တိုင်းရင်းသားဒေသ

February 6, 2019

တိုင်းရင်းသားဒေသက ကျောင်းသူကျောင်းသားများ ပညာရေးကောလိပ်တက်ခွင့်ရအောင် ဆောင်ရွက်ပေးမည်

တိုင်းရင်းသားဒေသတွေက ကျောင်းသူကျောင်းသားတွေအတွက် ပညာရေး ကောလိပ်အပါအ၀င် ကိုယ်သင်ကြားချင်တဲ့ ပညာရပ်ကို သင်ကြားနိုင်အောင် အမြန်ဆုံးကူညီ လုပ်ဆောင်ပေးမယ်လို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောပါတယ်။ ဒီနေ့ ရှမ်းပြည်နယ် မိုင်းတုံမြို့က လူထုတွေ့ဆုံပွဲမှာ ဒေသခံ ကျောင်းသူတယောက်ရဲ့ အမေးကို ပြန်ဖြေပေးခဲ့တာပါ။ ကျောင်းသူလေးက သူဟာ မန်တုံကျောင်းမှာ ပညာသင်ကြားခဲ့ပြီး တက္ကသိုလ်ဝင်စာမေးပွဲ အမှတ်နည်းတာကြောင့် သူတက်ချင်တဲ့ ပညာရေးကောလိပ် တက်ခွင့်မရဘူးဖြစ်နေတယ်လို့ တင်ပြခဲ့ပါတယ်။ ဒီအပေါ်မှာ ဒေါ်အောင်ဆန်းစုကြည်က “အထူးသဖြင့် တိုင်းရင်းသားဒေသတွေမှာ ဆိုလို့ ရှိရင် ဘာသာစကားကျွမ်းကျင်မှုအရ ၁၀ တန်း စာမေးပွဲဖြေဆိုတဲ့အခါ ကျမတို့ရဲ့ တိုင်းရင်းသား ကလေး (ခလေး)များဟာ အားနည်းသွားတယ်။ တချိန်လုံး မြန်မာဘာသာစကားကိုပဲ ပြောဆို သုံးစွဲနေတဲ့ ဒေသတွေက ကလေးတွေနဲ့စာလို့ရှိရင် အားနည်းချက် ဖြစ်သွားတယ်။ ဒါကြောင့်မို့လို့ ပြိုင်ဆိုင်တဲ့အခါ အမှတ်နည်းတာ ဖြစ်တတ်ပါတယ်။ ဒီကိစ္စကို ပညာရေးဝန်ကြီးဌာနနဲ့ ကျမတို့ လေးလေးနက်နက် ဆွေးနွေးနေပါတယ်။ တိုင်းရင်းသားဒေသတွေမှာ ရှိတဲ့ ကလေးတွေဟာ တန်းတူရည်တူ ကျမတို့ လုပ်ပေးဖို့ စီမံကိန်း တွေလည်း အကောင်အထည်ဖော်ဖို့ စတင်ဆွေးနွေးနေပါတယ်” လို့ ပြောပါတယ်။ ကျောင်းသူကျောင်းသားတွေ ဆန္ဒရှိတာကို သင်ကြားနိုင်မယ့် ပညာရေးစနစ်ဖြစ်ဖို့  အမြန်ဆုံးအကောင်အထည်ဖော်ပေးမယ်လို့လည်း ဒေါ်အောင်ဆန်းစုကြည်က ဆက်ပြောပါတယ်။ “ဒီလို လွန်သွားတဲ့သူတွေ ပညာရေးဘွဲ့ပြန်ပြီးတော့ ရနိုင်မယ့်နည်းလမ်းတွေကို ပြန်ပြီးတော့ ဖွင့်ပေးမှာဖြစ်ပါတယ်။ မကြာခင်ကာလမှာ စိတ်အားထက်သန်တဲ့ ကျောင်းသူကျောင်းသားတွေ အတွက် ကိုယ်သင်ကြားချင်တာကို သင်ကြားနိုင်ဖို့အတွက် ကူညီပြီးတော့ လုပ်ပေးပါ့မယ်” အတိုင်ပင်ခံ ပုဂ္ဂိုလ်နဲ့အတူပါလာတဲ့ နယ်စပ်ရေးရာဝန်ကြီးက ဗိုလ်ချုပ်ကြီး ရဲအောင်ကတော့ အထူးလိုက်လျောတဲ့အနေနဲ့ နောက်နှစ်မှာ ဒီကလေးမလေးကို သူ့ဝန်ကြီးဌာနက ပညာရေး ကောလိပ်မှာ တက်နိုင်အောင်လုပ်ပေးပါ့မယ်လို့ ရှမ်းပြည်နယ်ဝန်ကြီးချုပ် ဒေါက်တာလင်းထွဋ်က တင်ပြခဲ့တာပါ။ အတိုင်ပင်ခံပုဂ္ဂိုလ်က “ကျမတို့ ဒီလိုလုပ်လို့တော့ မဖြစ်ပါဘူး။ ဒါ ကျမ ပွင့်ပွင့်လင်းလင်း ပြောတာ။ ကျမတို့ မူတခုချပြီးတော့ လုပ်ရမယ်။ ဒီလိုပဲ တယောက်ချင်း တယောက်ချင်းကို ကောက်ပြီးတော့ လုပ်လို့တော့ မဖြစ်ပါဘူး။ သမီးလည်း အခွင့်အရေးရသလို တခြား သမီးလို တန်းတူရည်တူရှိတဲ့သူတွေလည်း အခွင့်အရေး ရရမယ်။ အဲဒါတွေ ကျမတို့ ဆက်ပြီး စီစဉ်ပါ့မယ်” လို့ ပြန်ပြောခဲ့ပါတယ်။ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ဟာ ရှမ်းပြည်နယ် ခရီးစဉ်သွားရောက်နေပြီး ဒီနေ့ ညနေမှာ တောင်ကြီးကို ရောက်ရှိမှာပါ။
2 years Ago

August 3, 2018

တိုင်းရင်းသားဒေသ စစ်ပွဲများကြောင့် မယ်သီလရှင်ဝတ်သူ များလာ

တိုင်းရင်းသားဒေသတွေမှာ စစ်ပွဲတွေကြောင့် ပြောင်းရွှေ့လာကြတဲ့ ကလေးတွေ မယ်သီရှင် ဝတ်လာတဲ့အတွက် စစ်ကိုင်းမှာ အရင်နှစ်ကထက် မယ်သီလရှင် အပါး ၆၀၀ ကျော် တိုးလာတယ်လို့ စစ်ကိုင်းမြို့နယ် သီလရှင်အမှုဆောင်အဖွဲ့ ဥက္ကဋ္ဌ ဆရာကြီး ဒေါ်ကေတုဝတီက မိန့်ကြားပါတယ်။ စစ်ကိုင်း သီတဂူ အပြည်ပြည်ဆိုင်ရာ ဝိပဿနာတက္ကသိုလ် ကျောင်းဝင်းအတွင်းမှာရှိတဲ့ သီတဂူသံဝေဇနိယ ဓမ္မဗိမာန်တော်ကြီးမှာ သြဂုတ် ၁ ရက်နေ့ မနက် ဝါဝင်ချိန် သီတဂူ ဆရာတော်ဘုရားကြီး ဥူးဉာဏိဿရကို ဂါဝရပြုပွဲမှာ ဒေါ်ကေတုဝတီက ဒီဗွီဘီကို  မိန့်ကြားခဲ့တာပါ။ စစ်ကိုင်း ဂူနီချောင်က သီလရှင်ဆရာကြီး ဒေါ်ကေတုဝတီက “တိုင်းရင်းသားတွေ ဒေသမှာ စစ်ပွဲတွေဖြစ်လို့ စစ်ဒုက္ခတွေ ရောက်တော့ သားသမီးတွေ ဟိုဆွဲ၊ ဒီဆွဲနဲ့ ရောက်လာကြတယ်။ ဒီဘက်ကိုပို့တော့ သီလရှင်ဝတ်ပြီး ကျောင်းထားပေးရတယ်။ အဲဒါတွေကြောင့် အရင်နှစ်ထက် ဒီနှစ်က သီလရှင်အပါး ၆၀၀ ကျော် တိုးလာခဲ့တယ်” လို့ မိန့်ပါတယ်။ စစ်ကိုင်းမြို့နယ်မှာ သီလရှင်ချောင်ပေါင်း ၆၀၀ ကျော်နဲ့ သီလရှင်အပါး ၇၈၀၀ ကျော် ရှိတယ်လို့ သိရပါတယ်။ ဒီနှစ်မှာ အရင်နှစ်တွေကထက် သီလရှင်ဦးရေ ပိုတိုးလာရာမှာ စစ်ဘေးရှောင်သူတွေက ပိုများတယ်လို့ ဆရာကြီးက မိန့်ကြားခဲ့ပါတယ်။ ရန်ကုန်နဲ့ မန္တလေး အပါအဝင် မြန်မာပြည်တွင်း တခြားမြို့တွေမှာရှိတဲ့  မယ်သလီရှင်ကျောင်းတွေမှာလည်း တိုင်းရင်းသားဒေသတွေက လာရောက်တဲ့ ကလေးငယ်တွေ မယ်သီလရှင်ဝတ်ပြီး ပညာသင်ယူနေကြတာတွေ ရှိနေပါတယ်။ ခင်သန်းညွန့်
3 years Ago
Up