တရားစွဲ

September 11, 2022

အလုပ်ထုတ်ခံရသည့် မြန်မာလုပ်သား ၂၀၀ ကျော်က ထိုင်းစက်ရုံပိုင်ရှင်ကို တရားစွဲ

ထိုင်းနိုင်င် နခွန်ပထုန်ခရိုင်၊ အုန်းရိုင်ကုန်တိုက် (Big C) အနီးက Sukboontip.Co., Ltd အထည်ချုပ်စက်ရုံမှာ အလုပ်လုပ်ကိုင်နေတဲ့ မြန်မာလုပ်သား ၂၀၀ ကျော်ကို အလုပ် ထုတ်ပယ်လိုက်ပြီး  ရသင့်ရထိုက်တဲ့ နစ်နာကြေး မပေးတာကြောင့် စက်ရုံပိုင်ရှင်ကို တရားစွဲ ထားတယ်လို့  အလုပ်သမားတွေကို ကူညီဆောင်ရွက်ပေးနေတဲ့ ကိုရဲမင်း (AAC) က ပြောပါတယ်။

အဲဒီ အထည်ချုပ်အလုပ်ရုံမှာ  လုပ်ကိုင်နေတဲ့ မြန်မာလုပ်သား ၂၀၃ ယောက်ကို စက်တင်ဘာ ၅ ရက်က လစာထုတ်ပေးပြီး အလုပ်ထုတ်လိုက်တာဖြစ်ပြီး သူတို့ဟာ အလုပ်လုပ်ခွင့် အထောက်အထား အပြည့်အစုံကိုင်ဆောင်ထားသူတွေဖြစ်သလို လုပ်သက်မပြည့်သေးတဲ့ အလုပ်သမား အနည်းငယ်ပဲ ပါဝင်တယ်လို့ သိရပါတယ်။

စက်ရုံအလုပ်သမားတွေကို ကူညီပေးနေတဲ့ ကိုရဲမင်းက "ဒီအလုပ်သမားတွေက ထိုင်းအစိုးရက လုပ်ပေးတဲ့ အလုပ်လုပ်ကိုင်ခွင့် လက်မှတ် ပန်းရောင်ကပ် ကိုင်ဆောင်ထားပြီး ပုံမှန် အလုပ်ဆင်းနေတဲ့ လူတွေပါ။ စက်ရုံက ပန်းရောင်ကပ် လုပ်ပေးတဲ့နေရာမှာလည်း ဈေးအကြီးကြီး ပေးပြီး လုပ်ထားရတာပါ။ လက်ရှိ စစ်ကောင်စီက အေဂျင်စီတွေနဲ့ ပို့မယ့် MOU  အလုပ်သမား အသစ်တွေ ထပ်ရောက်လာမှာ ဖြစ်တဲ့အတွက် ဒီအလုပ်သမားတွေကို အလုပ်ဖြုတ်တာဖြစ်တယ်။ အလုပ်ပြုတ်သွားသူ တဦးကို နစ်နာကြေး ဘတ် ၁ သောင်းကျော်ပေးရမှာကို ဘတ် နှစ်ထောင်ပဲ ပေးလို့ အလုပ်သမားတွေက ကျေနပ်မှုမရှိတာကြောင့် တရားစွဲတာ"  လို့  ပြောပါတယ်။

အလုပ်ဖြုတ်ခံရတဲ့ အလုပ်သမားတွေဟာ တခြားအလုပ်ကိုပြောင်းရွှေ့ဖို့အတွက် စာရွက်စာတန်း တွေ ကိစ္စတွေကို စက်ရုံက ၂ လအတွင်းပေးမယ်လို့ ပြောထားတာပေမယ့် ကိုရဲမင်း ဦးဆောင်တဲ့ (AAC မဟာမိတ်) နဲ့ ထိုင်းအာဏာပိုင်တွေ ချိတ်ဆက်ကူပေးတဲ့အခါမှာ တပတ်အတွင်းကို စာရွက်စာတန်းတွေ အဆင်ပြေအောင်လုပ်ပေးမယ်လို့ ဆိုပါတယ်။

ဆက်လက်ပြီး အဆိုပါအလုပ်သမားတွေအတွက် အလုပ်ပြောင်းရွှေ့တဲ့နေရာမှာ လိုအပ်တဲ့ စာရွက်စာတန်းတွေ တပတ်အတွင်း ရရှိရေး တယောက်ကို နစ်နာကြေး ဘတ် ၁ သောင်း ရရှိရေးအတွက် တရားစွဲဆိုထားတဲ့ ကိစ္စတွေကို ကူညီဆောင်ရွက်ပေးသွားဖို့ ရှိတယ်လို့ ကိုရဲမင်း က ပြောပါတယ်။

စစ်တပ်က အာဏာသိမ်းပြီးနောက်ပိုင်း ထိုင်းနိုင်ငံအတွင်း တရားမဝင်လမ်းကနေ ဝင်ရောက်လာတဲ့ အလုပ်သမား အများအပြား ရှိနေပြီး ထိုင်းနိုင်ငံအတွင်းမှာ အခက်အခဲပေါင်းစုံနဲ့ ရင်ဆိုင်နေရတာ ကြောင့် တရားမဝင်လမ်းကနေ မဝင်ကြဖို့ ကိုရဲမင်းက အကြံပြုထားပါတယ်။

ထိုင်းနိုင်ငံအတွင်း မေလကစပြီး  အလုပ်သားလိုအပ်ချက် ဖြည့်တင်းနိုင်ဖို့ နှစ်နိုင်ငံသဘောတူ စာချုပ် MOU စနစ် နဲ့ မြန်မာလုပ်သားမားတွေကို စတင်ခေါ်ယူနေတာဖြစ်ပါတယ်။

3 weeks Ago

September 9, 2022

မြန်မာစစ်ကောင်စီကို တရားစွဲရန် အင်ဒိုနီးရှား လူ့အခွင့်အရေးလှုပ်ရှားသူများ ကြိုးပမ်း

မြန်မာပြည်တွင်း လူ့အခွင့်အရေးချိုးဖောက်မှုတွေအတွက် အာဏာသိမ်းစစ်ကောင်စီကို တရားစွဲဆို အပြစ်ဒဏ်ချမှတ်ခွင့်ရရေး အင်ဒိုနီးရှားလူ့အခွင့်အရေးလှုပ်ရှားသူတွေက ဖွဲ့စည်းပုံအခြေခံဥပဒေ ဆိုင်ရာတရားရုံးကို လျှောက်ထားတောင်းဆိုခဲ့ကြပါတယ်။

လူထုတစ်ရပ်လုံးအပေါ်ပြစ်မှုကျူးလွန်ခဲ့တာ၊ မြန်မာနိုင်ငံရှိ မွတ်စလင် ဘာသာဝင်တွေအပေါ် လူမျိုးတုန်းသတ်ဖြတ်ခဲ့တာနဲ့ စစ်ရာဇဝတ်မှုကျူးလွန်ခဲ့တာတွေအတွက် မြန်မာစစ်ကောင်စီကို တရားစွဲဆိုရမှာဖြစ်တယ်လို့  အဲဒီလျှောက်ထားချက်ထဲမှာတင်ပြထားပါတယ်။

အင်ဒိုနီးရှားနိုင်ငံရဲ့ အခြေခံဥပဒေမှာ လူ့အခွင့်အရေးချိုးဖောက်မှုတွေနဲ့ ပတ်သက်ရင် နေရာဒေသခွဲခြားသတ်မှတ်ထားခြင်းမရှိဘူးလို့ ဆိုပါတယ်။

ဒါပေမဲ့ ၂၀၀၀ ပြည့်နှစ်မှာ အတည်ပြုပြဋ္ဌာန်းခဲ့တဲ့  ဥပဒေ အခန်း  ၂၆ ၊  အပိုဒ် ၅ မှာတော့ လူ့အခွင့်အရေးချိုးဖောက်မှုအတွက် ခုံရုံးတင် တရားစွဲဆိုနိုင်ဖို့ ပြစ်မှုကျူးလွန်ကြောင်းစွပ်စွဲခံရသူဟာ အင်ဒိုနီးရှားနိုင်ငံသား ဖြစ်ရမယ်လို့ ပါရှိပါတယ်။

အဲဒါကြောင့် ဒီလျှောက်ထားချက်မှာတော့ အဲဒီစာပိုဒ်ကို ပြင်ဆင်ပြီး မြန်မာနိုင်ငံသားတွေကိုပါ အကာအကွယ်ပေးနိုင်ဖို့ ကြိုးပမ်းနေကြတာဖြစ်ပါတယ်။

“ဘယ်သူမဆို တရားဥပဒေရဲ့ အကျိုးကို တန်းတူခံစားရမယ်ဆိုတာ၊ အင်ဒိုနီးရှားရဲ့ အခြေခံဥပဒေမှာ ရှင်းရှင်းလင်းလင်းဖော်ပြထားပါတယ်”လို့  ဒီလျှောက်ထားချက်ကို ဦးဆောင်တင်သွင်းခဲ့သူ အင်ဒိုနီးရှားနိုင်ငံရဲ့ ရှေ့နေချုပ်ဟောင်း မာဇူကီဒါရုစ်မန်က ပြောပါတယ်။

ဥပဒေပါ အဲဒီစာပိုဒ်ကို ပြင်ဆင်လိုက်မယ်ဆိုရင် မြန်မာနိုင်ငံသားတွေကို အကာအကွယ်ပေးနိုင်တဲ့အထိ အဲဒီဥပဒေရဲ့ နယ်နိမိတ်ကိုချဲ့ထွင်နိုင်ပြီး မြန်မာစစ်ကောင်စီကို တရားရုံးတင်နိုင်လိမ့်မယ်လို့ ဒါရုစ်မန် က ယုံကြည်ထားပါတယ်။

စက်တင်ဘာ ၇ ရက်ကတင်သွင်းခဲ့တဲ့ အဆိုပါလျှောက်ထားချက်ဟာ အင်ဒိုနီးရှားကနေ နိုင်ငံနယ်နိမတ်ကျော်လွန်ကာ မြန်မာစစ်ကောင်စီကို ပထမဆုံး တရားစွဲဆို ခုံရုံးတင်နိုင်မယ့်အမှုရဲ့ ပဏာမအစလည်း ဖြစ်လာနိုင်တယ်လို့ ဆိုပါတယ်။

မြန်မာနိုင်ငံမှာရှိတဲ့ တရားစီရင်ရေးစနစ်ဟာလည်း စစ်ကောင်စီရဲ့ နိုင်ငံရေးလက်နက်ဖြစ်နေပြီလို့ လျှောက်ထားတောင်းဆိုသူတွေက ယုံကြည်နားလည်နေကြတယ်လို့ တရားဥပဒေရေးရာတွေကို ရေးသားဖော်ပြနေတဲ့  Jurist  သတင်းဝက်ဘ်ဆိုက်မှာဖော်ပြပါတယ်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့ စစ်တပ်အာဏာသိမ်းပြီးနောက် စစ်ကောင်စီရဲ့ အကြမ်းဖက် လုပ်ရပ်တွေကြောင့်  ကျဆုံးခဲ့ရသူတဲ့ပြည်သူ  ၂၂၇၂  ဦး ရှိခဲ့ပြီး ဖမ်းဆီးချုပ်နှောင်ခံရသူပေါင်း ၁၂၃၄၀ ဦးရှိခဲ့ကာ ဒီအထဲက ၁၄၄၈ ဦး ထောင်ဒဏ်ချမှတ်ခြင်းခံထားရတယ်လို့ AAPP သတင်းအရ သိရပါတယ်။ ဒါ့အပြင် ပြည်သူ ၁ ဒသမ ၂ သန်းလောက်ဟာလည်း အိုးအိမ်စွန့်ခွာ စစ်ဘေးရှောင်ထွက်ပြေးနေကြရပါတယ်။

3 weeks Ago
More News
Up