တိုက်ခိုက်

August 15, 2022

မုံရွာမြို့ဝင် မအူဂိတ် တိုက်ခိုက်ခံရ၊ စစ်သား ၆ ဦး သေဆုံး

စစ်ကိုင်းတိုင်း၊ မုံရွာမြို့အဝင် မအူစစ်ဆေးရေးဂိတ်မှာရှိတဲ့ စစ်ကောင်စီတပ်ဖွဲ့ဝင်တွေကို ဩဂုတ် ၁၅ ရက် မနက် ၂ နာရီလောက်မှာ မုံရွာခရိုင်ပြည်သူ့ကာကွယ်ရေးတပ်ဖွဲ့တွေက လက်နက်ကြီး၊ လက်နက်ငယ်တွေနဲ့ ပစ်ခတ်တိုက်ခိုက်ခဲ့တယ်လို့ သိရပါတယ်။

၄၅ မိနစ်ကြာ နှစ်ဖက်ဖြစ်ပွားတဲ့ တိုက်ပွဲအတွင်း စစ်ကောင်စီတပ်ဖွဲ့ဝင် ၆ ဦး သေဆုံးခဲ့တယ်လို့ မုံရွာခရိုင်ပြည်သူ့ကာကွယ်ရေးတပ်ဖွဲ့ Chindwin Attack Force တာဝန်ရှိသူက ပြောပါတယ်။

“အဲဒီမအူဂိတ်ကို အထူးစစ်ဆင်ရေး တခုအနေနဲ့ ပြောက်ကျားတိုက်ခိုက်ခဲ့တာဖြစ်ပါတယ်။ စစ်ကောင်စီတပ်ဘက်က ၆ ယောက် ပွဲချင်းပြီး သေတာ တွေ့တယ်။ ဒဏ်ရာ ရသူတွေလည်း များတယ်။” 

တိုက်ပွဲအတွင်း စစ်ကောင်စီတပ်က ဗုံးပစ်လောင်ချာ ၄၀ မမ အပါဝင် စက်သေနတ်တွေ၊ လက်နက်ငယ်တွေနဲ့ ပြန်လည်ပစ်ခတ်ခဲ့ပေမဲ့ ပြည်သူ့ကာကွယ်ရေးတပ်ဖွဲ့ဝင်တွေဘက်မှ အထိအခိုက် မရှိခဲ့ဘူးလို့ ဆိုပါတယ်။

အဲ့ဒီတိုက်ခိုက်မှုကို  မုံရွာခရိုင်ပြည်သူကာကွယ်ရေးတပ်မတော် (Chindwin Attack Force) တပ်ရင်း‌ ၂၊ ၃၊ ၄ ရဲ့ အထူးကွန်မန်ဒိုတပ်ဖွဲ့ (Monywa The Boys) က ဦးဆောင်ပြီး မုံရွာခရိုင်ပြည်သူကာကွယ်ရေးတပ်မတော် (Chindwin Attack Force) တပ်ရင်း ၂၊ ၃၊ ၄ ရဲ့ အထူးစုံစမ်းစစ်ဆင်ရေးအဖွဲ့၊ မုံရွာခရိုင်ပြည်သူကာကွယ်ရေးတပ်မတော် (Chindwin Attack Force) တပ်ရင်း ၂၊ တပ်ခွဲ ၂၊ Monywa Special ဒိတ်ဒိတ်ကြဲ PDF၊ မုံရွာခရိုင်ပြည်သူကာကွယ်ရေးတပ်မတော် (Chindwin Attack Force) တပ်ရင်း ၂၊ တပ်ခွဲ ၃၊ အနောက်မြောက်လွင်ပြင်တော်လှန်ရေးအင်အားစု (Northwest Plains Revolutionary Forces-NPRF) တို့ ပူးပေါင်းဆောင်ရွက်ခဲ့တာလို့ ထုတ်ပြန်ချက်မှာ ဖော်ပြထားပါတယ်။

မေ ၇ ရက်ကလည်း မုံရွာမြို့အဝင် မအူဂိတ်မှာရှိတဲ့ စစ်ကောင်စီတပ်ဖွဲ့ဝင်တွေကို ပြည်သူ့ကာကွယ်ရေးပူးပေါင်းတပ်ဖွဲ့က လက်နက်ကြီးနဲ့ ပစ်ခတ်တိုက်ခိုက်ခဲ့တယ်လို့ သိရပါတယ်။

4 days Ago

August 7, 2022

တန့်ဆည်တွင် ကင်းလှည့် ရဲတပ်ဖွဲ့ကား တိုက်ခိုက်ခံရပြီး ရဲ ၇ ဦးသေဆုံး

စစ်ကိုင်းတိုင်း၊ တန်ဆည်မြို့နယ်မှာ ကားနဲ့ကင်းလှည့်နေတဲ့ ရဲတပ်ဖွဲ့ကားကို ဒေသခံပြည်သူ့ကာကွယ်ရေးပူးပေါင်းတပ်က သြဂုတ် ၇ ရက် မနက် တိုက်ခိုက်ခဲ့တာကြောင့် ရဲတပ်သား ၇ ဦးသေဆုံးပြီး G3 သေနတ် ၆ လက် သိမ်းဆည်းရမိတယ်လို့ တန်ဆည်ပြည်သူ့ရဲဘော်အဖွဲ့ TPC က ထုတ်ပြန်ပါတယ်။

“ရဲပါခင်ဗျ ဒီနေ့မနက် အစောပိုင်း ၅-၆ နာရီခန့်ကပါခင်ဗျ။ ကားနဲ့ ကင်းပတ်ထွက်လာချိန် စောင့်ပြီး တိုက်ခဲ့တာပါခင်ဗျ။ ကင်းပတ်တာ နေ့တိုင်းနီးပါးပါပဲ၊ အင်းအား ၇ ယောက်ပါခင်ဗျ” လို့ TPC သတင်းပြန်ကြားရေးတာဝန်ခံက ပြောပါတယ်။

တန်ဆည်ပြည့်သူ့ရဲဘော်အဖွဲ့(TPC) နဲ့ တန့်ဆည် ပြည်သူ့ကာကွယ်ရေးတပ်ဖွဲ့တို့  ပူးပေါင်းတိုက်ခိုက်ခဲ့တာလို့ သိရပါတယ်။

2 weeks Ago

ကနီမြို့နယ်တွင် စစ်ကောင်စီတပ်ဖွဲ့များလိုက်ပါလာသည့် ရေယာဉ် ၃ စီး တိုက်ခိုက်ခံရ

စစ်ကိုင်းတိုင်း၊ ကနီမြို့နယ်မှာ ဩဂုတ် ၆ ရက် မနက်က စစ်ကောင်စီရဲ့ စစ်သင်္ဘော အပါအဝင် ရေယာဉ် ၃ စီးကို မင်းအိုကျေးရွာနဲ့ ကနီမြို့အကြားမှာ ဒေသခံ ပြည်သူ့ကာကွယ်ရေးပူးပေါင်းတပ်ဖွဲ့တွေက  တိုက်ခိုက်ခဲ့ပါတယ်။

မုံရွာနဲ့ မန္တလေးနယ်ဘက်မှ ပြည်သူတွေဆီက အဓမ္မသိမ်းယူရရှိထားတဲ့ စက်ပစ္စည်းတွေနဲ့ စားသောက်ကုန်တွေတင်ဆောင်တဲ့ စစ်ကောင်စီတပ်ရဲ့ ရေယာဉ်တွေဟာ မုံရွာမြို့ အလုံဆိပ်ကမ်းကနေ ချင်းတွင်းမြစ်အထက်ကို ဆန်တက်ထွက်ခွာလာစဉ် တိုက်ခိုက်ခံရတာလို့ ဒေသကာကွယ်ရေးတပ်ဖွဲ့တစ်ခုဖြစ်တဲ့ ကျောက်လုံးကြီး PDF က ထုတ်ပြန်ပါတယ်။

"ရေယာဉ် ၃ စီးဟာ စစ်ကောင်စီတပ်ဖွဲ့ဝင်စုစုပေါင်းအင်အား ၂၀၀ လောက်ပါတယ်။ မုံရွာနဲ့ မန္တလေးနယ်ဘက်က မြို့ပေါ်အပါဝင် ကျေးရွာတွေဆီက ပြည်သူပိုင်ဆိုင်တဲ့ ဆန်၊ ဆီ၊ လယ်ယာသုံးစက်ပစ္စည်းတွေနဲ့ ဆိုင်ကယ်တွေ တင်ဆောင်လာတာ။ အဲ့ဒါ မင်းအိုနဲ့ ကနီကြားမှာ နေရာ ငါးနေရာခွဲပြီး ဖြတ်တိုက်တာပါ။ စစ်‌သင်္ဘောကို လက်နက်ကြီး နှစ်ချက်ထိတယ်။ စစ်သင်္ဘောမောင်းတဲ့ကောင်နဲ့ စက်ကြီးပစ်ခတ်တဲ့ကောင်လည်း စနိုက်ပါထိပြီး အပြင်းထန်ဒဏ်ရာရသွားတယ်။ သေဖို့များတယ်။ နောက်ပြီး အဲ့ဒီစစ်သင်္ဘောပေါ်က ကောင်တွေနဲ့ ကျန်ရေယာဉ်ပေါ်ကကောင်တွေလည်း အထိခိုက်အသေဆုံးများတယ်။ " လို့ ကျောက်လုံးကြီး PDF တာဝန်ရှိသူတစ်ဦးက ပြောပါတယ်။

တိုက်ပွဲဖြစ်ခဲ့တဲ့ စစ်ကောင်စီတပ်ရဲ့ ရေယာဉ် ၃ စီးကတော့ စစ်သင်္ဘော ၁ စီး၊ တွဲတွန်းဖလပ်သင်္ဘော ၁ စီးနဲ့ ရှပ်ပြေးရေယာဉ် ၁ စီးတို့ဖြစ်ပြီး ‌တိုက်ပွဲဖြစ်အပြီး သေဆုံးသူနဲ့ ဒဏ်ရာရတဲ့သူတွေကို ကနီမြို့မှာ ရေယာဉ်ရပ်နားကာ သယ်ဆောင်သွားကြပါတယ်။

PDF တပ်က ရဲဘော်တယောက်ကတော့ သင်္ဘောကပစ်တဲ့ လက်နက်ကြီးကျည်ထိမှန်ခဲ့ပြီး မစိုးရိမ်ရဒဏ်ရာရရှိခဲ့ပါတယ်။

အဲ့ဒီတိုက်ခိုက်မှုကို ကျောက်လုံးကြီး KLG PDF၊ MPDF၊ GTF PDF၊ DBTF PDF၊ SRTF PDF၊ Tiger Bann PDF၊ Alpha PDF၊ အမိမြေ PDF၊ ချင်းတွင်းဂဠုန်ရာဇာအဖွဲ့၊ မြောက်ယမားအဖွဲ့၊ ဒေသခံပကဖအဖွဲ့နဲ့ မဟာမိတ်အဖွဲ့တွေက ပူးပေါင်းဆောင်ရွက်ခဲ့တာလို့ ထုတ်ပြန်ချက်မှာ ဖော်ပြထားပါတယ်။

ကနီမြို့နယ် ချင်းတွင်းမြစ်ကြောင်းမှာ စစ်ကောင်စီတပ်ဖွဲ့ ရေယာဉ်တွေနဲ့ ဒေသကာကွယ်ရေးတပ်ဖွဲ့တွေ မကြာခဏတိုက်ပွဲဖြစ်ပွားလေ့ရှိပြီး စစ်ကောင်စီတပ်ဖွဲ့က ရိက္ခာတင်ပို့မှုကို ရေကြောင်းကနေ အများဆုံးပြုလုပ်နေတာ ဖြစ်ပါတယ်။

2 weeks Ago
More News
Up