တိုက်ပွဲရှောင်

August 30, 2021

တိုက်ပွဲကြောင့် ကောင်းလုံနှင့် နမ်ဟာရွာသား ၆၀၀ ကျော် မုံးကိုးမြို့သို့ တိုက်ပွဲရှောင်

ရှမ်းပြည်နယ်မြောက်ပိုင်း၊ မူဆယ်ခရိုင်၊ မုံးကိုးမြို့နယ်၊ ကောင်းလုံရွာနဲ့ နမ်ဟာရွာတို့ဘက်မှာ စစ်ကောင်စီနဲ့ MNDAA တပ်တို့ အကြားတိုက်ပွဲ ပြင်းထန်လာတာကြောင့် နမ်ဟာရွာနဲ့ ကောင်းလုံ ရွာခံ ၆၀၀ ကျော် ဩဂုတ် ၂၉ ရက်နေ့က မုံးကိုးမြို့သို့ ထွက်ပြေးတိမ်းရှောင်လာကြရတယ်လို့ စစ်ပြေးဒုက္ခသည်တွေနဲ့ မုံးကိုးမြို့ခံ တွေက ပြောပါတယ်။

"နမ်ဟာရွာဘက်မှာက မနက် ၆ နာရီကတည်းက တိုက်ပွဲဖြစ်တာ မွန်းလွဲ ၂ နာရီလောက်မှ ငြိမ်သွားတယ်။ ၃ နာရီလောက်မှာ အသံထပ် ကြားသေးတယ်။ ခဏလောက်ပဲ။ ခုတော့ ငြိမ်သွားပြီ"  လို့ ဒေသခံ အမျိုးသမီး တစ်ဦးက ပြောပြတယ်။

ဩဂုတ်လ ၂၉ ရက် ညနေပိုင်း ပစ်ခတ်မှု ငြိမ်သွားပြီးတဲ့အခါကျမှ နမ်ဟာ ရွာသားတချို့ ရွာပြန်ပြီး အလောင်းတွေ ပြန်သွားကောက်ကာ သင်္ဂြိုဟ်ခဲ့ရတာဖြစ်ပြီး နေအိမ်ထိခိုက်ပျက်စီးတာတွေ၊ မီးလောင်တာတွေနဲ့ ရွာထဲမှာ ဘာတွေဖြစ်သေးလဲဆိုတာ ဘာမှ မသိရသေးဘူး။ လိုက်လည်း မကြည့်ရသေးဘူးလို့ ဒေသခံက ပြောပါတယ်။

ကောင်းလုံရွာခံတွေက မုံးကိုး ကချင်ဘုရားကျောင်းဝင်းမှာ၊ နမ်ဟာ ရွာခံတွေက မုံးကိုးက ဆွေမျိုး အသိအိမ်နဲ့ ဘုန်းကြီးကျောင်းမှာ လောလောဆယ် ခိုလှုံနေကြရတယ် လို့ ဆိုပါတယ်။

“ကောင်းလုံရွာနဲ့ နမ်ဟာရွာ က မုံးကိုးကနေ ၅ မိုင်ခန့်အကွာမှာရှိပြီး  လမ်းလျှောက်ဆင်းလာတာ ၂ နာရီ လောက်ကြာတယ်။ တချို့က ဆိုင်ကယ်နဲ့ လာခဲ့ကြတယ်လို့ ဆိုပါတယ်။ ကြောက်လန့်တကြား လောလောနဲ့ ဘာမှ မပါလာဘူး။ အစားအသောက်နဲ့ စောင်တွေလိုမယ်ထင်တယ်။ အခြေအနေ မသိရသေးတော့ ဘာမှမသိသေးဘူး။ လူဦးရေက အတိအကျ မသိသေးဘူး။ ခုမှ လုပ်နေတုန်းလို့ လက်ရှိ စစ်ရှောင်ထဲက စီမံခန့်ခွဲနေသူက ပြောပါတယ်။

ကောင်းလုံမှာ အိမ်ခြေ ၂၇ အိမ်ရှိပြီး လူဦးရေ ၆၀ ကျော်နဲ့ နမ့်ဟာမှာ အိမ်ခြေ ၁၀၃ အိမ်နဲ့ လူဦးရေ ၅၅၈ ဦးရှိကာ ၅ မိုင်ခန့် လမ်းလျှောက် သွားလာဖို့ မလွယ်တဲ့ သက်ကြီးပိုင်းတွေသာ အိမ်ှာ ကျန်ခဲ့တယ်လို့ ဆိုပါတယ်။

ဇူလိုင်လဆန်း၏ကတည်းက မုံးကိုး ဒေသမှာ စစ်ကောင်စီနဲ့ MNDAA တို့အကြား တိုက်ပွဲ ပြင်းထန်ခဲ့တာကြောင့် ထောင်းဆိုင်၊ မန့်ယန်၊ ဘန်မွေ ရွာတို့က ဒေသခံ ၁၉၀ ကျော် တရုတ်နယ်စပ်လောက်တဲန့် ဘက် တိုက်ပွဲ ရှောင်နေရဆဲ ဖြစ်ပြီး စစ်ကောင်စီ ဘက်က စားနပ်ရိက္ခာ လမ်းကြောင်း ပိတ်ဆို့ဖြတ်တောက် ထားတာကြောင့် ရိက္ခာပြတ်လပ်မှုနဲ့ ရင်ဆိုင်နေကြရတယ်လို့ ဆိုပါတယ်။

စစ်ရှောင်တွေရဲ့ အစားအသောက် ပြတ်လပ်မှု ပြဿနာကို MNDAA ဘက်က ဆန်၊ ဆီ၊ ဆား ထောက်ပံ့ ပေးပေမယ့် ဆေးဝါးပစ္စည်းတွေ အရေးပေါ်လိုအပ်နေတဲ့အပြင် တခြား စားသောက်ကုန်တွေကို တရုတ်နိုင်ငံဘက်ရှိ တိုင်းရင်းသားတွေဆီ အကူအညီ တောင်းမှာဝယ်လို့ ရပေမယ့် ကိုဗစ် သတ်မှတ်ချက်တွေကြောင့် ကာထားတဲ့ နယ်ခြားစည်းရို ကနေ ပစ်ပေးပြီး ကောက်ယူ စားသုံးရတဲ့ အခြေအနေထိ ဖြစ်နေတယ် လို့ ဒေသခံ တစ်ဦး က ပြောပါတယ်။

မုံးကိုးမြို့နယ်အတွင်း တချို့နေရာတွေမှာ သြဂုတ် ၂၈ ရက်နေ့ကစပြီး စစ်ကောင်စီနဲ့ MNDAA တို့အကြား တိုက်ပွဲ ပိုမိုပြင်းထန်လာတာ ဖြစ်ပါတယ်။

Photo Crd# The Kokang, ဒေသခံ

3 months Ago

January 10, 2021

ဝိုင်းမော်တွင် တိုက်ပွဲရှောင်ပြည်သူများ ပြန်နေထိုင်နိုင်ရန် တပ်မတော်က မိုင်းရှင်းပေးခဲ့

ကချင်ပြည်နယ်၊ ဝိုင်းမော်မြို့နယ်မှာ တိုက်ပွဲရှောင်ပြည်သူတွေ ပြန်နေထိုင်နိုင်ဖို့ မိုင်းရှင်းပေးခဲ့တယ်လို့ တပ်မတော်က ထုတ်ပြန်ပါတယ်။

လဖိုင်ရွာမှာ ၂၀၂၁ ခုနှစ် ဇန်နဝါရီ ၅ ရက်အထိ ကျေးရွာရှိ နေအိမ် ၁၀၉ လုံး၊ ဘုရားရှိခိုးကျောင်း ၁ ကျောင်း၊ စာသင်ကျောင်း ၁ ကျောင်း၊ ဘောလုံးကွင်း ၁ ကွင်း၊ ကျေးလက်ဆေးပေးခန်း ၁ လုံး၊ အသင်းတော်ရုံး ၂ ရုံးနဲ့ မူကြိုကျောင်း ၁ ကျောင်းတို့အား မိုင်းရှင်းလင်းပေးခဲ့တယ်လို့ ဆိုပါတယ်။

မြောက်ပိုင်းတိုင်းစစ်ဌာနချုပ်၊ နယ်မြေခံ တပ်မတော်သားတွေက ၂၀၂၀ ပြည့်နှစ်၊ ဒီဇင်ဘာ ၂၉ ရက်ကစလို့ မိုင်းရှင်းလင်းပေးခဲ့တာဖြစ်ပြီး လဖိုင်ရွာ တာဝန်ခံ ဦးဇော်လွမ်ဆီကို နယ်မြေခံတပ်မတော်သားတွေက မိုင်းရှင်းလင်းခဲ့တဲ့ မှတ်တမ်း ဓာတ်ပုံတွေ လွှဲပြောင်း ပေးခဲ့တယ်လို့လည်း ဆိုပါတယ်။

11 months Ago
Up