တောင်ကိုရီးယား

June 27, 2022

နွေဦးတော်လှန်ရေးခေါင်းဆောင် ဒေါက်တာ တေဇာဆန်း ဘတ်ခ်ဂျုံချောလ် လူ့အခွင့်အရေးဆု ရရှိ

မြန်မာ့နွေဦးတော်လှန်ရေးခေါင်းဆောင်တယောက်ဖြစ်တဲ့ ဒေါက်တာ တေဇာဆန်းကို တောင်ကိုရီးယားနိုင်ငံက ဘတ်ခ်ဂျုံချောလ် လူ့အခွင့်အရေးဆု ချီးမြှင့်လိုက်ပါတယ်။

၁၈ ကြိမ်မြောက်အနေနဲ့ ကျင်းပမယ့် ဒီဆုချီးမြှင့်ပွဲအခမ်းအနားကိုတော့ လာမယ့်ဇွန် ၂၉ ရက်နေ့ ဆိုးလ်အမျိုးသားတက္ကသိုလ်မှာ ကျင်းပမယ်လို့ ဆုရွေးချယ်ရေးကော်မတီက သတင်းထုတ်ပြန်ပါတယ်။

ဒေါက်တာတေဇာဆန်းဟာ မန္တလေးဆေးတက္ကသိုလ်က ဆရာဝန်ဘွဲ့ ရရှိခဲ့ပြီးနောက် စာကြည့်တိုက်မှူးနဲ့ NGO ဝန်ထမ်းအဖြစ် လုပ်ကိုင်ခဲ့ကာ ၂၀၁၀ ပြည့်နှစ်မှာတော့ ချို့တဲ့သူတွေအတွက် အခမဲ့ ကျန်းမာရေး ဝန်ဆောင်မှု ထောက်ပံ့ပေးတဲ့ Beautiful Mind Foundation ကို တည်ထောင်ခဲ့ပြီး မန္တလေး ယုံကြည်ရာ အသိပညာပြန့်ပွားရေးအသင်း ဥက္ကဋ္ဌအဖြစ်လည်း ဆောင်ရွက်ခဲ့ပါတယ်။

၂၀၂၁ စစ်အာဏာသိမ်းခံရမှု ဖြစ်ပွားပြီး ရက်မကြာမီမှာပဲ အာဏာသိမ်းမှုကို ပထမဆုံး ဆန့်ကျင်ဆန္ဒပြမှုကို ဦးဆောင်ခဲ့သူဖြစ်ပြီး မန္တလေးမြို့က စတင်တဲ့ အဆိုပါ ပထမဆုံး ဆန္ဒပြမှုပြီး နောက်ပိုင်းမှာတော့ နိုင်ငံတဝန်း ဆန့်ကျင်ဆန္ဒပြမှုတွေ ထပ်ပြီးတော့ ပေါ်ပေါက်လာခဲ့တာ ဖြစ်ပါတယ်။

အကြမ်းဖက်စစ်ကောင်စီကတော့ ‌ဒေါက်တာတေဇာဆန်းကို နိုင်ငံတော် အကြည်ညိုပျက်စေမှု ပုဒ်မ ၅၀၅(က) နဲ့ အမှုဖွင့် တရားစွဲဆိုထားပေမယ့် သူကတော့ လက်ရှိအချိန်ထိ မြန်မာ့နွေဦးတော်လှန်ရေးမှာ ဆက်လက်ပြီး လှုပ်ရှားနေဆဲ ဖြစ်ပါတယ်။

ဘတ်ခ်ဂျုံချောလ် လူ့အခွင့်အရေးဆုကတော့ ၁၉၈၇ ခုနှစ် ၂၁ နှစ်အရွယ်မှာ ဒီမိုကရေစီအရေးအတွက် လှုပ်ရှားမှုတွေမှာ တိုက်ပွဲဝင်ရင်း ကျဆုံးသွားခဲ့ရတဲ့ ဆိုးလ်အမျိုးသားတက္ကသိုလ်ကျောင်းသား ဘတ်ခ်ဂျုံချောလ်ကို ဂုဏ်ပြုတဲ့အနေနဲ့ လွန်ခဲ့တဲ့ ၂၀၀၃ ခုနှစ်ကစတင်ကာ ဒီမိုကရေစီနဲ့လူ့အခွင့်အရေးမြှင့်တင်ဖို့ ကြိုးပမ်းခဲ့ကြတဲ့ လူပုဂ္ဂိုလ်တွေနဲ့ အဖွဲ့အစည်းတွေကို ရွေးချယ်ချီးမြှင့်ခဲ့တာဖြစ်ပြီး ပြီးခဲ့တဲ့နှစ် တုန်းကတော့ ဒီမိုက ရေစီအရေးအတွက် အကြမ်းဖက်စစ်တပ်နဲ့ ရင်ဆိုင်တိုက်ပွဲဝင်နေကြရတဲ့ မြန်မာပြည်သူတွေကို ပေးအပ်ခဲ့တာဖြစ်ပါတယ်။

2 days Ago

June 22, 2022

တောင်ကိုရီးယားတွင် မျောက်ကျောက်ဗိုင်းရပ်စ်ပိုး တွေ့ရှိ

တောင်ကိုရီးယားဟာ သူ့နိုင်ငံရဲ့ ပထမဆုံး မျောက်ကျောက်ဗိုင်းရပ်စ်ပိုး တွေ့ရှိမှုကို ဇွန် ၂၂ ရက်မှာ အတည်ပြုလိုက်ပြီး စောင့်ကြည့်တာနဲ့ တုံ့ပြန်မှုစနစ်တွေကိုလည်း အားကောင်းစေမှာဖြစ်ကြောင်း ကတိပြုလိုက်သလို ကူးစက်ရောဂါအတွက် သတိပေးချက်အဆင့်ကိုလည်း မြှင့်တင်လိုက်ပါတယ်။

ဇွန် ၂၁ ရက် နေ့လယ်ပိုင်းက ဂျာမနီနိုင်ငံကနေ ဝင်ရောက်လာပြီး  အင်ချွန်းဆေးဘက်ဆိုင်ရာစင်တာမှာ ဆေးကုသမှု ခံယူနေတဲ့ တောင်ကိုရီးယားပြည်သူ တယောက်မှာ ရောဂါလက္ခဏာတွေ ပြသလာတာဖြစ်ကြောင်း ကိုရီးယား ရောဂါထိန်းချုပ်ရေးနဲ့ ကာကွယ်ရေးအေဂျင်စီ (KDCA) က ပြောပါတယ်။ တဦးချင်းရဲ့ အသေးစိတ် အချက်အလက်တွေကိုတော့ မဖော်ပြထားပါဘူး။

အေဂျင်စီဟာ ကူးစက်ရောဂါအတွက် သတိပေးချက်အဆင့်ကို နိုင်ငံရဲ့ အဆင့်လေးဆင့်ထဲက ဒုတိယအဆင့် "သတိထားရမယ့်အဆင့်" အဖြစ် မြှင့်တင်ခဲ့ပြီး ဗိုင်းရပ်စ်ကူးစက်မှုကို အတည်ပြုခဲ့ပါတယ်။

အားကောင်းတဲ့ သီးသန့် ကွာရန်တင်းထားရှိဖို့ စီမံခန့်ခွဲမှုလိုအပ်တဲ့ ဧရိယာသတ်မှတ်တာတွေလုပ်ပြီး စောင့်ကြည့်မှုကို တိုးမြှင့်ဆောင်ရွက်သွားမှာဖြစ်ကာ အဓိကအားဖြင့် မျောက်ကျောက်ရောဂါ မကြာခဏ ဖြစ်ပွားတတ်တဲ့ နိုင်ငံတွေက လူတွေအကြားမှာ သေချာစောင့်ကြည့်သွားမယ်လို့ ဆိုပါတယ်။

ဇွန်လအစောပိုင်းမှာ တောင်ကိုရီးယားနိုင်ငံဟာ သူ့ရဲ့ အဆင့် ၄ ခုရှိ ကျန်းမာရေးစနစ်အရ ကိုဗစ်-၁၉၊ ကာလဝမ်းရောဂါနဲ့ ရေကျောက် အပါအဝင် ကူးစက်ရောဂါ ၂၂ မျိုးကို အမျိုးအစားတခုတည်းမှာ ထည့်သွင်းထားပြီး မျောက်ကျောက်ရောဂါကိုလည်း ဒုတိယအဆင့် ကူးစက်ရောဂါအဖြစ် သတ်မှတ်ထားပါတယ်။

1 week Ago

တောင်ကိုရီးယားပြည်တွင်းထုတ် အာကာသဒုံးပျံ စမ်းသပ်ပစ်လွှတ်မှု အောင်မြင်

တောင်ကိုရီးယားနိုင်ငံဟာ ပြည်တွင်းထုတ် နူရိ အာကာသဒုံးပျံကို ဇွန် ၂၁ ရက်က ဒုတိယအချီ စမ်းသပ်ပစ်လွှတ်တာ အောင်မြင်ခဲ့တယ်လို့ သိပ္ပံဝန်ကြီး လီဂျုံဟိုက ပြောပါတယ်။

နိုင်ငံတောင်ပိုင်းကမ်းရိုးတန်းမှာရှိတဲ့ နာ့ရို အာကာသစခန်းကနေ တောင်ကိုရီးယားစံတော်ချိန် ညနေလေးနာရီမှာ လွှတ်တင်လိုက်တဲ့ ဒုံးပျံဟာ အောင်အောင်မြင်မြင် ပျံတက်သွားခဲ့တာပါ။

တနာရီအကြာမှာ ဒုံးပျံဟာ အာကာသယာဉ်ကို သူ့ပတ်လမ်းအတွင်း အောင်အောင်မြင်မြင် နေရာချနိုင်မလားဆိုတာ သိဖို့ တာဝန်ရှိသူတွေက မျှော်လင့်ထားပါတယ်။

တောင်ကိုရီးယားဟာ ပထမအကြိမ်စမ်းသပ်မှု အောင်မြင်ပြီး ရှစ်လအကြာမှာ ဒုတိယအကြိမ် အာကာသယာဉ်ကို လွှတ်တင်ခဲ့နိုင်ခဲ့ပေမဲ့ ပထမအချီမှာ ဂြိုဟ်တုကို ပတ်လမ်းအတွင်း မထားနိုင်ခဲ့ပါဘူး။ ဒါကြောင့် ဒုတိယအချီ လွှတ်တင်ခဲ့ရတာပါ။

တောင်ကိုရီးယား အာကာသယာဉ်တည်ဆောက်မှု သုတေသနဌာနက (KARI) က ပုံစံထုတ်ထားတဲ့ အဆင့်သုံးဆင့်ရှိတဲ့ KSLV-II နူရီဒုံးပျံဟာ ကမ္ဘာမြေပြင်အထက် ကီလိုမီတာ  ၆၀၀ မှ ၈၀၀ ကြား အကွာအဝေးမှာ အလေးချိန် ၁ ဒသမ ၅ တန်ရှိတဲ့ ပစ္စည်းတွေကို လွှတ်တင်နိုင်မယ့် နိုင်ငံ့စီမံကိန်းတွေရဲ့ အုတ်မြစ်ပါ။

6G ကွန်ရက်တွေ၊ သူလျှိုဂြိုဟ်တုတွေနဲ့ လကမ္ဘာ စူးစမ်းလေ့လာရေးယာဉ်တွေ အပါအဝင် ကြီးမားတဲ့ ရည်မှန်းချက်တွေ အောင်မြင်ဖို့နဲ့ အာကာသအစီအစဉ်ကို စတင်ဖို့ စီမံကိန်းတွေရဲ့ အုတ်မြစ်လည်း ဖြစ်ပါတယ်။

နူရိဒုံးပျံဟာ တောင်ကိုရီးယား ဂြိုဟ်တုအခြေပြု လမ်းကြောင်းပြစနစ်နဲ့ 6G ဆက်သွယ်ရေးကွန်ရက်ကို တည်ဆောက်မယ့် တောင်ကိုရီးယားရဲ့ သော့ချက်လည်း ဖြစ်ပါတယ်။

တောင်ကိုရီးယားနိုင်ငံဟာ စစ်ဘက်ဆိုင်ရာဂြိုဟ်တု အမြောက်အမြား လွှတ်တင်ဖို့ စီစဉ်နေပေမဲ့ နူရိကိုတော့ လက်နက်အဖြစ် ဘယ်နေရာမှာမှ မသုံးဘူးလို့ တာဝန်ရှိသူတွေက ငြင်းဆိုထားပါတယ်။

1 week Ago
More News
Up