တရားမဝင်သစ်

December 2, 2021

စစ်ကိုင်းတိုင်းတွင် စစ်တပ်ပစ္စည်းပို့ယာဉ်နှင့် တရားမဝင်သစ်များကို PDF က ဖမ်းဆီး

စစ်ကိုင်းတိုင်း မြောင်၊ ကောလင်းနဲ့ ကနီမြို့နယ်တို့မှာ တရားမဝင်သစ်နဲ့ စစ်ကောင်စီတပ်ဖွဲ့ ပစ္စည်းပို့ ယာဉ်တွေကို ပြည်သူ့ကာကွယ်ရေးတပ်ဖွဲ့တွေက ဖမ်းဆီးခဲ့တယ်လို့ သိရပါတယ်။

စစ်ကိုင်းတိုင်း မြောင်ရဲစခန်းကနေ ကျောက်ရစ်ရဲစခန်းကို ပစ္စည်းပို့တဲ့ စစ်ကောင်စီ ယာဉ်တစ်စီးကို မြောင်မြို့နယ်ပြည်သူ့ကာကွယ်ရေးနဲ့ လုံခြုံရေးအဖွဲ့ (CDSOM) က ဒီဇင်ဘာ ၁ ရက်နေ့ ညနေပိုင်းက သိမ်းဆည်းရမိခဲ့ပါတယ်။

စစ်ကောင်စီပစ္စည်းပို့ ကားဖြတ်သန်းမယ်ဆိုတဲ့သတင်းအရ CDSOM ရဲဘော်တွေ စောင့်ကြည့်ခဲ့ပြီးနောက် ပြည်သူ့ကားဟန်ဆောင်ကာ အရပ်ဝတ် ကားသမားနှစ်ဦး မောင်းနှင်လာတဲ့ ယာဉ်နဲ့အတူ သေတ္တာ ၆ လုံး၊ ပလတ်စတစ်ပုံး ၂ ပုံး၊ အိတ် ၁ လုံးနဲ့ ရဲယူနီဖောင်းတွေ၊ ဖုန်းတွေနဲ့ တခြားအသုံးအဆောင်တွေကို သိမ်းဆည်းမိခဲ့တာလို့ CDSOM က ထုတ်ပြန်ထားပါတယ်။

ကားသမားနှစ်ဦးအား စစ်ဆေးမေးမြန်းရာ စစ်ကောင်စီတပ်က အတင်းခိုင်းစေတာကြောင့် ပို့ဆောင်ပေးရကြောင်း ဝန်ခံခဲ့တဲ့အတွက် လုံခြုံတဲ့နေရာကို ထွက်ပြေးတိမ်းရှောင်ဖို့ ဆိုပါတယ်။

ကောလင်းမြို့နယ် ရွှေဘို-မြစ်ကြီးနားကားလမ်းမှာလည်း ဒီဇင်ဘာ ၁ ရက်မနက် ၅ နာရီဝန်းကျင်က တရားမဝင်သစ်သယ် ကားလေးစီးကို ကောလင်း PDF က ဖမ်းဆီးပြီး မီးရှို့ဖျက်ဆီးခဲ့တယ်လို့ သိရပါတယ်။

ဖမ်းဆီးရမိတဲ့ ပစ္စည်းစာရင်း ကျွန်းသစ် ၁၃ တန်၊ သစ်မာ ၁၈ တန်၊ ကျွန်းတံခါးဘောင် တစ်ရာလောက်၊ ဆန်အိတ်နဲ့ ဆန်ကွဲအိတ် ၃၁၅ အိတ်၊ငွေ ဆယ်သိန်းကျော်တို့ကို ဖမ်းမိခဲ့ပြီး ငွေနဲ့ဆန်အိတ်တွေကို ရိက္ခာအဖြစ်သိမ်းဆည်းထားပြီး ကျန်ပစ္စည်းတွေကို မီးရှို့ဖျက်ဆီးခဲ့တယ်လို့ ကောလင်းက PDF က ဒီဇင်ဘာ ၁ ရက်နေ့မှာ  ထုတ်ပြန်ပါတယ်။

ကောလင်း PDF က ကားသမားတွေကို ကြိမ်ဒဏ်ပေးပြီး အိမ်ပြန်ဖို့ လမ်းစရိတ်ပေး စီစဉ်ပေးခဲ့ကာ တရားမဝင်စီးပွားရှာနေသူတွေကို ထိရောက်စွာအရေးယူသွားမယ်လို့ ဆိုပါတယ်။

ကနီမြို့နယ် ချင်းတွင်းမြစ်အရှေ့ဘက်ခြမ်းမှာလည်း နိုဝင်ဘာ ၃၀ ရက်နေ့က တရားမဝင်သစ်ခိုးထုတ်နေတဲ့ ကားတွေကို ကနီပြည်သူ့ကာကွယ်တပ်မတော်အဖွဲ့က ဖမ်းဆီးခဲ့ပါတယ်။

“ကျနော်တို့ သဘာဝ ပတ်ဝန်းကျင်ကို ပျက်စီးစေတဲ့အရာနဲ့ ပြည်သူတွေရဲ့ အသက်အိုးအိမ် စည်းစိမ်ကို ကာကွယ်စောင့်ရှောက်ရမှာက ကျနော်တို့ PDF တွေရဲ့တာဝန်ပါ။ မြန်မာပြည်ရဲ့ သယံဇာတတွေကလည်း ကျနော်တို့ရဲ့ အမွေအနှစ်တွေပါ။ အခုလိုသစ်ခိုးထုတ်တာမျိုး နောက်ထပ် မပြုလုပ်ဖို့ ပထမဆုံးနဲ့ နောက်ဆုံး သတိပေးဖမ်းဆီးရတာလို့ ကနီပြည်သူ့ကာကွယ်ရေး တပ်မတော်ရဲ့ ခေါင်းဆောင်တစ်ဦးက ပြောပါတယ်။

အဖမ်းဆီးခံရတဲ့ သစ်ကားအရေတွက်ဟာ ကား ၄ စီးဖြစ်ပြီး သစ်တန် ၃၀ကျော်ပါရှိကာ ကာလတန်ဖိုး ကျပ်သိန်း ၂၀၀ ဖိုးလောက် ရှိတယ်လို့ သိရပါတယ်။ 

2 months Ago

January 23, 2021

၂၀၂၀ ပြည့်နှစ်တွင် တပ်မတော်က ကျပ် ၁၁ ဘီလီယံကျော်တန်ဖိုးရှိ တရားမဝင်သစ်များ ဖမ်းမိ

၂၀၂၀ ပြည့်နှစ်အတွင်း ခန့်မှန်းငွေကျပ် ၁၁ ဘီလီယံကျော်တန်ဖိုးရှိ ကျွန်းသစ်တွေအပါအဝင် သစ်မျိုးစုံတန်ချိန် ၉၉၀၀ ကျော်နဲ့ တရားမဝင် သယံဇာတ ထုတ်ယူနေတဲ့ တရားမဝင်ငါးဖမ်းလှေနဲ့ မှောင်ခိုလှေ စုစုပေါင်း ၇၄ စီး ကို ဖော်ထုတ်ဖမ်းဆီးနိုင်ခဲ့တယ်လို့ တပ်မတော်က ထုတ်ပြန်ပါတယ်။ တပ်မတော်က တရားမဝင်သစ်တွေ နေရာဒေသတစ်ခုတည်းမှာ တချိန်တည်း မြောက်မြားစွာ ဖမ်းဆီးရမိမှုအနေနဲ့ ပြီးခဲ့တဲ့နှစ် အောက်တိုဘာ ၁၇ ရက်ကနေ ဒီဇင်ဘာ ၂၃ ရက်အထိ ရခိုင်ပြည်နယ်၊ တောင်ကုတ်မြို့နယ်၊ အနောက်ဘက် ပင်လယ်ပြင်နဲ့ ဆက်စပ်မြစ်ချောင်းတွေကနေ ရတနာတန်းဝင်ကျွန်းသစ် ၃၆၀ တန်အပါအဝင် ပိတောက်၊ ကညင်နဲ့ အခြားသစ် စုစုပေါင်း ၃,၆၂၉ ဒသမ ၄၅ တန်ခန့် (ခန့်မှန်းတန်ဖိုးငွေကျပ် ၇ ဒသမ ၈ ဘီလီယံခန့်) နဲ့ အလျား ၂၀၀ ပေအထက်ရှိ သင်္ဘောကြီးတစ်စီးအပါအဝင် သင်္ဘော၊ စက်လှေ ၁၂ စီး၊ လူ ၆၁ ဦးတို့ကို ဖော်ထုတ်ဖမ်းဆီးရမိခဲ့ပြီး သက်ဆိုင်ရာကို လွှဲပြောင်းအပ်နှံနိုင်ခဲ့တယ်လို့ ဆိုပါတယ်။ အလားတူ ကချင်ပြည်နယ်အတွင်း ကျွန်းသစ်တန်ချိန် ၂၈၂ တန်ကျော်အပါအဝင် အခြား သစ်မျိုးစုံ စုစုပေါင်းတန်ချိန် ၁၅၀၀ ကျော်၊ ယာဉ်ယန္တရား ၄၈ စီးနဲ့ ဆက်စပ်ပစ္စည်းတွေ၊ ရှမ်းပြည်နယ်အတွင်ေမှာ ကျွန်းသစ်တန်ချိန် ၁၂၀၀ ကျော်အပါအဝင် အခြားသစ်မျိုးစုံ စုစုပေါင်း တန်ချိန် ၂၁၀၀ ကျော်၊ ယာဉ်ယန္တရား ၈၄ စီးနဲ့ ဆက်စပ်ပစ္စည်းတွေ ဖမ်းဆီးမိခဲ့ပါတယ်။ အခြားတိုင်းနဲ့ ပြည်နယ်အသီးသီးမှာ ကျွန်းသစ်တန်ချိန် ၁၂၀ ကျော်အပါအဝင် အခြားသစ်မျိုးစုံ စုစုပေါင်း တန်ချိန် ၂၅၀၀ ကျော်၊ ယာဉ်ယန္တရား ၃၉ စီးနဲ့ ဆက်စပ်ပစ္စည်းတွေကို ဖော်ထုတ်ဖမ်းဆီးရမိခဲ့ပြီး သက်ဆိုင်ရာကို လွှဲပြောင်း အပ်နှံပေးခဲ့ပါတယ်။  ဒါကြောင့် တပ်မတော်က ၂၀၂၀ ပြည့်နှစ်အတွင်း ခန့်မှန်းငွေကျပ် ၁၁ ဘီလီယံ ကျော်တန်ဖိုးရှိ ကျွန်းသစ်တွေအပါအဝင် သစ်မျိုးစုံတန်ချိန် ၉၉၀၀ ကျော်၊ ယာဉ်၊ ယန္တရား ၁၈၂ စီးနဲ့ ဆက်စပ်ပစ္စည်းတွေကို ဖော်ထုတ်ဖမ်းဆီးနိုင်ခဲ့တယ်လို့ ဆိုပါတယ်။ အရှည်စုစုပေါင်း ရေမိုင် ၁၂၆၀ ဒသမ ၅၆ မိုင်၊ ပိုင်နက်ရေပြင်ဧရိယာစတုရန်းမိုင် တစ်သိန်းလေးသောင်းကျော်အထိကျယ်ဝန်း ရှည်လျားတဲ့ မြန်မာ့ကမ်းရိုးတန်း ရေပိုင်နက်အတွင်း တရားမဝင် ဝင်ရောက်သွားလာမှု မရှိစေရေး၊ အဖိုးတန်ရေအောက် သယံဇာတတွေ တရားမဝင်ခိုးထုတ်တာမရှိစေဖို့နဲ့ ပင်လယ်ပြင်လုံခြုံရေးတို့အတွက် တပ်မတော်(ရေ)က ရေနဂါးစစ်ဆင်ရေး၊ မြစ်ဧရာစစ်ဆင်ရေးတို့နဲ့ နေ့ညမပြတ် လုံခြုံရေးလုပ်ငန်းတွေ ဆောင်ရွက်ပေးနေတယ်လို့ ထုတ်ပြန်ထားပါတယ်။ ဒါ့အပြင် ၂၀၂၀ ပြည့်နှစ်အတွင်း မွန်ပြည်နယ်နဲ့ ထိစပ်နေတဲ့ ရေပိုင်နက်အတွင်းမှာ တရားမဝင်ငါးဖမ်းလှေနဲ့ မှောင်ခိုလှေ ၆ စီးနဲ့ မှောင်ခိုလုပ်ကိုင်သူအယောက် ၃၀၊ တနင်္သာရီတိုင်းနဲ့ ထိစပ်နေတဲ့ ရေပိုင်နက်အတွင်း တရားမဝင်ငါးဖမ်းလှေနဲ့ မှောင်ခိုလှေ ၆၈ စီးနဲ့ မှောင်ခိုလုပ်ကိုင်သူ ၄၃၄ ဦး၊ စုစုပေါင်း ဖမ်းမိတဲ့ တရားမဝင်ငါးဖမ်းလှေနဲ့ မှောင်ခိုလှေ ၇၄ စီး၊ မှောင်ခိုလုပ်ကိုင်သူ ၄၆၄ ဦးတို့ကို ဆက်စပ်ပစ္စည်းတွေနဲ့အတူ အရေးယူနိုင်ဖို့ သက်ဆိုင်ရာကို လွှဲပြောင်းအပ်နှံပေးအပ်ခဲ့တယ်လို့ ဆိုပါတယ်။ တပ်မတော်အနေအနေနဲ့ ရေပေါ်ရေအောက်၊ မြေပေါ် မြေအောက် သယံဇာတတွေကို တရားမဝင် ထုတ်ယူရောင်းချမှု မရှိစေဖို့ သက်ဆိုင်ရာ ဌာနတွေ ပူးပေါင်းကာကွယ်နေတယ်လို့ ထုတ်ပြန်ချက်မှာ ဖော်ပြထားပါတယ်။
12 months Ago
More News
Up