တက္ကဆက်

June 29, 2022

တက္ကဆက်တွင် ထရပ်ကားအတွင်းပိတ်မိနေသည့် ရွှေ့ပြောင်းနေထိုင်သူ ၅၁ ဦးထက်မနည်းသေဆုံး

အမေရိကန်ပြည်ထောင်စု၊ တက္ကဆက်ပြည်နယ်မှာ စွန့်ပစ်ထားတဲ့ ထွန်စက်နောက်တွဲ ထရပ်ကားအတွင်း ပိတ်မိနေတဲ့ ရွှေ့ပြောင်းနေထိုင်သူ ၅၁‌ ယောက်ထက်မနည်း သေဆုံးခဲ့ကြောင်း အာဏာပိုင်တွေက ပြောပါတယ်။

ဆန်အန်တိုနီယိုမြို့စွန်ရှိ ရထားလမ်းဘေး အပူရှိန်ပြင်းတဲ့ ထရပ်ကားပေါ်က အသက်ရှင် ကျန်ရစ်သူ အများစုကလည်း စိုးရိမ်ရတဲ့ အခြေအနေမှာ ရှိနေကြပြီး ဝေဒနာအမျိုးမျိုး ခံစားနေကြရလို့ ဆေးရုံ ၆ ရုံမှာ ကုသမှုခံယူနေရတယ်လို့ တက္ကဆက်ပြည်နယ် ဆန်အန်တိုနီယိုမြို့ရှိ မက္ကဆီကိုနိုင်ငံရဲ့ မက္ကဆီကန် ကောင်စစ်ဝန်ချုပ် Ruben Minutti က ဇွန် ၂၈ ရက်မှာ ပြောပါတယ်။

အမျိုးသား ၃၉ ယောက်နဲ့ အမျိုးသမီး ၁၂ ယောက် သေဆုံးခဲ့ရတဲ့ လူမှောင်ခိုမှုဖြစ်စဉ်နဲ့ ဆက်စပ်နေတဲ့ မက္ကဆီကိုနိုင်ငံသား ၂ ယောက်ကို အမေရိကန်ပြည်ထောင်စု တရားရုံးမှာ စွဲချက်တင်လိုက်ပါတယ်။

မက္ကဆီကိုနိုင်ငံသား ဟွမ် ဖရန်စစ္စကိုနဲ့ ဟွမ် ကလောက်ဒီယိုတို့ကို အမေရိကန်မှာ တရားမဝင်နေထိုင်ချိန်အတွင်း လက်နက်ကိုင်ဆောင်မှုနဲ့ စွဲချက်တင်ခံထားရကြောင်း တရားရုံးမှတ်တမ်းတွေအရ သိရပါတယ်။

စုံစမ်းစစ်ဆေးသူတွေဟာ သူတို့စောင့်ကြည့်နေတဲ့ ထရပ်ကားကို မှတ်ပုံတင်ထားတဲ့ ဆန်အန်တိုနီယိုလိပ်စာကို ခြေရာခံပြီး သူတို့ ၂ ယောက်ကို နေအိမ်က ထွက်ခွာချိန်မှာ သီးခြားစီ ဖမ်းမိခဲ့ပါတယ်။

ထရပ်ကားကို မောင်းနှင်လာတဲ့ အမေရိကန်နိုင်ငံသားအဖြစ် ဖော်ပြတဲ့ တတိယမြောက် သံသယရှိသူကို ဖမ်းဆီးပြီး တရားစွဲဆိုဖို့ မျှော်လင့်ထားပါတယ်။ ဒါပေမဲ့ သူဟာ ဇွန် ၂၈ ရက်ညက ဆေးရုံမှာ ဆက်ရှိနေခဲ့တယ်လို့ မက္ကဆီကို တာဝန်ရှိသူတဦးက ပြောပါတယ်။

ထရပ်ကားပေါ်ကနေ ထွက်ပြေးလွတ်မြောက်လာသူတဦးက အကူအညီတောင်းလိုက်တဲ့ လမ်းသွားလမ်းလာတဦးရဲ့ အရေးပေါ်ဖုန်းခေါ်ဆိုမှုကနေတဆင့် ထရပ်ကားကို အာဏာပိုင်တွေ အကြောင်းကြားခဲ့တာဖြစ်ကြောင်း တာဝန်ရှိသူတွေက ပြောကြားခဲ့ပါတယ်။

သေဆုံးသူတွေထဲမှာ မက္ကဆီကိုနိုင်ငံသား အနည်းဆုံး ၂၇ ယောက်၊ ဂွါတီမာလန် ၃ ယောက်နဲ့ ဟွန်ဒူးရပ်စ် ၄ ယောက်တို့ ပါဝင်ကြောင်း ၃ နိုင်ငံလုံးမှ တာဝန်ရှိသူတွေရဲ့ ပြောကြားချက်အရ သိရပါတယ်။

အသက်မပြည့်သေးသူ ၄ ယောက် အပါအဝင် အပူဒဏ်နဲ့ ပင်ပန်းနွမ်းနယ်မှုကြောင့် အသက်ရှင်ကျန်ရစ်သူ တဒါဇင်ကျော်ကို ဆေးရုံပို့ဆောင်ခဲ့ပါတယ်။

အဲဒီထရပ်ကားဟာ ရွှေ့ပြောင်းနေထိုင်သူ ၁၀၀ လောက်ကို တင်ဆောင်လာဖွယ်ရှိပေမဲ့ အရေအတွက် အတိအကျ မသိရသေးပါဘူး။

အမေရိကန်သမ္မတ ဂျိုးဘိုင်ဒင်က ဒီအဖြစ်အပျက်ဟာ ကြောက်မက်ဖွယ်ကောင်းပြီး ကြေကွဲဖွယ်ကောင်းတယ်လို့ ပြောပါတယ်။

5 months Ago

May 27, 2022

ကနေဒါနိုင်ငံ စာသင်ကျောင်းတခုအနီး သေနတ်သမားနှင့်ရဲတပ်ဖွဲ့တို့ အပြန်အလှန်ပစ်ခတ်

ကနေဒါနိုင်ငံ တိုရွန်တိုမြို့မှာ မေ ၂၆ ရက် နေ့လယ်ပိုင်းက စာသင်ကျောင်းနားမှာ သေနတ်သမားတယောက်နဲ့ ရဲအဖွဲ့တို့ အပြန်အလှန် ပစ်ခတ်မှုဖြစ်ပြီး သေနတ်သမား သေဆုံးသွားပါတယ်။

ဒီအဖြစ်အပျက်ကြောင့် အနီးနားက စာသင်ကျောင်း ၅ ကျောင်းကို ကြိုတင်ကာကွယ်တဲ့အနေနဲ့ နာရီအတန်ကြာအေင် ပိတ်ထားလိုက်တယ်လို့ မြို့တော် တာဝန်ရှိသူတွေက ပြောပါတယ်။

မူလတန်းကျောင်းအနီး လမ်းမပေါ်မှာ သံသယဖြစ်ဖွယ်ရာ အမျိုးသားတယောက် သေနတ်တကားကားနဲ့ သွားလာနေတာကို အကြောင်းကြားလာတာကြောင့် ရဲအဖွဲ့က သွားရောက်တဲ့အချိန်မှာ သေနတ်သမားဘက်က စတင်ပစ်ခတ်ခဲ့တယ်လို့ တိုရွန်တို ရဲတပ်ဖွဲ့ရဲ့ ရဲမှူးကြီး ဂျိမ်း ရမ်မားက သတင်းစာရှင်းလင်းပွဲမှာ ပြောပါတယ်။

အသေးစိတ်အချက်အလက်တွေကို ဆက်လက် စုံစမ်းနေဆဲဖြစ်ပြီး ထုတ်မပြောနိုင်သေးဘူးလို့ ဆိုပါတယ်။

အခင်းဖြစ်တဲ့နေရာဟာ ကိုဗစ်ကြောင့် ပိတ်ထားရပြီး မကြာခင်ကပဲပြန်ဖွင့်တဲ့ ဝီလီယံ ဒေးဗစ် မူလတန်းကျောင်းအနီးနားမှာ ဖြစ်ပါတယ်။

စစ်ဆေးမှုတွေ လုပ်နေတဲ့အချိန်မှာ အခင်းဖြစ်သွားတဲ့ လမ်းမကို ပိတ်ထားခဲ့တယ်လို့ ရိုက်တာသတင်းက ဆိုပါတယ်။

ရဲမှူးကြီး ရမ်းမားက “အမေရိကားမှာ ဒီလိုဖြစ်ထားတာ ပူပူနွေးနွေးဆိုတော့ အခု အဖြစ်အပျက်ကြောင့် ကျောင်းသားတွေ၊ ကျောင်းသားမိဘတွေ၊ ကျောင်းဝန်ထမ်းတွေ ဘယ်လောက် စိတ်အနာတရ ဖြစ်သွားမလဲဆိုတာကို နားလည်ပါတယ်” လို့ ပြောသွားပါတယ်။

ဒါပေမဲ့ အခြေအနေကို စုံစမ်းဆဲဖြစ်ပြီး အမေရိကားမှာဖြစ်တဲ့ အဖြစ်အပျက်မျိုးပဲလို့ မပြောချင်ဘူးလို့ ဆိုပါတယ်။

အမေရိကန်ပြည်ထောင်စု တက္ကဆက်ပြည်နယ်မှာ မေ ၂၄ ရက်က ဖြစ်သွားတဲ့ ပစ်ခတ်မှုဟာ ဒီနှစ်အတွင်း လူအများကို သေစေတဲ့ ပစ်ခတ်မှု ၂၀၀ ကျော်ထဲက တခုဖြစ်ပါတယ်။

ကနေဒါကတော့ အမေရိကန်ပြည်ထောင်စုနဲ့ နှိုင်းယှဉ်ရင် သေနတ်ကြောင့် လူသေဆုံးမှု နည်းတဲ့ နိုင်ငံတနိုင်ငံ ဖြစ်ပါတယ်။

6 months Ago
More News
Up