တက္ကသိုလ်ဝင်ခွင့်

May 25, 2019

၂၀၁၉ ပညာသင်နှစ် တက္ကသိုလ်ဝင်ခွင့် သီးခြားခေါ်ယူမည့် တက္ကသိုလ်များ ထပ်တိုး

၂၀၁၉ ပညာသင်နှစ်အတွက် တက္ကသိုလ်ဝင်ခွင့်တွေခေါ်ဆိုရာမှာ အရင်နှစ်ကလို လိုအပ်ချက်တွေ မရှိစေဖို့ ပညာရေးဝန်ကြီးဌာနအနေနဲ့ ပြည်သူ့လွှတ်တော်၊ အမျိူးသားလွှတ်တော်တာဝန်ရှိသူတွေနဲ့ ပူးပေါင်းဆောင်ရွက်သွားမယ်လို့ ပါမောက္ခချုပ်များကော်မတီဥက္ကဋ္ဌက ပြောပါတယ်။ ဒီနှစ်တက္ကသိုလ်ဝင်ခွင့် ရွေးချယ်ရေးစနစ်နဲ့ ပတ်သက်ပြီး ပြည်သူအားလုံး သိရှိနားလည်စေဖို့ မီဒီယာတွေကနေတဆင့် သတင်းဖြန့်ဝေတာတွေ၊ စကားဝိုင်းဆွေးနွေးတာတွေ၊ ကာတွန်းတွေရေးဆွဲပြီး လက်ကမ်းစာစောင်တွေ မျှဝေတာတွေနဲ့ တက္ကသိုလ်တွေကလည်း ၀င်ခွင့်စနစ်တွေကို နားလည်ပြီး လာစုံစမ်းသူတွေကို မျှဝေပေးနိင်အောင် လုပ်ဆောင်သွားဖို့ စီစဉ်ထားတယ်လို့ ဆိုပါတယ်။ ၂၀၁၉ ပညာသင်နှစ်အတွက် သီးခြား တက္ကသိုလ်ဝင်ခွင့်တွေကို တက္ကသိုလ် ၁၄ ခုကနေ ခေါ်ယူသွားမှာဖြစ်ပါတယ်။ အခုလို သီးခြားခေါ်ယူရာမှာ အရင်နှစ်ကလို တက္ကသိုလ်တခုချင်းစီအလိုက် တိုက်ရိုက်လျှောက်ထားရမှာမဟုတ်ဘဲ တက္ကသိုလ်ဝင်ခွင့်ရွေးချယ်ရေးအဖွဲ့က ရွေးချယ်တဲ့ လျှောက်လွှာပုံစံတခုတည်းမှာသာ တကြိမ်တည်း လျှောက်ထားရမှာဖြစ်ပါတယ်။ အရင်ပညာသင်နှစ်က တက္ကသိုလ်ဝင်ခွင့်ရွေးချယ်ရေးစနစ်ကို စတင်ပြောင်းလဲပြီး တက္ကသိုလ် ၁၁ ခုကနေ တက္ကသိုလ်ဝင်ခွင့်တွေကို တိုက်ရိုက်ခေါ်ယူခဲ့တာဖြစ်ပါတယ်။ အခုနှစ်မှာ သီးခြားခေါ်ယူဖို့ ထပ်တိုးထားတဲ့ တက္ကသိုလ် ၃ ခုကိုတော့ ၀န်ကြီးဌာနကနေ တရားဝင်ကြေညာပေးသွားမှာ ဖြစ်ပါတယ်။ သတင်း၊ဓာတ်ပုံ-ဆုဆုသွယ်
2 years Ago

January 29, 2019

တက္ကသိုလ်ဝင်ခွင့် ဘာသာရပ်နှင့်တက္ကသိုလ်ကို သင်ယူသူကိုယ်တိုင် ရွေးချယ်ခွင့်ရရေး ဆောင်ရွက်နေ

တက္ကသိုလ်ဝင်ခွင့်ကို အခြေခံပညာအထက်တန်းစာမေးပွဲရမှတ်နဲ့ စိစစ်ဆုံးဖြတ် ရွေးချယ်ခြင်းမဟုတ်ဘဲ တက်ရောက်လိုတဲ့ တက္ကသိုလ်ရဲ့ ပဋိညာဉ်စာတမ်းနှင့်အညီ စိစစ်ရွေးချယ်သည့် စနစ်ထားရှိရေး ပြဋ္ဌာန်းချက်နဲ့အညီ ပြုပြင်ပြောင်းလဲဖို့ ဆောင်ရွက်နေတယ်လို့ ပညာရေး ၀န်ကြီးက ပြောကြားလိုက်ပါတယ်။ မနေ့ကကျင်းပတဲ့ ဒုတိယအကြိမ် ပြည်သူ့လွှတ်တော်အစည်းအဝေးမှာ ကျိုက်မရော မဲဆန္ဒနယ်မှ ဦးစောကျော်ဝင်းမောင်က အခြေခံပညာ ၁၀ တန်းစာမေးပွဲရမှတ်နဲ့ တက္ကသိုလ်ဝင်ခွင့် သတ်မှတ်တာကြောင့် အခြေခံပညာကလေးတွေရဲ့ လက်တွေ့ဘ၀ဖွံ့ဖြိုးမှုကို ထိခိုက်နေတဲ့အပေါ် ပြောင်းလဲဖို့ အစီအစဉ် ရှိ၊ မရှိ မေးမြန်းခဲ့တာပါ။ ပညာရေး ပြည်ထောင်စုဝန်ကြီး ဒေါက်တာမျိုးသိမ်းကြီးက “တက္ကသိုလ်ဝင်ခွင့်နှင့်စပ်လျဉ်း၍ အမျိုးသားပညာရေးဥပဒေ အခန်း (၃) ပုဒ်မ ၄ တွင် တက္ကသိုလ်ဝင်ခွင့်အတွက် သင်ယူလိုသည့် ဘာသာရပ်နှင့်တက္ကသိုလ်ကို သင်ယူသူကိုယ်တိုင် ရွေးချယ် လျှောက်ထားခွင့်ရှိပြီး တက္ကသိုလ်ဝင်ခွင့်ကို အခြေခံပညာအထက်တန်းစာမေးပွဲရမှတ်ဖြင့်သာ စိစစ်ဆုံးဖြတ် ရွေးချယ်ခြင်းမဟုတ်ဘဲ တက်ရောက်လိုသည့် တက္ကသိုလ်၏ ပဋိညာဉ်စာတမ်းနှင့်အညီ စိစစ်ရွေးချယ်သည့် စနစ်ထားရှိရေး ဟုပြဋ္ဌာန်းပြီးဖြစ်သဖြင့် အဆိုပါပြဋ္ဌာန်းချက်နှင့်အညီ ပြုပြင်ပြောင်းလဲနိုင်ရန် စီစဉ်ဆောင်ရွက်လျက်ရှိပါ ကြောင်း။” ပြန်လည်ဖြေကြားခဲ့ပါတယ်။ တက္ကသိုလ်ဝင်ခွင့်ရွေးချယ်ရေးမှုကို လက်ရှိ တက္ကသိုလ်ဝင်ခွင့်စိစစ်ရွေးချယ်ရေးအဖွဲ့က တက္ကသိုလ်ဝင်ခွင့်လမ်းညွှန်နှင့်အညီ တက္ကသိုလ်ဝင်ခွင့်စနစ် ပြုပြင်ပြောင်းလဲမှုအရ အချို့တက္ကသိုလ်တွေက သတ်မှတ်ချက်နဲ့အညီ ဝင်ခွင့်စစ်ဆေးတာ၊ လူတွေ့စစ်ဆေးတာ၊ အချို့အသက်မွေးဝမ်း ကျောင်းတက္ကသိုလ်တွေက ဝေးလံခက်ခဲသော ဒေသတွေအတွက် ကျား/မ အချိုးညီမျှမှုအတွက် Quota စနစ်နဲ့ သတ်မှတ်ရွေးချယ်နေတယ်လို့ ဆိုပါတယ်။ ပညာရေးဝန်ကြီးဌာနအနေနဲ့ ဗြိတိန်နိုင်ငံ Open University နဲ့ ပူးပေါင်းပြီး လုပ်ငန်းခွင် ဝင်ရောက်မှုနှင့် ပိုမိုဆက်နွှယ်ဆက်စပ်မှုရှိတဲ့ ပညာရပ်နယ်ပယ်တွေကို အခြေခံပညာအထက်တန်း အဆင့်အောင်မြင်တဲ့ ကျောင်းသား/သူတွေ သင်ကြားသင်ယူမှုအခွင့်အလမ်း ပိုမိုရရှိရေးအတွက်လည်း ညှိနှိုင်းဆွေးနွေးကြောင်း ၀န်ကြီးက ပြောပါတယ်။ ပညာရေး ပြုပြင်ပြောင်းလဲမှုလုပ်ငန်းတွေအရ အခြေခံပညာကဏ္ဍမှာ ကျောင်းသား/သူများရဲ့ လက်တွေ့ဘဝဖွံ့ဖြိုးမှုအတွက် အလုပ်အကိုင်အခွင့် အလမ်းများ ပိုမိုရရှိရေးနဲ့ တစ်သက်တာ သင်ယူမှုအခွင့်အလမ်းတွေ ပိုမိုရရှိအတွက် ဦးတည်ကြိုးပမ်းပြုပြင်ပြောင်းလဲနေတယ်လို့ ဆိုပါတယ်။
2 years Ago
Up