တိုကျိုမြို့

May 25, 2022

တိုကျိုတွင်ကျင်းပသည့် Quad ထိပ်သီးအစည်းအဝေးကို ဂျပန်လူထု ဆန္ဒပြ

လေးပွင့်ဆိုင် လုံခြုံရေးဆွေးနွေးပွဲ (Quad) ရဲ့ နိုင်ငံလေးခုက ခေါင်းဆောင်တွေ ဂျပန်နိုင်ငံ မြို့တော်တိုကျိုမှာ လူချင်းတွေ့ဆုံ ကျင်းပနေတဲ့ ထိပ်သီးအစည်းအဝေးကို ဆန့်ကျင်တဲ့ လူထုဆန္ဒပြပွဲ မေ ၂၄ ရက်က ဆက်လက် ဖြစ်ပွားခဲ့ပါတယ်။

အမေရိကန်သမ္မတ ဂျိုးဘိုင်ဒင်ရဲ့ ခရီးစဉ်နဲ့ အမေရိကန်၊ ဂျပန်၊ အိန္ဒိယနဲ့ သြစတြေးလျတို့ ပါဝင်တဲ့ Quad အဖွဲ့ရဲ့ထိပ်သီးအစည်းအဝေးကိုပါ ဆန့်ကျင်တဲ့အနေနဲ့ ဒီရက်ပိုင်းအတွင်းမှာပဲ ဂျပန်နိုင်ငံတဝန်းက ရာနဲ့ချီတဲ့လူတွေဟာ တိုကျိုမြို့ရဲ့ လမ်းမတွေပေါ်ထွက်ပြီး ဆန္ဒပြခဲ့ကြပါတယ်။

ဒီအစည်းအဝေးဟာ အာရှ-ပစိဖိတ်ဒေသမှာ တရုတ်ကို သီးခြားခွဲထုတ်မယ့် ဝါရှင်တန်ရဲ့ကြိုးပမ်းမှု တစိတ်တပိုင်းအဖြစ် ကျယ်ကျယ်ပြန့်ပြန့် မြင်တွေ့ရတာကြောင့် ဆန္ဒပြကြတာပါ။

Quad နိုင်ငံ ထိပ်သီးခေါင်းဆောင်တွေဟာ လူချင်းတွေ့ဆုံ ထိပ်သီးဆွေးနွေးပွဲအပြီး မေ ၂၄ ရက်မှာ ပူးတွဲကြေညာချက် ထုတ်ပြန်ခဲ့ကာ ခြိမ်းခြောက်ခြင်း သို့မဟုတ် အင်အားသုံးခြင်းအစား အငြင်းပွားမှုများကို ငြိမ်းချမ်းစွာဖြေရှင်းရာမှာ ပံ့ပိုးပေးဖို့ တောင်းဆိုထားပါတယ်။

ဒါပေမဲ့ ဆန္ဒပြသူတွေကတော့ အတွင်းစည်းထဲက စစ်ပွဲအတွက် ထိပ်သီးအစည်းအဝေး လုပ်နေတာလို့ ယူဆကြတာပါ။

ဂျပန်ဟာ စစ်ပွဲတွေစတင်ဖို့ ရည်ရွယ်တဲ့ လှုပ်ရှားမှုတွေမှာ အမေရိကန်နဲ့ ပူးပေါင်းပြီးတော့ သူ့ရဲ့ကတိကို လိုက်နာဖို့ ပျက်ကွက်ခဲ့ကြောင်း ဂျပန်ပြည်သူတချို့က ‌မှတ်ချက်ချပါတယ်။

ဆန္ဒပြသူတချို့ကတော့ အမေရိကန် ဦးဆောင်တဲ့ Quad အဖွဲ့ဟာ အမေရိကန်ရဲ့ လွှမ်းမိုးချုပ်ကိုင် ဦးဆောင်မှုကို ထိန်းသိမ်းဖို့ လက်နက်တခုအဖြစ် လုပ်ဆောင်နေတာဖြစ်ပြီး ဒေသတွင်း တည်ငြိမ်ရေးကို ခြိမ်းခြောက်နေတယ်လို့ ယူဆကြပါတယ်။

"နိုင်ငံတကာ အသိုင်းအဝိုင်းမှာ စီးပွားရေးနဲ့ စစ်ရေးအရ ထိပ်တိုက်ရင်ဆိုင်မှု အမျိုးမျိုးကို ပြင်းထန်လာစေမယ့် သီးသန့်ကလပ် အဖွဲ့လေးတွေ ဖွဲ့နေတဲ့ လမ်းကြောင်းတခု ပေါ်နေပါတယ်။ ဒီလိုအပြုအမူတွေကို ရပ်တန့်ပြီးတော့ နိုင်ငံတကာ ပူးပေါင်းဆောင်ရွက်မှုကို အားကောင်းစေချင်တယ်။ စစ်ပွဲတွေဖြစ်အောင် ရန်စတဲ့ လုပ်ရပ်မှန်သမျှကို ဆန့်ကျင်ပါတယ်" လို့ ဆန္ဒပြသူတဦးက ပြောပါတယ်။

"ဂျပန်နိုင်ငံဟာ ဒုတိယကမ္ဘာစစ်အပြီးမှာ ဂျပန်က စစ်ပွဲတွေ မစတင်တော့ဘဲ ငြိမ်းချမ်းတဲ့နိုင်ငံ ဖြစ်လာမယ်လို့ ကတိပြုခဲ့ပေမဲ့လည်း ကတိကဝတ်တွေကို အဆက်မပြတ် ဖောက်ဖျက်နေတယ်" လို့ နောက်ထပ် ဆန္ဒပြသူတဦးက ပြောပါတယ်။

ဆန္ဒပြသူတဦးကလည်း "အမေရိကန်က ကမ္ဘာကို အုပ်စိုးဖို့နဲ့ သူ့ရဲ့ဩဇာလွှမ်းမိုးမှုကို ထိန်းထားဖို့ ရည်ရွယ်ပြီးတော့ 'Quad' အဖွဲ့ကို ဟန်ပြလုပ်ထားတာ ဖြစ်ပြီးတော့ စီးပွားရေး ဖွံ့ဖြိုးတိုးတက်ဖို့နဲ့ ငြိမ်းချမ်းရေးကို မြှင့်တင်တာ မဟုတ်ပဲ စစ်ပွဲတွေဆင်နွှဲဖို့ ရည်ရွယ်ချက်နဲ့ စစ်တပ်ကို ချထားတာ" လို့ ပြောပါတယ်။

ဆန္ဒပြသူ နောက်တဦးက "သူတို့ဟာ တကယ့်ကို ကမ္ဘာ့ငြိမ်းချမ်းရေးအတွက်လို့ ဆိုရင် ဒီ 'Quad' ရဲ့ လုပ်ငန်းစဉ်တွေကို ချက်ချင်း ဖြုတ်ချသင့်တယ်၊ အခု အမေရိကန်က နေတိုးရဲ့ အရှေ့ဘက်ကို ချဲ့ထွင်ဖို့ တွန်းအားပေးနေတာဖြစ်တယ်၊ ဒီလိုလုပ်နေတာတွေကို ရပ်တန့်စေချင်တယ်၊ ဒါဟာ ကမ္ဘာ့ငြိမ်းချမ်းရေးကို ထိန်းသိမ်းဖို့ အရေးကြီးတယ်" လို့ ပြောကြားခဲ့ပါတယ်။

1 month Ago

May 8, 2022

တိုကျိုမြို့တွင် မြန်မာ့နွေဦးတော်လှန်ရေး ဒုတိယလှိုင်းအဖြစ် စစ်အာဏာရှင်ဆန့်ကျင် ဆန္ဒပြ

ကမ္ဘာလုံးဆိုင်ရာ မြန်မာ့နွေဦးတော်လှန်ရေး ဒုတိယလှိုင်း တိုက်ပွဲခေါ်သံအဖြစ် စစ်အာဏာရှင် ဆန့်ကျင် ချီတက်ဆန္ဒပြပွဲကို ဂျပန်နိုင်ငံ၊ တိုကျိုမြို့လူစည်ကားတဲ့  ရှင်ဂျုခုအရပ်မှာ ဂျပန်ရောက် မြန်မာပြည်သားတွေက  မေလ ၈ ရက် ဒီကနေ့ ပြုလုပ်ခဲ့ပါတယ်။

ဒီကနေ့ဟာ ဂျပန်နိုင်ငံမှာ အမေများနေ့ကျင်းပတာနဲ့ တိုက်ဆိုင်တဲ့အတွက် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ နိုင်ငံရေးအကျဉ်းသားတွေအားလုံး အမြန်ဆုံးလွတ်မြောက်ရေးအတွက်လည်း တောင်းဆို ဆန္ဒပြခဲ့ကြပါတယ်။

ဆန္ဒပြပွဲဦးဆောင်သူတဦးဖြစ်တဲ့ ကိုရန်ပိုင်ဦးက “ကျနော်တို့အားလုံးရဲ့ အမေဖြစ်တဲ့ ဒေါ်အောင်ဆန်းစုကြည်နဲံ နိုင်ငံရေးအကျဉ်းသားတွေကို အမြန်ဆုံးလွှတ်ပေးရေးကို တောင်းဆိုပါတယ်” လို့ ပြောပါတယ်။

ဆန္ဒပြပွဲ ပွဲဦးဆောင်သူတဦးဖြစ်တဲ့ ကိုသန့်ဇော်ထက်ကလည်း “ဒီဆန္ဒပြပွဲက မြန်မာနိုင်ငံအတွက် အသက်ပေးဆောင်ရွတ်နေကြတဲ့PDFတွေကို ဂုဏ်ပြုတာပါသလို သွေးစွန်းတဲ့နေတဲ့ စစ်ကောင်စီကို အားမပေးကြဖို့နဲ့ နိုင်ငံတကာရောက်နေပေမဲ့ မြန်မာပြည်သူတွေနဲ့ တသားတည်းရှိနေတာကို နည်းမျိုးစုံပူးပေါင်းပါဝင်ပြသနေတာပါ။ အားတင်းထားကြပါ”လို့ ပြော ပါတယ်။

ချီတက်ဆန္ဒပြပွဲမှာပါဝင်ခဲ့သူ တိုကျို မြန်မာသံရုံးက CDM လုပ်ထားတဲ့ ပထမအတွင်းဝန် ဦးအောင်စိုးမိုးကလည်း “ မြန်မာပြည်က CDM ဝန်ထမ်းတွေ ပန်းတိုင်ရောက်ခါနီပါပြီ။  ဇွဲရှိကြပါ မျှော်လင့်လို့တိုက်တာမဟုတ်ဘူး၊ ယုံကြည်လို့ တိုက်တာမို့လို့ အရေးတော်ပုံ အောင်ကိုအောင်ရမယ်” လို့ ပြောပါတယ်။

ဆန္ဒပြပွဲကို ဂျပန်ရောက်မြန်မာတွေသာမက စစ်တပ်အာဏာသိမ်းတာကို လက်မခံတဲ့ မြန်မာ့အရေးကူညီလှုပ်ရှားနေကြတဲ့ ဂျပန်လူမျိုးတွေလည်း ပူးပေါင်းပါဝင်ခဲ့ကြတာ တွေ့ရပါတယ်။

ကမ္ဘာလုံးဆိုင်ရာ မြန်မာ့နွေဦးတော်လှန်ရေး ဒုတိယလှိုင်း တိုက်ပွဲခေါ်သံအဖြစ် ဂျပန်အပါအဝင် နိုင်ငံတကာမြို့ကြီးမှာ တပြိုင်နက် ကျင်းပနေကြတာဖြစ်ပါတယ်။

ဇော်ဇော်လှိုင်

2 months Ago
More News
Up