တရားမဝင်မြန်မာအလုပ်သမား

September 2, 2022

မယ်ဟောင်ဆောင်တွင် တရားမဝင် မြန်မာအလုပ်သမား ၁၆ ဦးနှင့် ပွဲစားများအား ဖမ်းဆီး

ထိုင်းမြောက်ပိုင်း မယ်ဟောင်ဆောင်ခရိုင် ပန်မဖာ့မြို့နယ်ထဲမှာ ဒုမြို့နယ်ဦးစီးမှူးက ရုပ်ဖျက်ပြီး တရားမဝင်အလုပ်သမား ၁၆ ယောက်နဲ့ ပွဲစားတွေကို ဖမ်းဆီးခဲ့တယ်လို့ siamrath ထိုင်းသတင်းမှာ ဖော်ပြပါတယ်။

နယ်မြေထဲမှာ တရားမဝင် အလုပ်သမားတွေ ဝင်ရောက်လာဖို့ရှိကြောင်း ကြိုတင်သတင်းရထားတဲ့အတွက် ဒုမြို့နယ်ဦးစီးမှူးကို လူကြိုသမားအဖြစ် အယောင်ဆောင်စေပြီး လမ်းပြသမားကိုရော၊ တရားမဝင် အလုပ်သမား ၁၆ ယောက်နဲ့  ထိုင်းလူမျိုး ကားသမား ၂ ယောက်ကို ဖမ်းဆီးရမိခဲ့တယ်လို့ ပန်မဖာ့မြို့နယ်ရဲတပ်ဖွဲ့မှူး ရဲမှူး ဆုမ်ဘတ် ဆိုင်ဆဝမ်က စက်တင်ဘာ ၁ ရက်နေ့က သတင်းထောက်တွေကို ပြောပါတယ်။

ဩဂုတ် ၃၀ ရက် ညနေ ၆ နာရီ ၄၀ လောက်က ပန်မဖာ့မြို့နယ် နားပူပွမ့်အုပ်စု မိုက်ဆန်းနမ်ရွာအနီး တောထဲမှာ တရားမဝင် အလုပ်သမားတွေ ထိုင်းနိုင်ငံအတွင်းပိုင်းကို ဆက်သွားဖို့ လူစုနေကြောင်း သိရတဲ့အတွက် ဒုဦးစီးမှူးလည်း အလုပ်သမားအသွင်နဲ့ လူအုပ်ထဲလိုက်နေခဲ့ကြောင်း၊ သူတို့ကို ပွဲစားက ဆုပ်ပေါင်အုပ်စု မဲ့မူရွာမှာ ကားလာစီးဖို့ ဖုန်းဆက်ပြောလာတဲ့အတွက် ၃ ကီလိုမီတာဝေးတဲ့ တောလမ်းခရီးကနေ လမ်းလျှောက်ခဲ့တယ်လို့ ဆိုပါတယ်။ တရားမဝင် အလုပ်သမားတွေကတော့ စုစုပေါင်း ၁၆ ယောက်ရှိပြီး ရှမ်းပြည်နယ် ပင်လုံမြို့ကနေ ချင်းမိုင်မှာ အလုပ်သွားလုပ်ဖို့ ဝင်လာကြတယ်လို့ ဆိုပါတယ်။

ဆုပ်ပေါင်ရွာရှေ့မှာ သူတို့ကိုစောင့်နေတဲ့ တောင်ပေါ်သားကတ် ကိုင်ဆောင်သူ ကားသမား နိုင်းထွန်းကို တွေ့ရပြီး ရဲတွေကို အကြောင်းကြားကာ လာရောက်ဖမ်းဆီးခဲ့ကြောင်း၊ နိုင်းထွန်းကို စစ်ဆေးမေးမြန်းချက်အရ သူ့တာဝန်က ဖာမွန့်ရွာထိ ခရီးတထောက်သာ ပို့ပေးဖို့ဖြစ်ပြီး အလုပ်သမား ၁ ယောက်ကို ကားခ ဘတ် ၅၀၀ စီပဲရတယ်လို့ ဖြေပါတယ်။ အလုပ်သမားတွေကတော့ နယ်စပ်ကနေ ချင်းမိုင်ထိ တယောက်ကို ဘတ် ၂၀,၀၀၀ မှ ၂၅,၀၀၀ ထိ ပေးရတယ်လို့ ပြောပါတယ်။

မြို့နယ်မှူးနဲ့ ရဲတပ်ဖွဲ့ဝင်လည်း အလုပ်သမားတွေနဲ့အတူ ဖာမွန့်ရွာထိ ကားလိုက်စီးလာခဲ့ရာ သန်းခေါင်ကျော် ဩဂုတ် ၃၁ ရက် မနက်ပိုင်းမှာ ချိန်းဆိုထားတဲ့နေရာ ရောက်ရှိလာပြီး အဆိုပါ နေရာမှာ ကား ၂ စီးက အသင့်စောင့်ဆိုင်းနေတာလို့ ဆိုပါတယ်။

ကားမောင်းသမား ၂ ယောက်မှာ ထိုင်းနိုင်ငံသားတွေဖြစ်ပြီး သူတို့ကို အဓိကဆက်သွယ် ကြိုးကိုင်နေသူမှာ နန်းထွေးဆိုသူ အမျိုးသမီးတယောက်ဖြစ်ကြောင်း သိရတဲ့အတွက် အဆိုပါအမျိုးသမီးကို ဖမ်းဆီးအရေးယူဖို့ ဆက်လက်ဆောင်ရွက်နေတယ်လို့ သတင်းမှာ ဖော်ပြပါတယ်။

ကိုးကား - siamrath.co.th

3 months Ago

August 4, 2022

ထိုင်းသို့တရားမဝင် ဝင်ရောက်လာသည့် မြန်မာအလုပ်သမား ၁၀၀ ကျော် ထပ်မံဖမ်းဆီးခံရ

ထိုင်းနိုင်ငံအတွင်း တရားမဝင် ဝင်ရောက်လာတဲ့ မြန်မာအလုပ်သမား ၁၀၀ ကျော် ထပ်မံဖမ်းဆီးခံရတယ်လို့ သိရပါတယ်။ 

မြန်မာပြည်က နိုင်ငံရေး၊ စီးပွားရေး၊ လုံခြုံရေး အကျပ်အတည်းတွေကြောင့် နိုင်ငံသားတွေဟာ နည်းအမျိုးမျိုးနဲ့ ပြည်ပကိုထွက်ပြီး လုပ်ကိုင်စားသောက်နေကြရပါတယ်။ 

အများအားဖြင့် ထိုင်းနိုင်ငံထဲဝင်ရောက်လုပ်ကိုင်ကြပြီး တရားမဝင်လမ်းကြောင်းက ဝင်ရောက်သူတွေလည်း နေ့တိုင်းလို ထိုင်းတာဝန်ရှိသူတွေရဲ့ ဖမ်းဆီးခံနေရပါတယ်။ 

ကန်ကျနပူရီခရိုင်ဘက်မှာ တရားမဝင်မြန်မာ ၄၂ ဦး မနေ့ကအဖမ်းခံရပြီး ထိုင်းအနောက်ပိုင်း ပရကျူပ်ခီရီခန်ခရိုင်ထဲမှာလည်း နောက်ထပ်မြန်မာ ၁၁၀ ဦး ဖမ်းဆီးခံရတယ်လို့ ထိုင်းစစ်တပ်  Royal Thai Army သတင်းအရ သိရပါတယ်။ 

ဖမ်းဆီးခံရသူ ၁၁၀ ထဲမှာ အမျိုးသား ၇၄ ဦး၊ အမျိုးသမီး ၃၆ ဦးပါဝင်ပြီး ဩဂုတ် ၂ ရက် မွန်းလွဲပိုင်းမှ ဩဂုတ် ၃ ရက် မွန်းလွဲပိုင်းထိ ၁ ရက်အတွင်း ကရကျူပ်ခီရီခန်မြို့နယ် အောဝ်နွဲ့၊ ကော်လတ် ၊ ဟွေ့ဆိုင်း နဲ့ ခလောင်းဝါးလ် စတဲ့ ကျေးရွာအုပ်စု ၄ နေရာကနေ ဖမ်းဆီးရမိခဲ့တာလို့ နယ်ခြားစောင့်တပ်တာဝန်ရှိသူက ပြောပါတယ်။ 

မြန်မာအလုပ်သမား ၁၁၀ အား လမ်းပြခေါ်ဆောင်လာသူ ၃ ဦးနဲ့ တင်ဆောင်လာတဲ့  ကား ၄ စီးကိုလည်း ဖမ်းထားတယ်လို့ ဆိုပါတယ်။ 

စစ်ဆေးမေးမြန်းချက်အရ သူတို့ဟာ မြန်မာပြည် ပဲခူး၊ ထားဝယ်၊ ရန်ကုန်၊ မကွေး၊ ဧရာဝတီနဲ့ မော်လမြိုင် စတဲ့ဒေသတွေကဖြစ်ပြီး ထိုင်းနိုင်ငံ ဘန်ကောက်၊ စမွတ်စခွန်း၊ ပထုံဌာနီ၊ ချွန်းပူးရီးနဲ့ လယောင်းမှာ အလုပ်သွားလုပ်ဖို့ ပွဲစားကို ၁ ဦး ဘတ် ၂၀,၀၀၀ မှ ၃၅,၀၀၀ ထိပေးခဲ့ရတယ်လို့ ဆိုပါတယ်။ 

ကျန်းမာရေးဌာနက အဖျားတိုင်းရာမှာ အားလုံးပုံမှန်အခြေအနေရှိပြီး လဝကဥပဒေနဲ့ အရေးယူဖို့ သက်ဆိုင်ရာနယ်မြေရဲစခန်းကို ပို့လိုက်တယ်လို့ နယ်ခြားစောင့်တပ်ဖွဲ့က ပြောပါတယ်။

4 months Ago
More News
Up