တိုက်စစ်မှူးဟောင်း

A d v e r t i s e m e n t With Us

March 17, 2020

ထောင်ထဲတွင် ရော်နယ်ဒင်ဟို ဝမ်းနည်းအားငယ်နေဟု ပါရာဂွေးတိုက်စစ်မှူးဟောင်းပြော

ပါရာဂွေးထောင်ထဲ ရောက်ရှိနေတဲ့ ရော်နယ်ဒင်ဟိုဟာ အများထင်သလို ပျော်ရွှင်နေတာမျိုးမဟုတ်ဘဲ သူ့အခြေအနေပေါ် ဝမ်းနည်းအားငယ်နေတယ်လို့ Metro သတင်းမှာ ဖော်ပြပါတယ်။  ဘရာဇီးနဲ့ ဘာစီလိုနာ ဂန္ထဝင်ကစားသမား ရော်နယ်ဒင်ဟိုဟာ ပါရာဂွေးနိုင်ငံအတွင်းကို ပတ်စ်ပို့အတု၊ ကတ်အတုတွေနဲ့ ဝင်ရောက်ခဲ့လို့ အစ်ကိုဖြစ်သူနဲ့အတူ မတ် ၅ ရက်နေ့က ဖမ်းဆီးခံခဲ့ရပါတယ်။ အဲဒီအချိန်ကစလို့ သူဟာ ပါရာဂွေးထောင်တခုထဲမှာ ထိန်းသိမ်းခံခဲ့ရသူ ဖြစ်ပါတယ်။ ထောင်ထဲမှာ ရှိနေစဉ်အတွင်း ရော်နယ်ဒင်ဟိုဟာ အကျဉ်းသားတွေနဲ့အတူ ဘောလုံးပွဲတပွဲကို ပျော်ပျော်ရွှင်ရွှင် ဝင်ရောက်ယှဉ်ပြိုင်ခဲ့ပြီး တခြားအကျဉ်းသားတွေကို လက်မှတ်ထိုးပေးနေတဲ့ ပုံရိပ်တွေ ထွက်ပေါ်လာခဲ့ပါတယ်။ ဒီပုံရိပ်တွေကြောင့် ရော်နယ်ဒင်ဟိုဟာ ရောက်လေရာအရပ်မှာ ပျော်ပျော်ရွှင်ရွှင် နေတတ်သူလို့ သတင်းမီဒီယာတွေမှာ ရေးသားဖော်ပြကြပါတယ်။  ဒါပေမဲ့ လက်တွေ့မှာတော့ ဂန္ထဝင်ကစားသမားကြီးဟာ သူ့လက်ရှိအခြေအနေအပေါ် ဝမ်းနည်းအားငယ်နေတယ်လို့ ပါရာဂွေးတိုက်စစ်မှူးဟောင်း နဲလ်ဆင် ကျူးဗတ်စ်က ပြောပါတယ်။ ကျူးဗတ်စ်ဟာ ရော်နယ်ဒင်ဟို ဖမ်းဆီးခံလိုက်ရစဉ်ကတည်းက သူ့ကို သွားရောက်တွေ့ဆုံခဲ့သူဖြစ်ပြီး လက်ရှိအချိန်မှာ  ရော်နယ်ဒင်ဟိုတယောက် ဘယ်လိုခံစားနေရသလဲ ဆိုတာကိုလည်း ထုတ်ဖော်ပြောဆိုခဲ့ပါတယ်။  “သူဟာ လက်ရှိ ရှိနေတဲ့ အနေအထားအတွက် ဝမ်းနည်းပြီး မပျော်မရွှင် ဖြစ်နေရပါတယ်။ သူ့ရှေ့နေတွေက ဒီကိစ္စကို ကိုင်တွယ်ဆောင်ရွက်နေပြီး မကြာခင်မှာ ထောင်ကနေ ပြန်လည်လွတ်မြောက်လာဖို့ မျှော်လင့်ပါတယ်” လို့လည်း ပါရာဂွေး ကစားသမားဟောင်းက သတင်းမီဒီယာတခုကို ဖြေကြားခဲ့ပါတယ်။ လက်ရှိအချိန်မှာ ရော်နယ်ဒင်ဟိုကို ထိန်းသိမ်းထားတဲ့နေရာဟာ အကျဉ်းထောင်လိုပုံစံမျိုး မဟုတ်ဘဲ ဟိုတယ်တခုလို နေရာမျိုးမှာ ထားရှိကြောင်းလည်း ပါရာဂွေး ပြည်ထဲရေးဝန်ကြီး အီစလီဒတ် အစီဗီဒိုက ပြောပါတယ်။ ဒီကိစ္စကို ကျူဗတ်စ်ကလည်း ထောက်ခံပြောဆိုခဲ့ပြီး “သူ နေရတဲ့နေရာက တခြားထောင်သားတွေကို ထားတဲ့ နေရာတွေထက်စာရင် အများကြီး ပိုကျယ် ပိုကောင်းပါတယ်။ ဒါပေမဲ့ သူဟာ ဒီနေရာတွေမှာ နေဖူးလေ့ရှိသူ မဟုတ်ဘူးလေ။ သူနေတဲ့နေရာမှာ သူတို့ညီအစ်ကိုနှစ်ယောက်ဟာ တယောက်ကို ခုတင်တလုံးစီ ရရှိထားပြီး အဲဒီမှာ သူဟာ ဘောလုံးကစားလို့လည်း ရပါတယ်” လို့ ကျူဗတ်စ်က ပြောဆိုလိုက်ပါတယ်။
12 months Ago

March 3, 2020

လီဗာပူး တိုက်စစ်မှူးဟောင်း စတာရစ် တူရကီကလပ်နှင့် စာချုပ်ဖျက်သိမ်း

တိုက်စစ်မှူး ဒန်နီယယ်စတာရစ်နဲ့ စာချုပ်ကို နှစ်ဦး သဘောတူညီမှုနဲ့ ဖျက်သိမ်းခဲ့ကြောင်း တူရကီကလပ် ထရာဇွန်စပေါအသင်းက မတ် ၂ ရက်နေ့မှာ ထုတ်ပြန်ကြေညာပါတယ်။ အင်္ဂလန်တိုက်စစ်မှူးဟောင်း စတာရစ်ဟာ လီဗာပူးအသင်းမှာ ၆ နှစ်ကြာ ကစားခဲ့ပြီး ၂၀၁၈-၁၉ ရာသီမှာ အသင်းနဲ့ စာချုပ်သက်တမ်း ကုန်ဆုံးခဲ့ပါတယ်။ အဲဒီနောက်မှာ တူရကီကလပ်က သူ့ကို နှစ်နှစ်စာချုပ်နဲ့ သြဂုတ်လမှာ ခေါ်ယူခဲ့ပါတယ်။  တူရကီမြေမှာတော့ စတာရစ်ဟာ ပုံမှန်ပွဲထွက်ခွင့်ရဖို့ ရုန်းကန်ခဲ့ရပြီး ၁၅ ပွဲ ကစားကာ ၇ ဂိုးသာ သွင်းယူနိုင်ခဲ့ပါတယ်။ ကြံ့ခိုင်မှုအခြေအနေက တူရကီမြေမှာ စတာရစ် ကျဆုံးခဲ့ရတဲ့ အဓိကအကြောင်းအရာတခု ဖြစ်ပြီး လက်ရှိအချိန်မှာတော့ တိုက်စစ်မှူးဟာ ကလပ်အသင်းတသင်းကို ထပ်မံရှာဖွေရတော့မှာ ဖြစ်ပါတယ်။ စတာရစ်ဟာ ထရာဇွန်စပေါအသင်းနဲ့ ဘတ်ရှီးတစ်အသင်းတို့ နှစ်ဖက် နှစ်ဂိုးစီ သရေကျခဲ့တဲ့ ပြီးခဲ့တဲ့သီတင်းပတ်ပွဲစဉ် လူစာရင်းမှာ ပါဝင်ခဲ့ပေမယ့် ရီဇတ်စပေါအသင်းကို ၅ ဂိုး ၂ ဂိုးနဲ့ နိုင်ခဲ့တဲ့ မတ် ၁ ရက်နေ့ ပွဲစဉ်မှာတော့ အသင်းလူ စာရင်းကနေ နုတ်ထွက်လိုက်ပါတယ်။  အသင်းဘက်က စတာရစ်နဲ့ စာချုပ်ဖျက်သိမ်းလိုက်တဲ့ အကြောင်းကို တရားဝင် ကြေညာချက်ထုတ်ပြန်ခဲ့ပြီး “အသင်းနဲ့ ကစားသမားတို့အကြားမှာရှိတဲ့ စာချုပ်ကို နှစ်ဦး သဘောတူညီမှုနဲ့ ဖျက်သိမ်းခဲ့ကြောင်း၊ ကစားသမားဟာ စာချုပ်ချုပ်ဆိုထားတဲ့အတိုင်း ၂၀၂၁ ခုနှစ် မေ ၃၁ ရက်အထိ ရသင့်တဲ့ လုပ်အားခကို ရရှိမှာ ဖြစ်ကြောင်း”လည်း ဒီကြေညာချက်မှာ ရေးသားဖော်ပြထားပါတယ်။  စတာရစ်ဟာ ပြီးခဲ့တဲ့ ဇန်နဝါရီ အပြောင်းအရွှေ့ကာလမှာ ပရီးမီးယားလိဂ်ကို ပြန်လည်ရောက်ရှိလာဖို့ တော်တော်လေးနီးစပ်ခဲ့သူ ဖြစ်ပါတယ်။ ဒဏ်ရာရရှိသွားတဲ့ ဝက်စလေ နေရာမှာ အစားထိုးဖို့အတွက် ဗီလာအသင်းက သူ့ကို ချိတ်ဆက်ခဲ့တာ ဖြစ်ပါတယ်။ လက်ရှိအချိန်မှာတော့ သူဟာ မေဂျာလိဂ်ကို ပြောင်းရွှေ့ဖို့ ရာခိုင်နှုန်းများနေပြီး ဒီစီယူနိုက်တက်အသင်းက သူ့ကို ခေါ်ဖို့ စိတ်ဝင်စားနေပါတယ်။ အသက် ၃၀ အရွယ် စတာရစ်ဟာ ကစားသမားဘဝကို မန်စီးတီးအသင်းနဲ့ စတင်ခဲ့သူဖြစ်ပြီး ၃ နှစ်အကြာမှာ ချဲလ်ဆီးအသင်းကို ပြောင်းရွှေ့ခဲ့ပါတယ်။ သူဟာ ချဲလ်ဆီးအသင်းမှာ ၄ ရာသီကြာ ကစားခဲ့တာဖြစ်ပြီး ‌ဘော်တန်အသင်းကိုလည်း အငှား သွားရောက်ကစားခဲ့ဖူးပါတယ်။ အဲဒီနောက်မှာတော့ သူဟာ လီဗာပူးအသင်းကို ရောက်ရှိလာခဲ့ပြီး ဆွာရတ်၊ စတားလင်းတို့နဲ့အတူ လီဗာပူးအသင်းအတွက် အောင်မြင်တဲ့ သုံးယောက်တွဲတိုက်စစ်အဖြစ် အသုံးတော်ခံခဲ့ဖူးသူ ဖြစ်ပါတယ်။
1 year Ago
Up