တင်ပါးဒဏ်ရာ

March 7, 2020

တင်ပါးဒဏ်ရာကြောင့် လီဗာပူး ဂိုးသမား အလီဆင် အနားယူရမည်

တင်ပါးဒဏ်ရာကြောင့် ဂိုးသမား အလီဆင်ဟာ ဘုန်းမောက်အသင်းနဲ့ ပရီးမီးယားလိဂ် ပွဲစဉ်အပြင် အက်သလက်တီကိုမက်ဒရစ်အသင်းနဲ့ ချန်ပီယံလိဂ် ဒုတိယအကျော့ပွဲစဉ်ကိုပါ လွဲချော်တော့မယ်လို့ လီဗာပူးနည်းပြ ယာဂန်ကလော့ပ်က ပြောပါတယ်။  လီဗာပူးအသင်းရဲ့ နံပါတ်တစ် ဂိုးသမား အလီဆင်ဟာ ချဲလ်ဆီးအသင်းနဲ့ အက်ဖ်အေဖလား ပဉ္စအဆင့်ပွဲစဉ်မှာလည်း ပွဲထွက်လူစာရင်းကနေ ချန်လှပ်ခံခဲ့ရသူဖြစ်ပြီး သူ့နေရာမှာ အရန်ဂိုးသမား အက်ဒရီယန်က ဝင်ကစားခဲ့ပါတယ်။  လက်ရှိအချိန်အထိ အလီဆင် ဒဏ်ရာကြောင့် ဘယ်လောက်နားရမလဲဆိုတာကို ရှင်းရှင်းလင်းလင်း မသိရသေးဘဲ သူဟာ နိုင်ငံတကာပွဲစဉ်တွေ ပြီးဆုံးချိန်အထိ အနားယူရနိုင်တယ်လို့ သတင်းတွေမှာ ဖော်ပြထားပါတယ်။ လီဗာပူးအသင်းဟာ ချန်ပီယံလိဂ် ၁၆ သင်း ရှုံးထွက်ပွဲစဉ် ပထမအကျော့မှာ အက်သလက်တီကိုအသင်းကို ၁ ဂိုး ဂိုးမရှိနဲ့ရှုံးနိမ့်ခဲ့ပြီး အလီဆင်ရဲ့ဒဏ်ရာအခြေအနေက ဒုတိယ အကျော့အတွက်ပြင်ဆင်နေတဲ့ လီဗာပူးလ်အသင်းအတွက် ထိုးနှက်ချက်တခု ဖြစ်လာနိုင်စရာရှိနေပါတယ်။  ကလော့က “ကံမကောင်းစွာနဲ့ပဲ ကျနော်တို့ဂိုးသမားက ဒဏ်ရာရရှိခဲ့ပါတယ်။ သူဟာ ချဲလ်ဆီးနဲ့ပွဲမတိုင်ခင် လေ့ကျင့်ရေးအစီစဉ်မှာ မတော်တဆမှုလေးတခုနဲ့ ကြုံတွေ့ခဲ့ရပါတယ်။ ဒဏ်ရာက ကြီးကြီးမားမားမဟုတ်ပေမယ့် သူဟာ ဝင်ကစားဖို့ အဆင်မပြေတာတော့ သေချာခဲ့ပါတယ်‌။ ဒီကိစ္စအပေါ် စွန့်စားလိုခြင်း မရှိတာကြောင့် သူ့ကို ပွဲကစားမယ့် လူစာရင်းကနေ ထုတ်ပယ်လိုက်ပါတယ်။ နောက်တနေ့ ဒဏ်ရာကို စကင်ရိုက်ပြီးတဲ့အချိန်မှာတော့ ကျနော်တို့ တစုံတခုကို ရှာတွေ့ခဲ့ပါတယ်။ ဒဏ်ရာက တင်ပါးမှာရှိတဲ့ ကြွက်သားအသေးလေးတခုမှာ ဖြစ်တာပါ။ ခင်ဗျားတို့အနေနဲ့ ဒီလောက်ဒဏ်ရာလေးနဲ့ဆို အလုပ်ကို လုပ်မြဲအတိုင်း လုပ်နေနိုင်မှာ ဖြစ်ပေမယ့် ပရော်ဖက်ရှင်နယ် ဂိုးသမားတယောက်အတွက်ကတော့ အဲဒီလို မဟုတ်ဘူးပေါ့” လို့ သတင်းထောက်တွေကို ပြောပါတယ်။ အလီဆင်ဟာ နောက်သီတင်းပတ်ထိ အနားယူနေရဦးမှာ ဖြစ်ပြီး အဲဗာတန်အသင်းနဲ့ ဒါ ဘီပွဲစဉ်မှာလည်း ပါဝင်နိုင်ဖို့  မသေချာသေးဘူးလို့ ဆိုပါတယ်။
1 year Ago
Up