တန့်ဆည်မြို့နယ်

November 9, 2021

တန့်ဆည်မြို့နယ်တွင် ကျောင်းတက်သူမရှိသဖြင့် စာသင်ကျောင်းများ ပြန်မဖွင့်နိုင်သေး

စစ်ကိုင်းတိုင်း၊ တန့်ဆည်မြို့နယ်အတွင်း အခြေခံပညာစာသင်ကျောင်းအားလုံး ပြန်ဖွင့်ဖို့ စစ်ကောင်စီက ညွှန်ကြားထားပေမဲ့ ကျောင်းတက်မယ့်ကျောင်းသူ ကျောင်းသားမရှိသလို ဆရာ ဆရာမလည်း မရှိလို့  ဖွင့်လှစ်နိုင်ခြင်းမရှိဘူးလို့ ဒေသခံတွေထံက  သိရပါတယ်။

တန့်ဆည်မြို့ခံတဦးက “လွန်ခဲ့တဲ့ ၃ ရက်က တန့်ဆည်မြို့ပေါ်က အထက -၂ ကျောင်းမှာ ကျောင်းသားလည်းမရှိဘူး၊ သင်မယ့်ဆရာလည်း မလာဘူး၊ ဒါကိုစစ်တပ်ကလုံခြုံရေးလာလုပ်တယ်။ ဗုံးခွဲခံရတယ်။ ပေါက်ကွဲမှုဖြစ်ပြီး ရမ်းသန်းပစ်ခတ်လို့ အပြစ်မဲ့အမျိုးသမီးတစ်ဦး သေဆုံးသွားသေးတယ်။တချို့အရာရှိ သားသမီးတွေကတော့ နေပြည်တော်လို မြို့တွေဆီ ပြောင်းရွေ့သင်ကြားဖို့ ပြင်နေကြတယ်” လို့ ပြောပါတယ်။

တန့်ဆည်မြို့ပေါ်မှာ အစစ်အဆေးတင်းကျပ်လို့ အသွားအလာ နည်းပါးနေပြီး ပေါက်ကွဲမှုတွေလည်း မကြာခဏ ဖြစ်ပွားနေကာ နိုဝင်ဘာလ ၇ ရက် ညပိုင်းကလည်း  မြို့မရဲစခန်း ပတ်ဝန်းကျင်မှာ အမည်မသိအဖွဲ့တစ်ဖွဲ့နဲ့ အပြန်အလှန်ပစ်ခတ်မှုဖြစ်ခဲ့ပါတယ်။

တန့်ဆည်မြို့နယ်မှာ စာသင်ကျောင်းပေါင်း ၁၇၂ ကျောင်းရှိပြီး ပညာရေးဝန်ထမ်းပေါင်း အယောက်  ၁၉၇၀  လောက်ရှိပါတယ်။ ဒီအထဲက   CDM မှာပါဝင်သူ ၈၀ ရာခိုင်နှုန်းရှိပြီး Non-CDM ပညာရေးဝန်ထမ်းတချို့လည်း စစ်ကောင်စီနဲ့မပတ်သက်ရဲလို့ပုန်းရှောင်နေကြတယ်လို့ သိရပါတယ်။

စစ်ကောင်စီဟာ ပြီးခဲ့တဲ့ဇူလိုင်လကလည်း  ကျောင်းတွေဖွင့်ဖို့ကြိုးပမ်းခဲ့သလို အခု နိုဝင်ဘာလ ၁ ရက်နေ့မှာလည်း   ၂၀၂၁-၂၂ ပညာသင်နှစ်အတွက် မြို့နယ်တချို့ကလွဲလို့  နိုင်ငံတဝန်း  ကျောင်းပြန်ဖွင့်ဖို့ စီစဉ်ခဲ့တာ ဖြစ်ပါတယ်။

4 weeks Ago

November 8, 2021

ဘုတလင်နှင့် တန့်ဆည်မြို့နယ်တွင် လင်မယားနှစ်တွဲ အသတ်ခံရ

စစ်ကိုင်းတိုင်း တန့်ဆည်မြို့နယ်နှင့်ဘုတလင်မြို့တွေက ဒလန်လို့ လူအများသတ်မှတ်ခံရတဲ့ လင်မယားစုံတွဲ ၂ တွဲ နိုဝင်ဘာ ၇ ရက်နဲ့ ၈ ရက်နေ့တွေမှာ အသတ်ခံခဲ့ရတယ်လို့ ဒေသခံတွေဆီက စုံစမ်းသိရပါတယ်။

နိုဝင်ဘာ ၇ ရက် ည ၇ နာရီလောက်မှာ  တန့်ဆည်မြို့နယ်က သရက်ကုန်းရွာနေ  ဒလန်လို့ သတ်မှတ်ခံရသူ ဇနီးမောင်နှံကို အမည်မသိအဖွဲ့အစည်းတခုက လာရောက်သတ်ဖြတ်သွားသလို နိုဝင်ဘာ ၈ ရက် မနက် ၉ နာရီကလည်း ဘုတလင်မြို့နယ်၊ပိုးကုန်းကျေးရွာနားမှာ မုံရွာ ပလ္လင်ကုန်းကနေ  ကြက်လာဝယ်တဲ့ လင်မယားနှစ်ဦးလည်း အသတ်ခံလိုက်ရပါတယ်။

သရက်ကုန်းရွာနေ  ကိုချစ်ပို နဲ့ မမိုးလွင်အေးတို့ လင်မယားကို လတ်တလော ဘယ်အဖွဲ့အစည်းက သတ်သွားတယ်ဆိုတာကတော့ ထုတ်ပြန်တာမရှိသေးပါဘူး။

“သူတို့က စစ်တပ်ထောက်ပို့လုပ်တယ်၊ ပစ္စည်းတွေပို့တယ်၊ စားစရာတွေပို့တယ်။ မိန်းမဖြစ်တဲ့သူက လည်း ငါတို့က ဘယ်သူ့မှမကြောက်ဘူးလို့ အော်အော်ပြောနေတတ်တယ်”လို့ ဒေသခံတစ်ဦးက ပြောပါတယ်။

ကြက်လာဝယ်ချိန် ဒီမနက်အသတ်ခံတဲ့ လင်မယားနှစ်ယောက် နေတဲ့ရွာဟာ နမခစစ်တပ်နားက ကျေးရွာ တစ်ရွာဖြစ်ပြီး သူတို့ဟာ စစ်တပ်နဲ့ အဆက်အသွယ်လုပ်တာတွေ ရှိတယ်လို့ ဒေသခံတွေရဲ့ ပြောပြချက်အရသိရပါတယ်။

ဒေသခံပိုးကုန်းကျေးရွာသား တစ်ဦးက “ဒီလင်မယားက ဘုတလင်မြို့နယ်ဘက်ကို ကြက်လာဝယ်နေတဲ့ လင်မယားဗျ။ ဒေသတွင်းမှာတော့ ဒလန်လို့ နာမည်ကြီးနေတာ။ လင်မယားနှစ်ယောက်ထဲက ယောင်္ကျားကတော့ နေရာတင်သေတယ်။ အခုအထိ အလောင်းလာ မ ကောက်ကြသေးဘူးဗျ။ မိန်းမကတော့ လွတ်သွားတယ်လို့ ကြားတယ်” လို့ ဆိုပါတယ်။

အသတ်ခံတဲ့သူတွေရဲ့ မိသားစုဝင်တွေနဲ့ ဆက်သွယ်ဖို့ ကြိုးစားခဲ့ပေမဲ့ ဖုန်းလက်ခံဖြေကြားတာမျိုး မရှိခဲ့ပါဘူး။

1 month Ago
More News
Up