တန့်ဆည်

January 4, 2023

ကလေးနှင့် တန့်ဆည်တို့တွင် စစ်ကောင်စီတပ်နှင့် ပျူစောထီးများ တိုက်ခိုက်ခံရ၊ ကနီတွင် စစ်တပ်ပိုင်စက်လှေကို မီးရှို့ဖျက်ဆီး

စစ်ကိုင်းတိုင်း၊ ကလေးမြို့နယ်၊ လက်ပံချောင်းရွာအရှေ့ဘက် ချမ်းသာကြီးရွာအနီးမှာ စစ်ကောင်စီတပ်အင်အား ၃၀ လောက်နဲ့  ပြည်သူ့ကာကွယ်ရေး ပူးပေါင်းတပ်ဖွဲ့ကြား ဇန်နဝါရီ ၃ ရက် ညနေပိုင်းက တိုက်ပွဲတွေဖြစ်ပွားခဲ့ပါတယ်။

အဆိုပါတိုက်ပွဲမှာ စစ်ကောင်စီတပ်ဘက်က RPG၊ လက်နက်ကြီး ၄၀ မမတွေနဲ့ ပစ်ခတ်ပြီး တိုက်ပွဲပတ်ဝန်းကျင်မှာရှိတဲ့ အသက် ၅၀ အရွယ် အမျိုးသမီးတဦး လည်ပင်းထိမှန်ဒဏ်ရာ ပြင်းထန်ရရှိသွားတယ်လို့ ချင်းအမျိုးသားအဖွဲ့ချုပ် (CNO) ထံက သိရပါတယ်။

အဲဒီတိုက်ပွဲမှာ စစ်ကောင်စီတပ်ဘက်က ၁၀ ယောက်လောက် သေဆုံးတယ်လို့ ခန့်မှန်းရပြီး  ဒေသကာကွယ်ရေး ပူးပေါင်းတပ်ဘက်က ထိခိုက်ကျဆုံးမှု မရှိ‌ဘူးလို့ CNO က ပြောပါတယ်။

ပြည်သူ့ကာကွယ်ရေးပူးပေါင်းတပ်ဖွဲ့က ပိတ်ပင်ထားတဲ့ ကလေး-တမူးလမ်းမနဲ့ ရာဇဂြိုဟ်-လက်ပံချောင်း လမ်းမကြီးတွေကို ဇန်ဝါရီ ၄ ရက်ကစပြီး ပြည်သူတွေ ပြန်လည်အသုံးပြုနိုင်ပြီလို့လည်း CNO က အသိပေးထားပါတယ်။

တိုက်ပွဲအပြီးမှာ စစ်ကောင်စီတပ်က ဆုတ်ခွာရင်း ခုံသာရွာ(သစ်) ရွာသားတချို့ကို လူသားဒိုင်းအဖြစ် ဖမ်းဆီးသွားတယ်လို့ ဒေသခံ ကာကွယ်ရေးတပ်တွေက ပြောပါတယ်။

အလားတူ ကလေးမြို့ ပျဉ်သာ‌ကျေးရွာကနေ ကလေးမြို့နယ်အရှေ့ပိုင်းကို ဦးတည် စစ်ကြောင်းထိုးလာတဲ့ စစ်ကောင်စီတပ်ကို ဇန်နဝါရီ ၂ ရက် မနက်ပိုင်းမှာ မိုင်းဆွဲတိုက်ခိုက်ခဲ့တယ်လို့   ကလေး PDF အဖွဲ့က ပြောပါတယ်။

အဆိုပါ စစ်ကောင်စီအင်အား ၆၀  လောက်ကို  PDF(Kalay) မိုင်းတပ်ဖွဲ့နဲ့ အောင်မေတ္တာ ပူးပေါင်းအဖွဲ့တို့က အသင့်တပ်ဆင်ထားတဲ့ မိုင်း ၄ လုံးနဲ့ ပျဉ်သာကျေးရွာအနီးမှာ မနက် ၁၁ နာရီလောက်နဲ့ မွန်းလွဲ ၁၂ နာရီလောက်က ဖောက်ခွဲတိုက်ခိုက်ခဲ့တယ်လို့ ဆိုပါတယ်။

အဲဒီ မိုင်းဖောက်ခွဲတိုက်ခိုက်မှုအတွင်း စစ်ကောင်စီတပ်ဖွဲ့ဝင် ၄ ဦး ထိခိုက်သေဆုံးနိုင်ပြီး ကျန်တပ်ဖွဲ့ဝင် အများအပြား ထိခိုက်မှုရှိကြောင်း၊ စစ်ကောင်စီတပ်ဟာ မိုင်းဖောက်ခွဲရာ အနီးပတ်ဝန်းကျင်မှာ ၁၀ မိနစ်ခန့် ပစ်ခတ်ခဲ့ကြောင်း ကလေး PDF က ပြောပါတယ်။

“သူတို့ဘက်က ၄ ဦးကျတယ်လို့ ဒေသခံတွေက အတည်ပြုပြောတာ။ ကျနော်တို့အဖွဲ့ကတော့ မိုင်းဆွဲပြီး ပြေးရတာ။ ထိခိုက်ကျဆုံးမှု အရေအတွက်ကိုတော့ အတိအကျ မသိနိုင်ဘူး။‌ ကျနော်တို့ဘက်ကတော့ ထိခိုက်ကျဆုံးမှု မရှိဘူး။”

ပျဉ်သာကျေးရွာတိုက်ပွဲနဲ့ ပတ်သက်ပြီး စစ်ကောင်စီဘက်က နယ်မြေလုံခြုံရေး ဆောင်ရွက်နေတဲ့ လုံခြုံရေးအဖွဲ့နဲ့ PDF တွေ တိုက်ပွဲဖြစ်ပွားရာ ဒေသခံ PDF တွေက ဒဏ်ရာများစွာရရှိပြီး ထွက်ပြေးသွားတယ်လို့ ထုတ်ပြန်ပါတယ်။

ပျဉ်သာကျေးရွာဟာ ကလေးမြို့ရဲ့ အရှေ့ဘက် ၃ မိုင်ခန့်ကွာဝေးပြီး စစ်ကောင်စီလက်အောက်ခံ ကျေးရွာတရွာဖြစ်သလို ပျူစောထီးအဖွဲ့တွေ များပြားတဲ့ ရွာတရွာလည်း ဖြစ်ပါတယ်။

စစ်ကိုင်းတိုင်း၊ ရေဦးခရိုင်၊ တန့်ဆည်မြို့နယ်၊ ဆင်ငယ်ကျေးရွာမှာလည်း စစ်ကောင်စီက လက်နက်တပ်ဆင်ပေးထားတဲ့ ပျူစောထီးစခန်းကို ဇန်နဝါရီ ၃ ရက် မွန်းလွဲပိုင်းက တန့်ဆည်မြို့နယ် ပြည်သူ့ကာကွယ်ရေး ပူးပေါင်းအဖွဲ့တွေက ဝင်ရောက်တိုက်ခိုက်ပြီး လက်နက်ခဲယမ်းတွေနဲ့အတူ သိမ်းပိုက်ရရှိခဲ့တယ်လို့ ဒေသတွင်း ပြည်သူ့ကာကွယ်ရေး တပ်ဖွဲ့ဆီက သိရပါတယ်။

Taze Support-TSO အဖွဲ့ တာဝန်ရှိသူက “ဆင်ငယ်ကျေးရွာမှာရှိတဲ့ စစ်(..) နဲ့ ပျူတွေအားလုံးကို ရှင်းလင်းနိုင်ခဲ့ပြီး MA-1 ၂ လက်၊ ကာဘိုင် ၂ လက်၊ ၉-ဗို့ ခါးချိုး ၄ လက်၊ လက်လုပ်ခါးချိုး ၂ လက်နဲ့ ကျည် ၂၀၀ ကျော် သိမ်းဆည်းနိုင်ခဲ့တယ်” လို့ ပြောပါတယ်။

အဆိုပါတိုက်ပွဲကို ရွှေဘိုခရိုင် တပ်ရင်း ၆၊ ၉၊ ၁၂ နဲ့ တန့်ဆည်မြို့နယ် ပ.က.ဖအဖွဲ့တို့ ပူးပေါင်းတိုက်ခိုက်ခဲ့ပြီး ပြည်သူ့ကာကွယ်ရေးတပ်ဖွဲ့ဝင် ရဲ‌ဘော် ၁ ဦး တိုက်ပွဲအတွင်း ကျဆုံးခဲ့တယ်လို့ ထုတ်ပြန်ခဲ့ပါတယ်။

စစ်ကိုင်းတိုင်း၊ ကနီမြို့နယ် ချင်းတွင်းမြစ်အတွင်းက စစ်ကောင်စီ စက်လှေတစီးကို မနေ့ ဇန်နဝါရီ ၃ ရက် ည ၈ နာရီမှာ သိမ်းဆည်းရမိတယ်လို့ ကနီမြို့နယ် ကျောက်လုံးကြီးတပ်မဟာအဖွဲ့ တာဝန်ရှိသူထံကနေ သိရပါတယ်။

အဆိုပါ စက်လှေနဲ့ ဖလပ်မော်တော် ၇ စီးဟာ ပြီးခဲ့တဲ့ ၂၀၂၂ ဒီဇင်ဘာ ၂၇ ရက်က စတင်ကာ စစ်ကောင်စီတပ် လုံခြုံရေးအပြည့်နဲ့ ချင်းတွင်းမြစ်အထက်ပိုင်းကို ဆန်တက်လာတဲ့ ရေယာဉ်တွေ ဖြစ်တယ်လို့ သိရပါတယ်။

ကျောက်လုံးကြီးတပ်မဟာ တာဝန်ရှိသူက “စစ်‌ကောင်စီရေယာဉ်တွေက မုဌောရွာအနီး ဆိပ်ကမ်းမှာ သောင်တင်နေတာ ကြာပြီဗျ။ အဲဒီနေရာကနေ ကနီမြို့ကို အင်အား ၇၀ လောက်နဲ့ သွားတာကို ကျနော်တို့ ငါးဖျတ်အနီး ဆိပ်ကမ်းကနေ ကြားဖြတ် တိုက်ခိုက်နိုင်ခဲ့တယ်။ စက်လှေတစီးရတယ်၊ ဖုန်း ၂ လုံးရတယ်၊ ဆန်အိတ် ၈၂ အိတ်၊ ပဲ ၁၀ အိတ်၊ စားဆီပုံး ၁ ပုံး၊ စစ်သုံးကျောပိုးအိတ် ၃ လုံး၊ ကျည်ကာအင်္ကျီတွေ ရခဲ့တယ်။ စက်လှေက‌တော့ မီးရှို့ထားခဲ့တယ်” လို့ ပြောပါတယ်။

အဆိုပါစက်လှေပေါ်က စစ်သားအများစုဟာ ချင်တွင်းမြစ်အတွင်း ခုန်ချထွက်ပြေးသွားသူတွေ ရှိသလို စက်လှေအတွင်း သေဆုံးသူ ၂ ဦးရဲ့ ရုပ်အလောင်းကိုလည်း တွေ့ရှိခဲ့တယ်လို့ သိရပါတယ်။

အဆိုပါတိုက်ပွဲတွေနဲ့ ပတ်သက်ပြီး စစ်ကောင်စီဘက်က ထိခိုက်သေဆုံးတာရှိပေမဲ့ ဒီဗွီဘီအနေနဲ့ သီးခြား အတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်တာ မရှိသေးပါဘူး။

4 weeks Ago

December 29, 2022

ရန်ကုန်စတော့အိတ်ချိန်းဝင် မြန်မာနိုင်ငံသားများဘဏ် (MCB)၏ ဘဏ်ခွဲ ၅ ခု ပိတ်သိမ်း

ရန်ကုန်စတော့အိတ်ချိန်း (YSX) စာရင်းဝင် ပြည်တွင်း ပုဂ္ဂလိကဘဏ်တခုဖြစ်တဲ့ မြန်မာနိုင်ငံသားများဘဏ် (MCB) ရဲ့ ဘဏ်ခွဲ ၅ ခုကို ပိတ်သိမ်းလိုက်တယ်လို့ အဆိုပါဘဏ်က  ဒီဇင်ဘာ ၂၈ ရက်နေ့စွဲနဲ့  အသိပေးကြေညာထားပါတယ်။

ဗဟိုဘဏ်ရဲ့ ခွင့်ပြုချက်နဲ့ မြန်မာနိုင်ငံသားများဘဏ်ရဲ့ မုံရွာဘဏ်ခွဲ၊ မူဆယ်ဘဏ်ခွဲ(၁)၊ မန္တလေးဘဏ်ခွဲ (၄)၊ တန့်ဆည်ဘဏ်ခွဲ၊ ဇီးကုန်းဘဏ်ခွဲစတဲ့ ဘဏ်ခွဲ ၅ ခုကို  ပိတ်သိမ်းပြီးဖြစ်ကြောင်း MCB ဘဏ်က ရင်းနှီးမြှုပ်နှံသူတွေနဲ့ ရှယ်ယာရှင်တွေကို အသိပေး ကြေညာထားတာ ဖြစ်ပါတယ်။

မြန်မာနိုင်ငံသားများဘဏ် (MCB) ရန်ကုန်ရုံးချုပ်တာဝန်ရှိသူတဦးက အခုပိတ်တာ စစ်ကိုင်းဘက်က ဘဏ် ၂ ခုဖြစ်ပြီး နိုင်ငံရေးအခြေအနေမကောင်းတာကြောင့် ပိတ်ရတာဖြစ်ကြောင်း ဒီဗွီဘီကို ပြောပါတယ်။ 

“ဘာကြောင့်ပိတ်တာလဲဆိုတော့ အဲဒီနယ်မှာ နိုင်ငံရေးအခြေအနေမကောင်းလို့ ခဏပိတ်ထားတာ။ တချို့ဟာတွေက အရင်ကတည်းက ပိတ်ထားတာ။ အခု ပိတ်တာက ၂ ဘဏ်ပဲ ပိတ်တာပေါ့နော်။ စစ်ကိုင်းဘက်ကဟာ ပိတ်တာ။ တန့်ဆည်ဘဏ်ရယ်၊ ဇီးကုန်းဘဏ်ရယ်၊ စစ်ကိုင်းဘက်က ဘဏ်တွေ။ မုံရွာတို့ မူဆယ်တို့၊ မန္တလေးဘဏ်ကတော့ အရင်ကတည်းက ပိတ်ထားတာ ၂၀၂၀ တည်းက ပိတ်တာ။” 

ဘာကြောင့် အခုလို ဘဏ်ခွဲတွေကို ပိတ်သိမ်းလိုက်တယ်ဆိုတဲ့ အကြောင်းပြချက်ကိုတော့ ရှယ်ယာရှင်တွေကို အသိပေးထားအကြောင်းကြားခဲ့တာမရှိဘူးလို့ MCB မှာ ရှယ်ယာရှင် ဝင်ထားသူတွေက ပြောပါတယ်။

ရှယ်ယာရှင်တဦးက “ကျနော်တို့ဆီက မနေ့က အကြောင်းကြားစာရောက်တယ်။ ဘဏ်ခွဲငါးခုကို ဖျက်သိမ်းလိုက်ပြီဆိုတာပဲ အသိပေးထားတယ်၊ ဘာကြောင့်ဆိုတာ မသိဘူး။ ဖြစ်နိုင်တာကတော့ ပြီးခဲ့တဲ့ နိုင်ငံရေးအခြေအနေတွေ စဖြစ်ပြီးကတည်းက ဝင်ငွေတွေ အမြတ်ငွေတွေ လျော့ကျလာတော့ ကုန်ကျစရိတ်တွေ လျှော့ချလိုက်တာဖြစ်မယ်”လို့ ပြောပါတယ်။ 

အာဏာသိမ်းပြီးတည်းက ဘဏ်ရဲ့ အမြတ်ဝေစုတွေကို ရှင်ယာရှင်တွေကို ခွဲဝေပေးနိုင်ခြင်း မရှိကြောင်းနဲ့ ကိုဗစ်ရောဂါနဲ့ အာဏာသိမ်းမှု အကျပ်အတည်းကြားမှာ ကုန်ကျစရိတ်တွေ လျှော့ပြီးတော့ ဆက်သွားဖို့ စီစဉ်နေတာဖြစ်နိုင်တယ်လို့လည်း  ပြောပါတယ်။

မြန်မာနိုင်ငံသားများဘဏ် (MCB) ကို ၁၉၉၁ ခုနှစ်မှာ စတင်တည်ထောင်ခဲ့ပြီး ဥက္ကဋ္ဌမှာ ဦးမင်းမင်း ဖြစ်ပါတယ်။ ၂၀၁၆ ခုနှစ် ဩဂုတ်လ ၂၆ ရက်မှာ ရန်ကုန်စတော့အိတ်ချိန်းဝင် အများပိုင်ကုမ္ပဏီတစ်ခု ဖြစ်လာပါတယ်။

၂၀၂၂ ခုနှစ် ဒီဇင်ဘာအထိ ရန်ကုန်တိုင်း၊ ရခိုင်ပြည်နယ်၊ စစ်ကိုင်းတိုင်း၊ ရှမ်းပြည်နယ်၊ မကွေးတိုင်း၊ ဧရာဝတီတိုင်း၊ နေပြည်တော်၊ မန္တလေးတိုင်း ၊မွန်ပြည်နယ်၊ ကချင်ပြည်နယ်၊ ကရင်ပြည်နယ်နဲ့ တနင်္သာရီတိုင်းတို့မှာ  ဘဏ်ခွဲပေါင်း ၄၈ ခုအထိ ဖွင့်လှစ်ခဲ့ပါတယ်။

မြန်မာနိုင်ငံသားများဘဏ် (MCB) ရဲ့ ရှယ်ယာ အများစုကို ပရီမီယာ၊ အာမို၊ Capital Hypermarket ၊ Capital Construction စတဲ့ လုပ်ငန်းတွေ ပိုင်ဆိုင်ထားတဲ့ CDSG လုပ်ငန်းစုက ပိုင်ဆိုင်ထားပါတယ်။

1 month Ago
More News
Up