တနင်္သာရီမြို့နယ်

December 3, 2022

တနင်္သာရီမြို့နယ်တွင် စစ်ကောင်စီယာဉ်တန်း တိုက်ခိုက်ခံရ

တနင်္သာရီတိုင်း တနင်္သာရီမြို့နယ် ပြည်ထောင်စုလမ်းမပေါ်မှာ  မြိတ်ကနေ ဘုတ်ပြင်းဘက်  စစ်ကူ တက်လာတဲ့ စစ်ကောင်စီယာဉ်တန်းကို  KNLA-TCSJF တပ်ဖွဲ့က ဒီဇင်ဘာ ၂ ရက် ညနေမှာ စောင့်ကြိုတိုက်ခိုက်ခဲ့တယ်လို့ KNLA-TCSJFအဖွဲဝင် တဦးက ပြောပါတယ်။

ရေဖြူရွာအလွန် ထုံခါရွာသင်္ချိုင်းနား (ဒေသအခေါ် မပိုက်ချောင်) ပြည်ထောင်စုလမ်းပေါ်မှာ တိုက်ခိုက်ခဲ့လို့ စစ်ကောင်စီတပ်သား ၁၀ ယောက်ထက်မနည်း ထိခိုက်ဒဏ်ရာရခဲ့ပြီး ဒေသခံပြည်သူ့ကာကွယ်ရေးအဖွဲတွေက ထိခိုက်မှု မရှိဘဲ ဆုတ်ခွာနိုင်ခဲ့တယ်လို့ ဆိုပါတယ်။ 

“စစ်ကောင်စီယာဉ်တန်းထဲက ပထမ ၃ စီးကို တိုက်ခိုက်တာ။ ကျန်နှစ်စီး ပြန်လှည့်သွားတယ်။ စစ်ကောင်စီဘက်ကတော့ အထိအခိုက်အကျအဆုံးများတယ်။ ကျနော်တို့ဘက်က အကျအရှုံး မရှိ ဆုတ်ခွာလာနိုင်တယ်။ ”

စစ်ကား ၅ အနက် ၃ စီး ပစ်ခတ်ခံရပြီး ချောင်းလမုဘုန်းကြီးကျောင်းဘက်ကို မောင်းသွားကာ ၂ စီးက နောက်ပြန်လှည့်ပြီး ရေဖြူဘက်ကို ပြန်သွားတယ်လို ဆိုပါတယ်။

တနင်္သာရီဒေသတွင်း ပြည်သူ့ကာကွယ်ရေးတပ်ဖွဲတွေအနေနဲ့လည်း ဒေသတွင်းတိုက်ပွဲတွေ ပြင်းထန်လာနိုင်လို့ ပြည်ထောင်စုလမ်းမကြီးတလျှောက်မှာ ရွာတွေအနေနဲ့ စစ်ကြောင်း ဝင်လာရင် ကျေးရွာထဲမှာ မနေဘဲ ဘေးလွတ်ရာနေဖို့ သတိပေးထားပါတယ်။

4 days Ago

November 1, 2022

တနင်္သာရီမြို့နယ်တွင် စစ်တပ်က လက်နက်ကြီးဖြင့်ပစ်သဖြင့် ဒေသခံ ၂ ဦး ဒဏ်ရာရ

တနင်္သာရီတိုင်း၊ တနင်္သာရီမြို့နယ်ထဲမှာ ဒေသတွင်း ပြည်သူ့ကာကွယ်ရေးတပ်ဖွဲ့တွေနဲ့ စစ်ကောင်စီတပ်ဖွဲ့တွေအကြား အောက်တိုဘာ ၃၁ ရက်က တိုက်ပွဲတွေဖြစ်ပွားခဲ့ပြီး စစ်ကောင်စီဘက်က လက်နက်ကြီးတွေနဲ့ ပစ်ခတ်လို့ ဒေသခံနှစ်ယောက် လက်နက်ကြီး ထိမှန်ခဲ့တယ်လို့ ဒေသခံတွေက ပြောပါတယ်။

တနင်္သာရီမြို့နယ်ထဲက ညောင်ပင်ကွင်းကျေးရွာထဲကို စစ်ကောင်စီရဲ့ ခမရ ၅၆၁ တပ်ရင်းက မနက်အစောပိုင်းတည်းက တိုက်ပွဲဖြစ်ပွားတာမရှိဘဲ လက်နက်ကြီးတွေနဲ့ အဆက်မပြတ် ပစ်ခတ်နေလို့ ကျေးရွာထဲမှာရှိတဲ့ နေအိမ်တချို့ ထိခိုက်ပျက်စီးခဲ့ပြီး အသက် ၁၃ နှစ်အရွယ် အမျိုးသမီးတယောက်နဲ့ အသက် ၃၀ ကျော်အရွယ် အမျိုးသားတယောက်တို့ လက်နက်ကြီး ထိမှန်ပြီး စိုးရိမ်ဒဏ်ရာတွေ ရရှိခဲ့ကြတယ်လို့ ဆိုပါတယ်။

ညောင်ပင်ကွင်းကျေးရွာနဲ့ ၅ မိုင်ဝန်းကျင် အကွာအဝေးမှာရှိတဲ့ ဘန်လောကျေးရွာ လမ်းဆုံဘက်မှာလည်း စစ်ကောင်စီနဲ့ ပြည်သူ့ကာကွယ်ရေး ပူးပေါင်းတပ်ဖွဲ့တွေ တိုက်ပွဲဖြစ်ပွားနေတဲ့အတွက် ဒေသခံတွေ ဘေးလွတ်ရာကို ထွက်ပြေးနေရပါတယ်။

အခုဖြစ်ပွားတဲ့ တိုက်ပွဲတွေအတွင်း စစ်ကောင်စီဘက်က ၄ ယောက်သေဆုံးပြီး ထိခိုက်ဒဏ်ရာရရှိတာတွေ ရှိတယ်လို့ တိုက်ပွဲနဲ့နီးစပ်တဲ့ ပြည်သူ့ကာကွယ်ရေး တပ်ဖွဲ့ဝင်တယောက်က အတည်ပြုပြောဆိုပေမဲ့ တိုက်ပွဲတွေ ဖြစ်ပွားနေဆဲဖြစ်လို့ စစ်ကောင်စီဘက်က သေဆုံးမှုနဲ့ပတ်သက်ပြီး ဒီဗွီဘီအနေနဲ့ သီးခြား အတည်မပြုနိုင်သေးပါဘူး။

အဲဒီလို တိုက်ပွဲတွေဖြစ်ပွားပြီး အောက်တိုဘာ ၃၁ ရက် ညပိုင်းမှာတော့ စစ်ကောင်စီ စစ်ကြောင်းက ဘန်လောကျေးရွာဘက်မှာ နေအိမ်တချို့ကို မီးရှို့ဖျက်ဆီးခဲ့သလို ၆ မိုင်ကျေးရွာထဲက မီးထွန်းထားတဲ့ နေအိမ်တွေထဲကို ဝင်ရောက်ပြီး ဒေသခံတွေကို ရိုက်နှက်နေတယ်လို့ ဒေသခံတွေက ပြောပါတယ်။

ဒေသတွင်း ပြည်သူ့ကာကွယ်ရေးတပ်ဖွဲ့တွေ အနေနဲ့လည်း ဒေသတွင်းတိုက်ပွဲတွေ ဆက်ပြီး ပြင်းထန်လာနိုင်လို့ ပြည်ထောင်စုလမ်းမကြီးတလျှောက်မှာရှိတဲ့ ကျေးရွာတွေအနေနဲ့ စစ်ကောင်စီစစ်ကြောင်းတွေ ဝင်လာရင် ကျေးရွာထဲမှာမနေဘဲ ဘေးလွတ်ရာမှာ နေထိုင်ကြဖို့ သတိပေးထားပါတယ်။

1 month Ago
More News
Up