တရားခံ

August 27, 2021

တရားခံသေဆုံးသည့်ကိစ္စ သူတစ်ဦးတည်း၏ တာဝန်သာဖြစ်ကြောင်း ထိုင်းရဲမှူးကြီး ဝန်ခံ

ထိုင်းနိုင်ငံ၊ နခွမ်းဆဝမ်ရဲစခန်းမှာ မူးယစ်တရားခံတစ်ဦးကို သေဆုံးတဲ့အထိ ငွေညှစ်နှိပ်စက်ခဲ့လို့  ဖမ်းဝရမ်းထုတ်ထားတဲ့ ရဲမှူးကြီး ထိတီဆန် အူဖတ်နတ်ဖွန်း ခေါ် စခန်းမှူး ကျို့ဟာ ချွန်းပူးရီးခရိုင် ဆဲန်ဆုချ်နယ်မြေရဲစခန်းမှာ ကိုယ်တိုင်လာရောက်အဖမ်းခံခဲ့တယ်လို့ တာဝန်ရှိရဲမှူးချုပ်က ပြောပါတယ်။ 

ရဲမှူးကြီး ထိတီဆန်ဟာ မြန်မာနိုင်ငံ မြဝတီဘက်ကို တိမ်းရှောင်သွားတယ်လို့ သတင်းတွေ ထွက်ပေါ်ခဲ့ပေမယ့် မနေ့ညက ဘန်ကောက် ထိုင်းရဲဌာနချုပ်မှာလုပ်တဲ့ သတင်းစာရှင်းပွဲမှာတော့ ထွက်ပြေးပုန်းရှောင်ခဲ့တဲ့နေရာကို ရဲမှူးချုပ်က မဖော်ပြခဲ့ပါဘူး။

အမှတ် ၆ တိုင်းဒေသ ရဲတပ်ဖွဲ့ ရဲမှူးချုပ် ဧကရာဇ် လင့်ဆန်ကတ်က “မနေ့ည ၁၁ နာရီလောက်မှာ ဖုန်းတစ်ခုဝင်လာတယ်၊ ဘယ်နံပါတ်ပဲဖြစ်ဖြစ် ကျနော်ကိုင်လေ့ရှိပါတယ်။ အဲဒီမှာ သူက ကျနော်ကျို့ပါ၊ ဒီကယက်ဒဏ်ကို ကျနော်မခံနိုင်တော့ဘူး၊ ကိုယ့်ကိုယ်ကိုယ် သတ်သေချင်တယ်။ အဲတော့ ကျနော်က အဲလိုလုပ်ရင် ရဲတပ်ဖွဲ့ကဘာကျန်မှာလဲ၊ ယောကျ်ားပီပီ ဖြစ်ရပ်မှန်ကို ပြည်သူတွေကိုရှင်းပြပါ၊  ပြဿနာဟာ ရှောင်ပြေးရုံနဲ့ မပြီးဘူး၊  သိက္ခာရှိစွာ တာဝန်ယူ ပါလို့ပြောတော့ သူက ဒါဆိုကျနော့ကို မနက်ဖန်ချွန်းပူးရီးမှာ လာကြိုပါတဲ့။ ဒါနဲ့ ကျနော်လည်း အထက်ကတာဝန်ရှိသူတွေကို အကြောင်းကြားပြီး ချွန်းပူးရီးကိုသွားပါတယ်၊ သူက ဆဲန်ဆုခ်နယ်မြေရဲ စခန်းရှေ့မှာချိန်းတယ်၊ ကျနော်တယောက်တည်းလာဖို့ လက်နက်မပါဖို့ တောင်းဆိုတယ်။ ကျနော်လည်း ညနေ ၄ နာရီ ရဲစခန်းရှေ့သွားစောင့်တယ်၊ ၁၅ မိနစ်လောက်နေတော့ အဖြူရောင်ကားတစ်စီးလာရပ်ပြီး ကားပေါ်မှာ မာ့က်စ်တပ်ထားတဲ့ လူတယောက်ဆင်းလာတယ်၊ ကားကချက်ချင်းပြန်ထွက်သွားတယ်၊ အဲဒီလူက ကျနော့်နားလာပြီး ကျနော် ကျို့ပါလို့ ပြောခဲ့တယ်၊ ဒါနဲ့ ကျနော်တို့ ဆဲန်ဆုခ်ရဲစခန်းထဲ ဝင်ပြီး တာဝန်ရှိသူတွေကို သတင်းပို့လိုက်တယ်” လို့ ပြောပါတယ်။

ထိုင်းအမျိုးသားရဲတပ်ဖွဲ့ ရဲချုပ်ကြီး ဆူဝပ် ကျဲန့်ယွတ်ဆုခ်ကလည်း ထိုင်းရဲတပ်ဖွဲ့အနေနဲ့ အပြစ်ရှိသူ ဘယ်သူ့ကိုမဆို အကာအကွယ်ပေးမှာမဟုတ်ဘဲ တရားခွင်ရောက်အောင်ပို့မှာဖြစ်ကြောင်း ပြောကြားခဲ့ပြီး သတင်းမီဒီယာတွေကိုလည်း စခန်းမှူး ကျို့နဲ့ ဖုန်းကတဆင့် မေးမြန်းခွင့်ပြုခဲ့ပါတယ်။

“ရဲတပ်ဖွဲ့ဆိုတာ ပြည်သူတွေရဲ့ ယုံကြည်မှုနဲ့ ရပ်တည်နေရတာဖြစ်တယ်၊ ပြီးခဲ့တဲ့အမှုတွေမှာလည်း  တရားခံအားလုံး နီးပါးဖမ်းမိပြီး အရေးယူခဲ့တယ်။ ဘယ်လိုရာထူး/အဆင့်အတန်းပဲဖြစ်ဖြစ်  အပြစ်ရှိရင် ခံရမှာပဲ၊ ရဲတပ်ဖွဲ့ပေါ် ယုံကြည်စိတ်ချဖို့ ပြောချင်တယ်။” 

စခန်းမှူး ကျို့က  ဒီကိစ္စဟာ မရည်ရွယ်ပဲ ဖြစ်သွားရကြောင်း၊ တရားခံထံမှာ အိုက်စ်ဆေး အလေးချိန် ၁ ကီလိုနဲ့ စိတ်ကြွဆေး ၂ သောင်းနီးပါးရှိကြောင်း သိထားပြီး သူ့ဖုန်းထဲမှာလည်း ဓာတ်ပုံတွေ့ကြောင်း၊ များပြားလှတဲ့ မူးယစ်ဆေးတွေထားတဲ့နေရာ သိရဖို့ စစ်ကြောရင်း ဖြစ်သွားရ တာဖြစ်ပြီး ဒီကိစ္စမှာ သူသာလျှင်အဓိက၊ ကျန်သူတွေက သူခိုင်းတဲ့အတိုင်းလုပ်ရတာဖြစ်လို့ ဘယ်သူမှမဆိုင်ဘဲ သူတယောက်တည်းတာဝန်ယူမယ်၊ ထောင်ဒဏ်တသက်ကျပါစေ သူတယောက်ပဲ ခံယူမယ်လို့ သတင်းမီဒီယာတွေကို ပြောခဲ့ပါတယ်။

ငွေ ၂ သန်းကိစ္စကတော့ လုံးဝမတောင်းရကြောင်း၊ သူတာဝန်ထမ်းဆောင်ခဲ့တဲ့ကာလ တရားခံဆီက ငွေတောင်းတာတကြိမ်မှ မရှိခဲ့ဖူးကြောင်း၊ သေဆုံးသူရဲ့ ဖခင်ကိုတော့ အသုဘစရိတ် ဘတ် ၃ သောင်းထောက်ပံ့ခဲ့ပြီး  ရှေ့နေဆီက ဗွီဒီယိုကလစ် မဖော်ပြဖို့ ဘတ် ၂၀ သန်းနဲ့ ညှိခဲ့တဲ့ ကိစ္စတော့  မဟုတ်မှန်ဘူးလို့ ပြောပါတယ်။ 

ဘာကြောင့် အိတ်မည်းနဲ့ စွပ်ရသလဲ၊ ဘယ်လိုသေဆုံးလဲလို့ မေးမြန်းရာမှာ တရားခံအနေနဲ့ စစ်ကြောသူတွေရဲ့ မျက်နှာကိုမတွေ့စေလိုကြောင်း၊ သူက လဲကျသွားစဉ် သတိရလာဖို့ အဝတ်ကို ရေဆွတ်ပြီးသုတ်တာ၊ မျက်နှာကိုရေလောင်းတာ၊ ရှေးဦးသူနာပြုစုတာတွေလုပ်ခဲ့ပြီး မသေဆုံးခင် ဆေးရုံကို ပို့ခဲ့တာလို့ ဖြေပါတယ်။

ဘာကြောင့် စီစီကင်မရာဖျက်ခိုင်းလဲလို့မေးတော့ မမျှော်လင့်တဲ့ဖြစ်ရပ်ကြုံရလို့ သူလည်းလန့်ဖြတ်ပြီး ပြောမိပြောရာဖြစ်ကာ စခန်းက စီစီကင်မရာတွေလည်း နဂိုက ပျက်နေတာတွေလည်းရှိလို့ အကုန်ဖြုတ်ထားဖို့ပြောတာလို့ စခန်းမှူး ကျို့က ဖြေဆိုခဲ့ပြီး သေဆုံးသူရဲ့ မိဘဆွေ မျိုးများအားလုံးကိုလည်း တောင်းပန်ကြောင်း ပြောသွားပါတယ်။ 

ဒီအမှုကို တာဝန်ယူစုံစမ်းရတဲ့ အဖွဲ့ခေါင်းဆောင် ဒုရဲချုပ်ကြီး ဆူချတ် ထီရဆဒီကတော့ သတင်းထောက်တွေ ဒိထက်ပိုမေးရင် အမှုတွဲကို ထိခိုက်စေနိုင်ကြောင်း၊ ရဲတပ်ဖွဲ့အနေနဲ့ အမှန်တရားအတိုင်း တရားမျှတစွာ ဆောင်ရွက်သွားမယ်လို့ ပြောကြားခဲ့ပါတယ်။

1 year Ago

December 16, 2020

တွစ်တာကနေ ဆက်သွယ်ပြီး လူ ၉ ဦး သတ်ခဲ့သည့် တရားခံကို တိုကျိုတရားရုံးက သေဒဏ်ပေး

၂၀၁၇ ခုနှစ်တုန်းက ဂျပန်နိုင်ငံမှာ တွစ်တာကတဆင့် ဆက်သွယ်ပြီး လူ ၉ ယောက်ကို သတ်ဖြတ်ခဲ့တဲ့ တရားခံကို တိုကျိုတရားရုံးက ဒီဇင်ဘာ ၁၅ ရက်မှာ သေဒဏ်ချမှတ်လိုက်ပါတယ်။  လူသတ်မှု၊  လူသေအလောင်း ၉ ခုကို အပိုင်းပိုင်းခုတ်ပြီး တိုကျိုဆင်ခြေဖုံးက သူ့ရဲ့ တိုက်ခန်းထဲမှာ ဝှက်ထားမှုတို့အတွက် အသက် ၃၀ အရွယ် တာကာရှီရိုရှီရာအီရှီဟာ  အပြစ်ရှိတယ်လို့  အစီရင်ခံစာက ဆိုပါတယ်။ ကိုယ့်ကိုယ်ကိုယ် သေကြောင်းကြံလိုတယ်လို့ ပြောကြားခဲ့သူတွေကို ရှီရာအီရှီက တွစ်တာကနေ ဆက်သွယ်ပြီး သူတို့ကို ကူညီပေးမယ်လို့ ပြောဆိုခဲ့တယ်လို့ ဂျီဂျီ သတင်းအေဂျင်စီက ပြောပါတယ်။ ဒါကြောင့် ရှီရာအီရှီကို ‘Twitter killer’ ဆိုပြီးလည်း လူသိများပါတယ်။ သူ့ရဲ့ ရှေ့နေကတော့ ရှီရာအီရှီဟာ သေဆုံးခဲ့သူတွေရဲ့ ခွ့င်ပြုချက်နဲ့အညီ ပြုလုပ်ခဲ့တယ်ဆိုပြီး လျှောက်လဲခဲ့တယ်လို့ ကျိုဒိုသတင်းဌာနက ဖော်ပြပါတယ်။ ဒါပေမဲ့လည်း တရားသူကြီး နာအိုခွန်နီယန်နိုက သေဆုံးသူတွေဟာ သူတို့ဆန္ဒနဲ့ အသတ်ခံရတာ မဟုတ်ဘဲ ရှီရာအီရှီဟာ စိတ်ကျန်းမာရေးကောင်းမွန်ပြီး လူသတ်မှုတွေအတွက် ပြစ်ဒဏ်ခံယူထိုက်တယ်လို့ ဆုံးဖြတ်ခဲ့တာပါ။ ဒီအမှုမှာ သေဒဏ်ပေးထိုက်တယ်လို့လည်း တိုကျိုမြို့သူမြို့သားတချို့က ရိုက်တာကို ပြောပါတယ်။  တရားခံ ရှီရာအီရှီကလည်း သေဒဏ်ချမှတ်ရင်တောင်မှ အယူခံမဝင်ဘူးဆိုပြီး ရုံးတင် မစစ်ဆေးမီက ပြောဆိုခဲ့တယ်လို့ ဂျပန်မီဒီယာတွေက ဖော်ပြပါတယ်။
2 years Ago
More News
Up