တရုတ်အစိုးရ

January 17, 2022

တရုတ်အစိုးရကို ရက်စက်ကြမ်းကြုတ်သည့်အာဏာရှင်အစိုးရဟု ဗြိတိန် အမတ်ဟောင်း ပြော

ဗြိတိန် ကွန်ဆာဗေးတစ်ပါတီခေါင်းဆောင်ဟောင်း အီယန်ဒန်ကန်စမစ်သ်က တရုတ်အစိုးရကို ရက်စက်ကြမ်းကြုတ်ပြီး အာဏာရှင်ဆန်တဲ့ အစိုးရလို့ ဇန်နဝါရီ ၁၆ ရက်က ခေါ်ဝေါ်သုံးနှုန်း ဝေဖန်လိုက်ပါတယ်။

ဗြိတိန်လွှတ်တော်အမတ်တွေကို မလျော်ဩဇာသုံးဖို့ အမျိုးသမီးတယောက်ကို အလုပ်ခန့်ထားတဲ့ တရုတ်ကွန်မြူနစ်ပါတီအကြောင်း ဗြိတိန် ပြည်တွင်းထောက်လှမ်းရေးဌာန MI5 က လွှတ်တော် အမတ်တွေကို သတိပေးခဲ့အပြီး ခုလို ပြောလိုက်တာပါ။

စကိုင်းနယူးစ်သတင်းဌာနရဲ့ အစီအစဉ်တင်ဆက်သူ ထရီဗာဖီးလစ်ပ်စ်နဲ့ လူတွေ့မေးမြန်းခန်း အတွင်း ဗြိတိန် တရုတ် ဆက်ဆံရေးကိုလည်း ဒန်ကန်က မေးခွန်းထုတ်လိုက်ပါတယ်။

“တရုတ်နဲ့ပတ်သက်ရင် ကျနော်တို့ ဘယ်နားမှာလဲ ဆိုတာ တွက်ထုတ်ဖို့လိုပြီ။ သူတို့နဲ့ ဆက်ဆံရေး ရှိသလား၊ ဒါမှမဟုတ် သူတို့ကို ခြိမ်းခြောက်မှုအဖြစ် ရှုမြင်လားဆိုတာကိုပေါ့”လို့ သူက ပြောပါတယ်။

MI5 ဟာ ခရစ္စတင်းလီလို့ ခေါ်တဲ့ အမျိုးသမီးရဲ့ ဓာတ်ပုံကို ဇန်နဝါရီ ၁၃ ရက်က ထုတ်ပြန်ခဲ့ပြီး သူဟာ တရုတ်ကွန်မြူနစ်ပါတီကိုယ်စား ဗြိတိန်နိုင်ငံထဲမှာ နိုင်ငံရေး နှောင့်ယှက်တဲ့ လုပ်ရပ်တွေမှာ ပါဝင်ပတ်သက်နေတယ်လို့ စွပ်စွဲထားပါတယ်။

လွှတ်တော်ဥက္ကဋ္ဌ လင်ဆေးဟွိုင်လေက MI5 ရဲ့ တပ်လှန့်ချက်ကို ဖြန့်ဝေပေးခဲ့ပြီး လီဟာ ဟောင်ကောင်နဲ့ တရုတ်ပြည်မကြီးမှာ အခြေစိုက်တဲ့ နိုင်ငံခြားသားတွေကိုယ်စား လွှတ်တော်အမတ်တွေကို ဘဏ္ဍာရေးအလှူတွေ ပံ့ပိုးနေတာကို MI5 က တွေ့ထားတယ်လို့ ပြောပါတယ်။

တရုတ်ရဲ့ အပြုအမူကို ရှုတ်ချဖို့ နိုင်ငံတွေက သတိကြီးကြီးထားနေကြပြီး ဒါဟာ ပင်လယ်ထဲ မျောနေတဲ့ ရေခဲတောင်ရဲ့ ထိပ်ဖျားပဲ ရှိသေးတယ်လို့လည်း ဒန်ကန်က ပြောပါတယ်။

1 day Ago

January 13, 2022

တရုတ်အစိုးရက စစ်ကောင်စီ နယ်စပ်ရေးရာဝန်ကြီးဌာနသို့ ဒေါ်လာ ၂ သိန်းလှူ

တရုတ်ပြည်သူ့သမ္မတနိုင်ငံအစိုးရက စစ်ကောင်စီနယ်စပ်ရေးရာဝန်ကြီးဌာနသို့ အမေရိကန်ဒေါ်လာ နှစ်သိန်း ပေးအပ်လှူဒါန်းလိုက်တယ်လို့ တရုတ်သံရုံးနဲ့ စစ်ကောင်စီပြန်ကြားရေးက သတင်းထုတ်ပါတယ်။

ဇန်နဝါရီ ၁၂ ရက် မနက်က နေပြည်တော် နယ်စပ်ရေးရာဝန်ကြီးဌာနဝန်ကြီးရုံး အစည်းအဝေးခန်းမမှာ စစ်ကောင်စီဝန်ကြီး ဒုတိယဗိုလ်ချုပ်ကြီး ထွန်းထွန်းနောင်ကို  တရုတ်နိုင်ငံသံအမတ်ကြီး မစ္စတာ ချန်းဟိုင်က အလှူငွေပေးအပ်ခဲ့တာလို့ ဆိုပါတယ်။

ဒီအလှူငွေတွေဟာ မြန်မာနိုင်ငံရဲ့ အပစ်အခတ်ရပ်စဲမှု၊ ငြိမ်းချမ်းရေးဖော်ဆောင်မှုတို့ကို တိုးမြှင့်ဖို့နဲ့ တရုတ်- မြန်မာ နယ်စပ်ဒေသမှာ နေထိုင်တဲ့ ပြည်သူတွေရဲ့ လူနေမှုဘဝ တိုးတက်ရေးအတွက် ရည်ရွယ်တယ်လို့ သံရုံးထုတ်ပြန်ချက်မှာဖော်ပြပါတယ်။

တရုတ်နိုင်ငံဟာ ပြီးခဲ့တဲ့ ဒီဇင်ဘာ ၂၉ ရက်နေ့ကလည်း ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC-U) ကိုယ်စားလှယ် ဒုတိယဗိုလ်ချုပ်ကြီးရာပြည့်ကို အမေရိကန်ဒေါ်လာ ၂ သိန်းပေးအပ်ခဲ့ပါတယ်။ 

ဒါ့အပြင် မကြာသေးခင်ကလည်း စစ်ကောင်စီခန့် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာသက်သက်ခိုင်ကိုလည်း ဒေါ်လာ ၃ သိန်း ပေးအပ်လှူဒါန်းခဲ့ပါတယ်။ 

တရုတ်နိုင်ငံအနေနဲ့ မြန်မာနိုင်ငံအမျိုးသားပြန်လည်သင့်မြတ်ရေးနဲ့ ငြိမ်းချမ်းရေးဖွံ့ဖြိုးတိုးတက်မှု ဖော်ဆောင်ရေးကို အစဉ်တစိုက်ထောက်ခံအားပေးကြောင်း၊ မြန်မာနိုင်ငံ ငြိမ်းချမ်းရေးလုပ်ငန်းစဉ်နဲ့ သက်ဆိုင်တဲ့ အဖွဲ့အစည်းတွေကို ထောက်ပံ့ငွေပေးအပ်တာ ၆ ကြိမ်ရှိသွားပြီလို့ တရုတ်သံရုံးထုတ်ပြန်ချက်အရ သိရပါတယ်။

ဒါပေမဲ့ အလှူငွေတွေဟာ နယ်စစ်ဒေသနေ ပြည်သူတွေဆီ အမှန်တကယ် ရောက်မယ် မရောက်ဘူး မသိရသလို စစ်ကောင်စီအနေနဲ့လည်း အလှူငွေတွေကို ဘယ်မှာ အသုံးပြုတယ်ဆိုတဲ့ ပွင့်လင်းမြင်သာစွာ ထုတ်ပြန်တာလည်းမရှိပါဘူး။

Photo Credit- Chinese Embassy

5 days Ago
More News
Up