တရုတ်နိုင်ငံသား

June 23, 2022

တရုတ်နိုင်ငံသားပိုင် GTIG Huasheng အထည်ချုပ်စက်ရုံ အလုပ်သမားအခွင့်အရေး ချိုးဖောက်နေ

ရွှေပြည်သာစက်မှုဇုန်မှာရှိတဲ့ တရုတ်နိုင်ငံသားပိုင် GTIG Huasheng (Myanmar) အထည်ချုပ်စက်ရုံဟာ ILO ရဲ့ Convention မှာပါရှိတဲ့ အပိုဒ် ၈၇ အချက်ကို ပြောင်ပြောင်တင်းတင်း ချိုးဖောက်နေတယ်လို့ အလုပ်သမားအရေး တက်ကြွလှုပ်ရှားသူတွေက ပြောပါတယ်။

ILO ရဲ့ Convention မှာပါရှိတဲ့ အပိုဒ် ၈၇ အရ လွတ်လပ်စွာသင်းပင်းဖွဲ့စည်းခွင့်ကို လိုက်နာရမှာ ဖြစ်ပါတယ်။ ဒါပေမယ့် ယင်းစက်ရုံက လိုက်နာမှု မရှိတဲ့အပြင် အလုပ်ရှင်က ဖွဲ့စည်းထားရှိတဲ့ အယောင်ဆောင်သမဂ္ဂ (Yellow Union) နဲ့ လက်ဝါးချင်းရိုက်ပြီး နာမည်ကြီး ကုန်အမှတ်တံဆိပ်တွေကို လက်ခံချုပ်လုပ်ပေးနေတာပါ။

အလုပ်သမားသမဂ္ဂခေါင်းဆောင်တဦးက “အဲဒီစက်ရုံက PEP&CO နဲ့ Primark အမှတ်တံဆိပ်နဲ့ အထည်တွေကို ချုပ်လုပ်ပေးနေတာ။ Primark ဆိုရင် ထွက်သွားပြီဆိုတဲ့ ကုန်အမှတ်တံဆိပ်နော်။ ပြောချင်တာက ဒီနာမည်ကြီးအမှတ်တံဆိပ်တွေဟာ လွတ်လပ်စွာ သင်းပင်းဖွဲ့စည်းခွင့်ကို လိုက်နာပါမယ်၊ မတားဆီးပါဘူး၊ စက်ရုံမှာလည်း အလုပ်သမားတွေသမဂ္ဂ ဖွဲ့တာကို မကန့်ကွက်ဘူး၊ အားပေးပါတယ်ပေါ့။ ဒါပေမယ့် အမှန်တကယ် သူတို့လုပ်နေတာက အယောင်ဆောင်သမဂ္ဂ (Yellow Union) ဖွဲ့ပြီးတော့ လုပ်နေတယ်။ ဆိုတော့ သမဂ္ဂဖွဲ့ခြင်း၊ မဖွဲ့ခြင်းဟာ အလုပ်သမားတွေနဲ့ဘဲ သက်ဆိုင်တယ်။ အလုပ်ရှင်တွေနဲ့ မသက်ဆိုင်ဘူး။ ဒီအပေါ်မှာ အလုပ်ရှင်တွေက ဦးဆောင်ပြီး အလုပ်သမားသမဂ္ဂကို ဖွဲ့စည်းခွင့်မရှိသလို ဖျက်ဆီးခွင့်လည်း မရှိဘူး” လို့ ဒီဗွီဘီကို ပြောပါတယ်။

ဒါ့အပြင် ဒီစက်ရုံဟာ အလုပ်သမားတွေကို အချိန်ပိုဆင်းခိုင်းပြီး အချိန်ပိုကြေးကို ပြည့်ပြည့်ဝဝ မပေးတဲ့အပြင် ခေါင်းပုံဖြတ်မှုတွေလည်း ရှိနေတာပါ။

အထည်ချုပ်ဝန်ထမ်းတဦးက “အချိန်ပိုတွေ ခေါ်ပြီး အလုပ်သမားတွေကို ထိုက်သင့်တဲ့ လစာ မပေးဘူး။ မပေးတဲ့အပြင် အခုဆိုရင် ဘာလုပ်လဲဆိုတော့ Yellow Union တွေနဲ့ ပေါင်းပြီးတော့ အလုပ်သမားတွေက Gate Pass ထွက်လို့ရှိရင် အဲဒီ Gate Pass က ပိုက်ဆံဖြတ်တယ်။ အဲ့ဒါကလည်း ဘယ်သူတွေကို ဖြတ်လဲဆိုရင် အလုပ်သမားတွေက ဖွဲ့စည်းထားတဲ့ သမဂ္ဂအဖွဲ့ဝင် အလုပ်သမားတွေဆိုရင် ဖြတ်တယ်။ ဘယ်လောက်အထိ ဖြတ်လဲဆိုရင် လစာထုတ်တဲ့အခါ ၆ သောင်းကနေ ၈ သောင်းအထိ အဖြတ်ခံရတယ်။ အဲဒီပြဿနာကို အလုပ်သမားရုံးမှာ သွားဖြေရှင်းကြသေးတယ်။ ဒါပေမယ့် ရှင်းရှင်း ပြောရင် စက်ရုံပိုင်ရှင်က စစ်ကောင်စီ လက်အောက်မှာရှိတဲ့ ရွှေပြည်သာမြို့နယ်က အလုပ်သမားရုံးတွေနဲ့ ပေါင်းပြီးတော့ အလုပ်သမားတွေကို ခေါင်းပုံဖြတ်ဖိနှိပ်ထားတယ်” လို့ ဒီဗွီဘီကို ပြောပါတယ်။

တရုတ်နိုင်ငံသားပိုင် GTIG Huasheng (Myanmar) အထည်ချုပ်စက်ရုံဟာ အထည်ချုပ်ဝန်ထမ်းအသိုင်းအဝန်းကြားမှာ ကော်ထိုက် အမည်နဲ့ လူသိများပြီး အထည်ချုပ်စက်ရုံ ၆ ရုံ ရှိကာ စက်ရုံ ၁ ရုံမှာ အထည်ချုပ်ဝန်ထမ်း ထောင်ကျော် ရှိပါတယ်။

2 months Ago

April 27, 2022

ပါကစ္စတန် အသေခံဗုံးခွဲမှုတွင် တရုတ်နိုင်ငံသား ၃ ဦးသေဆုံး

ပါကစ္စတန်နိုင်ငံ၊ ကရာချိတက္ကသိုလ်နားမှာ ဖြတ်မောင်းသွားတဲ့ မီနီဘတ်စ်ကားတစီး ဧပြီ ၂၆ ရက်က ဗုံးကွဲလို့ သေဆုံးတဲ့ ခရီးသည်တွေထဲမှာ အဲ့ဒီတက္ကသိုလ်ရဲ့ ကွန်ဖြူးရှပ်စ်ဌာနက တရုတ်ဝန်ထမ်း ၃ ယောက်နဲ့ ပါကစ္စတန်နိုင်ငံသား ၁ ယောက် ပါဝင်တယ်လို့ ရဲတွေက ပြောပါတယ်။

ဒါဟာ မနှစ်က ပါကစ္စတန်ရဲ့ ကာလကြာရှည် မဟာမိတ် တရုတ်နိုင်ငံသားတွေကို အကြီးစား တိုက်ခိုက်မှု ဖြစ်ပွားခဲ့အပြီး ပထမဆုံးအကြိမ် တရုတ်နိုင်ငံသားတွေ သေဆုံးမှုလည်း ဖြစ်ပါတယ်။

ဒီဗုံးကွဲမှုဟာ အမျိုးသမီး အသေခံဗုံးခွဲသမား တယောက်က ဖောက်ခွဲတိုက်ခိုက်ခဲ့တာ ဖြစ်ပြီး သူတို့လက်ချက် ဖြစ်တယ်လို့ ဘာလို့ချ် လွတ်မြောက်ရေးတပ်မတော် ခွဲထွက်ရေး အုပ်စု (BLA) က ရိုက်တာသတင်းဌာနဆီ ပေးပို့ထားတဲ့ အီးမေးလ်ထဲမှာ အခိုင်အမာ ပြောပါတယ်။

ဒါဟာ ပါကစ္စတန်မှာ ဝန်ကြီးချုပ်အသစ် ရှာဘတ်စ်ရှာရစ်ဖ် ဒီလထဲမှာ အာဏာရအပြီး မြို့ပေါ်မှာ ပထမဆုံး အကြီးစားတိုက်ခိုက်မှုလည်း ဖြစ်ပါတယ်။

ဝန်ကြီးချုပ်အသစ်ကတော့ ဒီလုပ်ရပ်ဟာ အကြမ်းဖက်ဝါဒရဲ့ သူရဲဘောကြောင်တဲ့ လုပ်ရပ်လို့ ပြောပါတယ်။

သေဆုံးသူတွေထဲမှာ ကွန်ဖြူးရှပ်စ်တက္ကသိုလ် တရုတ်ဘာသာနဲ့ ယဉ်ကျေးမှုဌာန ညွှန်ကြားရေးမှူးနဲ့ တခြား ဌာနတွင်း အဖွဲ့ဝင် ၂ ယောက် ပါတယ်လို့ တက္ကသိုလ် ပြောခွင့်ရက ပြောပါတယ်။

ဒီ သူရဲဘောကြောင်တဲ့ တိုက်ခိုက်မှုဟာ ပါကစ္စတန်-တရုတ် ချစ်ကြည်ရင်းနှီးမှုနဲ့ လက်ရှိ ပူးပေါင်းဆောင်ရွက်မှုတွေကို တိုက်ရိုက် တိုက်ခိုက်လိုက်တာပဲလို့ ပါကစ္စတန် နိုင်ငံခြားရေး ဝန်ကြီးဌာနက ကြေညာချက် ထုတ်ပြန် ပြောဆိုပါတယ်။

BLA တပ်ဟာ ဒီနှစ်အစောပိုင်းကလည်း နိုင်ငံအနောက်တောင်ပိုင်းက ဘာလူချီစတန် ပြည်နယ်အတွင်း စစ်တပ်အခြေစိုက်စခန်း ၂ ခုကို တိုက်ခိုက်ပြီး စစ်သား ၇ ယောက်ကို သတ်ဖြတ်ခဲ့ပါတယ်။

ပါကစ္စတန်စစ်တပ်နဲ့ တနာရီကြာ တိုက်ပွဲအတွင်း တိုက်ခိုက်ရေးသမား ၁၃ ယောက် ဆုံးရှုံးခဲ့ပါတယ်။ ဘာလို့ချ် ခွဲထွက်ရေး ပြောက်ကျားတပ်ဟာ ဒေသတွင်း ဓာတ်သတ္ထုဆိုင်ရာ သယံဇာတ ရင်းမြစ်တွေအတွက် ပိုကြီးတဲ့ဝေစုရဖို့ တိုက်ပွဲဝင်နေတာလို့ ပြောရင်း လုံခြုံရေးတပ်တွေ၊ အခြေခံအဆောက်အဦတွေနဲ့ ဓာတ်ငွေ့ပိုက်လိုင်းတွေကို တိုက်ခိုက်လေ့ ရှိပါတယ်။

4 months Ago
More News
Up