တိုက်ကြီးတွင်

February 17, 2018

တိုက်ကြီးတွင် အမျိုးသားတဦး တောဆင်ရိုင်းအနင်းခံရ သေဆုံး

တိုက်ကြီးမြို့နယ်၊ ဖလုံဘူတာကျေးရွာအုပ်စု၊ သပြုသစ်တော ကြိုးဝိုင်းအတွင်း ရှိပုဂ္ဂလိက သစ်မာစိုက်ခင်းရှေ့မှာ ဖေဖော်ဝါရီ ၁၆ ရက် ညပိုင်းက အမျိုးသားတဦး တောဆင်ရိုင်းအနင်းခံရပြီး သေဆုံးခဲ့တယ်လို့ သိရပါတယ်။ ဖလုံဘူတာကျေးရွာအုပ်ချူပ်ရေးမှူးဦးအေးသွင်က “အလောင်းကို တွေတဲ့သူတွေက သတင်းပို့တော့ ညဘက်ကြီးဆိုတော့ မသွားရဲဘူး။ နင်းလိုက်တဲ့ တောဆင်ရိုင်းနှစ်ကောင်က အလောင်းဘေးကနေ မခွာလို့ သက်ဆိုင်ရာတွေကို သတင်းပို့ပြီး ဒီနေ့မနက်ကျမှ အလောင်းသွားသယ်ပြီး တိုက်ကြီးမြို့နယ် ပြည်သူဆေးရုံကို ပိုဆောင်ထားပါတယ်” လို့ ပြောပါတယ်။ သေဆုံးသွားတဲ့ အမျိုးသားက သပြုသစ်တောကြိုးဝိုင်းအတွင်းရှိ ပုဂ္ဂလိကသစ်မာစိုက်ခင်းက မန်နေဂျာဦးမြဝင်းဆိုသူဖြစ်ပြီး ညနေဘက်တူမဖြစ်သူကို ရွာကိုပြန်ပို့ပြီးအပြန်မှာ တောဆင်ရိုင်းနဲ့တွေ့ပြီး အနင်းခံရတာဖြစ်တယ်လို့ စိုက်ခင်းပတ်ဝန်းကျင်အနားက သူတွေကပြောပါတယ်။ တိုက်ကြီးမြို့နယ်တွင်း တောဆင်ရိုင်းတွေ နှစ်စဉ်ဝင်ရောက်ပြီး လူတွေစိုက်ပျိုးထားတဲ့ စိုက်ခင်းတွေကို ဝင်ရောက်စားသောက်လေ့ရှိပြီး လူတွေကိုပါ အန္တရာယ်ပေးလေ့ရှိပါတယ်။ ပြီးခဲ့တဲ့ ဇန်နဝါရီလအတွင်း တိုက်ကြီးမြို့ နယ်လူသန့်အင်းကျေးရွာ၊ ချင်းကုန်းကျေးရွာနဲ့ လိမ္မော်ခြံကျေးရွာတွေကို ဂျစ်ကားအမည်ရှိ တောဆင်ရိုင်းတကောင်ဝင်ရောက်ခဲ့ပြီး စိုက်ခင်းနဲ့ လူနေအိမ်တွေကို ဖျက်ဆီးခဲ့ပြီး ဖေဖော်ဝါရီ ၁၃ ရက်နေ့ကလည်း ထပ်မံဝင်ရောက်ခဲ့ပြီး လူနေတဲအိမ် ၆ လုံးကို ထပ်မံဖျက်ဆီးခဲ့လို့ မြိုင်ဟေဝန်ဆင်စခန်းက ဆင်တွေနဲ့ မောင်ထုတ်ခဲ့ရပါတယ်။ ရန်ကုန်တိုင်းဒေသကြီး လှည်းကူးမြို့နယ်မှာလည်း ဖေဖော်ဝါရီ ၁၆ ရက် မနက်ပိုင်းက ဖောင်ကြီးကျေးရွာအုပ်စု မဟူရာသစ်တောကြိုးဝိုင်း အကွက် အမှတ် (၂၆) မှာ အသက် (၅၂) နှစ်အရွယ် ဦးမြင့်ရွှေဆိုသူ တောဆင်ရိုင်းအနင်းခံရလို့ သေဆုံးသွားတယ်လို့ ပြန်ကြားရေးသတင်းမှာ ဖော်ပြပါတယ်။
3 years Ago

October 7, 2017

တိုက်ကြီးတွင် တောဆင်ရိုင်းများ ၀င်ရောက်မှုကြောင့် စိုက်ခင်းများ ပျက်စီးဆုံးရှုံး

တိုက်ကြီးမြို့နယ် ဖလုံဘူတာကျေးရွာအုပ်စုနဲ့ ချင်းကုန်းကျေးရွာအုပ်စုတွေမှာ စိုက်ပျိုးထားတဲ့ စိုက်ခင်းတွေကို တောဆင်ရိုင်းတွေ ၀င်ရောက်စားသောက် ဖျက်ဆီးနေလို့ တောင်သူတွေ ပျက်စီးဆုံးရှုံးမှုတွေနဲ့ ရင်ဆိုင်နေရပါတယ်။ တောဆင်ရိုင်းတွေက စပါးစိုက်ခင်း၊ ကြံစိုက်ခင်းနဲ့ ငှက်ပျောစိုက်ခင်းတွေကို ဝင်ရောက်စားသောက်ဖျက်ဆီးနေတာလို့ ကြံစိုက်ခင်း တာဝန်ခံ ဦးမြင့်အောင်က ပြောပါတယ်။ “စက်တင်ဘာ တတိယအပတ်လောက်ကစပြီး တောဆင်ရိုင်းတွေ နည်းနည်းလောက်ဝင်လာပြီး စိုက်ခင်းတွေကို ဝင်စားပါတယ်။ အခုအောက်တိုလာလထဲမှာ တောဆင်ရိုင်းအကောင်ရေ ၃၀ လောက်ရှိတယ် ၀င်လာပြီး ကြံခင်းတွေကို ဝင်စားသွားတာ။ စားရုံတင်မဟုတ်ဘူး၊ အုပ်စုလိုက်ဝင်တော့ အကုန်နင်းထားတာနဲ့ စားသွားတာနဲ့ဆို ၁၇ ဧကလောက်ပျက်စီးသွားပြီ။ တောဆင်ရိုင်းတွေက ညဘက်ဝင်တာလေ၊ သူတို့အနားလည်း မကပ်ရဲတော့ အဝေးကနေ အော်ဟစ်ပြီး မောင်းတာတို့၊ ဗျောက်အိုးဖောက်ပြီး ခြောက်လှန့်မောင်းရပါတယ်။ ကြံခင်းပတ်လည်မှာ တူးမြောင်းတွေဖောက်ထားရတယ်။ စိုက်ခင်းစောင့်တဲ့လူတွေဆို သစ်ပင်ကြီးတွေအပေါ် လင့်စဉ်ထိုးနေတာတို့၊ ဝါးရုံပင်ထူထူတွေရှိတဲ့ကြားထဲမှာ နေရပါတယ်။ ညနလေးနာရီနောက်ပိုင်းဆို လူတွေအပြင်မထွက်ရဲတော့ဘူး။ သူတို့နဲ့တိုးရင် လူတွကိုပါ အန္တရာယ်ပေးတယ်လေ။ သက်ဆိုင်ရာဌာနဆိုင်ရာတွေအနေနဲ့ တောဆင်ရိုင်းတွေကို ကာကွယ်ပေးမယ်ဆိုရင် ကျနော်တို့ စိုက်ပျိုးတဲ့ တောင်သူတွေအနေနဲ့ ပျက်စီးဆုံးရှုံးမူတွေ သက်သာသွားမှာပါ။” ဖလုံဘူတာအုပ်ချူပ်ရေးမှူး ဦးအေးသွင်က “ကျနော်တို့ အုပ်ချူပ်ရေးပိုင်းအနေနဲ့ တောဆင်ရိုင်းအန္တရာယ်ကာကွယ်ရေးအနေနဲ့ အသိပညာပေးဟောပြောပွဲတွေ၊ ဆင်တွေကို လိုက်မောင်းမယ်ဆိုရင် တဦးတယောက်တည်း မမောင်းဖို့နဲ့ အုပ်စုဖွဲ့ မောင်းနှင်ဖို့တွေ တောဆင်တွေဝင်တဲ့ ကျေးရွာတွေကို အုပ်ချူပ်ရေး၊ သစ်တော၊ သစ်တောရဲ၊ မြန်မာနိုင်ငံရဲတပ်ဖွဲ့တွေပူးပေါင်းပြီး တောဆင်တွေကို ခြောက်လှန့်မောင်းတာတွေကို ပြုလုပ်ပေးထားတယ်” လို့ ပြောပါတယ်။ ပြီးခဲ့တဲ့ ဖေဖော်ဝါရီလကလည်း တိုက်ကြီးမြို့နယ်က သစ်တောကြိုးဝိုင်းအတွင်း တောဆင်ရိုင်းအနင်းခံရလို့ ၂ လ အရွယ် ကလေးငယ်တဦး သေဆုံးခဲ့ပါတယ်။ သတင်းနှင့်ဓာတ်ပုံ - မေသွယ်
4 years Ago
Up