တိုင်းရင်းသားလက်နက်ကိုင်

August 22, 2022

တိုင်းရင်းသားလက်နက်ကိုင် ၃ ဖွဲ့က စစ်ခေါင်းဆောင်နှင့်တွေ့ဆုံ၊ ဆင်ဖြူတော်ပေါ်ထွန်းမှု အတိတ်နိမိတ်ကောင်းကြောင်း ဆွေးနွေးတင်ပြ

ပအိုဝ်း၊ လားဟူနဲ့ ရခိုင် တိုင်းရင်းသားလက်နက်ကိုင်အဖွဲ့  ၃ ဖွဲ့က ခေါင်းဆောင်တွေဟာ အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်နဲ့ ဩဂုတ် ၂၂ ရက် ဒီနေ့မနက်က နေပြည်တော်မှာ   ဒုတိယအကြိမ်တွေ့ဆုံပြီး  ငြိမ်းချမ်းရေးဆွေးနွေးခဲ့တယ်လို့  စစ်ကောင်စီပြန်ကြားရေးလက်အောက်ခံ MRTV က သတင်းထုတ်ပြန်ပါတယ်။

ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO) ဥက္ကဋ္ဌ ခွန်သူရိန်၊ လားဟူဒီမိုကရက်တစ်အစည်းအရုံး(LDU) ဥက္ကဋ္ဌ ကျာဆော်လမွန်နဲ့ ရခိုင်ပြည်လွတ်မြောက်ရေးပါတီ(ALP) ဒုဥက္ကဋ္ဌ စောမြရာဇာလင်းတို့ ခေါင်းဆောင်တဲ့အဖွဲ့တွေနဲ့ နေပြည်တော်ရှိ ဘုရင့်နောင်ရိပ်သာမှာ တွေ့ဆုံခဲ့တာဖြစ်ပါတယ်။

ဒီတွေ့ဆုံပွဲမှာ လက်နက်ကိုင် ပဋိပက္ခတွေ၊ သဘောထားကွဲလွဲမှုတွေနဲ့ ဒေသနဲ့ တိုင်းပြည်တိုးတက်ရေး တည်ဆောက်လို့ မရနိုင်ကြောင်း၊ ငြိမ်းချမ်းမှုရရှိပြီး ဖွံ့ဖြိုးတိုးတက်ရေး ဆွေးနွေးဆောင်ရွက်သွားမှာဖြစ်ကြောင်း ၊ တိုင်းပြည်ငြိမ်းချမ်းရေးနဲ့ နယ်မြေဒေသအားလုံးဖွံ့ ဖြိုးတိုးတက်ရေးအတွက် ကောင်းမွန်တဲ့ ငြိမ်းချမ်းရေးဆိုင်ရာ လက်တွေ့တိုးတက်မှုတခုကို ဆွေးနွေးဆောင်ရွက်သွားမှာဖြစ်ကြောင်း၊ အခုလိုငြိမ်းချမ်းရေးဆွေးနွေးဆောင်ရွက်နေချိန်မှာ ဆင်ဖြူရတနာပေါ်ထွန်းလာမှုကလည်း နိုင်ငံအေးချမ်းသာယာရေးနဲ့ ဖွံ့ဖြိုးတိုးတက်ရေးအတွက် အတိတ်နိမိတ်ကောင်းဖြစ်တာကြောင့် အောင်မြင်အောင်ဆောင်ရွက်သွားဖို့ လိုအပ်ကြောင်း၊ ပါတီစုံ ဒီမိုကရေစီစနစ်ကျင့်သုံးဆောင်ရွက်ရေး၊ ဒီမိုကရေစီနဲ့ ဖယ်ဒရယ်စနစ်ကို အခြေခံတဲ့ပြည်ထောင်စု တည်ဆောက်ရေး၊  ဒေသဖွံ့ဖြိုးရေးကိစ္စတွေကို တိုင်းရင်းသား ၃ ဖွဲ့ရဲ့ ခေါင်းဆောင်တွေက ဆွေးနွေးတင်ပြခဲ့တယ်လို့ ဆိုပါတယ်။

ဒီတွေ့ဆုံပွဲမှာ စစ်ခေါင်းဆောင်က စစ်မှန်တဲ့ ပါတီစုံဒီမိုကရေစီစနစ်ကျင့်သုံးရေး၊ ဒီမိုကရေစီနဲ့ ဖယ်ဒရယ်စနစ်ကို အခြေခံတဲ့ပြည်ထောင်စုတည်ဆောက်ရေးကို နိုင်ငံရေးမျှော်မှန်းချက်အဖြစ် ကြိုးပမ်းဆောင်ရွက်ရေး၊ ဒေသနဲ့ တိုင်းရင်းသားအကျိုးကို တရားဥပဒေနဲ့အညီတောင်းဆို ဆွေးနွေးနိုင်ရေး တိုင်းရင်းသားတွေ နိုင်ငံရေးစင်မြင့်မှာ ပိုမိုပါဝင်လာရေး၊ ၂၀၀၈ ဖွဲ့စည်းပုံနဲ့ အန်စီအေ အပစ်ရပ်စာချုပ်ကို အခြေခံပြီး ငြိမ်းချမ်းရေးဆက်လက်ဖော် ဆောင်ရေး စတဲ့ကိစ္စတွေ ဆွေးနွေးပြောကြားခဲ့တယ်လို့ စစ်ကောင်စီသတင်းမှာဖော်ပြပါတယ်။

အခု ဒုတိယအကြိမ်ဆွေးနွေးမှုကရရှိလာတဲ့ သဘောထားဆန္ဒတွေကို မူတည်ပြီး ရှေ့ဆက်ဆောင်ရွက် အကောင်အထည်ဖော်သွားနိုင်မယ့် နိုင်ငံရေးလမ်းကြောင်းပုံစံအတွက် ကြိုတင်သဘောတူညီမှုတွေရယူ ညှိနှိုင်းတာတွေကို အချိန်ယူပြီး အသေးစိတ်ဆောင်ရွက်သွားမှာဖြစ်ကြောင်း တိုင်းရင်းသားဒေသဖွံ့ဖြိုးရေးအတွက် ငွေကျပ် ဘီလီယံ ၃၃၀ ကို နိုင်ငံစီးပွားမြှင့်တင်ရန်ပုံငွေကနေ ခွင့်ပြုထားတယ်လို့ စစ်ခေါင်းဆောင်က ပြောပါတယ်။ 

အဆိုပါ တိုင်းရင်းသားလက်နက်ကိုင် ၃ ဖွဲ့ဟာ စစ်ကောင်စီလက်အောက်ခံအဖွဲ့တွေနဲ့ နေပြည်တော်မှာ ဆက်လက်ဆွေးနွေးဖို့ရှိနေပါတယ်။ အာဏာသိမ်း စစ်ခေါင်းဆောင်ဟာ တိုင်းရင်းသားလက်နက်ကိုင် အဖွဲ့အစည်းတွေကို ငြိမ်းချမ်းရေး တွေ့ဆုံဆွေးနွေးနွေးဖို့  ဧပြီလ ၂၂ ရက်က စတင်ဖိတ်ခေါ်ခဲ့တာမှာ စစ်ကောင်စီတပ်တွေနဲ့ တိုက်ပွဲတွေ မဖြစ်တာ ၁၀ စုနှစ်နဲ့ချီ ကြာနေပြီဖြစ်တဲ့  တိုင်းရင်းသားလက်နက်ကိုင် ၁၀ ဖွဲ့က နေပြည်တော်ကို မေလမှ ဩဂုတ်လအတွင်း ပထမအကြိမ် သွားရောက် တွေ့ဆုံခဲ့ပြီး အခု ဒုတိယအကြိမ် ထပ်မံတွေ့ဆုံနေတာဖြစ်ပါတယ်။

6 months Ago

August 17, 2022

EAO ၁၀ ဖွဲ့နှင့် ထပ်တွေ့မည်၊ ပြည်နယ်နှင့် တိုင်း ဝန်ကြီးချုပ်များကို ဖက်ဒရယ်အာဏာပေးထားဟု စစ်ခေါင်းဆောင်ပြော

မကြာသေးခင်ကတွေ့ဆုံထားတဲ့ တိုင်းရင်းသားလက်နက်ကိုင် EAO အဖွဲ့ ၁၀ ဖွဲ့စလုံးနဲ့ ထပ်မံတွေ့ဆုံပြီး လက်မှတ်ထိုးနိုင်အောင် ကြိုးစားသွားမယ်လို့ အာဏာသိမ်းစစ်ခေါင်းဆောင်က ပြောကြားလိုက်ပါတယ်။

ဩဂုတ် ၁၆ ရက်က နေပြည်တော်မှာ ကျင်းပတဲ့ စစ်ကောင်စီ အစည်းအဝေးမှာ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောကြားခဲ့တာလို့ စစ်ကောင်စီ ပြန်ကြားရေးက သတင်းထုတ်ပါတယ်။

“နားလည်တဲ့သူတွေကတော့ ငြိမ်းချမ်းရေးအတွက် လာကြတာပေါ့။ နားမလည်တဲ့သူကတော့ ဘေးကနေပြောနေကြတုန်း ရှိပါသေးတယ်။ အခု ၁၀ ဖွဲ့ ကျနော်တို့ ဆွေးနွေးပြီးသွားပြီ။ မနေ့တစ်နေ့ကပဲ ကျနော် SSPP အဖွဲ့နဲ့ဆွေးနွေးတယ်။ ကျနော်တို့ အားလုံးအောင်မြင်ပါတယ်။ အခုနကပြောတဲ့ ပါတီစုံဒီမိုကရေစီစနစ်နဲ့ ဒီမိုကရေစီအုပ်ချုပ်ရေးနဲ့ ဖက်ဒရယ် အာဏာကိုပေးထားတဲ့ ပြည်ထောင်စုတည်ဆောက်ရေးကို ခင်ဗျားတို့ လက်ခံလား မေးတော့၊ အကုန်လက်ခံတယ်ပြောတယ်။ ကျနော် ဒုတိယအကြိမ် ပြန်တွေ့မယ်။ ဒီလထဲမှာ ပြန်တွေ့ဖို့ကြိုးစားနေတယ်။ အဖွဲ့ ၁၀ ဖွဲ့လုံးကို အုပ်စုဖွဲ့ပြီး တခါဆွေးနွေးမယ်။ စက်တင်ဘာလကျလို့ရှိရင် တခါသူတို့နဲ့ အားလုံးပြန်တွေ့မယ်။ အဲဒါပြီးရင် လက်မှတ်ထိုးနိုင်ဖို့ကြိုးစားမယ်။ ဒီအတွက်တော့ ဘယ်လောက်ကြာမလဲ ကျနော် မပြောနိုင်သေးဘူး။ အခြေခံသဘောတူညီချက်ရပြီးဖြစ်တဲ့ အတွက်ကြောင့် ကျနော်တို့ အနေနဲ့မရစရာ အကြောင်းမရှိဘူးလို့ မြင်ပါတယ်။” လို့ စစ်ခေါင်းဆောင်က ပြောပါတယ်။

ဒီမိုကရေစီအုပ်ချုပ်ရေးနဲ့ ဖက်ဒရယ်အာဏာကို ပေးထားတဲ့ ပြည်ထောင်စုကို သွားရမှာဖြစ်ပြီး လက်ရှိ ပြည်နယ်နဲ့တိုင်း ဝန်ကြီးချုပ်တွေကို ဖက်ဒရယ်အာဏာတွေပေးထားတယ်လို့လည်း စစ်ခေါင်းဆောင်က ပြောပါတယ်။ 

“ဝန်ကြီးချုပ်တွေကိုလည်း ကျနော်ပြောတယ်။ ခင်ဗျားတို့ ဖက်ဒရယ်အာဏာတွေ ခင်ဗျားတို့ရှိနေတယ်။ ဒီအပေါ်မှာ ခင်ဗျားတို့လုပ်ကြည့်ပါ။ အခုလည်း သူတို့လုပ်ကြတာပဲ။ တချို့ ပြည်ထောင်စုကပြောတာ။ ဗဟိုကပြောတာ မဟုတ်ဘူး သူတို့ဖာသာလုပ်နေတဲ့ဟာ။ ရည်မှန်းချက်တွေအများကြီးပါတယ်။ ကျနော်ကလည်း တစ်ချို့ဟာတွေသဘောကျတယ်။ ဒါဆိုကောင်းတယ်။ လုပ်ပါ။ အားပေးပါတယ်။ ခင်ဗျားအတွက် အခက်အခဲရှိရင် ကျနော့်ကိုပြော။ ဒီလိုပြောပါတယ်။ အဲ့ဒီတော့ ကျနော်တို့ ဒီမိုကရေစီအုပ်ချုပ်ရေးနဲ့ ဖက်ဒရယ်အာဏာကို၊ လုပ်ပိုင်ခွင့်ကိုပေးထားတဲ့ ပြည်ထောင်စုကို သွားရမယ်။”

အာဏာသိမ်း စစ်ခေါင်းဆောင်ဟာ တိုင်းရင်းသားလက်နက်ကိုင် အဖွဲ့အစည်းတွေကို ငြိမ်းချမ်းရေး တွေ့ဆုံဆွေးနွေးနွေးဖို့  ဧပြီလ ၂၂ ရက်က ဖိတ်ခေါ်ခဲ့တာမှာ စစ်ကောင်စီတပ်တွေနဲ့ တိုက်ပွဲတွေ မဖြစ်တာ ၁၀ စုနှစ်နဲ့ချီ ကြာနေပြီဖြစ်တဲ့  တိုင်းရင်းသားလက်နက်ကိုင် ၁၀ ဖွဲ့က နေပြည်တော်ကို သွားရောက် တွေ့ဆုံခဲ့တာဖြစ်ပါတယ်။

စစ်ကောင်စီ ဖိတ်ခေါ်တဲ့ဆွေးနွေးပွဲကိုလက်ခံပြီး နေပြည်တော်သွားခဲ့တဲ့ အဖွဲ့ ၁၀ ဖွဲ့ကတော့   ‘ဝ’ ပြည်သွေးစည်းညီညွတ်ရေး တပ်မတော် (UWSA)၊ အမျိုးသားဒီမိုကရေစီမဟာမိတ် တပ်မတော်(NDAA-မိုင်းလားအဖွဲ့)၊ မွန်ပြည်သစ်ပါတီ(NMSP)၊ ရှမ်းပြည်ပြန်လည်ထူထောင်ရေးကောင်စီ (RCSS/SSA)၊ ၊  ဒီမိုကရေစီအကျိုးပြု ကရင်တပ်မတော် (DKBA)၊ ရခိုင်ပြည် လွတ်မြောက်ရေးပါတီ (ALP)၊ ကရင်အမျိုးသားအစည်းအရုံး/ ကရင်အမျိုးသား လွတ်မြောက်ရေး တပ်မတော်- ငြိမ်းချမ်းရေးကောင်စီ (KNU/ KNLA-PC)၊ ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO)၊  လားဟူဒီမိုကရက်တစ်အစည်းအရုံး( LDU) နဲ့ ရှမ်းပြည်တိုးတက်ရေးပါတီ ( SSPP/SSA) အဖွဲ့တို့ ဖြစ်ကြပါတယ်။

ကချင်လွတ်မြောက်ရေးတပ်မတော် (KIA) ၊ ကရင်အမျိုးသားအစည်းအရုံး (KNU) ၊ ရက္ခိုင့်တပ်တော် (AA) ၊ ချင်းနဲ့ ကရင်နီလက်နက်ကိုင်တပ်ဖွဲ့တွေအပါအဝင် လက်ရှိ စစ်ကောင်စီတပ်ဖွဲ့တွေနဲ့ တိုက်ပွဲအပြင်းအထန်ဖြစ်ပွားနေတဲ့ တိုင်းရင်းသား လက်နက်ကိုင်အဖွဲ့တွေကတော့ စစ်ခေါင်းဆောင်ရဲ့ ငြိမ်းချမ်းရေးဖိတ်ခေါ်မှုကို လက်မခံဘဲ သွားရောက်တွေ့ဆုံခဲ့တာ မရှိပါဘူး။ 

စစ်ကောင်စီဟာ တဖက်မှာ ငြိမ်းချမ်းရေးဖိတ်ခေါ်ပြီး အပစ်ရပ်ဟန်ပြကြေညာထားပေမဲ့ တိုင်းရင်းရင်းသားဒေသတွေမှာ စစ်အင်အားတိုးချဲ့ စစ်ရေးလှုပ်ရှားမှုတွေ အကြီးအကျယ်ပြုလုပ်နေပြီး  မြေပြင်မှာ တိုက်ပွဲတွေဆင်နွှဲနေသလို လေကြောင်းတိုက်ခိုက်မှုတွေလည်း အဆက်မပြတ်လုပ်ဆောင်နေတာ ဖြစ်ပါတယ်။

6 months Ago
More News
Up