တရားမဝင်လုပ်သား

December 16, 2021

ချင်းမိုင်တွင် စစ်ဆေးရေးရှောင်ပြီး တောထဲထွက်ပြေးသည့် တရားမဝင်လုပ်သား ၇၈ ဦး အဖမ်းခံရ

ထိုင်းမြောက်ပိုင်း ချင်းမိုင်ခရိုင် အုမ်းကွယ်မြို့နယ်ထဲမှာ ဒီဇင်ဘာ ၁၅ ရက်နေ့ မနက်က စစ်ဆေးရေးကိုရှောင်ပြီး တောထဲထွက်ပြေးကြတဲ့ တရားမဝင် မြန်မာအလုပ်သမား ၈၀ ကျော်ထဲက  ၇၈ ဦး အဖမ်းခံရတယ်လို့  ချင်းမိုင်နယူးစ် ထိုင်းသတင်းမှာ ဖော်ပြပါတယ်။

ဒီဇင်ဘာ ၁၄ ရက် ည ၈ နာရီကျော်လောက်က အုမ်းကွယ်မြို့နယ် ယန်းပျိန့်ကျေးရွာအုပ်စု ပါယန်ကျောက်သစ်တောကြိုးဝိုင်းဧရိယာထဲမှာ သစ်တောဘက်ဆိုင်ရာဝန်ထမ်းတွေက လုံခြုံရေး ယူနေစဉ် တောလမ်းထဲကနေ  ကား ၇ စီးလောက် ဖြတ်မောင်းလာတယ်လို့ သစ်တောဝန်ထမ်းက သတင်းထောက်တွေကို ပြောပါတယ်။

အဆိုပါကားတွေကို သင်္ကာမကင်းဖြစ်တာကြောင့် စစ်ဆေးဖို့တားဆီးခဲ့ကြောင်း၊ ဒါပေမယ့် ကားတွေက ရပ်မပေးဘဲ မောင်းပြေးသွားကြလို့ တာဝန်ရှိသူတွေက သူတို့နောက်ကိုကားနဲ့ လိုက်လံခဲ့ကြောင်း၊ တနေရာမှာ ကားတစ်စီး လမ်းဘေးမှာထိုးရပ်ထားလို့ ဆင်းကြည့်တော့ လူမရှိဘဲ အနီးနားတဝိုက်လိုက်ရှာရာမှာ အမှောင်ထဲပုန်းနေတဲ့ လူ ၂ ယောက်ကို အရင်ဖမ်းမိ ခဲ့ပါတယ်။ 

ဖမ်းမိသူနှစ်ဦးရဲ့ ဖွင့်ဟဝန်ခံချက်အရ သူတို့ဟာ မြန်မာနိုင်ငံသားတွေဖြစ်ပြီး ဘန်ကောက်မှာ အလုပ်သွားလုပ်ဖို့ ပွဲစားကို ၁ ဦး ဘတ် ၂၅၀၀၀ နဲ့ ပေးပြီး လူပေါင်း ၈၀ ကျော် ဝင်လာကြောင်း၊ စစ်ဆေးရေးနဲ့တွေ့တော့ ကားပေါ်ကဆင်းပြီး တောထဲ ထွက်ပြေးပုန်းရှောင်ခဲ့ကြတယ်လို့ ဆိုပါတယ်။ 

သစ်တောဝန်ထမ်းတွေကလည်း အုမ်းကွယ်မြို့နယ်အုပ်ချုပ်ရေးရုံးကို အကြောင်းကြားပြီး အုပ်ချုပ်ရေးရုံး၊ လဝကရဲ၊ နယ်မြေခံရဲ နဲ့ စစ်တပ်တွေပါတဲ့ ပူးပေါင်းအဖွဲ့တွေနဲ့အတူ တောထဲပုန်းအောင်းနေသူတွေကို တညလုံး လိုက်လံရှာဖွေရာမှာ ဒီဇင်ဘာ ၁၅ ရက်နေ့မနက် ၃ နာရီလောက်အထိ စုစုပေါင်း ၇၈ ဦး ဖမ်းဆီးရမိခဲ့ပါတယ်။ 

သူတို့ကို အုမ်းကွယ်မြို့နယ်ရဲဌာနကို ပို့ဆောင်ကာ အုမ်းကွယ်ဆေးရုံဝန်ထမ်းတွေက ကိုဗစ် ၁၉ ရောဂါစစ်ဆေးခဲ့ကြောင်း၊ အားလုံးပိုးမတွေ့ဘဲ လဝကဥပဒေနဲ့ ဆက်လက်အရေးယူသွား မယ်လို့ တာဝန်ရှိသူက သတင်းထောက်တွေကို ပြောပါတယ်။ 

အလားတူ ထိုင်းအနောက်မြောက်ပိုင်း ကန်ကျနပူရီခရိုင်ထဲမှာလည်း တရားမဝင် ဝင်ရောက်လာတဲ့ မြန်မာ ၇၉ ဦး ဖမ်းဆီးရမိတယ်လို့ ကန်ကျနပူရီဒေသတွင်းသတင်းမှာ ဖော်ပြပါတယ်။ 

အဆိုပါ ၇၉ ဦးအနက် ၃၄ ဦးကို ဒီဇင်ဘာ ၁၄ ရက် မွန်းတည့် ၁၂ နာရီကျော်က ကန်ကျနပူရီမြို့နယ် ဘန့်ကောင်အုပ်စု ဟွေနမ့်ခေါင်ရွာနားမှာလည်းကောင်း၊ အဲဒီအုပ်စုမှာဘဲ ဒီဇင်ဘာ ၁၅ ရက် မနက် ၇ နာရီခွဲက ၃၄ ဦး၊ နောက်ထပ် ၁၁ ဦးကတော့ ဒီဇင်ဘာ ၁၄ ရက် ညနေ ၆ နာရီလောက်က ဆိုင်းယုဒ်မြို့နယ် ဆီရီမုန်းခုန်းအုပ်စု ဟွေ့ကထထောင်းကျေးရွာနီးရှိ တောထဲမှာ ဖမ်းမိခဲ့တယ်လို့ ဆိုပါတယ်။ 

သူတို့တွေဟာ မြန်မာနိုင်ငံ ထားဝယ်၊ ရန်ကုန်၊ မော်လမြိုင်၊ ဖားအံ၊ ပဲခူး စတဲ့ဒေသက ဖြစ်ပြီး ထိုင်းနိုင်ငံမှာ လာရောက်အလုပ်လုပ်ဖို့ ပွဲစားကို ၁ ဦးကို ဘတ် ၁၅၀၀၀ မှ ၂၅၀၀၀ ထိပေးပြီး ဝင်လာခဲ့တာလို့ သတင်းမှာဖော်ပြပါတယ်။

12 months Ago

December 24, 2020

တရားမဝင်လုပ်သားများအား စွန့်ပစ်မှုမဖြစ်ရေး ယာယီနေခွင့်ကတ်လုပ်ပေးရန် ထိုင်းဝန်ကြီးချုပ် အကြံပြု 

ထိုင်းနိုင်ငံမှာ ရွှေ့ပြောင်းအလုပ်သမားပေါင်းထောင်ကျော်ဆီက ကိုဗစ်-၁၉ ရောဂါပိုး တွေ့ရှိပြီးတဲ့နောက် ထိုင်းတနိုင်ငံလုံးရှိ ရွှေ့ပြောင်းလုပ်သားများ စုဝေးနေထိုင်ရာ စက်ရုံအလုပ်ရုံ လုပ်ငန်းခွင်တွေကို ကိုဗစ်-၁၉ စစ်ဆေးဖို့ အစိုးရက ထုတ်ပြန်ညွှန်ကြားထားပါတယ်။  အဲဒီလိုစစ်ဆေးရင်းက အထောက်အထားမရှိတဲ့ အထောက်အထားတွေ ငှါးရမ်းခန့်ထားပါက သက်ဆိုင်ရာက အရေးယူအပြစ်ပေးခံရမှာစိုးတဲ့အတွက် အလုပ်ရှင်တချို့က မိမိအလုပ်သမားတွေကို အလုပ်ထုတ်ပစ်တာ၊ စွန့်ပစ်တာ၊ အခြားနေရာကို ရွှေ့ပြောင်းသိုဝှက်ထားတာတွေ ရှိနေပါတယ်။  အဆိုပါအလုပ်သမားတွေဟာ ကိုဗစ်-၁၉ စစ်ဆေးမှုကို မခံယူရတာကြောင့် သူတို့ တိမ်း ရှောင်နေတဲ့ ပတ်ဝန်းကျင်က လူတွေအတွက် ရောဂါပိုးကူးစက်ခံရမယ့်အရေး စိုးရိမ်မကင်းဖြစ်နေ ကြပါတယ်။  ဒီပြဿနာတွေကို ဖြေရှင်းတဲ့အနေနဲ့  အဆိုပါတရားမဝင်အလုပ်သမားတွေကို ယာယီနေ ထိုင်ခွင့် ပန်းရောင်ကတ်ထုတ်ပေးဖို့ ထိုင်းဝန်ကြီးချုပ် ပရယုဒ်ကျန်အိုးချားက ဒီဇင်ဘာ ၂၃ ရက် အစိုးရအိမ်တော် သတင်းစာရှင်းပွဲမှာ ပြောပါတယ်။  ထိုင်းနိုင်ငံအနေနဲ့ နိုင်ငံခြားရင်းနှီးမြှုပ်နှံမှုအတွက် ငွေကြေးလုံလောက်ပေမယ့် လတ်တလော ကိုဗစ်-၁၉ ကူးစက်မှုပြဿနာရှိနေကြောင်း၊ အဓိကမှာ တရားမဝင်ရွှေ့ပြောင်း အလုပ်သမားတွေ ဆီကနေ တဆင့်ကူးစက်လာတာဖြစ်ပြီး၊ ထိုင်းနိုင်ငံမှာ အနေကြာတဲ့ တရားဝင်အလုပ်သမားဆိုရင် ပြဿနာမရှိဘူးလို့ ဆိုပါတယ်။  တရားမဝင်အလုပ်သမားတွေဟာ တကိုယ်ကောင်းဆန်တဲ့ အလုပ်ရှင်တွေကြောင့် ရှိလာရတာ ဖြစ်ကြောင်း၊ အဲဒီအလုပ်ရှင်တွေဟာ လုပ်အားခကို ဥပဒေကသတ်မှတ်ထားတဲ့အတိုင်း အပြည့်မပေးချင်လို့ ဈေးပေါတဲ့တရားမဝင်အလုပ်သမားတွေကို ငှါးရာက တရားမဝင် အလုပ်သမားတင်သွင်းမှုတွေလည်း ရှိလာရကြောင်း ဒါကြောင့် တရားမဝင် ဝင်ရောက်မှုကို ထိထိရောက်ရောက်နှိမ်နင်းရမယ်လို့ ဝန်ကြီးချုပ်က ပြောပါတယ်။ ဒါ့အပြင် တချို့စက်ရုံအလုပ်ရုံတွေမှာ တရားမဝင်အလုပ်သမားငှါးရမ်းခန့်ထားမှုတွေရှိ နေပြီး သက်ဆိုင်ရာကအစစ်အဆေးတင်းကြပ်တဲ့အခါ သူတို့ကအလုပ်သမားတွေကို အလုပ်ထုတ်ပစ်တာ စွန့်ပစ်တာတွေလုပ်ကြောင်း၊ နောက်ဆက်တွဲ ရောဂါကူးစက်ပြန့်ပွားမှု ရှိလာနိုင တာကြောင့်  ဒီပြဿနာကိုဖြေရှင်းတဲ့အနေနဲ့ အလုပ်သမားဝန်ကြီးဌာနနဲ့ ပြည်ထဲရေးဝန်ကြီးဌာနတို့ တိုင်ပင်ဆွေးနွေးပြီး  သူတို့ကို ပန်းရောင်ယာယီနေ ထိုင်ခွင့်ကတ်ပြား ထုတ်ပေးသင့်တယ်လို့ အကြံပြုထားကြောင်း ဝန်ကြီးချုပ်က ပြောသွားပါတယ်။  ကိုးကား - www.matichon.co.th
2 years Ago
Up