တိုက်ပိတ်ခံရ

August 21, 2021

ကျောက်ဆည် စည်ပင်ဥက္ကဋ္ဌ ဦးခင်မောင်မြင့် တိုက်ပိတ်ခံထားရ

ကျောက်ဆည်မြို့နယ် စည်ပင်သာယာရေးကော်မတီဥက္ကဋ္ဌ ဦးခင်မောင်မြင့်ဟာ ပြီးခဲ့တဲ့ ၈ ရက်နေ့ အိုးဘိုထောင်ဆူပူမှုနဲ့ပတ်သက်ပြီး တိုက်ပိတ်ခံထားရသလို ထောင်ဝင်စာလည်း တစ်လပိတ်ခံထားရတယ်လို့ မိသားစုထံက သိရပါတယ်။

ဦးခင်မောင်မြင့်ရဲ့ သားဖြစ်သူက "သူက အသက်လည်းကြီးပြီ နှလုံးသွေးကြောကျဉ်းရောဂါအခံနဲ့ စက်ထည့်ထားရတဲ့သူမို့ ကျန်းမာရေးကို အထူးစိုးရိမ်ပါတယ်ဗျာ။ ကျန်တာတော့ သူဟာ ခံယူချက်ပြင်းသူမို့ အစစရာရာ ဘေးကင်းကင်းနဲ့ ပြန်လာနိုင်မယ်လို့ မျှော်လင့်ပါတယ်" လို့ ဆိုပါတယ်။

သူဟာ မြို့နယ်စည်ပင်သာယာရေးကော်မတီဥက္ကဋ္ဌ တာဝန်ထမ်းနေစဉ်  CDM လှုပ်ရှားမှုမှာပါဝင်တဲ့ အတွက် ရာဇသတ်ကြီး ပုဒ်မ ၅၀၅ နဲ့ တရားဆွဲခံထားရာကနေ မတ်လ ၁၅ ရက်နေ့ ညနေပိုင်းမှာ စတင်  အဖမ်းခံထားရတာ ၅ လ ကျော်ပြီ ဖြစ်ပါတယ်။

အဖမ်းမခံရခင် ဖေဖော်ဝါရီ ၈ ရက်နေ့က ကျောက်ဆည်ဆန္ဒပြပွဲတွေ စခဲ့တဲ့ အချိန်ကစပြီး အဖမ်းခံရတဲ့နေ့အထိ ကျောက်ဆည်မြို့ ဆန္ဒပြပွဲတွေမှာ ရှေ့ဆုံးကနေ တက်တက်ကြွကြွ ဦးဆောင်လှုပ်ရှားခဲ့သူဖြစ်ပါတယ်။

ဖေဖော်ဝါရီ ၁ ရက်နေ့ စစ်တပ်အာဏာသိမ်းတဲ့နေ့မှာလည်း အဖမ်းခံရပြီး ဖေဖော်ဝါရီ ၂ ရက်နေ့မှာ ပြန်လွတ်လာခဲ့ပါသေးတယ်။ 

သူဟာ ကျောက်ဆည်မြို့ အမေ့အိမ်ပညာဒါနကျောင်းကို ဦးစီးတည်ထောင်ပြီး တာဝန်ခံအဖြစ်ရော ဆရာအဖြစ်ပါ ငါးနှစ်တိတိ ထမ်းဆောင်ခဲ့တာလည်း ဖြစ်ပါတယ်။

3 months Ago
Up