တရားမဝင် မြန်မာနိုင်ငံသား

October 31, 2021

တရက်တည်း ထိုင်းဘက်ခိုးဝင် မြန်မာ အယောက် ၁၀၀ ကျော် ဖမ်းဆီးခံရ

ထိုင်းနိုင်ငံဘက်ကို တရားမဝင် နယ်စပ်ဖြတ်ကျော်ဝင်ရောက်လာတဲ့ မြန်မာအယောက် ၁၁၀ တရက်တည်း ဖမ်းဆီးခံခဲ့ရတယ်လို့  ဘန်ကောက်ပို့စ်သတင်းမှာ ဖော်ပြပါတယ်။

ထိုင်းနိုင်ငံအနောက်ဘက် ကန်ကျနပူရီခရိုင်ရှိ နယ်စပ်ကနေ ဝင်ရောက်လာတဲ့ အုပ်စု ၃ စုကို လုံခြုံရေးတပ်ဖွဲ့က ဖမ်းဆီးနိုင်ခဲ့တာဖြစ်ပြီး နောက်ဆုံးအုပ်စုမှာတော့ ၃၈ ယောက် ပါဝင်ပြီး ဆန်ခလဘူရီမြို့နယ် ဘန့်ခေါင်ကျေးရွာအုပ်စုက ကြံစိုက်ခင်းထဲမှာ ဖမ်းမိခဲ့တာလို့ ဆိုပါတယ်။

သူတို့ဟာ ပဲခူး၊ မော်လမြိုင်နဲ့ မန္တလေးမြို့တွေကနေ ထိုင်းနိုင်ငံ ချွန်ဘူရီ၊ ဆမွတ်စာခွန်းနဲ့ ဘန်ကောက်ခရိုင်တွေမှာ အလုပ်လုပ်ကိုင်ဖို့ ပွဲစားခ ဘတ် ၁၅,၀၀၀ စီပေးပြီး ခုလိုဝင်ရောက်လာခဲ့ကြတာလို့ ဆိုပါတယ်။

သူတို့အုပ်စုမတိုင်ခင် အစောပိုင်းကတော့ ၁၈ ယောက် ပါဝင်တဲ့ အုပ်စုနဲ့ ၅၄ ယောက် ပါဝင်တဲ့ အုပ်စု ၂ စုကို မနက်အစောပိုင်း ၄ နာရီခွဲနဲ့ ၆ နာရီတွေမှာ ကန်ကျနပူရီခရိုင် ဆန်ခလာဘူရီမြို့နယ်ထဲမှာ ဖမ်းဆီးနိုင်ခဲ့တာလို့ ဆိုပါတယ်။

လက်ရှိမှာတော့ သူတို့အားလုံးကို ဖမ်းဆီးထားပြီး တရားမဝင် နယ်စပ်ဖြတ်ကျော် ဝင်ရောက်မှု၊ ကိုဗစ်-၁၉ ကာလအရေးပေါ်အခြေအနေ ဖောက်ဖျက်ကျူးလွန်မှုတွေနဲ့ ပြစ်ဒဏ်ချမှတ် အရေးယူမှာဖြစ်ပြီး နေရပ်ပြန်ပို့သွားမယ်လို့ ဆိုပါတယ်။

လတ်တလော ထိုင်း-မြန်မာ နယ်စပ်မှာ တရားမဝင် ဝင်ရောက်လာသူတွေ နေ့စဉ်လို ဖမ်းဆီးရမိနေတာမို့ နယ်စပ်တလျှောက် လုံခြုံရေးတင်းကျပ် လုပ်ဆောင်နေပါတယ်။

3 months Ago

October 27, 2021

ချင်းမိုင်ခရိုင်တွင် တရားမဝင် ဝင်ရောက်လာသည့် မြန်မာ ၅၂ ဦး ဖမ်းဆီးခံရ

ထိုင်းနိုင်ငံမြောက်ပိုင်း၊ ချင်းမိုင်ခရိုင်၊ ဖှန်မြို့နယ်ရှိ မြန်မာနယ်စပ်မှာ အောက်တိုဘာ ၂၆ ရက်ညက တရားမဝင် ဝင်ရောက်လာတဲ့ မြန်မာရွှေ့ပြောင်းလုပ်သား ၅၂ ဦးကို ဖမ်းဆီးခံရတယ်လို့ ချင်းမိုင်နယူးစ်သတင်းမှာ ဖော်ပြပါတယ်။ 

နယ်စပ်ဒေသ မူးယစ်ဆေးဝါးသယ်ဆောင်မှုနဲ့ တရားမဝင် ဝင်ထွက်မှုထိန်းချုပ်ရေးအတွက် အမှတ် ၄ နယ်ခြားစောင့်တပ်နဲ့ တာဝန်ရှိသူတွေဟာ မနေ့ည ၁၁ နာရီခွဲလောက်က  ဖှန်မြို့နယ်ထဲ လုံခြုံရေးစောင့်ကြပ်စစ်ဆေးစဉ် မွမ့်ပင်ကျေးရွာအုပ်စု နောလဲကျေးရွာမှာ နယ်စပ်တောလမ်းကနေ ခြေကျင်လျှောက်ပြီး ဝင်ရောက်လာတဲ့ တရားမဝင် မြန်မာရွှေ့ပြောင်းလုပ်သား အမျိုးသား ၁၉ ဦး အမျိုးသမီး ၃၃ ဦး စုစုပေါင်း  ၅၂ ဦးတို့ကို ဖမ်းဆီးရမိခဲ့တယ်လို့ သတင်းမှာ ဖော်ပြပါတယ်။ 

သူတို့အားလုံးကို မြို့နယ် ကျန်းမာရေးဌာနက ကိုယ်အပူချိန်စစ်ဆေးပြီး ကိုဗစ်-၁၉ ကာကွယ်ရေးဥပဒေ လဝက ဥပဒေတွေနဲ့ အရေးယူသွားမယ်လို့ တာဝန်ရှိသူက ပြောပါတယ်။ 

ချင်းမိုင်ခရိုင် ဖှန်မြို့နယ်ထဲမှာ ဒီအောက်တိုဘာလအတွင်း မြန်မာဘက်ခြမ်းကနေ တရားမဝင် ဝင်ရောက်မှု  ဒီတကြိမ်ပါရင် ၅ ကြိမ်ရှိသွားပြီဖြစ်ပြီး မြန်မာနိုင်ငံသားပေါင်း ၁၇၇ ဦး ဖမ်းဆီးခံခဲ့ရပါတယ်။

3 months Ago
More News
Up