တရုတ်

September 21, 2021

နျူကလီးယား သဘောတူညီချက်ကို ပြန်အသက်သွင်းရန် အင်အားကြီးနိုင်ငံများနှင့် အီရန် ဆွေးနွေးရန်ရှိ

ဗြိတိန်၊ တရုတ်၊ ပြင်သစ်၊ ဂျာမနီနဲ့ ရုရှားဝန်ကြီးတွေဟာ ဒီသီတင်းပတ် နှောင်းပိုင်းမှာ ကျင်းပမယ့် ကုလသမဂ္ဂအထွေထွေညီလာခံအတွင်း အီရန်သမ္မတနဲ့  တွေ့ဆုံဆွေးနွေးဖို့ရှိနေပါတယ်။

ဒီလိုတွေ့ဆုံရာမှာ ၂၀၁၅ နျူကလီးယား သဘောတူညီချက်ကို ပြန်အသက်သွင်းဖို့ နှောင့်နှေးနေတဲ့ ဆွေးနွေးပွဲတွေကို အရှိန်အဟုန်သစ်နဲ့ပြန်စဖို့ ကြိုးစားမယ်လို့ ပြင်သစ် နိုင်ငံခြားရေး ဝန်ကြီးက စက်တင်ဘာ ၂၀ ရက်မှာ ပြောပါတယ်။

“သဘောတူညီချက်ထဲမှာ အီရန်နဲ့ အမေရိကန် ပြန်ပါလာစေဖို့ ညှိနှိုင်းပွဲတွေကို ပြန်စဖို့ အပြုသဘောဆောင်တဲ့ အရှိန်အဟုန် တချို့ စတင်ရေး ဒီသီတင်းပတ်ထဲမှာ ကျနော်တို့ သေသေချာချာ ကြိုးစားဖို့ လိုမယ်”လို့  ပြင်သစ်နိုင်ငံခြားရေး ဝန်ကြီးက သတင်းစာရှင်းလင်းပွဲမှာ ပြောခဲ့ပါတယ်။

အီရန်နဲ့ အမေရိကန် အစိုးရတွေကြား တိုက်ရိုက်မဟုတ်တဲ့ ဆွေးနွေးပွဲ ဆဋ္ဌမအကျော့ကို ဇွန်လမှာ ရွှေ့ဆိုင်းခဲ့တာပါ။ အီရတ်ခေါင်းဆောင်အီဘရာဟင်မ် ရိုင်စီက သြဂုတ် ၅ ရက်မှာ သမ္မတ ဖြစ်လာခဲ့ပြီးနောက် ဆွေးနွေးပွဲတွေပြန်စဖို့ အလားအလာရှိနေတာဖြစ်ပါတယ်။ 

16 hours Ago

မြန်မာမှ တရုတ်သို့ မြေရှားသတ္တုဒြပ်စင် (Rare-earth )တင်ပို့မှု လျော့နည်းသွား

မြန်မာနိုင်ငံကနေ အသုံးဝင်သတ္တုပေါင်းစုံပါဝင်နေတဲ့ မြေရှားသတ္တုဒြပ်စင် (Rare-earth ) တွေကို တရုတ်နိုင်ငံဆီသို့ တင်သွင်းမှုဟာ သြဂုတ်လမှာ နှေးကွေးသွားခဲ့တယ်လို့ စက်တင်ဘာ ၂၀ ရက်  တရုတ်အကောက်ခွန်စာရင်းတွေအရ သိရပါတယ်။

ကိုရိုနာဗိုင်းရပ်စ် ကူးစက်ပျံ့နှံ့မှုကို တားဆီးဖို့အတွက် အဓိကကျတဲ့ နယ်စပ်ဖြတ်ကျော်ဂိတ်တစ်ခု ပိတ်ထားတာကြောင့် ခုလို တင်သွင်းမှု နည်းသွားတာလို့ ရိုက်တာသတင်းမှာဖော်ပြပါတယ်။

လူသုံးလျှပ်စစ်ပစ္စည်းနဲ့ စစ်သုံးပစ္စည်းတွေမှာ အသုံးပြုတဲ့ ဓာတ်သတ္တု ၁၇ မျိုးလောက်ပါဝင်တဲ့ ဒြပ်ပစ္စည်းအုပ်စုဖြစ်တဲ့ မြေရှားသတ္တုဒြပ်စင်ကို တရုတ်နိုင်ငံဟာ ကမ္ဘာပေါ်မှာ အများဆုံးထုတ်လုပ်နိုင်တဲ့ နိုင်ငံဖြစ်ပေမဲ့ တရုတ်နိုင်ငံဟာ ပစ္စည်းထုတ်လုပ်ဖို့ များပြားလှတဲ့ ဒီမြေရှားဒြပ်စင် ၅၀ ရာခိုင်နှုန်းလောက်ကို မြန်မာနိုင်ငံကနေ မှီခို ရယူနေတာ ဖြစ်ပါတယ်။

မြေရှားဒြပ်စင် တင်ပို့မှုနှေးကွေးခြင်းကြောင့် လျှပ်စစ်ဓာတ်အားသုံး မော်တော်ယာဉ်တွေနဲ့ လေအားသုံးတာဘိုင်တွေမှာ အသုံးပြုတဲ့ မြေရှားသံလိုက်တွေကို ထုတ်လုပ်သူတွေမှာ တဆင့်ခံအကျိုးသက်ရောက်မှုတွေ ကြုံနေရပြီး terbium နဲ့ dysprosium တို့လို အဓိကသံလိုက်သွင်းအားစုတွေအတွက် စျေးနှုန်းတွေ တက်နေပြီလို့ ဆိုပါတယ်။ 

တရုတ်နိုင်ငံကို မြန်မာနိုင်ငံကနေ မြေရှားဒြပ်စင် တင်ပို့မှုတွေဟာ အရင်လက ၂၃ တန်သာ ရှိခဲ့တယ်လို့ တရုတ်အကောက်ခွန် အထွေထွေအုပ်ချုပ်ရေးမှ ထုတ်ပြန်တဲ့ အချက်အလက်တွေအရ ပြထားပါတယ်။

တရုတ်နိုင်ငံ အနောက်တောင်ပိုင်း ယူနန်ပြည်နယ် တိန်းချုံးရှိ နယ်စပ်ဖြတ်ကျော်မှုကို ကိုရိုနာဗိုင်းရပ်စ်ကူးစက်မှုကို ကာကွယ်ဖို့အတွက် ဇူလိုင်လလယ်က ပိတ်ထားခဲ့ပါတယ်။

မြန်မာနိုင်ငံမှ တရုတ်နိုင်ငံကို ရှားပါးမြေဆီ တင်သွင်းမှုဟာ သြဂုတ်လမှာ တန်ချိန် ၇၀ သာရှိခဲ့ပြီး ဇူလိုင်လက တန်ချိန် ၂၇၀ ကနေ ၉၃ ဒသမ ၅ ရာခိုင်နှုန်း ကျဆင်းခဲ့တာဖြစ်ပါတယ်။ ပြီးခဲ့တဲ့လကတော့ မြန်မာနိုင်ငံမှ တရုတ်ကို ကာဗွန်နိတ်တွေ ပေါင်းစပ်ပါဝင်နေတဲ့ မြေရှားဒြပ်စင် တင်ပို့မှု လုံးဝမရှိခဲ့ပါဘူး။

အချိန်တိုအတွင်း နယ်စပ်ဂိတ်တွေ ပြန်ဖွင့်ဦးမှာမဟုတ်လို့ အခြေအနေက မတိုးတက်သေးပါဘူးလို့ စက်တင်ဘာ ၁၅ ရက် webinar မှာ Roskill မှ လေ့လာဆန်းစစ်သူ လက်စ်လီလီအန်းက ပြောပါတယ်။

ဆိုလိုတာကတော့ တရုတ်ဟာ မြန်မာနိုင်ငံမှာ သတ္တုရိုင်းတွေကို သန့်စင်ဖို့ ဓာတုပစ္စည်းတွေ မပို့ပေးနိုင်သလို မြေရှားဒြပ်စင် တင်သွင်းမှုကိုလည်း မလုပ်နိုင်ဘူးလို့ ဖြည့်ပြောပြပါတယ်။ 

လွန်ခဲ့တဲ့ငါးနှစ်ကျော်လောက်က မြန်မာနိုင်ငံကို မှီခိုအားထားလေ့ရှိတဲ့ တရုတ်နိုင်ငံပိုင်လုပ်ငန်းတွေ အပါအဝင်အားလုံးဟာ အခုဆိုရင် ကိုယ့်ဆီပစ္စည်းပေးသွင်းသူ မရှိသလောက်နည်းပြီး  supply-chain (ကုန်ကြမ်းမှ ကုန်ချောထုတ်ပြီး စားသုံးသူထံပေးပို့သည့်လုပ်ငန်းစဉ်) ပြဿနာ ရင်ဆိုင်နေရပြီလို့လည်း ဆိုပါတယ်။

Source- Reuters

23 hours Ago

September 20, 2021

တရုတ်နိုင်ငံသို့ တိရစ္ဆာန်အစာ ပြောင်းချဉ်ဖတ် စိုက်ပျိုးထုတ်လုပ်တင်ပို့ရန် လိုက်နာရမည့် အချက်များထုတ်ပြန်

တရုတ်နိုင်ငံကို တိရစ္ဆာန်အစာ ပြောင်းချဉ်ဖတ် စိုက်ပျိုးထုတ်လုပ်တင်ပို့တာနဲ့ ပတ်သက်ပြီး ကုန်သွယ်မှုချောမွေ့စေဖို့ နှစ်နိုင်ငံသဘောတူညီချက်အရ စိုက်ပျိုးထုတ်လုပ်သူနဲ့ တင်ပို့သူတွေ လိုက်နာဆောင်ရွက်ရမယ့်အချက်တွေကို  စစ်ကောင်စီ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာနက ထုတ်ပြန်ပါတယ်။ 

ပထမအဆင့်အနေနဲ့ စိုက်ပျိုးထုတ်လုပ်သူတွေက Good Agricultural Practices (GAP) စနစ်နဲ့ စိုက်ပျိုးထုတ်လုပ်ကာ ပိုးမွှားကာကွယ်ရေးအတွက် Integrated Pest Management (IPM) စနစ်ကိုကျင့်သုံးရမယ်လို့ ဆိုပါတယ်။

ဒီအတွက် စိုက်ပျိုးရေးဦးစီးဌာနက ပြောင်းစိုက်ပျိုးထုတ်လုပ်သူတွေကို စိုက်ပျိုးရေးအလေ့အကျင့်ကောင်းများ Good Agricultural Practices (GAP) စနစ်နဲ့ စိုက်ပျိုးထုတ်လုပ်နိုင်ဖို့ လိုအပ်တဲ့ နည်းပညာပေးရေးလုပ်ငန်းတွေ ဆောင်ရွက်ပေးဖို့နဲ့ သတ်မှတ်လုပ်ငန်းစဉ်အတိုင်း ဆောင်ရွက်နိုင်ဖို့ ကွင်းဆင်းစိစစ်ပြီး မှတ်တမ်းရေးသွင်း ဆောင်ရွက်ရ မယ်လို့လည်း သိရပါတယ်။

တင်ပို့ရောင်းချသူတွေကလည်း ထုပ်ပိုးပြီးဖြစ်တဲ့ တိရစ္ဆာန်အစာ ပြောင်းချဉ်ဖတ်တွေကို တင်ပို့ခြင်းမပြုမီ စိုက်ပျိုး၊မွေးမြုရေးနဲ့ ကုသရေးဦးစီးဌာနထံ နမူနာတွေပေးပို့ကာ တရုတ်နိုင်ငံက သတ်မှတ်ထားတဲ့ သီးနှံဖျက်ပိုးများနှင့် တိရစ္ဆာန်ကူးစက်ရောဂါများကင်းရှင်းကြောင်း စစ်ဆေးပြီးမှသာ သတ်မှတ်ထားသော Certificate ကို စိုက်ပျိုး၊မွေးမြူရေးနှင့်ကုသရေးဦးစီးဌာနက ထုတ်ပေးသွားမှာ ဖြစ်ပါတယ်။

ဒါကြောင့် တင်ပို့လိုသူတွေအနေနဲ့ တိရစ္ဆာန်အစာ ပြောင်းချဉ်ဖတ်နမူနာတွေကို စိုက်ပျိုးရေးဌာနရဲ့ သီးနှံကာကွယ်ရေး ဌာနခွဲမှာ စစ်ဆေးခဲ့ပြီးနောက် သတ်မှတ်ချက်နဲ့ကိုက်ညီပါက ပိုးမွှားကင်းရှင်းကြောင်း သက်သေခံလက်မှတ် Phytosanitary Certificate (PC) ကို ၃ ရက်အတွင်း ထုတ်ပေးသွားမည်လို့ သိရပါတယ်။

တိရစ္ဆာန်အစာအတွက် အစိုဓာတ် ၆၅ မှ ၇၀ ရာခိုင်နှုန်းရှိ ပြောင်းပင်နဲ့ အဖူးကို စဉ်းဖြတ်ကာ လေကင်းမဲ့တဲ့နေရာမှာ အချဉ်ဖောက်ပြီးနောက် စနစ်တကျသိုလှောင်သိမ်းဆည်းထားရာမှ ရရှိလာတဲ့ ချဉ်ဖတ်ကို တိရစ္ဆာန်တွေက နှစ်သက်ကြကာ အာဟာရဓာတ်ကလည်း ကြွယ်ဝမှု ရှိစေပါတယ်။

ရာသီအလိုက် တိရစ္ဆာန်အစာ အခက်အခဲရှိတဲ့ ဒေသတွေမှာရှိတဲ့ မွေးမြူရေးတောင်သူတွေအတွက် တိရစ္ဆာန်အစာလိုအပ်ချက်ကို ဖြည့်ဆည်းနိုင်တဲ့အပြင် ပြည်ပပို့ကုန်အနေနဲ့လည်း အလားအလာရှိတာကြောင့် စိတ်ပါဝင်စားတဲ့သူတွေ ကျယ်ကျယ်ပြန့်ပြန့် ထုတ်လုပ်နိုင်ဖို့အတွက် စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာနက စီစဉ်ထားပါတယ်။

နိုင်ငံရဲ့ နှစ်စဉ် အသားတင်ထုတ် လုပ်မှုတန်ဖိုး တိုးတက်ရေးမှာ ကျွဲ၊ နွား၊သိုး၊ဆိတ် အပါအဝင် အသားကဏ္ဍကလည်း အရေးပါတဲ့လုပ်ငန်းဖြစ်လို့ မွေးမြူရေးလုပ်ကိုင်သူတွေအနေနဲ့ လွှတ်ကျောင်းစနစ်အစား တိရစ္ဆာန်အစာ စိုက်ပျိုးကျွေးမွေးတဲ့စနစ် ကျင့်သုံး ဆောင်ရွက်ကြဖို့ စိုက်ပျိုးရေး ၊မွေးမြူရေးနှင့်ဆည်မြောင်းဝန်ကြီးဌာန စစ်ကောင်စီ ပြည်ထောင်စုဝန်ကြီး ဦးတင်ထွဋ်ဦးက ပြောပါတယ်။ 

ဒါ့အပြင် ဒေသနဲ့ ကိုက်ညီတဲ့ တိရစ္ဆာန်အစာပင်တွေကို လက်တွေ့စိုက်ပျိုး ပြသတာ၊ တိရစ္ဆာန်အစာ ချဉ်ဖတ် ပြုလုပ်နည်း ဖြန့်ဝေတာတွေလုပ်ဆောင်ဖို့  တိရစ္ဆာန်အစာချဉ်ဖတ်ထုတ်လုပ်ခြင်း လုပ်ငန်းညှိနှိုင်းအစည်းအဝေးမှာ ပြောဆိုခဲ့ပါတယ်။

2 days Ago
More News
Up