တရုတ်ပြည်မကြီး

March 21, 2022

တရုတ်ပြည်မကြီး၌ ၁ ရက်အတွင်း ပြည်တွင်း ကိုဗစ်ကူးစက်သူ ၁၆၀၀ ကျော်ရှိ

တရုတ်ပြည်မကြီးမှာ မတ် ၁၉ ရက်နေ့ တရက်တည်း ကိုဗစ်-၁၉ ကပ်ရောဂါ ပြည်တွင်း ကူးစက်ခံ ၁၆၅၆ ယောက် နဲ့ ပြည်ပက ပြန်လာသူကြား တွေ့တဲ့ ကူးစက်ခံ ၈၁ ယောက် ရှိတယ်လို့ တရုတ်အမျိုးသားကျန်းမာရေးကော်မရှင်က မတ် ၂၀ ရက်မှာ ဖော်ပြပါတယ်။

တရုတ်နိုင်ငံရဲ့ ပြည်နယ် ၁၉ ခုမှာ ကူးစက်ခံ လူနာတွေကို တွေ့ခဲ့တာဖြစ်ပြီး ရောဂါလက္ခဏာ ပြတဲ့ လူနာတွေကိုသာ ကူးစက်ခံအဖြစ် အတည်ပြု စာရင်းသွင်းတာလို့ ကော်မရှင်က ပြောပါတယ်။

မတ် ၁၉ ရက်နေ့မှာ ကူးစက်ခံ သေဆုံးသူ မရှိဘဲ သံသယလူနာ ၃ ယောက်ကတော့ နိုင်ငံခြားကနေ ရှန်ဟိုင်းမြို့ကို ရောက်လာသူတွေလို့ ဆိုပါတယ်။ လူနာ ၃၃၇ ယောက်က နေပြန်ကောင်းလာလို့ ဆေးရုံက ဆင်းသွားပြီဖြစ်ပြီး ကူးစက်ခံတွေနဲ့ အနီးကပ်ထိတွေ့မိသူ အယောက် ၁၁,၃၉၆ ယောက်ကို ဆေးဘက် စောင့်ကြည့်လေ့လာရာကနေ ပြန်လွှတ်ပေးလိုက်ပါပြီ။

ရောဂါအခြေအနေ ပြင်းထန်ဆိုးရွားလာသူ အရင်နေ့ကထက် လေးယောက် ပိုများလာတယ်လို့ ဆိုပေမယ့် လူအရေအတွက်ကိုတော့ ဖော်ပြမထားပါဘူး။

တရုတ်ပြည်မကြီးမှာ ကူးစက်ခံလူနာ စုစုပေါင်း ၁ သိန်းကျော်ဟာ နေပြန်ကောင်းလို့ ဆေးရုံက ဆင်းသွားပြီး ကူးစက်ခံ စုစုပေါင်း ၄၆၃၈ ယောက်က သေဆုံးခဲ့ပြီးပြီလို့ ကော်မရှင်က ပြောပါတယ်။

ဟောင်ကောင် အထူးကိုယ်ပိုင်အုပ်ချုပ်ခွင့်ရ ဒေသထဲမှာ စနေ တရက်တည်း ကိုဗစ်-၁၉ ကူးစက်ခံ ၆ သိန်း ၈ သောင်း ကျော်ကို စမ်းသပ် တွေ့ရှိထားပြီး ကူးစက်ခံ ၅၆၅၀ ဦး သေဆုံးခဲ့တယ်လို့ ဆိုပါတယ်။

မကာအို ကိုယ်ပိုင် အုပ်ချုပ်ခွင့်ရ ဒေသမှာတော့ ကူးစက်ခံ အတည်ပြုလူနာ စုစုပေါင်း ၈၂ ယောက် ရှိတယ်လို့ ဆိုပါတယ်။

ထိုင်ဝမ်မှာ ကူးစက်ခံ အတည်ပြုလူနာ စုစုပေါင်း ၂ သောင်း ၁၇၈၄ ယောက်ရှိပြီး ကူးစက်ခံ ၈၅၃ ယောက် သေဆုံးခဲ့တယ်လို့ ဖော်ပြပါတယ်။

10 months Ago

August 2, 2021

တရုတ်ပြည်မကြီးတွင် တရက်တည်း ကိုဗစ်-၁၉ ရောဂါ အသစ်ကူးစက်ခံရသူ ၇၅ ဦးရှိ

တရုတ်ပြည်မကြီးက ပြည်နယ် ၈ ခုမှာ ကိုဗစ်-၁၉ ကပ်ရောဂါ  ပြည်တွင်းကူးစက်ခံရသူတွေ အပါအဝင် ဇူလိုင် ၃၁ ရက် တရက်တည်းမှာ အသစ်ကူးစက်ခံ ၇၅ ယောက် ရှိတယ်လို့ တရုတ်အစိုးရက သြဂုတ် ၁ရက်မှာ ထုတ်ပြန်ပါတယ်။

တရုတ်နိုင်ငံမှာ လချီပြီး ပြည်တွင်းနေ ကူးစက်မှု မရှိသလောက် နည်းနေရာက ခုနောက်ပိုင်းမှာ ကိုဗစ်-၁၉ ဒယ်လ်တာ ဗီဇမျိုးကွဲ ကူးစက်မှု ပိုပြီး ဆိုးဆိုးရွားရွား ပြန်တိုးလာနေတာပါ။

တရုတ်နိုင်ငံ ဖှုကျန်းပြည်နယ် ရှားမဲန်းမြို့မှာ ဒေသခံတွေကို အိမ်ထဲမှာပဲ နေဖို့ အမိန့်ထုတ်ထားပြီး စားနပ်ရိက္ခာနဲ့ တခြားအထောက်အပံ့တွေ ဖြန့်ဝေပေးနေတဲ့ ပုံတွေကို CCTV က ထုတ်လွှင့်ပြသပါတယ်။

ရုရှားကနေ ကူးစက်ခံ လူနာတယောက်ကို တင်လာတဲ့ လေယာဉ်ကို သန့်ရှင်းရေး လုပ်ခဲ့တဲ့ နန်ကျင်း လူခို့ နိုင်ငံတကာလေဆိပ်က အလုပ်သမားတွေနဲ့ ပတ်သက်ပြီး နန်ကျင်းမြို့မှာ ကူးစက်ခဲ့တာလို့ အရာရှိတွေက ပြောပါတယ်။

ကူးစက်ခံတွေဟာ ကိုဗစ်-၁၉  ဗိုင်းရပ်စ်ရဲ့ ဒယ်လ်တာ ဗီဇမျိုးကွဲ ကူးစက်ခံရတာလို့ သူတို့က အတည်ပြုပါတယ်။ တရုတ်နိုင်ငံ အလယ်ပိုင်း ဟီနန်ပြည်နယ်က ရေဘေးသင့် ကျန်းကျိုးမြို့မှာလည်း နောက်ထပ် ကူးစက်ခံ အသစ် ၁၁ ယောက် တွေ့ရှိထားပါတယ်။

လက္ခဏာ မပြတဲ့ ကူးစက်ခံ ၁၆ယောက် ရှိပေမယ့် တရုတ်အစိုးရက တရားဝင် ကိန်းဂဏန်းထဲ ထည့်မတွက်ပါဘူး။ တရုတ်နိုင်ငံမှာ ကူးစက်မှု စတည်းက ခုထိ ကူးစက်ခံရသူပေါင်း ၉၃၀၀၀  ရှိနေပြီဖြစ်ပါတယ်။

1 year Ago
More News
Up