အပြင် ၅ ဦးထက်မနည်း ဖမ်းဆီးခေါ်ဆောင်သွားတယ်လို့လည်း သိရပါတယ်။

မတ်လ ၁၃ ရက်နေ့ မနေ့ည ၈ နာရီလောက်က စစ်အာဏာရှင်ဆန့်ကျင်ရေးသပိတ် ပြုလုပ်နေစဥ် တပ်မတော်ထောက်ခံသူတစ်ဦးက လူအုပ်ထဲကို ဆိုင်ကယ်နဲ့ နောက်ကနေ ဝင်တိုက်ခဲ့တယ်လို့ ဆန္ဒပြ ကျေးရွာသားတဦးက ပြောပါတယ်။

ဆိုင်ကယ်နဲ့ ဝင်တိုက်တဲ့သူဟာ စစ်ကောင်စီကနေ ခန့်အပ်ထားတဲ့ ကျေးရွာအုပ်ချုပ်ရေးမှူး အိမ်ထဲကို ဝင်ရောက် တိမ်းရှောင်ခဲ့တယ်လို့ ဆိုပါတယ်။

ရွာခံလူထုက ဆိုင်ကယ်နဲ့ တိုက်သူကို ထုတ်ပေးဖို့ တောင်းဆိုပေမယ့် အုပ်ချုပ်ရေးမှူးက ထုတ်မပေးတာကြောင့် အုပ်ချုပ်ရေးမှူးအိမ်ကို လူထုက ဝိုင်းရံခဲ့ကြတယ်လို့ ကျေးရွာသားတဦးက ပြောပါတယ်။

ဒီနောက် အုပ်ချုပ်ရေးမှူးကနေ တောင်သာမြို့ပေါ်မှာရှိတဲ့ စစ်တပ်ကို အကြောင်းကြားခဲ့တာကြောင့် ည ၉ နာရီခွဲအချိန်မှာ စစ်ကားတွေနဲ့ စစ်သားတွေ ရောက်ရှိလာခဲ့ပြီး ရွာထဲဝင် ပစ်ခတ်ခဲ့တာလည်း ဖြစ်ပါတယ်။

2 months Ago

February 25, 2021

တောင်သာမြို့နယ် ရွေးကောက်ပွဲကော်မရှင်ရုံးကို စစ်တပ်ကလာရောက်ပြီး စာရွက်စာတမ်းများ ယူဆောင်သွား

မန္တလေးတိုင်းဒေသကြီး၊ တောင်သာမြို့နယ် ရွေးကောက်ပွဲကော်မရှင်ရုံးကို စစ်တပ်က ဖေဖော်ဝါရီ ၂၄ ရက်က ကားနဲ့လာပြီး စာရွက်စာတမ်းတွေ၊ ပစ္စည်းတွေသယ်ယူသွားတယ်လို့ မျက်မြင်တွေ့သူတွေက ပြောပါတယ်။

“ညနေ ၂ နာရီခွဲ၊ ၃ နာရီ အချိန်လောက်မှာ စစ်တပ်ကကားတစီးနဲ့ စစ်သားက ၅ ယောက် လောက်ရှိတယ်။ အမျိုးသမီးတချို့လည်းပါတယ်။ ရဲမေတွေလို့ ထင်ပါတယ်။ ဒီမတိုင်ခင်ကလည်း လိုက်ထရပ်တစီး လာသေးတယ်။ ရုံးထဲကနေ အိတ်တွေနဲ့ ၄၊ ၅ ခေါက်သယ်သွားတာ” လို့ ပြောပါတယ်။

သယ်ယူတဲ့ပစ္စည်းတွေကို  ဘယ်ကိုပို့တယ်ဆိုတာတော့ မသိဘဲ ဒေသခံတချို့ကတော့ မြို့နယ်ထွေအုပ်ရုံးကို ပို့တာလို့ ပြောပါတယ်။

ပြီးခဲ့တဲ့ ရွေးကောက်ပွဲမှာ မဲစာရင်းတွေမှားတယ်လို့ တပ်မတော်က စွပ်စွဲထားပြီးနောက် ရုံးမှာ သိမ်းဆည်းထားတဲ့ စာရွက်စာတမ်းတွေကို သက်သေမရှိ၊ ကော်မရှင်အဖွဲ့ဝင်တွေမရှိဘဲ ခုလို လာရောက်ယူသွားတာဖြစ်ပါတယ်။

တောင်သာမြို့နယ် ရွေးကောက်ပွဲကော်မရှင်အဖွဲ့ခွဲ ဥက္ကဋ္ဌနဲ့ အတွင်းရေးမှူးတို့ကို ဖမ်းဆီးထားပြီး ခုချိန်ထိ ဘယ်မှာရှိတယ်ဆိုတာလည်း မသိရသေးပါဘူး။

2 months Ago
More News
Up