တုပ်ကွေးရောဂါ

August 2, 2022

ညောင်လေးပင်ခရိုင်တွင် စစ်ဘေးရှောင်ကလေးငယ်များ တုပ်ကွေးရောဂါ အဖြစ်များနေ

ကေအန်ယူ ကရင်အမျိုးသားအစည်းအရုံး၊ စီမံအုပ်ချုပ်နယ်မြေ၊ ညောင်လေးပင်ခရိုင်၊ ကျောက်ကြီးမြို့နယ်အတွင်းက စစ်ဘေးရှောင်ပြည်သူတွေဟာ လုံလောက်တဲ့ ကူညီပံ့ပိုးမှုတွေ မရရှိသလို ကလေးသူငယ်တွေဟာ မိုးရာသီမှာ အဖြစ်များတဲ့ တုပ်ကွေးရောဂါတွေ ဖြစ်နေကြတယ်လို့ စစ်ရှောင်အရေး ကူညီပေးနေသူတွေက ပြောပါတယ်။

စစ်ကောင်စီရဲ့ တပ်တွေက နယ်မြေကျော်ဝင်ရောက်ခဲ့တဲ့အတွက် KNLA ပူးပေါင်းတပ်ဖွဲ့တွေနဲ့ တိုက်ပွဲတွေ ဖြစ်ပွားနေသလို ကျေးရွာတွေအတွင်းကို လက်နက်ကြီးနဲ့ ပစ်ခတ်နေတာတွေကြောင့် ဒေသခံတွေ ထွက်ပြေးတိမ်းရှောင်နေရတဲ့အတွက် ကလေးသူငယ်တွေ အခုလို တုပ်ကွေးရောဂါတွေ ဖြစ်ပွားနေတာပါ။

ကရင်လူမှုရေးရာအဖွဲ့ တာဝန်ရှိသူတဦးက “လက်ရှိ ကြုံတွေ့နေရတဲ့ ပြဿနာက ကလေးသူငယ်အများစု တုပ်ကွေးရာသီ တုပ်‌ကွေးရောဂါတွေ အဖြစ်များတယ်။ ပြီးတော့လည်း အမိုးအကာတွေ မလုံလောက်တာတွေရှိတယ်။ လက်ရှိအခြေအနေကို ကျနော်က ပိုသိလာရတယ်” လို့ ပြောပါတယ်။

စစ်ဘေးရှောင်တွေဟာ လုံလောက်တဲ့ဆေးဝါးမရှိတာ၊ ဆရာဝန်မရှိတာတွေကြောင့် ဆေးဝါးကျွမ်းကျင်သူတွေနဲ့ပဲ အဆင်ပြေသလို ဆေးကုသနေရသလို စစ်ဘေးရှောင်အရေး ကူညီပေးနေသူတွေရဲ့ ရှေးဦးကုသမှုနည်းနဲ့ပဲ ဆေးကုသမှု ခံယူနေရတယ်လို့ ဆိုပါတယ်။

စစ်ကောင်စီရဲ့ လက်နက်ကြီးပစ်ခတ်မှုကြောင့် နေရပ်မပြန်နိုင်တဲ့ သက်ကြီးရွယ်အိုတွေနဲ့ ကိုယ်ဝန်ဆောင်မိခင်တွေဟာ ကျန်းမာရေးပြဿနာတွေနဲ့ ရင်ဆိုင်နေရသလို မသန့်ရှင်းတဲ့ရေတွေကို သောက်သုံးနေရတာ၊ ကျန်းမာရေးအတွက် အိမ်သာမရှိတာတွေကြောင့် နောက်ဆက်တွဲရောဂါ ဖြစ်ပွားမှာကို စိုးရိမ်နေရပါတယ်။

ကျောက်ကြီးမြို့နယ်အတွင်းက စစ်ဘေးရှောင်ပြည်သူတွေဟာ စစ်ကောင်စီရဲ့ ဖမ်းဆီးသတ်ဖြတ်မှာကို စိုးရိမ်ရပေမဲ့ နေထိုင်စားသောက်ရေးအတွက် လယ်ယာလုပ်ငန်းခွင် ပြန်လည်ဝင်ရောက်ဖို့ နေရပ်ပြန်သူတွေရှိတယ်လို့ စစ်ဘေးရှောင်အရေး ကူညီပေးနေသူတွေဆီက သိရပါတယ်။

ဇူလိုင် ၂၉ ရက် မနက် ၉ နာရီလောက်က စစ်ကောင်စီရဲ့ တိုက်ခိုက်ရေးရဟတ်ယာဉ်တွေနဲ့ ပစ်ခတ်တိုက်ခိုက်ခဲ့တဲ့အတွက် အရပ်သားပြည်သူ ၄ ဦး ထိမှန်ဒဏ်ရာရရှိခဲ့တယ်လို့ ကေအန်ယူက ထုတ်ပြန်ပါတယ်။

ကျောက်ကြီးမြို့နယ်အတွင်းက သောတူဒေး၊ ကွီးဒိုကယ်ခို၊ ခလယ်ကွီးကယ်ခိုကျေးရွာ ၃ ရွာကို စစ်ကောင်စီရဲ့ တိုက်ခိုက်ရေးရဟတ်ယာဉ်နဲ့ ၃ ကြိမ် လာရောက်ပစ်ခတ်ခဲ့တဲ့အတွက် အရပ်သားပြည်သူ ၄ ဦး အသက်အန္တရာယ် မစိုးရိမ်ရ ဒဏ်ရာတွေ ရရှိခဲ့ပါတယ်။

စစ်ကောင်စီရဲ့ ဖမ်းဆီးသတ်ဖြတ်ခံရတာ၊ လက်နက်ကြီးထိမှန် သေဆုံးခဲ့ရတဲ့ အရပ်သားပြည်သူ စုစုပေါင်း ၉ ဦးရှိပြီး လက်နက်ကြီးထိမှန် ဒဏ်ရာရရှိခဲ့တဲ့ အရပ်သားပြည်သူ စုစုပေါင်း ၁၂ ဦးရှိကာ စစ်ကောင်စီတပ်တွေရဲ့ ဖမ်းဆီးခံခဲ့ရတဲ့ အရပ်သားပြည်သူ စုစုပေါင်း ၃၄ ဦးရှိပြီး ထွက်ပြေးတိမ်းရှောင်နေရတဲ့ စစ်ဘေးရှောင်ပြည်သူ စုစုပေါင်း ၁၆,၀၃၆ ဦးရှိတယ်လို့ ကေအန်ယူက ထုတ်ပြန်ထားပါတယ်။

2 months Ago

September 14, 2021

အိန္ဒိယတွင် တုပ်ကွေးရောဂါ ကူးစက်မှုကြောင့် လူဒါဇင်ချီ သေဆုံး

အိန္ဒိယနိုင်ငံမြောက်ပိုင်း၊ ဥတ္တရာပရာဒေ့ရှ်ပြည်နယ်မှာ စက်တင်ဘာလဆန်းတည်းက ခုထိ တုပ်ကွေးအဖျားရောဂါ ကူးစက်နေလို့ ဒါဇင်နဲ့ချီတဲ့လူတွေ သေဆုံးခဲ့ပါတယ်။

အာဏာပိုင်တွေက ခြင်တွေ ပေါက်ဖွားနိုင်တဲ့ အခြေအနေတွေကို ဖျက်ဆီးဖို့ စတင် လှုပ်ရှားခဲ့ပါတယ်။

ရောဂါဒဏ်အခံရဆုံး ခရိုင်ဖြစ်တဲ့ ဖီရိုဇာဘက်ဒ်ခရိုင် တခုတည်းမှာ ကလေးအများအပြား အပါအဝင် လူ ၅၈ ယောက်ထက်မနည်း သေဆုံးခဲ့တာပါ။

လတ်တလောနှစ်တွေအတွင်း တုပ်ကွေး အဆိုးဆုံး ကူးစက်မှုအလယ် ရောက်သွားမှာကို ပြည်နယ်သားတွေ စိုးရိမ်နေကြပါတယ်။

ပြည်နယ်ထဲက ဆေးရုံတွေမှာလည်း တုပ်ကွေးလူနာတွေအတွက် အထူးလူနာဆောင်တွေကို ပြင်ဆင်ခဲ့ရပါတယ်။

တုပ်ကွေးလူနာအတွက် ခုတင် ၂၀ ပါတဲ့ လူနာဆောင် ၂ ဆောင် သီးသန့်ဖယ်ထားရတယ်လို့ ရှရီရှိဗာ ပါရာဆဒ် ဂုပ္ပတားခရိုင်ဆေးရုံက ဆေးဘက်ကြီးကြပ်ရေးမှူး ဒေါက်တာပရာဆာနာကူးမားက ပြောပါတယ်။

ကြွက်သားတွေ အဆစ်အမြစ်တွေ ပြင်းပြင်းထန်ထန် နာကျင်စေတဲ့ တုပ်ကွေးအဖျားရောဂါဟာ အေးဒီးစ်ခြင်အမျိုးအစား အကိုက်ခံရလို့ ဖြစ်လေ့ရှိတဲ့ ရောဂါဖြစ်ပြီး အပူပိုင်းဒေသ ရေသေ ရေပုပ်တွေမှာ ပေါက်ဖွားလေ့ရှိပါတယ်။

1 year Ago
Up