တပ်မတော်သား ၃ ဦး

December 11, 2020

ဦးဂါရွာ၌ မုဒိမ်းမှုကျူးလွန်ခဲ့သည့်  တပ်မတော်သား ၃ ဦးကို အလုပ်ကြမ်းနှင့် ထောင်ဒဏ် အနှစ် ၂၀ စီချမှတ်

ရခိုင်ပြည်နယ်၊ ရသေ့တောင်မြို့နယ်၊ ဦးဂါကျေးရွာမှာ ရခိုင်အမျိုးသမီး ၁ ဦးအား အဓမ္မပြုကျင့်ခဲ့တဲ့ တပ်မတော်သား ၃ ဦးကို ဒီကနေ့ ဒီဇင်ဘာ ၁၁ ရက်မနက်  စစ်တွေတပ်နယ် စစ်ခုံရုံးက အလုပ်ကြမ်းနဲ့ ထောင်ဒဏ် နှစ် ၂၀ စီ ချမှတ်လိုက်ပါတယ်။ ဒီနေ့မနက်မှာ အကျဉ်းစစ်တရားရုံးချုပ်က နှစ်ဘက် သက်သေတွေ၊ လေ့လာသူတွေရှေ့မှောက်မှာ ပွင့်လင်းမြင်သာစွာ စစ်ဆေးပြီးနောက် ပြစ်မှု ကျူးလွန်ခဲ့တဲ့ စစ်သည် ၃ ဦးကို အလုပ်ကြမ်းနဲ့ ထောင်ဒဏ် နှစ် ၂၀ ကျခံစေဖို့နဲ့ စစ်မှုထမ်းဆောင်ခြင်းမှ အမြဲတမ်းထုတ်ပစ်စေဖို့ အမိန့်ချမှတ်ခဲ့တယ်လို့ တပ်မတော်က   သတင်းထုတ်ပြန်ပါတယ်။ အလုပ်ကြမ်းနဲ့ ထောင်ဒဏ် အနှစ် ၂၀ ချမှတ်ခံရတဲ့ တပ်မတော်သား ၃ ဦးကတော့ အမှတ် ၂၀၆ ခြေမြန်တပ်ရင်းမှ တပ်သား အောင်မျိုးမင်း၊ တပ်သား မင်းသူရ နဲ့ တပ်သား မြင့်လွင် တို့ ဖြစ်ကြပါတယ်။ ဇွန် ၃၀ ရက်က ရသေ့တောင်မြို့နယ်မှာ လုံခြုံရေးတာဝန်ထမ်းဆောင်နေတဲ့ စစ်ကြောင်း တခုက  ဦးဂါကျေးရွာနားမှာ တပ်ချခဲ့ပြီး ဦးဂါကျေးရွာနေ အမျိုးသမီးတယောက်ကို  စစ်သည် ၃ ယောက်က အဓမ္မပြုကျင့်ခဲ့တယ်လို့ ကာယကံရှင် အမျိုးသမီးက စစ်တွေမြို့မရဲစခန်းမှာ အမှုဖွင့်တိုင်ကြားခဲ့တဲ့ အမှုဖြစ်ပါတယ်။ ဒီဖြစ်စဉ်နဲ့ပတ်သက်ပြီး တပ်မတော်သတင်းမှန် ပြန်ကြားရေးအဖွဲ့က သတင်းဟာ မှန်ကန်မှု မရှိကြောင်းနဲ့ ပြည်သူလူထု အထင်လွဲမှားစေဖို့ လုပ်ကြံဖန်တီးပြီး မမှန်သတင်း ဖော်ပြတာသာ ဖြစ်ကြောင်း ဇူလိုင် ၂ ရက်မှာ ကနဦး သတင်းထုတ်ပြန်ခဲ့ဖူးပါတယ်။ အဲဒီနောက်မှာမှ ပထမအကြိမ် စစ်မေးရာမှာ  ပြစ်မှုကျူးလွန်သူ ၃ ယောက်က ပြစ်မှုကျူးလွန်ခဲ့တာ မရှိကြောင်း လိမ်လည်ထွက်ဆိုခဲ့ပြီး နှစ်ဖက်သက်သေထွက်ဆိုချက်တွေ ကွဲလွဲမှုများပြားနေလို့ စက်တင်ဘာလဆန်းမှာ ပိုမိုတိကျတဲ့ စစ်ဆေးချက်တွေနဲ့  ဒုတိယအကြိမ် ထပ်မံစစ်ဆေးမှသာ  ပြစ်မှုကျူးလွန်ကြောင်း ဝန်ခံထွက်ဆိုဖြောင့်ချက်ပေးခဲ့တာလို့ ဆိုပါတယ်။ အဓမ္မကျင့်ခဲ့တဲ့ တရားခံစစ်သား ၃ ယောက်က ပြစ်မှု ကျူးလွန်တယ်လို့ ဖြောင့်ချက်ပေး ဝန်ခံ ထွက်ဆိုပြီး ၃ လအကြာ ဒီဇင်ဘာ ၃ ရက်နေ့က စစ်တွေတပ်နယ်မှာ ပထမဆုံးအကြိမ် အကျဉ်းစစ်တရားရုံးချုပ်နဲ့ စတင်စစ်ဆေးခဲ့ပြီး ဒီကနေ့ ဒီဇင်ဘာ ၁၁ ရက်မှာ အပြီးသတ် အမိန့်ချမှတ်ခဲ့တာဖြစ်ပါတယ်။
6 months Ago

June 28, 2020

အိန္ဒိယပြန် တပ်မတော်သား ၃ ဦးတွင် ကိုဗစ်-၁၉ ရောဂါ ထပ်တွေ့  

အိန္ဒိယကနေ သင်တန်းတက်ရောက်ပြီး တပ်မတော်လေယာဉ်နဲ့ ပြန်လည်ရောက်ရှိလာတဲ့ အရာရှိ၊ စစ်သည်တွေထဲက စစ်သည် ၃ ဦးမှာ   ကိုဗစ်-၁၉ ရောဂါပိုး ထပ်မံတွေ့ရှိတယ်လို့ တပ်မတော်က ဇွန်လ ၂၈ ရက်မှာ သတင်းထုတ်ပြန်ပါတယ်။  အိန္ဒိယနိုင်ငံကနေ ဇွန်လ ၂၆ ရက်က တပ်မတော်လေယာဉ်နဲ့ ရန်ကုန်မြို့ကို ပြန်လည်ရောက်ရှိလာပြီး ရန်ကုန်တိုင်းစစ်ဌာနချုပ်နယ်မြေမှာ အသွားအလာကန့်သတ် သီးခြားစောင့်ကြည့်ထားတဲ့ အရာရှိ၊ စစ်သည် ၄၈ ဦးထဲက  ၂ ဦး ကိုဗစ်-၁၉  ရောဂါပိုးတွေ့ရှိကြောင်း မနေ့က ထုတ်ပြန်ခဲ့ပြီး အခု  လူနာသစ်  ၃ ဦး ထပ်မံတွေ့ရှိတာပါ။  အဆိုပါလေယာဉ်နဲ့ ပြန်လာသူတွေအထဲက စစ်သည် ၅ ဦး ရောဂါပိုးတွေ့ရှိထားပြီး ဒီနေ့အထိ ကိုဗစ်-၁၉ ရောဂါပိုးတွေ့ရှိတဲ့ အိန္ဒိယပြန် တပ်မတော်သား စုစုပေါင်း ၁၀ ဦး ရှိပြီဖြစ်ပါတယ်။ ရောဂါပိုးတွေ့ရှိတဲ့ စစ်သည်တွေကို တပ်မတော်အသည်းရောဂါအထူးကုဆေးရုံကြီး (မင်္ဂလာဒုံ)ကို ပို့ဆောင်ကုသပေးနေပြီး  သူတို့အားလုံးရဲ့ ကျန်းမာရေးအခြေအနေ တည်ငြိမ်ကောင်းမွန်တယ်လို့ သိရပါတယ်။ အဆိုပါ ကိုဗစ်-၁၉ လူနာသစ် ၃ ဦးထပ်တွေ့တာနဲ့ပတ်သက်ပြီး ကျန်းမာရေးနဲ့ အားကစားဝန်ကြီးဌာနကလည်း ဒီကနေ့ည ၈ နာရီမှာ သတင်းထုတ်ပြန်ပါတယ်။ အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) (NHL) မှ (ပထမအသုတ်) ဓာတ်ခွဲနမူနာ ၅၆၂ ခု၊ ဆေးသုတေသနဦးစီးဌာန (DMR)မှ ဓာတ်ခွဲနမူနာ ၂၇၃ ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မန္တလေး) (PHL, Mandalay) မှ ဓာတ်ခွဲနမူနာ ၂၈၀ ခုနဲ့ ရန်ကုန်မြို့၊ အမှတ် (၁) တပ်မတော်ဆေးရုံကြီး ခုတင် (၁၀၀၀) မှ ဓာတ်ခွဲနမူနာ ၆၇ ခု စုစုပေါင်း ၁,၁၈၂ ခုကို ဒီကနေ့ ညနေမှာ စစ်ဆေးပြီးစီးခဲ့ရာမှာ လူနာသစ် ၃ ဦးတွေ့ရှိတာပါ။ ဇွန်လ ၂၈ ရက် ည ၈ နာရီအထိ  မြန်မာနိုင်ငံမှာ ကိုဗစ်-၁၉ အတည်ပြုလူနာ စုစုပေါင်း ၂၉၉ ဦး၊ သေဆုံးသူ ၆ ဦး၊ ရောဂါပိုးကင်းစင်လာသူ  ၂၁၈ ဦးနဲ့ ဒီအထဲက   ၂၀၆ ဦးကို ဆေးရုံမှဆင်းခွင့်ပြုခဲ့ပြီးဖြစ်ပါတယ်။
12 months Ago
Up