တရားခံပြေး

March 20, 2021

ဖြူးတွင် ဆန္ဒပြအမျိုးသမီး ၁ ဦးအား တရားခံပြေးအဖြစ်ကြေညာပြီး ပုဒ်မ၅၀၅-က ဖြင့် အမှုဖွင့်

DVB

ဖြူးမြို့နယ်မှာ အာဏာသိမ်းစစ်ကောင်စီအား ဆန့်ကျင်ဆန္ဒပြတဲ့ အမျိုးသမီး ၁ ဦးအား အကြမ်းဖက်ရဲတပ်ဖွဲ့က တရားခံပြေးအဖြစ်ကြေညာပြီး ပုဒ်မ၅၀၅-ကနဲ့ အမှုဖွင့်ကာ ဓာတ်ပုံကို ဓာတ်တိုင်တွေမှာ လိုက်ကပ်ထားတယ်လို့ သိရပါတယ်။

ဖြူးမြို့မရဲတပ်ဖွဲ့စခန်းက ပုဒ်မ၅၀၅-ကနဲ့ အဲဒီဆန္ဒပြ အမျိုးသမီးအား  အမှုဖွင့်ကာ လိုက်လံဖမ်းဆီးနေတာကြောင့် တိမ်းရှောင်နေပြီး တရားပြန်လည်စွဲဆိုသွးမယ်လို့ ကာယကံရှင်က ပြောပါတယ်။

တရားစွဲခံရတဲ့ အမျိုးသမီးက “ဖြူးမြို့နယ် နေရာအနှံ့မှာ ကျမကို တိမ်းရှောင်နေသည့် တရားခံပြေးဟု ဓာတ်တိုင်များတွင် လိုက်ကပ်ထားပါသည်။ စစ်ကောင်စီမှ ကြေညာချက်သည် လုံးဝတရားမဝင်ကြောင်း၊ ဖြူးမြို့မှ ပြည်သူများ သိစေရန် ဖြေရှင်းခြင်းဖြစ်သည်။ ကျမတင်မဟုတ်ဘဲ ကျန်သူများအားလုံးလည်း စစ်ကောင်စီမှ တရားစွဲလျှင် လုံးဝတရားမဝင်ပါ။ စစ်ကောင်စီသည် အကြမ်းဖက်အဖွဲ့အစည်းဖြစ်ကြောင်း ကမ္ဘာသိကြေညာထားပြီး နိုင်ငံတကာကလည်း လက်ခံထားပြီး ဖြစ်ပါသည်။ ကျမနှင့်တကွ ဆန္ဒပြပြည်သူများအား စစ်ကောင်စီမှ တစုံတရာ ပြုလုပ်ခဲ့လျှင် ကျမတို့ပြည်သူများ ငြိမ်မခံကြရန် တိုက်တွန်းအပ်ပါသည်။” လို့ လူမှုကွန်ရက်ကတဆင့် ရေးသားထားပါတယ်။

ပြီးခဲ့တဲ့ ရက်ပိုင်းကလည်း အဲဒီအမျိုးသမီးရဲ့ ညီမပိုင်ဆိုင်တဲ့ စားသောက်ဆိုင်မှာ စစ်ကောင်စီရဲ့ လက်ကိုင်တုတ်တွေက လာရောက်မြန်းတာတွေ ပြုလုပ်ခဲ့ကြတယ်လို့ ဆိုပါတယ်။

ဖြူးမြို့နယ် NLD ရုံးရှေ့ကိုလည်း အကြမ်းဖက် ရဲနဲ့စစ်သားတွေ  ရောက်ရှိပြီး အင်အားပြတာတွေ ပြုလုပ်နေကြတယ်လို့ ရုံးအနီးမှာနေထိုင်သူတွေက ပြောပါတယ်။

3 months Ago

June 23, 2020

တရားခံပြေး ဦးဝီရသူနှင့် ဘူးလက်လှဆွေတို့ကို ဝရမ်းမပါဘဲ ဖမ်းဆီးနိုင်

တရားခံပြေးအဖြစ် ကြေညာခံထားရတဲ့  ဦးဝီရသူနဲ့ ဘူးလက်လှဆွေတို့ကို ဘယ်နေရာမှာမဆို ဝရမ်းမပါဘဲ ဖမ်းဆီးနိုင်ဖို့ ရဲစခန်းမှတ်ပုံတင် ၃၃ အရ ညွှန်ကြားထားတယ်လို့ ရဲဗိုလ်ချုပ်မျိုးဆွေဝင်းက ပြောပါတယ်။ ဇူလိုင် ၂၂ ရက်က နေပြည်တော်ရှိ ပြန်ကြားရေးဝန်ကြီးဌာနမှာ ကျင်းပတဲ့ အစိုးရလေးနှစ်တာကာလ ဆောင်ရွက်ချက်တွေနဲ့ပတ်သက်တဲ့ သတင်းစာရှင်းလင်းပွဲမှာ ပြောကြားသွားတာပါ။ ဒီအမှုဟာ ရဲအရေးပိုင်တဲ့အမှု မဟုတ်ပေမဲ့ ရာဇဝတ်ကျင့်ထုံးဥပဒေပုဒ်မ ၅၄ တတိယအပိုဒ်အရ ဘယ်ရဲတပ်ဖွဲ့မဆို ဝရမ်းမပါဘဲ ဖမ်းဆီးနိုင်တယ်လို့ ဆိုပါတယ်။ ရုရှားလူမှုကွန်ရက်စာမျက်နှာ VK  မှာ သူတို့နဲ့ပတ်သက်ပြီး တက်လာတဲ့ သတင်းအချက်အလက်တွေကို စစ်ဆေးလိုက်တဲ့အခါမှာ အတုအယောင်တွေသာ ဖြစ်တယ်လို့ ဆိုပါတယ်။ သူတို့နဲ့ပတ်သက်တဲ့သတင်းတွေကို သက်ဆိုင်ရာရဲတပ်ဖွဲ့ကို တိတိကျကျ ပေးလာတဲ့အခါမှာ ဖမ်းဆီးဆောင်ရွက်ပြီး သက်ဆိုင်ရာတရားရုံးကို ပို့ပေးဆောင်ရွက်နိုင်မှာဖြစ်တယ်လို့ ရဲမှူးကြီး ကျော်လင်းကလည်း ပြောပါတယ်။ ရန်ကုန်နဲ့မြိတ်မြို့မှာ ကျင်းပခဲ့တဲ့ ပုဒ်မ ၅၉(စ) မပြင်ဆင်ရေး ဟောပြောပွဲတွေမှာ ဦးဝီရသူရဲ့ ဟောပြောချက်တွေဟာ နိုင်ငံတော်အကြီးအကဲတွေရဲ့ ဂုဏ်သိက္ခာကို ထိခိုက်စေတယ်ဆိုပြီး ဦးဝီရသူကို ပုဒ်မ ၁၂၄ (က) နိုင်ငံတော် အကြည်ညိုပျက်စေမှုနဲ့ ရန်ကုန်တိုင်း အနောက်ပိုင်းခရိုင်၊ ဒုခရိုင် အုပ်ချုပ်ရေးမှူး ဦးစန်းမင်းက တရားလို ပြုလုပ် တရားစွဲထားတာ ဖြစ်ပါတယ်။ ဦးဝီရသူက အဖမ်းမခံဘဲ  ထွက်ပြေးတိမ်းရှောင်နေတဲ့အတွက် အမှုကို မျက်ကွယ်မှာ စစ်ဆေးနေသလို  ပြီးခဲ့တဲ့ သြဂုတ် ၉ ရက်မှာ သူပိုင်ဆိုင်တဲ့ပစ္စည်းတွေကို ချိပ်ပိတ်ဝရမ်းကပ်ဖို့ ရန်ကုန်အနောက်ပိုင်းခရိုင်တရားရုံးက အမိန့်ချမှတ်ထားတာပါ။ ဦးဝီရသူနဲ့  ဦးလှဆွေတို့ကို  အမှုဖွင့်တိုင်ကြားထားပေမဲ့ ခုချိန်အထိ ဖမ်းဆီးရမိခြင်း မရှိသေးတဲ့ အပေါ်  သတင်းမီဒီယာတွေက မေးခွန်းထုတ်နေကြတာဖြစ်ပါတယ်။
12 months Ago
More News
Up