တိုက်ပွဲပြင်းထန်

January 26, 2023

ယင်းမာပင်တွင် တိုက်ပွဲပြင်းထန်၊ လေကြောင်းတိုက်ခိုက်မည်ကိုစိုးရိမ်ပြီး ဆယ်ဇင်းရွာသားများ တိမ်းရှောင်

စစ်ကိုင်းတိုင်း၊ ယင်းမာပင်မြို့နယ်က မြရိပ်ကျေးရွာကို မီးရှို့ပြီး အနီးက မြရိပ်တောင်ကို စစ်ကြောင်းထိုးလာတဲ့ စစ်ကောင်စီတပ်နဲ့ ဒေသကာကွယ်ရေးတပ်ဖွဲ့တွေပါဝင်တဲ့ တပ်ပေါင်းစုတို့ ဒီနေ့မနက်က ပြင်းထန်တိုက်ပွဲဖြစ်ပွားခဲ့ပြီး စစ်ကောင်စီတပ်သား အများအပြားကျရှုံးခဲ့တယ်လို့ မြောက်ယမားပြည်သူ့ကာကွယ်ရေးတပ်ဖွဲ့-ယင်းမာပင်မြို့ကနေ သိရပါတယ်။

ဒီနေ့မနက်ပိုင်းက ဒေသကာကွယ် ရေး တပ်ပေါင်းစုတွေ ရှိနေတဲ့ မြရိပ်တောင်ကုန်းကို စစ်ကောင်စီတပ်က နှစ်ဖက်ညှပ်ပြီး စစ်ကြောင်းထိုး တိုက်ခိုက်လာတဲ့အတွက် တပ်ပေါင်းစုနဲ့ မီတာ ၂၀ အကွာကနေ အနီးကပ်တိုက်ပွဲဖြစ်ပွားခဲ့တာလို့ ဆိုပါတယ်။

"ကျနော်တို့ရှိနေတဲ့ တောင်ကုန်းကို သူတို့က နှစ်ဘက်ညှပ်ပြီးဝိုင်းပြီး တက်လာတာပါ။ ကျနော်တို့က အပေါ်ကနေဆိုတော့ အပိုင်ပစ်နိုင်ခဲ့တာပေါ့နော်။ တိုက်ပွဲကပြင်းထန်တယ်လို့ ပြောလို့ရပါတယ်၊ ကျနော်တို့နဲ့ မီတာ ၂၀ အကွာလောက်ကနေပဲဆိုတော့ မြင်နေရတယ်။ ကျနော်တို့ဘက်က စစ်ရေးဗျူဟာတွေပြောင်းပြီး တိုက်ခိုက်ခဲ့လို့ စစ်ကောင်စီဘက်က အကျအဆုံးတွေ များစွာရှိပါတယ်။ ကျနော်တို့ဘက်ကတော့ မစိုးရိမ်ရဒဏ်ရာတွေတော့ ရခဲ့ပါတယ်" လို့ မြောက်ယမားပြည်သူ့ကာကွယ်ရေးတပ်ဖွဲ့- ယင်းမာပင်မြို့ ပြောရေးဆိုခွင့်ရှိသူ ကိုခန့်က ပြောပါတယ်။

တိုက်ပွဲဖြစ်ပြီးနောက်  စစ်ကောင်စီတပ်တွေက ယင်းမာပင်မြို့နယ် အောင်ချမ်းသာကျေးရွာမှာ ဒီကနေ့ ညအိပ်ဖို့ ယာယီတပ်စွဲထားတာကြောင့် ဒေသခံတွေကို ဘေးလွတ်ရာ ပြောင်းရွေ့နေထိုင်ကြဖို့ သတိပေးထားတယ်လို့လည်း သိရသည်။

စစ်ကိုင်းတိုင်း ယင်းမာပင်မြို့နယ်က စစ်ကောင်စီအာဏာသိမ်းပြီးနောက်ပိုင်းမှာ တိုက်ပွဲအများအပြားဖြစ်ပွားခဲ့တဲ့အတွက် တနိုင်ငံလုံးမှာ လေကြောင်းတိုက်ခိုက်ခံရမှု အများဆုံး ဒေသတခုဖြစ်သလို စစ်ရှောင်အများဆုံးဒေသတခုလည်းဖြစ်ပါတယ်။

ကချင်ပြည်နယ်နဲ့ စစ်ကိုင်းတိုင်းအစပ် ဆယ်ဇင်းကျေးရွာနေ ပြည်သူတွေ ဇန်နဝါရီ ၂၆ ရက် မနက်ပိုင်းက ဆယ်ဇင်းရွာနားမှာဖြစ်တဲ့ တိုက်ပွဲတွေကြောင့် စစ်ကောင်စီလေတပ်က လေကြောင်းတိုက်ခိုက်မှု ပြုလုပ်လာမှာကို စိုးရိမ်ပြီး ဘေးလွတ်ရာ ထွက်ပြေးတိမ်းရှောင်နေကြရတယ်လို့ ဒေသခံတဦးက ပြောပါတယ်။

“တိုက်ပွဲက ရွာနားမှာကော၊ ရွာနဲ့ ၇ မိုင်လောက်ဝေးတဲ့ နေရာမှာကော တိုက်ပွဲတွေ ဖြစ်နေတာဆိုတော့ လေကြောင်းတိုက်ခိုက်မှုတွေရှိမှာစိုးလို့ ထွက်လာကြတာ၊ လူဦးရေက ၄၀၊ ၅၀ ပေါ့။ လွန်ခဲ့တဲ့ ရှစ်လပိုင်းက တရွာလုံးရှောင်ကြတာကနေ ပြန်ပြီး အခြေချဖို့ လုပ်နေကြတာ၊ တိုက်ပွဲတွေ ပြန်ဖြစ်လာတော့ ပြန်ထွက်လာကြတာပေါ့လေ။”

မနက် ၄ နာရီဝန်းကျင်လောက်က ဆယ်ဇင်းကျေးရွာနဲ့ ၇ မိုင်လောက်ဝေးတဲ့ စစ်ကိုင်းတိုင်း ဟုမ္မလင်းမြို့နယ် ရွှေတွင်းအုပ်စု ပန်ချယ်ဘုရားနားမှာရှိတဲ့ SNA တပ်စခန်းကို KIA၊ PDF ပူးပေါင်းတပ်ဖွဲ့တွေ လာရောက်တိုက်ခိုက်သိမ်းယူခဲ့သလို စစ်ကိုင်းတိုင်းအခြမ်း ဆယ်ဇင်းရွာ ကပ်ရပ်က မံစိမ်းကြိုးတံတားထိပ်မှာရှိတဲ့ SNA တပ်စခန်းကိုလည်း သွားရောက်တိုက်ခိုက်ခဲ့တယ်လို့ ဒေသခံတွေဆီကနေ သိရပါတယ်။

ဆယ်ဇင်းကျေးရွာက ပြည်သူတွေဟာ နိုဝင်ဘာလလောက်ကတည်းက နေရပ်ပြန်ပြီး နေထိုင်နေတာ ဖြစ်ပါတယ်။ ဆယ်ဇင်းကျေးရွာဟာ လွန်ခဲ့တဲ့ ၈ လပိုင်းလောက်က တိုက်ပွဲတွေ ပြင်းထန်စွာဖြစ်ပွားခဲ့ပြီး နေအိမ်ရာချီ မီးရှို့ခံရကာ ပြည်သူ ၃၀ ဝန်းကျင် သေဆုံးခဲ့ရပါသေးတယ်။

2 days Ago

ကျုံဒိုးမြို့အနီး တိုက်ပွဲပြင်းထန် ဆက်ဖြစ်၊ စစ်ကောင်စီတပ်က ရွာမီးရှို့သဖြင့် ဒေသခံ ထောင်ချီ စစ်ဘေးရှောင်

ကရင်ပြည်နယ်၊ ကော့ကရိတ်မြို့နယ်၊ ကျုံဒိုးမြို့ကမ်းနားပိုင်း အရှေ့ဘက်ကမ်း ညောင်ရိပ်သာရွာရှိ ပြည်သူလူထုနေအိမ်တွေကို  ဇန်နဝါရီ ၂၆ ရက် ဒီမနက် ၉ နာရီဝန်းကျင်လောက်မှာ စစ်ကောင်စီက စတင် အကြမ်းဖက် မီးရှို့ဖျက်ဆီးနေတယ်လို့ ဒေသခံတွေက ပြောပါတယ်။

အိမ်ခြေ ၁၀၀ လောက်ရှိတဲ့ ညောင်ရိပ်သာရွာ အခုအချိန်အထိ မီးလောင်နေဆဲဖြစ်ပြီး အိမ်အရေအတွက် ဘယ်လောက် မီးထဲပါသွားတယ်ဆိုတာ လတ်တလော မသိရသေးတဲ့ အကြောင်းနဲ့ ရွာသားတွေကတော့ တိုက်ပွဲဖြစ်တာနဲ့ စစ်ဘေးရှောင်နေကြတယ်လို့ KNLA သတင်းအရင်းမြစ်က ပြောပါတယ်။

ကျုံဒိုးမြို့နားမှာ စစ်ကောင်စီတပ်တွေနဲ့ KNLA ပူးပေါင်းတပ်ဖွဲ့တွေ ဇန်နဝါရီ ၂၀ ရက်ကစပြီး ဒီနေ့အထိ တိုက်ပွဲတွေဖြစ်နေရာမှာ ကျုံဒိုး ကမ်းနီဘက်မှာတော့ မနေ့ညကနေ ဒီမနက်အထိ တိုက်ပွဲပြင်းထန်နေကာ စစ်ကောင်စီတပ်ဘက်က လက်နက်ကြီးတွေနဲ့ပစ်ခတ်နေသလို လေကြောင်းပစ်ကူပေးနေတယ်လို့လည်း ပြောပါတယ်။

စစ်ကောင်စီဘက်က လက်နက်ကြီးတွေနဲ့ ပစ်ခတ်နေလို့ ကျုံဒိုးမြို့ပေါ်အပါအဝင် အနီးနားကျေးရွာတွေက ဒေသခံတွေက ဘေးလွတ်ရာနေရာတွေကို ထွက်ပြေးနေကြရပြီး ဒေသခံတချို့ရဲ့နေအိမ်တွေပေါ် လက်နက်ကြီး ကျရောက်ပြီး မီးလောင်ပျက်စီးခဲ့တယ်လို့ ဆိုပါတယ်။ 

အဆိုပါတိုက်ပွဲတွေကြောင့် ကျုံဒိုး ကမ်းနီအပါဝင် မွန်ကရင်အများစုနေထိုင်ကြတဲ့ ရွာပေါင်း ၉ ရွာလောက်ဟာ ထောင်နဲ့ချီစစ်ဘေးရှောင်တွေအရေးပေါ်လူသားချင်းစာနာမှု အကူညီ တွေလိုအပ်နေတယ်လို့ သိရပါတယ်။

လက်ရှိ စစ်ဘေးရှောင်ပြည်သူတွေက နဘူး၊ ဘားအံနဲ့ မော်လမြိုင်အပြင် နီးစပ်ရာ တော တောင်တွေထဲ ထွက်ပြေးနေရပြီး စားနပ်ရိက္ခာနဲ့ နေရာထိုင်ခင်းတွေ အရေးပေါ်လိုအပ်နေတယ်လို့ ထွက်ပြေးတိမ်းရှောင်တဲ့ ဒေသခံတစ်ဦးက  ဒီဗွီဘီကို ပြောပါတယ်။  

မနေ့ညပိုင်းအထိ စစ်ကောင်စီဘက်က Mi 35 ရဟတ်ယာဉ်တွေအသုံးပြုပြီး လေကြောင်းတိုက်ခိုက်နေသလို ဘားအံမြို့ပေါ်ကနေ ရဟတ်ယာဉ်တွေက ကော့ကရိတ်ဘက်ကို ခေါက်တုံ့ ခေါက်ပြန် ပျံသန်းနေတယ်လို့ မြို့ခံတွေက ဆိုပါတယ်။ 

အခုတိုက်ပွဲမှာ စစ်ကောင်စီဘက်က ထိခိုက်သေဆုံးမှုများပြားတယ်လို့ မြေပြင်မှာရောက်ရှိနေတဲ့ ပူးပေါင်းတပ်ဖွဲ့က ရဲဘော်တစ်ယောက်က ပြောပေမယ့် စစ်ကောင်စီဘက်က ထိခိုက်သေဆုံးမှုကိုတော့ သီးခြားအတည်မပြုနိုင်သေးပါဘူး။

2 days Ago

January 25, 2023

ကျုံဒိုးတွင် တိုက်ပွဲပြင်းထန်၊ ကျေးရွာတချို့ မီးလောင်ပြီး ဒေသခံများ ထွက်ပြေး

ကရင်ပြည်နယ်၊ ကော့ကရိတ်ခရိုင်၊ ကျုံဒိုးမြို့အနီးမှာ အခုရက်ပိုင်း တိုက်ပွဲတွေ ပြင်းထန် ဖြစ်ပွားနေတာကြောင့် ကမ်းနီ၊ သရက်တောနဲ့ မိကလုံ စတဲ့ ကျေးရွာတွေမှာ လက်နက်ကြီးကျရောက် နေအိမ်တွေ မီးလောင် ပျက်စီးပြီး  ကျေးရွာသားတွေ ထွက်ပြေးတိမ်းရှောင်နေကြရပါတယ်။

ဇန်နဝါရီလ ၂၄ ရက် မနေ့ ညနေပိုင်း ကျုံဒိုး ကမ်းနီရွာရှိ နေအိမ်တွေကို စစ်ကြောင်းထိုးလာတဲ့ စစ်ကောင်စီတပ်သားတွေက မီးရှို့သွားတယ်လို့ ဒေသခံတွေဆီကနေ တဆင့်သိရပါတယ်။ 

ဒေသခံအမျိုးသမီးတယောက်က “ကတိုးကော့နပ် ကော့ဘိန်းကော့မွန်ရွာတွေဘက်မှာ အခုညနေ ၃ နာရီလောက်မှာ စစ်ကောင်စီတပ်ဘက်က ပစ်လိုက်တဲ့ လက်နက်ကြီးကျည်တွေဟာ လူနေအိမ်တွေ ထိမှန်ခဲ့တယ်” လို့ ပြောပါတယ်။

နှစ်ဖက်တိုက်ပွဲတွေကြောင့် လက်နက်ကြီးကျည်ထိမှန်တဲ့ ကမ်းနီကျေးရွာရှိ နေအိမ်တွေ မီးကူးစက်လောင်ကျွမ်းခဲ့ပြီး အိမ်ဘယ်နှစ်အိမ်လောင်သွားသလဲဆိုတာ မသိရသလို ဒေသခံတွေ ဘေးလွတ်ရာကို ပြေးပုန်းနေရတယ်လို့ ဒေသခံတွေဆီက သိရပါတယ်။

ကျုံဒိုးမြို့နယ်၊ ကမ်းနီကျေးရွာမှာ ဇန်နဝါရီ ၂၄ ရက် ည ၇ နာရီကစပြီး စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော် (KNLA) ပူးပေါင်းတပ်တွေ တိုက်ပွဲဖြစ်ပွားခဲ့ပါတယ်။

မနေ့က ကျုံဒိုး - ညောင်ရိပ်သာဒေသဘက် စစ်ကြောင်းထိုးလာတဲ့ စစ်ကောင်စီ တပ်မ ၄၄  လက်အောက်ခံတပ်တွေနဲ့ မဟာမိတ်ပူးပေါင်းတပ်တွေအကြား တိုက်ပွဲဖြစ်ပွားခဲ့ပြီး စစ်ကောင်စီဘက်က ၃ ဦး သေဆုံးကာ ၅ ဦး ထက်မနည်း ပြင်းထန်စွာ ဒဏ်ရာရရှိခဲ့ကြောင်း Lion Battalion Commando - ဗျူဟာစစ်ကြောင်းက သတင်းထုတ်ပြန်ထားပါတယ်။ 

ဒီလို တိုက်ပွဲဖြစ်ပြီးနောက် ညနေပိုင်းမှာတော့ ကျုံဒိုး ကမ်းနီရွာ မီးရှို့ဖျက်ဆီးခံခဲ့ရတယ်လို့ ဒေသခံတွေဆီက သိရပါတယ်။

ကျုံဒိုးမြို့ စစ်ကောင်စီတပ်စခန်းကို KNLA နဲ့ ပူးပေါင်းတပ်တွေ လွန်ခဲ့တဲ့ ရက်ပိုင်းတွေက ဒရုန်းနဲ့ သွားရောက်တိုက်ခိုက်ပြီးတဲ့နောက် ရက်ဆက်ဆိုလို တိုက်ပွဲတွေ ဖြစ်လာခဲ့ပါ တယ်။ 

တိုက်ပွဲတွေကြောင့် ကျုံဒိုးမြို့ပေါ် အပါအဝင် ကမ်းနီနဲ့ အနီးနားကျေးရွာက ဒေသခံ ၃,၀၀၀ ကျော်လောက် နေရပ်စွန့်ခွာ ထွက်ပြေးနေရတယ်လို့ သိရပါတယ်။

ဘုရားသုံးဆူမြို့မှာလည်း ဇန်နဝါရီ ၂၃ ရက်ညက မြို့ပေါ်ရှိ  ရုံးပေါင်းစုံဝင်းကို ဗိုလ်လင်းယုန် ဦးဆောင်တဲ့ မြို့ပြပြောက်ကျား တပ်ဖွဲ့က ဝင်ရောက်တိုက်ခိုက်စီးနင်း မီးရှို့ဖျက်ဆီးခဲ့တာကြောင့် ဒေသခံတချို့ ထိုင်းနိုင်ငံဘက်ခြမ်းကို ထွက်ပြေးခဲ့ကြပါတယ်။

3 days Ago
More News
Up