တိုက်ပွဲဖြစ်

December 2, 2022

အစ္စရေးသိမ်းပိုက်နယ်မြေတွင် တိုက်ပွဲဖြစ်ပြီး ပါလက်စတိုင်း ၂ ဦး သေဆုံး

အစ္စရေးသိမ်းပိုက်ထားတဲ့ အနောက်ဘက်ကမ်းမှာ ဒီဇင်ဘာ ၁ ရက်က တိုက်ပွဲတွေဖြစ်ပွားခဲ့ရာမှာ ပါလက်စတိုင်း စစ်သွေးကြွ ၂ ဦး သေဆုံးခဲ့ကြောင်း ပါလက်စတိုင်းနဲ့ အစ္စရေး တာဝန်ရှိသူတွေက ပြောကြားခဲ့ပါတယ်။

အစ္စလာမ်မစ် ဂျီဟတ်အဖွဲ့က သေဆုံးသွားသူတွေဟာ သူ့အဖွဲ့ဝင်တွေလို့ အခိုင်အမာ ပြောကြားပြီး တစ်ယောက်က ဂျနင်းမှာရှိတဲ့ အဖွဲ့ခွဲခေါင်းဆောင်လို့ ဆိုပါတယ်။

နောက်တယောက်ကတော့ ပါလက်စတိုင်းအာဏာပိုင်အဖွဲ့ (PA) မှာ သူ့တာဝန်ချိန်မဟုတ်တဲ့ လုံခြုံရေးအရာရှိဖြစ်ကြောင်း ဒေသခံတွေက ပြောပါတယ်။

အစ္စရေးစစ်တပ်က စစ်သွေးကြွလို့ သံသယရှိသူတွေကို ဖမ်းဆီးဖို့ ဂျနင်နယ်မြေကို ဝင်ရောက်စီးနင်းချိန်အတွင်း တပ်ဖွဲ့ဝင်တွေ ပစ်ခတ်ခံရလို့ ပြန်လည်ပစ်ခတ်ခဲ့တာဖြစ်ကြောင်း ပြောကြားခဲ့ပါတယ်။

မတ်လက အစ္စရေးမြို့ကြီးတွေမှာ ပါလက်စတိုင်းရဲ့ လမ်းပေါ် တိုက်ခိုက်မှုတွေ ဖြစ်ပွားခဲ့ပြီးနောက် စစ်ရေးအရ စစ်ဆင်ရေးတွေလည်း အရှိန်မြင့်လာခဲ့တာ ဖြစ်ပါတယ်။ 

4 days Ago

November 20, 2022

သံဖြူဇရပ်-ရေးကားလမ်းတွင် စစ်တပ်နှင့် PDF သုံးကြိမ် တိုက်ပွဲဖြစ်

မွန်ပြည်နယ်  သံဖြူဇရပ်-ရေးကားလမ်းဝန်းကျင်က ရွာတွေနားမှာ နိုဝင်ဘာ ၁၉ ရက်က စစ်ကောင်စီတပ်နဲ့  တိုက်ပွဲ သုံးကြိမ်ဖြစ်ခဲ့တယ်လို့ ဒေသခံတောင်ညိုပြည်သူ့ပြောက်ကျားအဖွဲ့က ဒီနေ့ သတင်းထုတ်ပြန်ပါတယ်။

မနေ့မနက် ၉ နာရီခွဲကျော်လောက်က ရေးမြို့ကနေ သံဖြူဇရပ်ကို တက်လာတဲ့ စစ်ကား ၇ စီးကို  ကွမ်ကြိုက်နဲ့  ကနင်ကမော့ရွာကြားမှာ ပထမအကြိမ် ချုံခို မိုင်းဆွဲပစ်ခတ်တိုက်ခိုက်ခဲ့ပြီး  မနက် ၁၁ နာရီကျော်လောက်မှာတော့ သံဖြူဇရပ်မြို့ကနေ လမ်းကင်းလာတဲ့ စစ်ကားသေး ၁ စီးနဲ့  ဝဲခမီကျေးရွာနားမှာ ဒုတိယအကြိမ် ထိပ်တိုက်တွေ့ဆုံ ပစ်ခတ်ခဲ့သလို နေလယ် ၁ နာရီဝန်းကျင်မှာ ရေးမြို့ ကနေ သံဖြူဇရပ်ကို တက်လာတဲ့ စစ်ကား ၇ စီးကို ဘေးလမိုင်းရွာနားမှာ တတိယအကြိမ် ချုံခိုတိုက်ခိုက်နိုင်ခဲ့တယ်လို့ ထုတ်ပြန်ချက်က ဆိုပါတယ်။

တိုက်ခိုက်မှု သုံးခုမှာ စစ်ကောင်စီတပ်သား ၈ ယောက် သေဆုံးကာ အများအပြား ဒဏ်ရာ ရခဲ့တယ်လို့ သိရပါတယ်။ 

တိုက်ခိုက်မှု ၃ ကြိမ်အတွင်း ဒေသခံပြောက်ကျားအဖွဲ့တွေဘက်က ထိခိုက်ကျဆုံးမှုကိုတော့ ထုတ်ပြန်ချက်ထဲမှာ မဖော်ပြထားပါဘူး။

အခုလို သံဖြူဇရပ်-ရေးကားလမ်းပေါ်မှာဖြစ်ခဲ့တဲ့ မကြာခဏ တိုက်ခိုက်ခံရမှု၊ သေဆုံး ဒဏ်ရာမှုတွေနဲ့ ပတ်သက်လို့ စစ်ကောင်စီဘက်က ခုချိန်ထိ တစုံတရာ သတင်းထုတ်ပြန်တာ မရှိသလို သီခြား အတည်လို့လည်း မရခဲ့ပါဘူး။

မနေ့ကအဲဒီလမ်းပိုင်းမှာ ခရီးသွားခဲ့သူ တဦးက “စစ်တပ်နဲ့ PDF တွေ တိုက်ပွဲဖြစ်နေတယ် ကြားတယ်။ ခရီးသွားကားတွေ ပိတ်မိနေတယ်။ စစ်ကား ၂ စီးလောက် ပျက်စီးတာ မြင်ရတယ်။ ထိခိုက် သေဆုံးတာတော့ ရှိနိုင်တယ်။ လမ်းက ညလောက်မှ ပြန်ပြီးသွားလာလို့ရတယ်” ပြောပါတယ်။

သံဖြူဇရပ် - ရေး ကားလမ်းပေါ်ရှိ ပိန္နဲတော၊ ငှက်ပျောတောကျေးရွာနဲ့ အနီးအနားက ကျေးရွာတွေ၊  သံဖြူဇရပ် - ဘုရားသုံးဆေလမ်းပေါ်က ဇီးနှစ်ပင်၊ ဦးခွေး(ဒေါ်ယိမ်း)ရွာ ၊ရဲတံခွန် ကျေးရွာနဲ့ အနီးအနားရှိရာဘာခြံတွေနဲ့ ဂျပန်တောင်ခြေဝန်းကျင်က ရာဘာခြံတွေမှာ နေထိုင်ကြတဲ့ ဒေသခံ ၂၀ လောက် ပြီးခဲ့တဲ့ရက်တွေက ဖမ်းဆီးခံထားရပါတယ်။

သံဖြူဇရပ်-ရေး ကားလမ်းပေါ်က  ဦးခွေး(ဒေါ်ယိမ်း) ကျေးရွာမှာ ရွာလုံးကျွတ်နီးပါး ထွက်ပြေး တိမ်းရှောင်နေရပြီး ရွာသားအများစုကတော့ ရွာကို မပြန်လာရဲကြသေးပါဘူး။

2 weeks Ago
More News
Up