တိုင်းပြည် ကောင်းချင်လျှင် ၂၀၁၆ မှာ လူပြောင်းရလိမ့်မည်

July 17, 2015

တိုင်းပြည် ကောင်းချင်လျှင် ၂၀၁၆ မှာ လူပြောင်းရလိမ့်မည်

၈၈ အရေးအခင်း အပါအ၀င် လူထုလှုပ်ရှားတောင်းဆိုမှုများကြောင့် နိုင်ငံကို ချုပ်ကိုင်ထားသူတို့ စနစ်ပြောင်းရန် စဉ်းစားခဲ့ရသည်။ အာဏာရှင်စနစ်မှ ထိန်းချုပ်သော ဒီမိုကရေစီ စနစ်သို့။ လူထုကတော့ ဒီမိုဆိုလျှင် ဒီမိုစစ်စစ်ပဲ လိုချင်သည်။ တဖွဲ့တစုက ၀င်ထိန်းချုပ်နေလျှင် ဒီမိုစစ်စစ် မဖြစ်။ သို့သော်၊ ဘာပဲပြောပြော နှစ်ပေါင်းများစွာ မပြောင်း၊ ယခု ပြောင်းမည်ဆိုတော့ အနည်းနဲ့ အများ ပြောင်းလေမလား စောင့်ကြည့်ကြသည်။ တချို့သော တိုင်းပြည်များမှာလို နည်းနည်း ပြောင်းရာက များများ ပြောင်း၊ နောက်တော့ လုံးလုံးလျားလျား ပြောင်း ဆိုတာမျိုး ဖြစ်လာမလားလည်း မျှော်လင့်ကြသည်။ တကယ်တမ်းကျတော့ အကူးအပြောင်းသမားတို့က ပါးစပ်ကသာ ပြောင်းသည်၊ လက်တွေ့မှာ ပြောင်းဖို့ တွန့်တို နေသည်။ စနစ်ဟောင်းမှာက အာဏာရှိသူတို့အတွက် အကျိုးစီးပွားတွေနဲ့ အထူးအခွင့်အရေးတွေ မြောက်မြားစွာ ရှိခဲ့သည် မဟုတ်လား။ အာဏာနဲ့ ဥစ္စာရှာသောစနစ်။ မိမိ ရရှိမည့် လာဘ်လာဘကို ကြည့်ကာ စီမံကိန်းများ ချမှတ် ဆောင်ရွက်နိုင်သောစနစ်။ သည်ဟာကို စွန့်လွှတ်ဖို့ ခက်နေသည်။ ထို့ကြောင့် ဒီမိုကရေစီသို့ ကူးပြောင်းပါမည် ဆိုသော်လည်း မူသာ ပြောင်းမည် လူမပြောင်း ဟူ၍ ပြောင်ပြောင်တင်းတင်းပင် ပြောခဲ့ကြသည်။ စနစ်ကိုတော့ ပြောင်းမည်၊ သို့သော် ကျနော်တို့တော့ ဆက်ရှိနေမည်ဟူသော သဘော။ ဒါကိုပဲ အလိုက်သိသော ပညာရှင်တွေက လူမပြောင်း မူပြောင်းသောစနစ်ဟု အမည်ပေးခဲ့ကြသည်။ ယခုဆိုလျှင် အဲသည်စနစ်ကို ကျင့်သုံးလာတာ ၄ နှစ်ကျော် ၅ နှစ်တွင်း ၀င်ရောက်ခဲ့ပြီ။ သည်အတွင်း တိုင်းပြည်မှာ ဘာတွေ ပြောင်းလဲခဲ့သလဲ။ အများပြည်သူကတော့ လူထုအတွက် ဘာမှ မပြောင်းလဲ၊ ဟု ဆိုနေသည်။ အများပြည်သူသည် ဆင်းရဲမြဲ ဆင်းရဲဆဲ။ အစိုးရယန္တရားပေါင်းစုံမှာ ပါဝင်နေသူတွေကို ထိပ်ဆုံးအဆင့်မှ အောက်ဆုံးအဆင့်ထိ ကြောက်ရမြဲ ကြောက်ရဆဲ။ လယ်သမားတို့ မြေယာ အသိမ်းပိုက်ခံရမှုနဲ့ အလုပ်သမားတို့ အခွင့်အရေး ဆုံးရှုံးမှု စသည့် မတရား မမျှတမှုများက ရှိမြဲ ရှိဆဲ။ သည့်အပြင် လူ မပြောင်းသော်လည်း မူပြောင်းနေပါသည် ဆိုကြသည့် အုပ်စိုးသူအာဏာပိုင်တို့၏ အမူအကျင့်များကော ပြောင်းလဲပါသလား။ တခုတည်းပဲ ကြည့်ပါ။ လယ်သမားများ၊ အလုပ်သမားများ၊ ကျောင်းသား ကျောင်းသူများနဲ့ လူ့အခွင့်အရေး၊ သဘာဝပတ်ဝန်းကျင် အရေး၊ တရားမျှတမှုရှိရေး စသည်တို့အတွက် လှုပ်ရှားဆောင်ရွက်ကြသူများ၏ ငြိ်မ်းချမ်းသော ဆန္ဒ ထုတ်ဖော်မှုများကို မည်သို့ နှိပ်ကွပ်နေပါသလဲ။ ဒါတစ်ခု ကြည့်ရုံနဲ့ပင် အမူအကျင့်မပြောင်း၊ သဘောထား များလည်း မပြောင်းဘူး ဆိုတာ သိနိုင်ပါသည်။ အကူးအပြောင်း ဆိုတာကို စတင်စဉ်က စိတ်ထားဟောင်းတွေနဲ့ အမူအကျင့်ဟောင်းတွေ ပြောင်းရလိမ့်မည်။ mindset တွေ မပြောင်းဘဲ အကူးအပြောင်း မအောင်မြင်နိုင်၊ စသဖြင့် ဆိုခဲ့ကြသည်။ ယခုတော့ mindset ပြောင်းဖို့ ပြောသူတွေ စိတ်ပျက်သွားကြပြီ ထင်သည်။ သည်စကားသံ မကြားရတော့။ တကယ်တော့ “ကျားသည် သူ့ကိုယ်ပေါ်က ကန့်လန့်စင်းများကို မပြောင်းလဲနိုင်” ဟူသော စကားအတိုင်းသာ ဖြစ်သည်။ အတ္တအကျိုးစီးပွားနဲ့ ဒွန်တွဲဖြစ်တည်လာသည့် စိတ်ဓာတ်များ သဘောထားများ အမူအကျင့်များကို ဖျောက်ဖျက်ဖို့ ဆိုတာ အလွန်ခက်သည်။ မကြိုးစားနဲ့။ မဖြစ်နိုင်။ သို့သော်၊ လူထုဘက်က လုပ်နိုင်တာ တခုတော့ ရှိသည်။ အဲဒါက လာမည့် ရွေးကောက်ပွဲ ဖြစ်သည်။ အကယ်၍၊ လက်ရှိ ဖွဲ့စည်းပုံက ချမှတ်ထားသည့် အကန့်အသတ်ဘောင်ထဲမှာပင် ဖြစ်နိုင်သမျှ လွတ်လပ်၍ တရားမျှတသော ရွေးကောက်ပွဲတရပ် ကျင်းပခဲ့သည် ရှိသော် အတိုင်းအတာတခုအထိ နိုင်ငံရေးအကူးအပြောင်း ဖြစ်အောင် လူထုက တတ်နိုင်သည်။ အဲဒါက၊ “လူပြောင်း”ဖို့ ဖြစ်သည်။ အာဏာပိုင်အကျင့် မဖျောက်နိုင်သူ၊ လူထုအပေါ် သဘောထား မကောင်းနိုင်သူတွေကို ဖယ်ရှားကာ ၎င်းတို့နေရာ၌ လူထုသဘောထားနဲ့ လူထုဆန္ဒများအတိုင်း ဆောင်ရွက်မည့် ပြည်သူ့ကိုယ်စားလှယ်စစ်စစ်များ အစားထိုး ခန့်အပ်ဖို့ ဖြစ်သည်။ ရွေးကောက်ပွဲတွင် တဦးချင်းသော ပြည်သူတွေ၏ ဆန္ဒမဲများ ပေါင်းစုကာ လူထု မလိုလားသူကို ဖယ်ရှားပြီး လူထု လိုလားသူကို ခန့်အပ်နိုင်သည်။ လူထုသည် နိုင်ငံတော်အာဏာ၏ မူလပိုင်ရှင် ဖြစ်သည်ဆိုတာ ဒါကြောင့်ပဲ ဖြစ်သည်။ လွတ်လပ်၍ တရားမျှတသော ရွေးကောက်ပွဲများနဲ့ သွားနေသရွေ့ လူထုသည်သာ အာဏာပိုင်။ (တရားမျှတမှုဆိုရာ၌ ဖွဲ့စည်းပုံ အခြေခံဥပဒေပါ ပြဋ္ဌာန်းချက်များလည်း တရားမျှတဖို့ လိုသည်၊ ဟူသော အချက်ကို ဤနေရာတွင် မပြောတော့။ ယခု ရှိနေသည့် အကန့်အသတ်ဘောင်ထဲမှာပဲ ပြောနေတာ ဖြစ်သည်။) နိုဝင်ဘာ ရွေးကောက်ပွဲတွင် ဘယ်သူ့ကို ဆန္ဒမဲပေးမလဲ ရွေးချယ်သည့်အခါ လူထုအတွက် ဘာမှ မခက်။ အဓိကအချက်က အစဉ်အဆက် လူထုအား ဖိနှိပ် ချုပ်ချယ်လာခဲ့သည့် အဖွဲ့အစည်းများ၊ ပုဂ်္ဂိုလ်များကို ရွေးကောက်ပွဲနီးခါမှ ဘာတွေ ညာတွေနဲ့ လာပြီး မျက်နှာချို သွေးသွေး ထည့် မစဉ်းစား၊ ဘေးဖယ်ထားလိုက်ဖို့ ဖြစ်သည်။ ပြီးတော့မှ ကျန်အဖွဲ့အစည်းများ ပုဂ်္ဂိုလ်များထဲမှ ဘယ်ပုဂ်္ဂိုလ်၊ ဘယ်အဖွဲ့အစည်းသည် လူထု သဘောထားကို လေးစားနားထောင်၍ လူထုဆန္ဒ၊ လူထုမျှော်မှန်းချက်များကို အပြည့်ဝဆုံး အကောင်အထည် ဖော်ပေးနိုင်သူ ဖြစ်မလဲ။ ဘယ်ပုဂ်္ဂိုလ်၊ ဘယ်အဖွဲ့အစည်းသည် စစ်မှန်သော ဒီမိုကရေစီ (ပြည်သူ့အစိုးရ)စနစ်ကို အမှန်တကယ် သက်ဝင် ယုံကြည်သူလဲ။ ဘယ်ပုဂ်္ဂိုလ်၊ ဘယ်အဖွဲ့အစည်းသည် တိုင်းပြည်၌ အများပြည်သူတို့၏ အခြေခံရပိုင်ခွင့် လွတ်လပ်ခွင့်များကို အထိရောက်ဆုံး ကာကွယ် စောင့်ရှောက်ပေးသူ ဖြစ်မည်လဲ။ ဘယ်ပုဂ်္ဂိုလ်၊ ဘယ်အဖွဲ့အစည်းသည် တိုင်းပြည်၌ တရားမျှတမှုနဲ့ တန်းတူညီမျှမှု ရှိရေးကို အလေးထား ဆောင်ရွက်ပေးမည်လဲ။ ဘယ်ပုဂ်္ဂိုလ်၊ ဘယ်အဖွဲ့အစည်းသည် တိုင်းပြည်၌ အကျင့်ပျက်ခြစားမှု လျော့ပါး ကင်းစင်၍ နိုင်ငံ ဖွံ့ဖြိုးတိုးတက်အောင် အစွမ်းဆောင်နိုင်ဆုံး ဖြစ်မည်လဲ။ စတာတွေ စဉ်းစား ချင့်ချိန်ကာ အသင့်တော်ဆုံးကို ရွေးချယ်ကြဖို့သာ ဖြစ်ပါသည်။ ဖေမြင့် ၁၃၊ ၇၊ ၂၀၁၅ (မှတ်ချက်- ပြည်သူ့အရေးဂျာနယ်၊အတွဲ - ၁၊ အမှတ် - ၄၂ ပါ ဆရာဖေမြင့်ဆောင်းပါးကို ဖော်ပြထားခြင်း ဖြစ်ပါတယ်။)
6 years Ago
Up