တရုတ်-မြန်မာ

October 15, 2021

တရုတ်-မြန်မာ နှစ်နိုင်ငံ နယ်စပ်ဂိတ်များ ပြန်ဖွင့်ရေး ဆက်လက်ဆိုင်းငံ့

တရုတ် - မြန်မာ နှစ်နိုင်ငံ နယ်စပ်မှာ ပိတ်ထားတဲ့ ဂိတ်တွေကို ပြန်လည်ဖွင့်လှစ်ရေးအတွက် နှစ်နိုင်ငံ ဆွေးနွေးတဲ့ အစည်းအဝေးမှာ ကုန်သွယ်ရေး မျှတမှု မရှိတာကြောင့် ဆိုင်းငံ့ထားလိုက်တယ်လို့ သိရပါတယ်။

တရုတ်-မြန်မာနှစ်နိုင်ငံ  နယ်စပ်မှာ ပိတ်ထားတဲ့ ဂိတ်တွေ ပြန်လည်ဖွင့်လှစ်ရေးအတွက် အစည်းဝေးတခုကို အောက်တိုဘာ ၁၄ ရက်နေ့က Online ကနေကျင်းပခဲ့တာပါ။

တရုတ်ပြည်ဘက်က တရုတ်နိုင်ငံတွင်းမှာ ရှိတဲ့ ကုန်ပစ္စည်းတွေအား မြန်မာနိုင်ငံအတွင်းကို ထုတ်ခွင့်ပြုပေမယ့် မြန်မာကထွက်ရှိတဲ့ ပစ္စည်းတွေကို တရုတ်နိုင်ငံဘက် ဝယ်ခွင့်မပြုဘူးဆိုပြီး တင်ပြလာတာကြောင့် မြန်မာနိုင်ငံက လက်မခံခဲ့တာလို့ မူဆယ် ဆန်စပါးကုန်စည်ဒိုင် ဒုတိယ ဥက္ကဋ္ဌ ဦးမင်းသိန်းက DVB ကိုပြောပါတယ်။ 

“ဒီကိစ္စနဲ့ ပတ်သက်လို့ မြန်မာနိုင်ငံဘက်က တာဝန်ရှိ ပုဂ္ဂိုလ်တွေကလည်း ဒါဆိုရင်တော့ မဖြစ်နိုင်ဘူး။ တရုတ်ပြည်က ကားအစီး ၁၀၀၀ မြန်မာပြည်ကိုဝင်ရင် ကျနော်တို့ မြန်မာပြည်ကလည်း ကားအစီး ၁၀၀၀ ခင်ဗျားတို့ တရုတ်ပြည်က ခွင့်ပြုမှ ကုန်သွယ်ရေးမျှတမှု ဆိုတာ ဖြစ်ပေါ်လာမယ်။ ဒါကြောင့် တဖက်သတ် တရုတ်ပြည်ကပဲ မြန်မာပြည်ကိုသွင်းမယ်၊ မြန်မာပြည်က ကုန်ပစ္စည်းတွေကို တရုတ်ပြည်ကို မသွင်းရဘူးဆိုတဲ့ ကိစ္စတော့ ကျနော်တို့ လက်မခံနိုင်ဘူးဆိုပြီး တင်ပြလာတော့ တဖက် တရုတ်နိုင်ငံက တာဝန်ရှိ ပုဂ္ဂိုလ်တွေကလည်း ကောင်းပါပြီ ဒီကိစ္စတွေကို ကျနော်တို့ ဗဟိုအစိုးရဆီ တင်ပြပေးပါမယ် ဆိုပြီး ပြောပြီးတော့ အစည်းဆုံးသွားတယ်။” 

တရုတ်ဘက်က တဖက်သတ် ကုန်သွယ်မှုပုံစံ ဖြစ်နေကာ ကျယ်ဂေါင်-မန့်ဝိန်းဂိတ် ဖွင့်ပြီး တရုတ်ကုန် တင်သွင်းခွင့်ပေးပါက ကျင်ဆန်းကျော့-ဝမ်တိန်ကိုလည်း ဖွင့်ပြီး မြန်မာကုန်တွေ တင်ပို့ခွင့်ပြုဖို့ လိုတယ်လို့ ဆိုပါတယ်။

“ဖြစ်ချင်တာကတော့ မျှမျှတတပေါ့။ ကုန်သွယ်ရေးကို တဖက်စောင်းနင်း အသာစီး ယူထားတဲ့ ပုံစံ မဟုတ်ပဲနဲ့ တရုတ်နိုင်ငံကရော မြန်မာနိုင်ငံ ကရော အဝင်အထွက်တွေကို မျှမျှတတနဲ့ ဝင်ထွက် ပြုမယ်ဆိုရင်တော့ တရုတ်-မြန်မာ နယ်စပ်ကုန်သွယ်ရေးဟာ ယခင်လိုပဲ တိုးတက်လာမယ်လို့ ပြောချင်ပါတယ်။” လို့ သူက ထပ်မံ ရှင်းပြပါတယ်။ 

မူလက မြန်မာဘက်တင်ပို့မယ်ကုန်တွေကို အောက်တိုဘာ ၁၅ ရက်ကနေ နိုဝင်ဘာ ၇ ရက်ထိ တင်သွင်းဖို့ တရုတ်ဘက်က စာထွက်ထားတာရှိပေမယ့် နှစ်နိုင်ငံ သဘောတူညီချက်မရတာကြောင့် ရက်ရွှေ့ဆိုင်းလိုက်ရတယ်လို့ သိရပါတယ်။

နှစ်နိုင်ငံ ဆွေးနွေးပွဲမှာ တက်ရောက်သူတွေကတော့ မြန်မာဘက်က မူဆယ်နယ်စပ် စီးပွားကူးသန်း၊ နယ်စပ်ကုန်သွယ်ရေးက ပုဂ္ဂိုလ်တွေ၊ ခရိုင် အထွေထွေ အုပ်ချုပ်ရေး ဦးစီးဌာနက ပုဂ္ဂိုလ်တွေ၊ ကုန်သည်တွေ၊ တရုတ်အဖွဲ့အစည်းက ဥက္ကဋ္ဌတွေ တက်ရောက်ပြီး တရုတ်ဘက်က ယူနန်ပြည်နယ် ခရိုင်အဆင့်ရှိ တာဝန်ရှိပုဂ္ဂိုလ်တွေ တက်ရောက်တယ်လို့ ဆိုပါတယ်။

ကျယ်ဂေါင်-မန့်ဝိန်းဂိတ်ပေါက်ကို ကိုဗစ်ကြောင်းပြချက်နဲ့ တရုတ်ဘက်က ဧပြီလ လဆန်းပိုင်းကတည်းက ယာယီပိတ်ထားတာဖြစ်ပြီး ပိတ်မိနေတဲ့ ကုန်ကား အစီး ၃၀၀ လောက်ရှိတယ်လို့ မြန်မာကုန်ဂိတ်ပိုင်ရှင်တဦးက ပြောပါတယ်။

Pra Jaw

7 days Ago

April 4, 2021

တရုတ်-မြန်မာနယ်စပ် မန့်ဝိန်း ကုန်သွယ်ရေးဂိတ်ပေါက် ယာယီပိတ်

မြန်မာနိုင်ငံရဲ့ အရှေ့မြောက် ကုန်သွယ်ရေးတံခါးပေါက် တစ်ပေါက်ဖြစ်တဲ့ မြန်မာ - တရုတ်နယ်စပ် အဝင်၊ အထွက် ဂိတ်ပေါက်ကို ယာယီပိတ်ထားကြောင်း နယ်စပ် ဒေသခံတွေထံက သိရပါတယ်။

လက်ရှိ ရွှေလီ၊ ကျယ်ဂေါင် ဘက်မှာ  ကိုဗစ် - ၁၉ ရောဂါ ကူးစက်ပြန့်ပွားနေတာကြောင့် ဧပြီလဆန်း ၁ ရက်နေ့ ကစပြီး ပိတ်ထားကြောင်း  မူဆယ် တရုတ်ထောင်လွှဲ တာဝန်ခံ ဦးမန်းမျိုးမြင့်က ဒီဗွီဘီကိုပြောပါတယ်။

 "မန့်ဝိန်းဂိတ်ရော အကုန် အကုန်ပိတ်တယ်။ ကားအဝင် အထွက်ကအစ မရှိဘူး။ လုံးဝ အဝင်အထွက် မရှိဘူး"။

မြန်မာတရုတ်နယ်စပ် ကျယ်ဂေါင်-ရွှေလီလမ်းကြောင်းကို ကိုဗစ်- ၁၉ ရောဂါပိုးတွေ့ရှိလို့ တရုတ်နိုင်ငံဘက်မှ ခေတ္တပိတ်ထားတာကြောင့် ကုန်တင်ကားကြီးတွေ မန့်ဝိန်းပေါက်မှဝင်ရောက်နိုင်ခြင်းမရှိဘဲ ကျင်စန်းကျော့ ဝင်ပေါက်တစ်ခုတည်းကိုသာ လတ်တလော အသုံးပြုနေရကြောင်း မူဆယ်ယာဉ်ထိန်းတပ်ဖွဲ့က လူမှုကွန်ယက်မှာ အသိပေးထားတာလည်း ရှိပါတယ်။

ရွှေလီမြို့မှာ နေထိုင်သူ ကိုဟိန်းနိုင် က "မန့်ဝိန်းပေါက်က အဝင် အထွက်မရှိဘူး။ လောလောဆယ်တော့ ရပ်ထားတာပေါ့နော်။ ကုန်သည်တွေက တခါတလေကျတော့ ဒီနေ့ရပ်ချင် ရပ်တယ်။ နက်ဖြန် ဖွင့်ချင်ဖွင့်တယ်။ လောလောဆယ် ခု ရပ်ထားတာ ၃ ရက် ၃ ရက် ရှိပြီ။" လို့ ပြောပါတယ်။

ရွှေလီ၊ ကျယ်ဂေါင်မှာ မတ်လ ၃၀ ရက်နေ့ကတည်းက အပြင်မထွက်ဖို့ လိုက်လံ သတိပေးနေပြီး Lockdown ချထားကာ အစက တစ်ပတ်လို့ပြောပေမယ့်  ကူးစက် သံသယ လူနာ ၁၃၂၀ ကျော်ထိ ပိုးတွေ့ ထပ်တိုးနေတဲ့အတွက် ဆက်ပိတ်ထားမလားမသိသေးဘူးလို့  ကျယ်ဂေါင်၊ ရွှေလီမှာ နေထိုင် အလုပ်လုပ်သူ ကိုကျော်သက်က ပြောပါတယ်။

မန့်ဝိန်း တရုတ် - မြန်မာ ကုန်သွယ်ရေး နယ်စပ် ဂိတ်ပေါက်မှ တရုတ်နိုင်ငံသို့  ဆန်၊ ပဲ စတဲ့ မြန်မာ့ လယ်ယာထွက်ကုန်၊ ပုပ်ပျက် မလွယ်တဲ့ အခြားကုန်စည်တွေကို နေ့စဉ် ကုန်တင်ကား ရာချီ တင်ပို့နေတာလည်း ဖြစ်ပါတယ်။

မြန်မာနိုင်ငံမှာ စစ်တပ်အာဏာသိမ်းပြီးနောက် တရုတ်ကုန်စည်တွေ မြန်မာဘက်တင်ပို့မှု ၂၀ ရာခိုင်နှုန်းလောက် ကျဆင်းသွားတယ်လို့ တရုတ်သတင်းတွေမှာ ဖော်ပြပါတယ်။ 

7 months Ago
More News
Up