တူးဖော်

December 6, 2020

စမွတ်စခွန်ခရိုင်တွင် နှစ်ငါးထောင် သက်တမ်းရှိ ရှားပါး ဝေလငါး ရုပ်ကြွင်းတူးဖော်

ထိုင်းနိုင်ငံ မြို့တော် ဘန်ကောက် စမွတ်စခွန် ခရိုင်ထဲကနေ အနှစ်ငါးထောင် သက်တမ်း ရှိပြီလို့ ယုံကြည်ရတဲ့ ရှားပါး ဝေလငါး ရုပ်ကြွင်းကို ရှေးဟောင်းသုတေသီတွေ ဒီဇင်ဘာ လေးရက်က တူးဖော်ခဲ့ပါတယ်။ ပင်လယ်ကနေ ၁၂ ကီလိုမီတာ ဝေးတဲ့နေရာ မြေကြီးထဲက ထွက်နေတဲ့ ၄၁ ပေရှည်တဲ့ ရုပ်ကြွင်း အစိတ်အပိုင်းကို နိုဝင်ဘာလ အစောပိုင်းမှာ စက်ဘီးစီးသူတွေက ရှာတွေ့ခဲ့တာပါ။  တူးဖော်နေတာ ၁ လလောက်ကြာပြီး ဒါဟာ အာရှမှာ ရှာတွေ့တဲ့ တခုတည်းသော အမျိုးအစားလို့ သုတေသီတွေက ယုံကြည်ကြပါတယ်။ လုံးဝနီးပါး အကောင်းအတိုင်း ရှာတွေ့တာမျိုးက ရှားတယ်လို့ သတ္ထုရင်းမြစ်ဌာန ရုပ်ကြွင်း ကာကွယ်ရေးဌာနခွဲ ဘူမိဗေဒ ပညာရှင် ပန်နီပါ ဆေးတီယန်က ပြောပါတယ်။ ဝေလငါးက အထီးအမ မသိရသေးသလို အရိုးတွေကိုလည်း ကာဗွန်သက်တမ်း တွက်ချက်နည်းနဲ့ တွက်ချက်ရင်း ဝေလငါး အရိုးစုရဲ့ သက်တမ်းကို ဆုံးဖြတ်ဖို့ လိုနေသေးတယ်လို့ ပန်နီပါက ပြောပါတယ်။ ဘရိုက် ဝေလငါးတွေနဲ့ အဲဒီခေတ်က ဘူမိဗေဒ အခြေအနေတွေကို သုတေသနပြုရာမှာ ဒီအရိုးစုက ရတဲ့ သတင်းအချက်အလက်တွေက ကူညီလိမ့်မယ်လို့ သိပ္ပံပညာရှင်တွေက မျှော်လင့်နေပါတယ်။  
12 months Ago

October 29, 2020

လစ်ဗျားနိုင်ငံ တာဟွန်နာမြို့တွင် အလောင်း ၁၂ လောင်း တူးဖော်တွေ့ရှိ

လစ်ဗျားနိုင်ငံ တာဟွန်နာမြို့ထဲမှာ အမှတ်အသားမရှိတဲ့ သင်္ချိုင်းလေးခုကနေ အလောင်း ၁၂ လောင်းကို လစ်ဗျားအာဏာပိုင်တွေက တူးဖော်တွေ့ရှိခဲ့တယ်လို့ အောက်တိုဘာ ၂၈ ရက် ရိုက်တာသတင်းမှာ ဖော်ပြပါတယ်။ ဒီဒေသဟာ ဇွန်လက အစိုးရ စစ်တပ် (GNA)က ပြန်သိမ်းပိုက်ထားတဲ့ နယ်မြေပါ။ ဒီမြို့ကို ဒေသခံ ခါနီမိသားစုက ချုပ်ကိုင်ထားတဲ့ ခါနီယတ် ပြည်သူ့စစ်အုပ်စုက နှစ်ချီ ထိန်းချုပ်ခဲ့ဖူးပါ တယ်။ ခါနီယတ် ပြည်သူ့စစ် အုပ်စုဟာ လစ်ဗျာ အရှေ့ပိုင်းမှာ အခြေစိုက်တဲ့ ဗိုလ်ချုပ်ကြီး ခါလီဖာ ဟဲ့ဖ်တာရဲ့ လစ်ဗျား အမျိုးသားစစ်တပ် LNA နဲ့အတူ တိုက်ပွဲဝင်ဖူးပါတယ်။ ခါနီယတ် ခေါင်းဆောင်တွေကို ဖမ်းဖို့ GNA အစိုးရက ဝရမ်းထုတ်ထားပါတယ်။ တူရကီအစိုးရက လစ်ဗျားရဲ့ နိုင်ငံတကာ အသိအမှတ်ပြု GNA အစိုးရကို ကျောထောက် နောက်ခံပေးထားပြီး ဇွန်လက ရုတ်တရက် ထိုးစစ်ဆင်ခဲ့ပါတယ်။ GNA တိုက်ခိုက်ရေး သမားတွေဟာ အလောင်းတွေ ပုံနေတဲ့ ဆေးရုံတရုံနဲ့ ပျောက်ဆုံးနေသူတွေကို မြှုပ်ထားတဲ့ အမှတ်အသား မရှိတဲ့ သင်္ချိုင်းမြေပုံတွေကို တွေ့ခဲ့ကြပါတယ်။ GNA အစိုးရရဲ့ ပျောက်ဆုံး သူများ ရှာဖွေရေး ဗျူရိုက စုံစမ်းစစ်ဆေးသူတွေဟာ မှုခင်းဆေးပညာဆိုင်ရာ ဝတ်စုံတွေဝတ်ပြီး မြေပုံတွေထဲက အလောင်းတွေကို တူးဖော်ရင်း ဘယ်သူဘယ်ဝါ ဆိုတာ စုံစမ်းဖော်ထုတ်နေကြပါတယ်။ တူးဖော်တွေ့ရှိထားတဲ့ အလောင်းတချို့က ဦးခေါင်းခွံ ကွဲနေတာ၊ ခြေလက်တွေ ပြတ်နေတာ တွေ အပါအဝင် အကြမ်းဖက်ခံရတဲ့ အမှတ်အသားတွေ ရှိနေတယ်လို့ ဗျူရို အရာရှိတွေကို ကိုးကားပြီး ရိုက်တာသတင်းမှာ ဖော်ပြထားပါတယ်။
1 year Ago
Up