တောင်ငူ

November 7, 2021

စစ်ကျွန်ပညာရေး ပြတ်ပြတ်သားသားဆန့်ကျင်ကြရန် တောင်ငူကျောင်းသားများသမဂ္ဂ တောင်းဆို

နိုဝင်ဘာလ ၁ ရက်နေ့မှာ  တနိုင်ငံလုံး ကျောင်းတွေပြန်ဖွင့်ဖို့ ကြေညာလိုက်တဲ့ စစ်ကောင်စီရဲ့ စစ်ကျွန်ပညာရေးကို ပြတ်ပြတ်သားသား ဆန့်ကျင်ကြဖို့ တောင်ငူမြို့နယ်ကျောင်းသားများသမဂ္ဂ (ဗကသများအဖွဲ့ချုပ်) က ကျောင်းသားမိဘတွေကို တောင်းဆိုလိုက်ပါတယ်။ 

အခုလို ကျောင်းတွေ ပြန်ဖွင့်တာဟာ ကျောင်းသားတွေရဲ့ ပညာတတ်မြောက်ရေးကို ထည့်သွင်း စဥ်းစားတာ မဟုတ်ဘဲ ကျောင်းသားနဲ့ မိဘတွေကြား မပြေလည်မှုတွေကို ဖန်တီးပြီး တော်လှန်ရေး အင်အားကို လျော့နည်းအောင် ဆောင်ရွက်တာလို့ ဆိုပါတယ်။ 

အကြောင်းတစုံတရာရှိရင် ကျောင်းသားလူငယ်တွေရဲ့ အသက်ကို ဓားစာခံလုပ်ဖို့ ဝန်လေးမှာ မဟုတ်တဲ့အတွက် မိဘတွေအနေနဲ့ ကိုယ့်ရဲ့သားသမီးတွေကို ဘက်ပေါင်းစုံ ဘေးဒုက္ခ ကျရောက်နိုင်တဲ့ အန္တရာယ်တွင်းကို မပို့ကြဖို့လည်း မေတ္တာရပ်ခံထားတာပါ။ 

အခုအချိန်ကာလမှာ တနိုင်ငံလုံး အကြမ်းဖက်စစ်ကောင်စီကို လက်နက်ကိုင်တော်လှန်ရေး ဆင်နွှဲနေတဲ့ကာလ ဖြစ်ပြီး ကျောင်းသားလူငယ်များစွာလည်း ဒီမိုကရေစီအရေးအတွက် ပေးဆပ် တိုက်ပွဲဝင်နေကြတာကြောင့် စစ်အာဏာရှင်လက်အောက်က စစ်ကျွန်ပညာရေးကို ကျောင်းသားရော မိဘပါ ဆန့်ကျင်သပိတ်မှောက်ကြဖို့ လိုအပ်တယ်လို့  တိုက်တွန်းထားပါတယ်။ 

ဒါ့အပြင် နိုဝင်ဘာ ၆ ရက်နေ့ကလည်း တောင်ငူမြို့နယ်နဲ့ ရေတာရှည်မြို့နယ်က ကျောင်းသားသမဂ္ဂတွေ စုပေါင်းပြီး စစ်ကျွန်ပညာရေး အလိုမရှိကြောင်း၊ ပြတ်ပြတ်သားသား ဆန့်ကျင်စေလိုကြောင်း photo campaign ပြုလုပ်ပြီး ထုတ်ဖော်ဆန္ဒပြခဲ့ကြပါတယ်။

Photo - တောင်ငူမြို့နယ်ကျောင်းသားများသမဂ္ဂ-ဗကသများအဖွဲ့ချုပ်

4 weeks Ago

October 18, 2021

တောင်ငူတွင် ပြည်ခိုင်ဖြိုးပါတီဝင် ၁ ဦး ပစ်သတ်ခံရ၊ Mytel တာဝါတိုင်ကို မီးရှို့ဖျက်ဆီး

ပဲခူးတိုင်း တောင်ငူမြို့နယ်မှာ အောက်တိုဘာလ ၁၈ ရက်မနက်ပိုင်းက ပြည်ခိုင်ဖြိုးပါတီဝင် ရာအိမ်မှူး ၁ ဦး ပစ်သတ်ခံရပြီး စစ်တပ်ပိုင် Mytel တာဝါတိုင်ဖျက်ဆီးခံရတယ်လို့ ဒေသခံတွေဆီ က သိရပါတယ်။

ပစ်သတ်ခံရသူမှာ အုတ်ကျွတ်တန်းရပ်ကွက်၊  ၁၀ လမ်းမှာ နေတဲ့ ဦးမောင်မောင်စိုး ဖြစ်တယ်လို့ သိရပါတယ်။

ဒေသခံတဦးက ''မောင်မောင်စိုးက စစ်တပ်အာဏာသိမ်းပြီးကတည်းက ထောင်ထောင်ထောင်ထောင်လုပ်နေတာ။ မြို့နယ်ပြည်ခိုင်ဖြိုးပါတီဝင်လေ။ ရပ်ကွက်ထဲမှာလည်း စစ်ကောင်စီကခန့်တဲ့ ရာအိမ်မှူးလုပ်နေတာ။ ဒီနေ့မနက် ၇ နာရီဝန်းကျင်လောက်က အသတ်ခံရ တာပေါ့'' လို့ပြောပါတယ်။

သေဆုံးသူ ဦးမောင်မောင်စိုး ဆိုသူမှာ ရန်ကုန်-မန္တလေးလမ်းကားဟောင်း၊ ပန်းစွယ်တော်ဟိုတယ်နားမှာ သေနတ်နဲ့ပစ်သတ်ခံရပြီး ဦးခေါင်းမှာ ၂ ချက်နဲ့ ဝမ်းဗိုက်မှာ ၃ ချက် ကျည်ဆံထိမှန်ကာ နေရာမှာတင်သေဆုံးသွားပြီး ရင်ခွဲရုံကိုသယ်ဆောင်သွားပြီလို့ ဆက်လက်ရှင်းပြ ပါတယ်။

ဦးမောင်မောင်စိုး ပစ်သတ်ခံရတဲ့နေရာကို စစ်ကောင်စီတပ်သား အများအပြားရောက်လာပြီး လမ်းသွားလမ်းလာတွေကို စစ်ဆေးမေးမြန်းနေတယ်လို့ မျက်မြင်ဒေသခံတဦးက ပြောပြပါတယ်။

ဒီကနေ့မနက်စော ၅ နာရီဝန်းကျင်ကလည်း တောင်ငူမြို့နယ်၊ ဆင်ဆိပ်ကျေးရွာအုပ်စု၊ ခပေါင်းတိန်ရွာနားက စစ်တပ်ပိုင်  Mytel တာဝါတိုင် မီးရှို့ဖျက်ဆီးခံရပြီး နာရီပိုင်းအကြာ စစ်ကောင်စီတပ်က စစ်ကား ၅ စီးနဲ့ စစ်သားတွေ ရောက်လာကာ စစ်ဆေးပြီး သေနတ်ပစ်ဖောက်တာ လုပ်နေတယ်လို့ ဒေသခံတွေဆီက သိရပါတယ်။

တောင်ငူမြို့က ဦးမောင်မောင်စိုး အသတ်ခံရတာ၊ Mytel တာဝါတိုင်ဖျက်ဆီးခံရတာနဲ့ ပတ်သက်ပြီး ဘယ်အဖွဲ့က လုပ်တယ်ဆိုတာ ထုတ်ပြန်ကြေညာတာ မရှိသေးပါဘူး။

2 months Ago
More News
Up